PA December 26, 2004, pacilumba cine cakolanjikwa Simeulue cacili kumpoto kwa cilambo ca Indonesia patendekwe cisicinya cakogoya mnope. Ŵandu paŵayiweni kuti mesi ga m’nyasa gatandite kuwoneka mpela gakupwa, ŵatandite kutilila kumatumbi acigumilaga kuti, “Smong! Smong!” gopolela kuti cisicinya ca m’nyasa. Mkanigamale maminisi 30, matumbela gamacili gatyocele m’nyasamo ni kwika kumkuli ni konanga yindu soni majumba gamajinji.

Cilumba ca Simeulue caliji candanda konanjikwa ni cisicinya cakogoyaci. Nambo pa ŵandu 78,000 ŵaŵatamaga pacilumbapo, ŵandu 7 ni ŵaŵawile ni cisicinyaco. Ligongo cici ŵandu ŵakuŵalanjikape ni ŵaŵawile? * Ŵandu ŵa pacilumbapo akusati naga mesi ga m’nyasa gatandite kuwoneka mpela gakupwa ni kuti cikutendekwe cisicinya cekulungwa ni akusasosekwa kutilila kumatumbi ligongo ndaŵi jilijose mesigo mpaka gayice mwamacili ni konanga yindu. M’yoyo, kupikanila yikalamusyo kwakamucisye ŵandu pacilumbaci kulupusya umi wawo.

Baibulo jikusasalasoni ya cindu cakogoya mnope cacikwika pacangakaŵapa. Cindu cakwe cili “yisawusyo yekulungwa yanganiyitendekweje kutandila pandanda pacilambo capasi mpaka apanopano, soni ngasiyitendekwasoni.” (Matayo 24:21) Nambotu yeleyi ngayikugopolela kumala kwa cilambo capasici ligongo lya yitendo ya ŵandu kapena ngosi syacipago. Tukaliŵalila kuti cakulinga ca Mlungu cili cakuti cilamboci ciŵepo kwangamala. (Mlaliki 1:4) Nambo Mlungu caciyikasya yisawusyo yekulungwa pakusaka “konanga ŵandu ŵakonanga cilambo capasi.” Pandaŵiji yakusakala soni kulaga kosope yicimala. (Ciunukuko 11:18; Miyambo 2:22) Kusala yisyene, kumala kwa yindu yeleyi kuciŵa majali gekulungwa.

Konjecesya pelepa, mwakulekangana ni ngosi syacipago mpela yisicinya, conasiko cacikwisaco ngasicijonanga ŵandu ŵambone. Baibulo jikusati, “Mlungu ali cinonyelo.” Soni Mlungu jwele lina lyakwe lili Yehofa ŵatulagucisye kuti “ŵakulungama cacipocela cilambo capasi. Ni cacitamaga mwelemo kwandaŵi josope.” (1 Yohane 4:8; Salimo 37:29) Nambo ana mpaka tutende cici kuti citukulupuce pa yisawusyo yekulungwa ni kusangalala ni majali gaŵatulagucisye Mlunguga? Cakusosekwa mnope cili kupikanila yikalamusyo.

Pangali mundu jwakumanyilila lisiku lisyesyene lyele kusakala soni kulaga kucimala. Yesu ŵatite, “Pakwamba ya lisikulyo ni ndaŵi jakwe, pangali jwakumanyilila, atamose malayika gakwinani kapenasoni Mwanace nambo Atati jika.” Nambope ŵatulimbikasisye kuti ‘tuŵeje mesope.’ (Matayo 24:36; 25:13) Ana tukusosekwa kuŵa mesope payindu yapi? Baibulo jikusatusalila mwayiciŵela yindu pacilambopa Mlungu mkanatyosye yakusakala yosope. Ŵandu ŵa pacilumba ca Simeulue ŵala ŵayimanyi kuti cikutendekwe  cisicinya pakulola mwagajendelaga mesi. Mwakulandana ni yeleyo, mwayikwendela yindu pacilambopa moŵa agano yikulosya kuti mbesi jiŵandicile. Libokosi lyakuti “Yayikutendekwa M’cilamboci Yayikulosya Kuti Mbesi Jiŵandicile” likulosya yine mwa yindu yajasasile Baibulo kuti yicitendekwa.

Kusala yisyene, yine mwa yindu yayisasile m’libokosiyi yiŵele yili mkutendekwa. Nambo Yesu ŵatite patuciyiwona ‘yindu yosopeyi,’ citumanyilile kuti mbesi jisigele panandi kwika. (Matayo 24:33) M’yoyo, akusosekwa kuliwusya kuti, ‘Ana yindu yosopeyi pakwete payitendekwe (1) pacilambo cosope, (2) pandaŵi jakulandana, soni (3) ana yikusakalilasakalilape?’ Yindu yeleyi yikulosya kuti tukutama m’moŵa gambesi.

Pulesidenti jwakala jwa cilambo ca United States ŵatite, “Yindu yakalamusya yikusakulupusya umi wa ŵandu.” Cisicinya ca m’nyasa cacatendekwe mu 2004 cila cili cimasile, maboma gaŵisile yida yakwakalamusya ŵandu m’malo mwamwatendekwe cisicinyaco kuti ŵandu ŵane akawasoni ni cisicinya msogolo. Mwakulandana ni yeleyi, Mlungu akwakalamusya ŵandu mbesi mkanijiyice. Baibulo jasasile kuti, “Ngani syambonesi syakwamba ya Ucimwene wa Mlungu tisicilalicidwa pacilambo cosope capasi, kuti ŵandu ŵamitundu josope asipikane, kaneko mbesi ni tijiciyika.”—Matayo 24:14.

Caka cimasileci, Ŵamboni sya Yehofa ŵamalile maawala gakwana 1.9 biliyoni ali mkulalicila ngani syambone m’yilambo yakwana 240, m’yiŵeceto yakupunda 700. Kulalicikwa kwa ngani syamboneku uli umboni wakwanila wakulosya kuti mbesi jisigele panandi kwika. Ligongo lyakuti Ŵamboni sya Yehofa akusiŵanonyela ŵandu, akukamula mwamtawu masengo gakwakalamusya ŵanduwo kuti lisiku lyakulamula lya Mlungu lisigele panandi kwika. (Matayo 22:39) Yehofa alosisye kuti akusiŵanonyela wawojo kupitila m’masengo gakusatenda Ŵamboni. “[Mlungu] ngakusaka kuti jwine jwalijose cajonajikwe, nambo akusaka  kuti ŵandu wosope apitikuce mtima.” (2 Petulo 3:9) Ana calosye kuti akuyamicila cinonyelo ca Mlunguci mwakupikanila yikalamusyo yakwe?

Ana akukumbucila yaŵatesile ŵandu ŵa pacilumba ca Simeulue ŵala paŵayiweni kuti mesi gakuwoneka kuti gakupwa? Jemanjajo nganacelewa nambo ŵatilile kumatumbi. Yeleyi yakamucisye kuti akulupusye umi wawo. M’yoyosoni, kuti cakulupuce pa yisawusyo yayikwisayo, akusosekwa kutililasoni kumatumbi kapena kuti kumalo gaciteteyo ndaŵi mkanijimale. Ana mpaka atende catuli yeleyi? Jwakulocesya Yesaya ŵalembile ya cindu cine catukusosekwa kutenda ‘m’moŵa gambesi’ gano. Jwalakwe ŵalembile kuti, “Yikani jemanja, kwende tujawule ku litumbi lya Yehofa . . . Jwalakwe cacitujiganya matala gakwe nipo tucijenda m’matala gakwe.”—Yesaya 2:2, 3.

Kuŵa pacanya pa litumbi kukusakamucisya kuti uloleje yindu yejinji soni gali malo gaciteteyo. Mwakulandanamo, kumanyilila matala ga Mlungu kupitila m’Baibulo kukamucisya ŵandu ŵajinji pacilambo cosope kucenga umi wawo. (2 Timoteo 3:16, 17) Kutenda yeleyi, kukusakamucisya kuti atande ‘kwenda m’matala’ ga Mlungu ni kusangalalaga ni cinonyelo soni citeteyo cakwe.

Ana wawojo catende yindu mwakamulana ni yaŵalembile Yesayayi, ni kuŵa m’malo gaciteteyo ga Mlungu m’moŵa gakusawusya gano? Tukwalimbikasya kuti alole maumboni ga m’Malemba gakulosya kuti tukutama ‘m’moŵa gambesi’ gagakusimanikwa m’libokosi lyakuti, “Yayikutendekwa M’cilamboci Yayikulosya Kuti Mbesi Jiŵandicile.” Ŵamboni sya Yehofa cacisangalala kwakamucisya kuti apikanicisye malemba gagali m’libokosilyo soni kulola mwampaka agakamulicisye masengo paumi wawo. Soni mpaka apate kwanga kwa yiwusyo yawo pa webusayiti jetu ja www.pr418.com/ny. Ajawule palembile kuti ZIMENE BAIBULO LIMAPHUNZITSA > KUYANKHA MAFUNSO A M’BAIBULO.