HAN Disyembre 26, 2004, ginbay-og hin 9.1 magnitude nga linog an Simeulue, usa nga isla hirani ha norte-weste nga baybayon han Sumatra, Indonesia. Ha kadagmitan, an tanan nga nakadto ha baybayon kumita ha dagat. Diri normal nga umatras an tubig. Nandadlagan dayon an ngatanan tipakadto ha mga bungtod samtang naguliat, “Smong! Smong!” an ira termino para ha tsunami. Ha sulod hin 30 minutos, pinusak an dagku nga balud ha baybayon, nga nagguba han kadam-an han mga balay ngan mga baryo.

An isla han Simeulue an siyahan nga naigo hito nga tsunami. Pero ha 78,000 nga residente, 7 la an namatay. Kay ano nga pito la? * An mga residente didto may puplunganon: ‘Kon may makusog nga linog ngan umatras an dagat, dalagan ngadto ha mga bungtod kay magkakaada dagku nga balud.’ Tungod han ira eksperyensya, maaram an mga taga-Simeulue ha pagkilala kon may tiabot nga tsunami pinaagi han pagbag-o ha dagat. An pagpamati ha pahamangno nagtalwas ha ira.

An Biblia naghihisgot mahitungod han tiarabot nga kalamidad, usa nga “daku nga kasakitan nga waray pa mahitabo tikang ha tinikangan han kalibotan tubtob yana, ngan diri na gud mahitatabo utro.” (Mateo 24:21) Pero diri ini an kataposan han planeta nga Tuna tungod han waray pagpaid nga mga buhat han tawo o tungod han makusog nga natural nga kalamidad—kay katuyoan han Dios nga magpabilin an tuna ha kadayonan. (Eklesiastes 1:4) Lugod, papahinaboon ito han Dios basi ‘bungkagon an mga nagbubungkag han tuna.’ Ito an magigin kataposan han karaotan ngan pag-antos. (Pahayag 11:18; Proberbios 2:22) Daku gud ito nga bendisyon!

Dugang pa, diri sugad ha tsunami, linog, o pagbuto hin bulkan, waray inosente an mamamatay hito nga kabungkagan. “An Dios gugma,” siring han Biblia, ngan an Dios, nga an ngaran Jehova, nagsasaad nga “an mga magtadong makakapanunod han tuna, ngan maukoy hira dida hin waray kataposan.” (1 Juan 4:8; Salmo 37:29) Kondi paonan-o ka makakatalwas ha daku nga kasakitan ngan makakapahimulos ha iya saad? An yawi amo an pagpamati ha pahamangno!

Diri naton mahibabaroan an eksakto nga petsa han kataposan han karaotan ngan pag-antos kay hi Jesus nagsiring: “Mahitungod hito nga adlaw ngan oras waray maaram, bisan an mga anghel ha langit o an Anak, kondi an Amay la.” Bisan pa hito, gin-aghat kita ni Jesus nga ‘padayon nga magbantay.’ (Mateo 24:36; 25:13) Ha ano? Ginhuhulagway han Biblia an magigin kahimtang han kalibotan antes pahinaboon han Dios an kataposan. Sugad la nga an tigda nga pag-atras han dagat nagpahamangno ha mga taga-Simeulue han tiarabot nga tsunami, an dagku nga pagbag-o ha kalibotan nagpapahamangno liwat ha aton nga hirani na an kataposan. Ginhihisgotan ha  kahon an pipira han dagku nga pagbag-o nga gin-uunabi han Biblia.

Oo, an pipira han mga panhitabo o kahimtang nga nakalista ha kahon nahitabo ha naglabay. Pero hi Jesus nagsiring nga kon makita na naton “ini ngatanan nga butang,” makakasiguro kita nga hirani na gud an kataposan. (Mateo 24:33) Pakianhi an imo kalugaringon, ‘Kakan-o ha kasaysayan nga ini ngatanan nga butang (1) nahitabo ha bug-os nga kalibotan, (2) durungan nga nahitabo, ngan (3) nagtikaraot pa gud?’ Matin-aw, nagkikinabuhi na kita hito nga panahon.

“An mga early warning system . . . nagtatalwas han kinabuhi,” siring han usa nga presidente hadto han Estados Unidos. Katapos hiton tsunami han 2004, nag-instalar hin warning system ha apektado nga mga rehiyon basi malikyan nga may mamatay ha sugad nga mga kalamidad. Ha pariho nga paagi, naghahatag an Dios hin pahamangno antes umabot an kataposan. An Biblia nagtagna: “Inin maopay nga sumat han Ginhadian isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan sunod hito an kataposan maabot.”—Mateo 24:14.

Ha naglabay la nga tuig, naggahin an mga Saksi ni Jehova hin sobra 1.9 ka bilyon nga oras ha pagsangyaw ha 240 nga nasud ngan ha sobra 700 nga yinaknan. Marig-on ini nga pamatuod nga hirani na an kataposan. Tungod han ira gugma ha ira igkasi-tawo, ginhihimo nira an tanan ha pagpahamangno ha iba mahitungod han tiarabot nga adlaw han paghukom han Dios. (Mateo 22:39) An imo pagpahimulos hini nga impormasyon ebidensya han gugma ni Jehova ha imo. Hinumdumi nga “diri niya karuyag nga mabungkag an bisan hin-o, lugod karuyag niya nga magbasol an ngatanan.” (2 Pedro 3:9) Magios ka ba uyon  ha gugma han Dios ngan mamamati han iya pahamangno?

Han makita han mga taga-Simeulue an pag-atras han dagat, pumalagiw dayon hira ha higtaas nga lugar basi matalwas; waray na hira maghulat nga bumalik ito. An ira paggios dayon nagtalwas ha ira. Basi matalwas ha tiarabot nga kasakitan, kinahanglan mo liwat kumadto ha mas higtaas nga lugar, siring pa, samtang may panahon pa. Paonan-o? Ginsugo han Dios hi propeta Isaias nga igsurat an makapaaghat nga imbitasyon nga iginpapaabot durante han “urhi nga mga adlaw,” an panahon diin kita nabubuhi: “Tana kamo, ngan sagka kita ngadto ha bukid ni Jehova, . . . hiya magtututdo ha aton han iya mga dalan, ngan kita maglalakat ha iya mga agianan.”—Isaias 2:2, 3.

Kon kumadto ka ha bukid, makikita mo an panhitabo ha ubos ngan magigin talwas ka. Ha pariho nga paagi, an pag-aram ha pamaagi han Dios pinaagi han Biblia nabulig ha minilyon nga tawo yana ha bug-os nga kalibotan ha paghimo hin pagbag-o ha ira kinabuhi. (2 Timoteo 3:16, 17) Ha pagbuhat hito, natitikangan nira an ‘paglakat ha mga agianan’ han Dios ngan nakakakarawat han iya pag-uyon ngan proteksyon.

Kakarawaton mo ba ito nga imbitasyon han Dios basi makapahimulos han iya mahigugmaon nga proteksyon hinin peligroso gud nga mga panahon? Gin-aaghat ka namon nga usisahon hin maopay an mga ebidensya han Kasuratan nga aanhi na kita ha “kataposan nga mga adlaw,” nga makikita ha kahon hini nga artikulo. An mga Saksi ni Jehova ha iyo lugar malilipay ha pagbulig ha imo basi magkaada ka matin-aw nga pagsabot ha mga teksto nga gin-uunabi ngan kon paonan-o ito iaaplikar. O mahimo mo hibaroan an mga baton han imo mga pakiana pinaagi han amon website nga www.pr418.com/war.