NGA ḽa 26 December 2004, ho vha na mudzinginyo muhulwane vhukuma ngei Simeulue hune ha vha tshiṱangadzimeni tsha phendelashango ya devhula-vhukovhela ha Sumatra kha ḽa Indonesia. Vhathu vhoṱhe vho vha vho sedza khunzi-khunzi ya lwanzhe. Magabelo o vha a tshi khou humela murahu. Nga u ṱavhanya, vhathu vhoṱhe vho thoma u shavhela thavhani vha tshi vhidzelela vha tshi ri, “Smong! Smong!” ipfi ḽa henefho ḽine ḽa amba uri tsunami. Hu sa athu u fhela mimunithi ya 30, ho vha na magabelo mahulu, e a tshinyadza miḓi minzhi na mivhundu.

Tshiṱangadzime tsha Simeulue tsho vha tsha u thoma u tshinyadzwa nga yeneyo tsunami. Ho fa vhathu vha sumbe kha vhadzulapo vha 78 000. Ndi ngani ho fa vha si gathi? * Vhadzulapo vha tshiṱangadzime vha anzela u amba uri: ‘Arali ha vha na mudzinginyo nahone magabelo a humela murahu, ni shavhele dzithavhani ngauri ni ḓo kumbiwa nga magabelo.’ U ya nga zwe vha zwi tshenzhela tshifhingani tsho fhiraho, musi hu tshi vha na tshanduko lwanzheni, vhathu vha Simeulue vho vha vha tshi vho kona u ḓivha uri hu ḓo vha na tsunami. U thetshelesa tsevho hu tshee nga phanḓa zwo tshidza vhutshilo havho.

Bivhili i amba nga ha khombo ine ya khou ḓa ine ya vha “maṱungu mahulu a sa athu vhuya a vha hone u bva tshee shango ḽa sikwa u swika zwino, nahone ha tsha ḓo dovha a vha hone.” (Mateo 24:21) Fhedzi zwenezwi a si u fheliswa ha Ḽifhasi hune ha itwa nga vhathu vha si na vhuḓifhinduleli kana khombo ya mupo—ngauri ndivho ya Mudzimu ndi ya uri ḽifhasi ḽi dzule ḽi hone lwa tshoṱhe. (Muhuweleli 1:4) Nṱhani hazwo, maṱungu ane a khou ḓa ndi nḓila ya Mudzimu ya “u lozwa vha tshinyadzaho ḽifhasi.” Hu ḓo vha hu vhufhelo ha vhuvhi na tshengelo. (Nzumbululo 11:18; Mirero 2:22) Yeneyi i ḓo vha phaṱhutshedzo khulwane lungafhani!

Zwiṅwe hafhu, maṱungu ane a khou ḓa ha nga vhulahi vhathu vha si na mulandu u fana na tsunami, midzinginyo kana thavhandubi. Bivhili i ri: “Mudzimu ndi lufuno.” Nahone Mudzimu ane dzina ḽawe ḽa vha Yehova u fulufhedzisa uri, “vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.” (1 Yohane 4:8; Psalme ya 37:29) Nga zwenezwo, ni nga ponyoka hani maṱungu mahulu nahone na ḓiphina nga phaṱhutshedzo dzo fulufhedziswaho? Zwa ndeme ndi u thetshelesa tsevho hu tshee nga phanḓa!

Ri nga si kone u ḓivha ḓuvha ḽo teaho ḽa vhufhelo ha vhuvhi hoṱhe na tshengelo, ngauri Yesu o ri: “A hu na ane a ḓivha nga ha ḽeneḽo ḓuvha kana tshifhinga, na vharuṅwa vha ṱaḓulu na Murwa a vha ḽi ḓivhi, ḽi ḓivhiwa nga Khotsi fhedzi.” Naho zwo ralo, Yesu o ri ṱuṱuwedza uri ri ‘dzule ro fhaṱuwa.’ (Mateo 24:36; 25:13) Ndi ngani? Bivhili i ri vhudza nga ha vhuimo ha shango vhune ha ḓo vha hone musi Mudzimu a sa athu u ḓisa vhufhelo. Samusi vhadzulapo vha Simeulue vho vhona zwine zwa sumbedza uri tsunami i khou ḓa, na tshanduko khulwane dzine dza khou itea shangoni dzi  ri sumbedza uri vhufhelo vhu tsini. Bogisi ḽi tshimbidzanaho na yeneyi thero ḽi sumbedza dziṅwe dza tshanduko khulwane dzine Bivhili ya amba nga hadzo.

Vhukuma, zwiṅwe zwa zwenezwi zwiitea kana vhuimo zwo no itea tshifhingani tsho fhiraho. Fhedzi Yesu o amba uri musi ri tshi vhona “zwenezwi zwithu zwoṱhe,” ri ḓo ḓivha uri vhufhelo vhu tsini. (Mateo 24:33) Ḓivhudziseni uri, ‘Ndi lini he zwenezwi zwithu zwoṱhe zwo ṱaluswaho kha ḓivhazwakale (1) zwa itea shangoni ḽoṱhe, (2) zwa itea nga tshifhinga tshithihi nahone (3) zwa ṋaṋa u vhifha?’ Vhukuma, ri khou tshila kha tshenetsho tshifhinga.

Muṅwe we a vha e muphuresidennde wa Amerika o amba uri: “U sevha hu tshee nga phanḓa . . . zwi tshidza vhutshilo.” Musi ho no vha na tsunami nga 2004, ho vhewa tsevho kha honoho vhupo u itela u iledza zwi fanaho tshifhingani tshi ḓaho. Zwi fanaho na zwenezwo, Mudzimu o dzula o ita ndugiselelo ya u sevha vhufhelo vhu sa athu u ḓa. Bivhili yo dzula yo amba uri: “Mafhungo maḓifha aya a Muvhuso a ḓo ḓivhadzwa ḽifhasini ḽoṱhe uri zwi vhe vhuṱanzi kha tshaka dzoṱhe, nga murahu ndi hone vhufhelo vhu tshi ḓo ḓa.”—Mateo 24:14.

Mahoḽa, Ṱhanzi dza Yehova dzo fhedza awara dzi fhiraho bilioni dza 1,9 dzi tshi khou huwelela mafhungo maḓifha mashangoni a 240 na nga nyambo dzi fhiraho 700. Dzenedzi tshanduko dza zwenezwino dzi ṋea vhuṱanzi ha uri ri khou tshila maḓuvhani a vhufhelo. Nga nṱhani ha u funa vhaṅwe vhathu, Ṱhanzi dza Yehova vha fhedza tshifhinga vha tshi sevha vhathu nga ha ḓuvha ḽa khaṱulo ya Mudzimu ḽine ḽa khou ḓa nga u ṱavhanya. (Mateo 22:39) Mbuno ya uri ni ḓo vhuyelwa nga enea mafhungo ndi vhuṱanzi ha uri Yehova u a ni funa. Humbulani uri, “[Mudzimu] ha ṱoḓi muthu naho e ufhio a tshi lozwiwa, fhedzi u tama vhoṱhe vha tshi rembuluwa.” (2 Petro 3:9) Naa ni ḓo vhona  nḓila ine Mudzimu a ni funa ngayo na u thetshelesa tsevho hu tshee nga phanḓa?

Humbulani uri vhadzulapo vha phendelashango ya ngei Simeulue vho shavhela dzithavhani u itela u ḓitsireledza musi vha tshi vhona tshanduko dzine dza khou itea lwanzheni. U dzhia havho vhukando zwo tshidza vhutshilo havho. U itela u ponyoka maṱungu mahulu, na inwi ni fanela u dzhia vhukando vhune ha ḓo tsireledza vhutshilo haṋu ni sa athu u lenga. Nga nḓila-ḓe? Muporofita Yesaya o hevhedzwa u ṅwala nga ha u ramba hune ha khou itwa na ṋamusi nga tshino tshifhinga tsha ‘vhufhelo ha maḓuvha,’ tshifhinga tshine ra khou tshila khatsho ṋamusi. Eneo maipfi a u ramba a ri: ‘Nḓarieni ri gonye thavha ya nnḓu ya Yehova, a ri funze nḓila dzawe, uri ri tshimbile kha gondo ḽawe!’—Yesaya 2:2, 3.

U gonya thavha zwi ḓo ita uri ri kone u vhona zwine zwa khou itea na u vha fhethu ho tsireledzeaho. Nga nḓila i fanaho, u ḓivha nḓila dza Mudzimu ri tshi shumisa Bivhili zwi thusa vhathu vhanzhi shangoni ḽoṱhe ṋamusi uri vha ite tshanduko dzine dza ḓo vhuyedza vhutshilo havho. (2 Timotheo 3:16, 17) Nga u ita nga u ralo, vha thoma u tshimbila “kha gondo” ḽa Mudzimu na u takalelwa ngae na tsireledzo yawe.

Naa ni ḓo ṱanganedza honoho u rambiwa na u tenda u tsireledzwa nga Mudzimu kha ano maḓuvha a konḓaho? Ri ni ṱuṱuwedza uri ni vhale nga vhuronwane vhuṱanzi vhu bvaho Maṅwaloni a “maḓuvhani a vhufhelo” vhu re kha bogisi ḽi tshimbidzanaho na yeneyi thero. Ṱhanzi dza Yehova dza hune na dzula hone dzi ḓo takalela u ni ṋea thuso ine na nga i ṱoḓa u itea u pfesesa zwavhuḓi maṅwalo na nḓila ine na nga a shumisa ngayo. Kana ni nga wana phindulo dza mbudziso dzaṋu nga u dalela website yashu ya www.pr418.com. Sedzani kha tshiṱoho BIBLE TEACHINGS > BIBLE QUESTIONS ANSWERED.