HI December 26, 2004, ku tsekatseka ka misava ka mpimo wa 9,1 ku tsekatsekise xihlala xa Simeulue, lexi nga en’walungu vupeladyambu bya Sumatra, le Indonesia. Vanhu hinkwavo a va langute eribuweni ra lwandle. Mati lama nga elwandle ma sungule ku vohla ma tlhelela endzhaku hi ku hatlisa. Hi xitshuketa vanhu hinkwavo va sungule ku tsutsumela eswitsungeni va ri karhi va huwelela va ku, “Smong! Smong!” leswi vulaka tsunami hi ririmi ra kwalaho. Ku nga si hela timinete ta 30, ku humelele magandlati ya matimba ivi ma ba ribuwa ma tlhela ma onhetela makaya ni miti ya kwalaho.

Xihlala xa Simeulue i xo sungula eka swihlala swa kwalaho lexi hlaseriweke hi tsunami leyi chavisaka. Kambe, eka vaaki va 78 000 ku lo fa ntsena va nkombo. Ha yini ku fe vatsongo swinene? * Marito lama tolovelekeke eka lava tshamaka exihlaleni xexo hi lama nge: ‘Loko ku va ni ku tsekatseka lokukulu ka misava naswona lwandle ri sungula ku vohla, tsutsumelani eswitsungeni hikuva mati ya lwandle ma ta ta eribuweni hi ku hatlisa.’ Hi ku ya hi ntokoto lowu va nga na wona, vanhu va le Simeulue va dyondze ku vona loko tsunami yi ta sungula hi ku xiya ku cinca ka lwandle. Ku yingisa xitsundzuxo ka ha ri emahlweni swi ponise vutomi bya vona.

Bibele yi vulavula hi ku ta ka khombo, ku nga “nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona ku fikela sweswi, e-e, naswona a wu nge he tlheli wu va kona.” (Matewu 24:21) Kambe a hi ku herisiwa ka pulanete ya Misava hi swiendlo swa vanhu swo pfumala vutihlamuleri kumbe mhangu ya ntumbuluko leyi chavisaka hikuva xikongomelo xa Xikwembu hileswaku misava yi tshama hilaha ku nga heriki. (Eklesiasta 1:4) Ku ri na sweswo, nhlomulo lowu taka i goza leri Xikwembu xi nga ta ri teka ku “lovisa lava onhaka misava.” Ku ta va ku ri ku herisiwa ka vuhomboloki hinkwabyo ni ku xaniseka. (Nhlavutelo 11:18; Swivuriso 2:22) Hakunene ku ta va ku ri nkateko lowukulu!

Ku engetela kwalaho, ku hambana ni leswi endliwaka hi titsunami, ku tsekatseka ka misava kumbe ku buluka ka vholkheno, ndzoviso lowu taka a wu nge endli leswaku ku fa vanhu lava nga riki na nandzu. Bibele yi ri: “Xikwembu i rirhandzu” naswona Xikwembu lexi vito ra xona ku nga Yehovha, xi tshembisa leswaku “lavo lulama va ta dya ndzhaka ya misava, va ta tshama eka yona hi masiku.” (1 Yohane 4:8; Pisalema 37:29) Hambiswiritano, xana u nga swi kotisa ku yini ku pona nhlomulo lowukulu ni ku tiphina hi mikateko leyi tshembisiweke? U nga pfuna hi ku yingisa xitsundzuxo ka ha ri emahlweni!

A hi nge swi koti ku tiva siku leri vuhomboloki ni ku xaniseka ku nga ta endleka ha rona hikuva Yesu u te: “Malunghana ni siku ra kona ni nkarhi wa kona a ku na munhu la swi tivaka, hambi ku ri tintsumi ta le matilweni hambi ku ri N’wana, kambe swi tiviwa hi Tatana ntsena.” Nilokoswiritano, Yesu u hi khutaze leswaku hi ‘tshama hi rindzile.’ (Matewu 24:36; 25:13) Ha yini? Bibele yi hi nyika nhlamuselo ya swiyimo swa misava leswi nga ta va kona Xikwembu xi nga si tisa makumu. Hilaha ku  cinca ka lwandle a ku lemukisa vaaki va le xihlaleni xa Simeulue hi ku ta ka tsunami, ku cinca ka swiyimo loku hlamarisaka laha misaveni i xikombiso xa leswaku makumu ma le kusuhi. Bokisi leri nga laha leri fambisanaka ni xihloko lexi ri hlamusela ku cinca kun’wana loku hlamarisaka loku Bibele yi vulavulaka hakona.

Entiyisweni, swin’wana swa swiendlekalo leswi hlamuseriweke eka bokisi leri swi endlekile enkarhini lowu hundzeke hi mpimo wo karhi. Kambe Yesu u vule leswaku loko hi vona “swilo leswi hinkwaswo,” a hi ta swi tiva leswaku makumu ma le kusuhi. (Matewu 24:33) Tivutise, ‘Hi rini ematin’wini laha swilo leswi hinkwaswo leswi hlamuseriweke (1) swi humeleleke emisaveni hinkwayo, (2) swi humeleleke hi nkarhi wun’we swi tlhela (3) swi nyanya ku biha?’ Swi le rivaleni leswaku hi hanya enkarhini wolowo.

Khale ka presidente ya le United States u te: “Switsundzuxo leswi taka ka ha ri emahlweni . . . swi ponisa vutomi.” Endzhaku ka loko ku ve ni tsunami leyi veke kona hi 2004, ku vekiwe mfungho lowu a wu ta tsundzuxa vanhu exifundzheni lexi hlaseriweke hi tsunami, hi xikongomelo xo sivela leswaku ku nga fi vanhu vo tala enkarhini lowu taka. Hilaha ku fanaka, Xikwembu xi endle lunghiselelo ro hi nyika xitsundzuxo ka ha ri emahlweni, makumu ma nga si fika. Bibele yi profete yi ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”​—Matewu 24:14.

N’wexemu ntsena, Timbhoni ta Yehovha ti hete tiawara leti tlulaka 1,9  wa tibiliyoni ti ri karhi ti chumayela mahungu lamanene ematikweni ya 240 hi tindzimi leti tlulaka 700. Nhluvuko lowu endliwaka manguva lawa i xikombiso lexikulu xa leswaku makumu ma tshinele. Hi ku susumetiwa hi ku rhandza vaakelani va tona, Timbhoni ta Yehovha ti tirhisa nkarhi wa tona ku lemukisa vanhu van’wana hi siku ra Xikwembu ra vuavanyisi leri tshinelaka hi ku hatlisa. (Matewu 22:39) Leswi na wena  u nga vuyeriwaka eka rungula leri, sweswo i vumbhoni bya leswaku Yehovha wa ku rhandza. Tsundzuka, “a nga naveli leswaku ku lova ni un’we kambe u navela leswaku hinkwenu mi hundzuka.” (2 Petro 3:9) Xana u ta amukela rirhandzu ra Xikwembu ivi u yingisa xitsundzuxo ka ha ri ni nkarhi?

Tsundzuka leswaku vaaki va le ribuweni ra xihlala xa Simeulue va tsutsumele eswitsungeni leswaku va hlayiseka hi nkarhi lowu va voneke mati ya lwandle ma vohla; a va ma yimelanga ma tlhelela eribuweni. Leswaku va pona a swi titshege hi ku va teka goza hi xihatla. Leswaku u pona nhlomulo lowukulu lowu taka, na wena u fanele u teka goza leri nga ta ponisa vutomi bya wena ka ha ri ni nkarhi. Njhani? Muprofeta Esaya u huhuteriwe ku tsala hi xirhambo lexi hetisekaka “exiphen’wini xo hetelela xa masiku,” ku nga nkarhi lowu hi hanyaka eka wona sweswi. Xi ri: “Tanani, a hi tlhandlukeleni entshaveni ya Yehovha . . . U ta hi letela tindlela ta yena, hi ta famba emintileni ya yena.”​—Esaya 2:2, 3.

Ku ya ehenhla ka ntshava swi ku pfuna leswaku u kota ku vona swilo hinkwaswo ni ku va endhawini leyi hlayisekeke. Hilaha ku fanaka, ku tiva tindlela ta Xikwembu hi ku hlaya Bibele swi pfuna vanhu va timiliyoni emisaveni hinkwayo namuntlha leswaku va cinca vutomi bya vona. (2 Timotiya 3:16, 17) Hi ku endla tano, va sungula ku “famba emintileni ya [Xikwembu]” va tlhela va tiphina hi tintswalo ta xona ni hi nsirhelelo wa xona.

Xana u nga amukela xirhambo lexi ni nsirhelelo wa Xikwembu wa rirhandzu emasikwini lama nonon’hwaka? Hi ku khutaza leswaku u kambisisa hi vukheta vumbhoni lebyi nga eMatsalweni malunghana ni ‘masiku yo hetelela’ eka bokisi leri fambisanaka ni xihloko lexi. Timbhoni ta Yehovha ta le ndhawini ya ka n’wina ti nga swi tsakela ku ku pfuna leswaku u twisisa matsalwa ni ndlela leyi u nga ma tirhisaka ha yona. Kumbe u nga kuma tinhlamulo ta swivutiso swa wena hi ku nghena eka website ya hina ya www.pr418.com/ts. Languta ehansi ka TIDYONDZO TA BIBELE > SWIVUTISO LESWI HLAMURIWAKA HI BIBELE.