LI TA 26 yuʼun disiembre ta 2004, echʼ jun nikel ti 9.1 stsatsale, la slilin komel li lum joyol ta nab ti Simeulue sbie, ti te xkom ta snoroesteal Sumatra (Indonesia). Li buchʼutik te oyik ta tiʼ nabe laj yilik ti lik ochuk batel ta yut nab li voʼe. Ta anil noʼox muyik batel ta vits li krixchanoetike, xi tsots lik avanikuke «Smong! Smong!» jaʼ skʼan xal «tsunami». Kʼalal mu toʼox sta 30 minutoe la stsak tal tsots yip yok li nabe, vaʼun la sjines naetik xchiʼuk bikʼtal lumetik.

Li tsunamie, jaʼ baʼyel la slajes li kʼusitik oy li ta jun lum joyol ta nab ta Simeulue. Li ta 78 mil krixchanoetik ti te nakalik li ta lum joyol ta nabe, vukub noʼox chamik. ¿Kʼu yuʼun ti jayvoʼ noʼox chamike? * Jun loʼil ti xojtikinik li buchʼutik nakalik ta bikʼtal lumetike xi chale: «Mi oy nikel xchiʼuk mi avil ti chnamaj batel yok li nabe, jatavan muyel ta vits yuʼun tsots xa me chchaʼsut tal li yok nabe». Li jnaklejetik ta Simeulue, la xchanbeik smoltotakik sventa snaʼik kʼu yelan tspas nab kʼalal mi chtal junuk tsunamie. Ta skoj ti la xchʼunik li pʼijubtasele kuxul komik.

Li Vivliae, chal ti oy kʼusi chkʼot ta pasel ta spʼejel Balumile, ti chnopaj xa tal «mukʼta tsatsal vokolil ti muʼyuk bu jech kʼotem-o ta pasel kʼalal lik tal li balumil kʼalal to avie, muʼyuk, mi jaʼuk chtal yan velta xtok» (Mateo 24:21). Maʼuk skʼan xal ti chichʼ lajesel li balumil ta skoj li kʼusi toj chopol tspas li krixchanoetike o li yan kʼusitik stalelik onoʼox chkʼotanuk ta pasele, yuʼun li kʼusi oy ta yoʼonton li Diose, jaʼ ti te oyuk-o li Balumile (Eclesiastés 1:4). Yuʼun li Diose ‹chakʼbe slajeb li buchʼutik yakal tsokesik li balumile›. Jaʼ te chlaj-o skʼoplal li kʼusitik chopole xchiʼuk li vokoliletike (Apokalipsis 11:18; Proverbios 2:22). ¡Jaʼ jun mukʼta muyubajel!

Li ta tsatsal vokolil ti chnopaj xa tale, mu xkoʼolaj xchiʼuk li tsunamietik, volkanetik xchiʼuk li tsatsal nikeletik echʼemike, yuʼun muʼyuk bu chcham li lekil krixchanoetike. Li Vivliae chal ti «jaʼ kʼanelal li Diose» xchiʼuk yaloj ta melel xtok ti «bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o» (1 Juan 4:8; Salmo 37:29). Sventa kuxul xakom li ta mukʼta tsatsal vokolile xchiʼuk ti xakʼupin li kʼusitik yaloj chakʼ Diose ¿kʼusi van skʼan xapas? Skʼan xachʼun li pʼijubtaseletike.

Mu xuʼ xkaltik lek kʼusi ora chlaj li choplejal xchiʼuk li vokolile, yuʼun xi laj yal li Jesuse: «Ta sventa li skʼakʼalil xchiʼuk yorail taje muʼyuk buchʼu snaʼ, mi jaʼuk li anjeletik ta vinajele mi jaʼuk li Nichʼonile, jaʼ noʼox snaʼ stuk li Totile». Jaʼ yuʼun li Jesuse la stij koʼontontik ti skʼan vikʼiluk li jsatike (Mateo 24:36; 25:13). Pe ¿kʼu yuʼun ti skʼan vikʼiluk jsatike? Li Vivlia yaloj xa onoʼox kʼu yelan li krixchanoetik kʼalal skʼan to xakʼbe slajebal li kʼusitik ta balumil li Diose. Kʼalal laj yakʼik venta ti oy kʼusi jel li ta nab li jnaklejetik ta Simeulue jaʼ jech la snaʼik ti chtal jun tsunamie, li avie eke, jaʼ jech ta anil noʼox chjel li kʼusitik chkʼot ta pasel ta spʼejel li Balumile ti jaʼ chakʼ jnaʼtik  ti nopol xa skʼan xlaj li kʼusitik ta balumile xchiʼuk ti skʼan vikʼiluk jsatike. Li ta rekuadro liʼe, te chakʼ ta ilel ti oy kʼusitik yakal chjel talele, taje jaʼ li kʼusi xa onoʼox yalojbe skʼoplal li Vivliae.

Melel onoʼox ti jech kʼotemik ta pasel li ta voʼnee, akʼo mi jelajtik yorail xchiʼuk ti oy noʼox spajeb li kʼusitik kʼotanuk ta pasele. Akʼo mi jech, li Jesuse laj yal ti mi kiltik «skotol li kʼusitik taje» jech ta jnaʼtik ti nopol xa li slajeb kʼusitike (Mateo 24:33). Jakʼbo aba kʼu yelan kʼotemik talel ta pasel li kʼusi laj yal Jesus liʼe, 1) mi kʼotem ta pasel ta spʼejel Balumil, 2) mi jmoj kʼotemik ta pasel xchiʼuk 3) mi mas xa sokem tajek li balumile. Ta melel yakal chkiltik chkʼotanuk ta pasel taje.

Xi laj yal jun vinik ti jaʼ toʼox presidente ta Estados Unidose: «Kʼalal ta yorail noʼox chbakʼ li alarmae [...] xuʼ kuxul xijkom yuʼun». Sventa mu xa epuk xchamik krixchanoetike laj yichʼ akʼel alarmaetik kʼalal echʼ xa ox li tsunami ta 2004. Li Dios eke yakʼoj alarma xkaltik sventa tspʼijubtasutik kʼalal skʼan to xtal li slajeb kʼusitike. Xi chalbutik ta melel li Vivliae: «Jech xtok, li lekil aʼyejetik ta sventa li Ajvalilal liʼe ta xichʼ cholel ta spʼejel balumil sventa xaʼi skotol li jteklumetike, vaʼun ta xtal li slajebe» (Mateo 24:14).

Jaʼ noʼox kalbetik skʼoplal li echʼ jabile, li stestigotak Jeovae la xcholik mantal ta 240 lumetik xchiʼuk mas ta 700 jeltos kʼopetik, taje jaʼ skʼan xal ti mas ta 1.900 miyon ora la xcholik mantale. Li abtelal chichʼ pasel ta spʼejel Balumile, jaʼ sprevail ti nopol xa oyutik ta slajebal kʼusitike. Ta skoj ti skʼanojik li xchiʼilike, li stestigotak Jeovae tspasik persa sventa spʼijubtasik yantik ta sventa ti ta anil xa chtal li chapanel chakʼ Diose (Mateo 22:39). Ta skoj ti yakal chakʼel li mantal liʼe, jaʼ chakʼ ta ilel ti skʼanojot li Jeovae. Vuleso ta ajol ti Diose «mu skʼan ti oy buchʼu xbat ta lajelal junuke; moʼoj, li kʼusi tskʼane jaʼ ti xasutes avoʼonton akotolike» (2 Pedro  3:9). Li voʼote, ¿mi ta van xavakʼ ta mukʼ li pʼijubtasel chakʼ Dios ta skoj ti kʼanvanem tajeke?

Li buchʼutik te nakajtik li ta stiʼiltak nab ta Simeulue, jatavik batel ta tayal vitsetik yoʼ kuxul xkomik kʼalal laj yilik ti lik ochuk batel ta yut nab li voʼe, muʼyuk la smalaik ti sut tale. Ta skoj ti ta anil noʼox lokʼik batele jaʼ kolik-o. Jaʼ jech ek, yoʼ to oy yoraile skʼan xajatav batel ta junuk toyol vits xkaltik sventa kuxul xa kom. Li j-alkʼop Isaiase akʼbat snaʼ yuʼun Dios jun takel ta ikʼel ti chtun kuʼuntik avi li «ta slajebtic batel cʼacʼale». Li takel ta ikʼele, xi chale: «Laʼic, muycutic batel ta vits yuʼun li Mucʼul Diose; [...] yuʼun jaʼ te chijyacʼbutic quiltic li beetic yuʼune, jech chlic xanovcutic ta bicʼtal be yuʼun» (Isaías 2:2, 3).

Kʼalal chijmuyutik ta junuk vitse lek xkiltik li kʼusi chkʼot ta pasele xchiʼuk jaʼ mu kʼusi jnuptantik-o te. Jaʼ jech, ta skoj li yojtikinel sbetak Dios ti te oy ta Vivliae, jaʼ chkoltaatik-o epal miyon krixchanoetik ta spʼejel Balumil sventa slekubtas li xkuxlejalike (2 Timoteo 3:16, 17). Taje jaʼ chakʼ ti xanavik batel li «ta bicʼtal be yuʼun[e]», jaʼ xkaltik, li ta sbetak Diose, ti skʼupinik ti chchabiatike xchiʼuk ti lekuk x-ilatike.

¿Mi ta van xachʼam li takel ta ikʼel xchiʼuk li chabiel chakʼ Dios li avi ti chkil jvokoltike? Avokoluk chano li rekuadro ti yichʼoj tal li mantal liʼe, ti bu chalbe skʼoplal ti kuxulutik «ta slajebal xa kʼakʼale» (2 Timoteo 3:1). Li stestigotak Jeova ti chcholik mantal bu nakalote, ta sjunul yoʼonton tskoltaoxuk sventa xavaʼibe smelolal xchiʼuk ti xavakʼ ta akuxlejal li kʼusi chal Vivliae. Xuʼ van chakʼan chakʼel kʼuxi tstakʼbot sjakʼobiltak avuʼun mi la och li ta jpajinakutik ta Internet ta jw.org. Akʼbo klik ta «ENSEÑANZAS BÍBLICAS», ta tsʼakale ta «PREGUNTAS SOBRE LA BIBLIA».