MU December 26, 2004, muzuzumo uusika ku 9.1 magnitude iwakacitika wakazungaanya nsumbu ya Simeulue iili kunyika lwaambo kunkomwe ya Sumatra, ku Indonesia. Bantu boonse ibakali kunkomwe bakalanga kulwizi. Maanzi akali kuyaabuceya kapati. Cakufwambaana bantu boonse bakatalika kutijila kumalundu, kaboompolola kuti “Smong! Smong!” ibbala lyaamba kuti guwo pati lyamumaanzi mumwaambo wabo. Mumaminiti aali 30 buyo, mayuwe aajisi nguzu akaboola canguzu kunkomwe, akunyonyoona maanda.

Nsumbu ya Simeulue mbobwakali busena bwakusanguna ibwakajatikizigwa aguwo pati lyamumaanzi. Nokuba boobo, akati kabantu bakkala nkuko ibali 78,000, kwakafwa buyo bali ciloba. Nkaambo nzi ncokwakafwa buyo bantu basyoonto? * Bantu bakkala ansumbu eeyi baamba kuti: ‘Ikuti guwo pati lyaboola akuti maanzi mulwizi aboneka kuti ayaabuceya, amutijile kumalundu, nkaambo cakufwambaana maanzi alaboola canguzu kunkomwe.’ Kuzwa kuli ceeci cakacitika, bantu bakkala kunsumbu ya Simeulue bakaiya ciiyo cakuzyiba guwo lyamulwizi mboliboola. Kubikkila maano kukucenjezya kwakabafwutula.

Bbaibbele lilaamba mapenzi aaboola, “mapenzi mapati aatanacitikide kuzwa kumatalikilo aanyika kusikila sunu, alimwi kunyina naayooba limbi pe.” (Matayo 24:21) Pele eeci tacaambi mamanino aanyika iine kwiigama akaambo kazintu zibyaabi nzyobacita bantu kulinjiyo, naa akaambo kazintu zibyaabi zilicitikila. Nkaambo Leza uyanda kuti nyika kailiko lyoonse. (Mukambausi 1:4) Muciindi caboobo, mapenzi aaboola ninzila Leza njayoobelesya ‘kunyonyoona baabo banyonyoona nyika.’ Ayooba ngamamanino aabubi boonse akupenga. (Ciyubunuzyo 11:18; Tusimpi 2:22) Eelo kaka buumi buyoobota!

Kuyungizya waawo, kwiindana amaguwo mapati aamumaanzi, mizuzumo yanyika, kwaanduka kwazilundu zizwa mulilo, lunyonyooko luboola talukanyonyooni bantu batajisi mulandu. Bbaibbele lyaamba kuti, “Leza nduyando” alimwi Leza uujisi zina lyakuti Jehova utusyomezya kuti, “Balulami bayookona nyika, bayookala alinjiyo lyoonse.” (1 Johane 4:8; Intembauzyo 37:29) Aboobo, ino mbuti mbomukozya kufwutuka mapenzi mapati akuyootambula zileleko nzyomwakasyomezyegwa? Bwiinguzi mbwakuti: Nkubikkila maano kukucenjezya!

Tatukonzyi kubuzyiba buzuba bwini-bwini bwamamanino aabweende bwazintu oobu bubyaabi, nkaambo Jesu wakati: “Kujatikizya buzuba oobo alimwi aciindi kunyina uuzyi pe, nobaba bangelo kujulu naba Mwana, pele buyo Taata alikke.” Nokuba boobo, Jesu wakatukulwaizya kuti “amulangile.” (Matayo 24:36; 25:13) Kulangila nzi? Bbaibbele lilatwaambila zitondezyo ziyoocitika munyika Leza katanaleta mamanino. Mbubwenya mbuli zintu zyakacitika ku Simeulue mbozyakabacenjezya bantu bakkala  nkuko kujatikizya kuboola kwaguwo pati lyamumaanzi, azyalo zintu zicitika munyika zitondezya kuti mamanino alafwaafwi. Kabbokesi katondezya zintu zimwi zicitika izyaambwa mu Bbaibbele.

Masimpe, zimwi akati kazintu izili mukabbokesi zyakacitika kale. Pele Jesu wakati twaakubona kazicitika “zintu zyoonse eezyi,” tuyoozyiba kuti mamanino aali aafwaafwi. (Matayo 24:33) Amulibuzye kuti, ‘Ndilili mumakani aakaindi aawo zintu zyoonse zyaambidwe (1) nozyakacitika munyika yoonse, (2) nozyakacitika aciindi comwe, alimwi (3) anozyakabija cakuzwa munzila?’ Masimpe aayo ngamazuba ngotupona.

Umwi iwakali muleli waku U.S. wakaamba kuti, “Kucenjezya . . . kulafwutula bantu.” Kweelana aguwo pati lyamumaanzi lyakacitika mu 2004, bantu bakajatikizyidwe bakacenjezyegwa kutegwa bakakwabililwe kuti naa caakucitika kumbele. Mbubwenya buyo, Leza wakapa malailile aakucenjezya mamanino kaatanasika. Bbaibbele lyakaamba kuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”—Matayo 24:14.

Mumwaka wainda, Bakamboni ba Jehova bakabeleka mawoola aayinda ku 1.9 bbiliyoni kukambauka makani mabotu mumanyika aali 240 mumyaambo iinda ku 700. Kuyaambele kwamulimo ooyu mbumboni bwakuti mamanino alaafwaafwi. Akaambo kaluyando ndobajisi kuli basimukobonyina, Bakamboni ba Jehova balabeleka canguzu kucenjezya bantu kujatikizya buzuba bwalubeta bwa Leza kuti bwaswena afwaafwi. (Matayo 22:39) Akaambo kakuti mulakonzya kugwasyigwa amakani aaya, mbumboni bwakuti Jehova ulamuyanda. Amuyeeye kuti, “[Leza] tayandi kuti muntu uuli woonse anyonyoonwe, pele uyanda kuti boonse bakonzye kweempwa.” (2 Petro 3:9) Sena muyoolutambula luyando lwa Leza akubikkila maano kukucenjezya?

Amuyeeye kuti bantu bakkala muminzi yakunkomwe ya Simeulue bakatijila kumalundu kutegwa bakwabililwe ciindi maanzi naakali kuyaabuceya; tiibakalindila kuti mane maanzi ajokele alimwi. Kubweza ntaamu cakufwambaana cakali kwaamba lufwutuko. Kutegwa mukafwutuke kumapenzi aboola, andinywe mweelede kutijila kumalundu, naa ooko nkomukonzya kufwutukila, kacitanamana ciindi. Ino inga mwacita buti oobo? Musinsimi Isaya wakasololelwa amuuya kuti alembe kujatikizya kutambwa kuyakucitika “kumamanino aamazuba,” ciindi calo ncotupona lino. Lyaamba kuti: “Amuboole, atweende tutante cilundu ca Jehova . . . Walo uyootuyiisya nzila zyakwe, eelyo tuyakweenda munzila zyakwe.”—Isaya 2:2, 3.

Kuunka atala aamulundu kumupa coolwe cakubona zintu alimwi abusena bwamatijilo. Mbubwenya buyo, kuzyiba nzila zya Leza kwiinda mukwiiya Bbaibbele kulabagwasya bantu banji nyika yoonse mazuba aano kutegwa babweze ntaamu zikonzya kubagwasya mubuumi. (2 Timoteyo 3:16, 17) Kwiinda mukucita boobo, balatalika ‘kweenda munzila zya [Leza]’ akukkomaninwa anguwe alimwi akukwabililwa.

Sena inga mwakutambula kutamba ooko alimwi akunjila mulukwabililo lwaluyando lwa Leza mumazuba aakatazya? Tumukulwaizya kulingula bumboni bwamu Magwalo butondezya kuti tuli “kumazuba aamamanino” ibuli mukabbokesi kali mucibalo eeci. Bakamboni ba Jehova bali mucilawo canu bayookkomana kumupa lugwasyo ndomuyandika kutegwa mwaamvwisye magwalo aapedwe alimwi ambomukonzya kwaabelesya. Naa kujana bwiinguzi kumibuzyo yanu kwiinda mukuswaya webbusaiti yesu ya www.pr418.com/toi. Amulange aalembedwe kuti NJIISYO ZYAMU BBAIBBELE > MIBUZYO YAMU BBAIBBELE YAINGULWA.