TU KʼIINIL 26 tiʼ diciembre tiʼ 2004, jach chich tu tíituba le luʼum tu islail Simeulueoʼ; u chichil úuchik u tíitkubaeʼ 9.1. Le islaoʼ tiaʼan tu xaman-chikʼinil Sumatraeʼ (Indonesia). Le máaxoʼob yaan jáal kʼáaʼnáaboʼ tu yiloʼob táan u náachtal le jaʼoʼ. Tu séebaʼanil jóokʼ u yáalkaboʼob, ka joʼopʼ u yawtikoʼob: «Smong! Smong!», u kʼáat u yaʼaleʼ tsunami, wa nukuch olas. Mix 30 minutos máanakeʼ, jeʼel túun ku taal le nukuch olasoʼ. Tu kʼaskúuntaj óoliʼ tuláakal le najoʼob yéetel le mejen kaajoʼob yaan naatsʼ tiʼ le kʼáaʼnáaboʼ.

U islail Simeulueʼ letiʼe yáax kaaj tuʼux tu jatsʼuba le nuxiʼ tsunamioʼ. Kex beyoʼ tiʼ le 78,000 kajaʼanoʼob teʼeloʼ chéen 7 u túulal kíimi. ¿Bix túun úuchik leloʼ? * Teʼ islaoʼ suuk u yaʼalaʼal: «Wa ku tíitkuba tuláakal baʼal yéetel ku náachtal le kʼáaʼnáaboʼ, áalkabnen teʼ puʼukoʼoboʼ tumen jeʼel u suut le jaʼ ta wóokʼoloʼ». U kajnáaliloʼob Simeulueʼ tu kanoʼob tiʼ u úuchben láakʼtsiloʼob bix jeʼel u yojéeltikoʼob táan u taal junpʼéel tsunami chéen yoʼolal bix yanil le kʼáaʼnáaboʼ. Úuchik u yuʼubikoʼob tʼaaneʼ tu salvartubaʼob.

Le Bibliaoʼ ku yaʼalikeʼ taʼaytak u yúuchul «junpʼéel nojoch muʼyajil mix juntéen ilaʼak desde ka káaj yóokʼol kaab tak bejlaʼeʼ, yéetel mix bikʼin kun kaʼa ilbil» (Mateo 24:21). Baʼaleʼ maʼ táan k-tʼaan tiʼ u xuʼulsaʼal yóokʼol kaab yoʼolal bix kʼaasil u meyaj tiʼ wíinik wa yoʼolal uláakʼ baʼaloʼobiʼ, tumen Dioseʼ tu beetaj yóokʼol kaab utiaʼal ka yanak mantatsʼ (Eclesiastés 1:4). Baʼaxeʼ táan k-tʼaan tiʼ le nojoch muʼyajil kun antal ken «xuʼuls[aʼak] tiʼ le máaxoʼob táan u kʼaskúuntikoʼob le Luʼumoʼ». Bey ken u xuʼulsil Dios le kʼasaʼanil yéetel le muʼyajiloʼ (Apocalipsis 11:18; Proverbios 2:22). ¡Bukaʼaj maʼalobil ken béeychajak leloʼ!

Ken u taas Dios le nojoch muʼyajilaʼ maʼ tun kíimil inocenteʼob jeʼex u yúuchul teʼ tsunamiʼoboʼ, ken u tíituba le luʼumoʼ wa ken wáakʼak junpʼéel volcán. Le Bibliaoʼ ku yaʼalikeʼ Jéeoba «Dioseʼ yaabilaj», le oʼolal u beetmaj le promesaaʼ: «Le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul[iʼ]» (1 Juan 4:8; Salmo 37:29). ¿Baʼax túun kʼaʼabéet k-beetik utiaʼal k-salvartikba yéetel k-ilik le jatsʼuts baʼaloʼob ken u beet Diosoʼ? Kʼaʼabéet k-uʼuyik tʼaan.

Maʼ k-ojel jach baʼax kʼiin u xuʼulsaʼal tiʼ le kʼasaʼanil yéetel muʼyajiloʼ, tumen Jesuseʼ tu yaʼalaj: «U kʼiinil yéetel u yoraileʼ, mix máak u yojel, mix le angeloʼob yanoʼob teʼ kaʼanoʼ, mix le Paaloʼ, chéen le Taataoʼ». Le oʼolal tu yaʼalaj xan toʼon: «Maʼ a weenleʼex» (Mateo 24:36; 25:13). Le Bibliaoʼ ku yaʼalik bix kun ilbil le yóokʼol kaab le jach taʼaytak u taal le xuʼulsajoʼ. Jeʼex u kajnáaliloʼob Simeulue tu tsʼáajoʼob cuenta nukaʼaj taal le tsunami le ka tu yiloʼob  bix yanil le kʼáaʼnáaboʼ, toʼon xaneʼ tsʼoʼok k-tsʼáaik cuenta naatsʼ yanil le xuʼulsajoʼ tumen táan k-ilik bix yanil le yóokʼol kaabaʼ. ¿Bey baʼaxoʼob ku yaʼalik le Biblia kun ilbiloʼ? Ilawil baʼax ku yaʼalik le cuadro yaan teʼ xookaʼ.

U jaajileʼ jujunpʼéel tiʼ le baʼaloʼob ku yaʼalaʼal teʼ cuadrooʼ tsʼoʼok u yáax ilaʼaloʼob desde úuchjeakil. Baʼaleʼ Jesuseʼ tu yaʼaleʼ yaan k-ojéeltik naatsʼ yanil u xuul ken k-il u yúuchul «tuláakal le baʼaloʼobaʼ», maʼ chéen jujunpʼéeliʼ (Mateo 24:33, Le Tumben Nuptʼan). Tukult lelaʼ: «Tuláakal le baʼaxoʼob u yaʼalmaj Jesusoʼ, ¿baʼax kʼiin ka káaj u yilaʼal 1) u yúuchul tiʼ tuláakal yóokʼol kaab, 2) u yúuchul tiʼ junpʼéeliliʼ súutukil, yéetel 3) u bin u maas kʼastal jeʼex mix juntéen ilaʼakeʼ?». Jeʼex a wilkoʼ bejlaʼeʼ kuxaʼanoʼon tu tsʼook kʼiinoʼob.

«Le alarmaoʼ [...] jeʼel u salvartik máakeʼ», bey tu yaʼalil juntúul u presidenteil kaʼach Estados Unidos. Ka tsʼoʼok u máan le tsunami tu añoil 2004, tsʼaʼab alarmaʼob jejeláas tuʼuxoʼob utiaʼal ka páajchajak u salvarkuba máak wa ku taal uláakʼ tsunami. Dios xaneʼ tsʼoʼok u tsʼáaik «alarmaʼob» utiaʼal u yeʼesik tsʼoʼok u náatsʼal u kʼiinil le xuʼulsajoʼ. Le Bibliaoʼ u yaʼalmaj: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, ken tsʼoʼokkeʼ letiʼ túun ken taalak u xuul» (Mateo 24:14).

Chéen teʼ año máanikoʼ, u j-jaajkunajoʼob Jéeobaeʼ tu kʼaʼaytoʼob u tʼaan Dios 1,900 horaʼob tiʼ 240 luʼumoʼob ich maas tiʼ 700 idiomaʼob. Lelaʼ ku yeʼesikeʼ jach tu jaajil taʼaytak u taal le xuʼulsajoʼ. U j-jaajkunajoʼob Jéeobaeʼ, tumen u yaabiltmoʼob u yéet máakiloʼobeʼ, jach u tsʼaamaj u yóol u yaʼaltiʼob tsʼoʼok u náatsʼal u kʼiinil u beetaʼal justicia tumen  Dios (Mateo 22:39). Como tak teech tsʼoʼok a wojéeltik lelaʼ, u kʼáat u yaʼaleʼ Jéeoba Dioseʼ u yaabiltmech. Kʼaʼajaktecheʼ Jéeobaeʼ «maʼ u kʼáat ka xuʼulsaʼak tiʼ mix máakiʼ, baʼaxeʼ u kʼáat ka u kʼex u tuukul tuláakal máak» (2 Pedro 3:9). Techeʼ ¿yaan wa túun a wuʼuyik u tʼaan Dios?

Kʼaʼajaktecheʼ u kajnáaliloʼob Simeulueeʼ: tu séebaʼanil binoʼob teʼ puʼukoʼob utiaʼal u salvarkubaʼob le ka tu yiloʼob tsʼoʼok u náachtal le kʼáaʼnáaboʼ, maʼ tu páaʼtoʼob u kaʼa suutiʼ. Úuchik u beetkoʼob beyaʼ tu salvartubaʼob. Jeʼel u páajtal k-aʼalikeʼ utiaʼal a salvarkabaeʼ kʼaʼabéet xan a séeb bin tiʼ junpʼéel puʼuk, wa wits. ¿Baʼax u kʼáat u yaʼal lelaʼ? Profeta Isaíaseʼ tu yaʼalaj: «Koʼoteneʼex, naʼakakoʼon tu wits Yuumtsil, [...] ka u yeʼestoʼon u beeloʼob utiaʼal ka k-xíimbalte» (Isaías 2:2, 3).

Ken naʼakakech tiʼ junpʼéel witseʼ ku páajtal a wilik maas yaʼab baʼaloʼob yéetel maʼ saajkech búululiʼ. Bey túun xanoʼ u millonesil máakoʼobeʼ táan u kankoʼob teʼ Biblia bix jeʼel u biskoʼob junpʼéel kuxtal maas maʼalob tu táan Dioseʼ (2 Timoteo 3:16, 17). Beyoʼ ku xíimbaloʼob tiʼ «u beeloʼob» Dios, ku pʼáatloʼob maʼalobil tu táan yéetel ku kanáantaʼaloʼob.

Techeʼ ¿yaan wa a beetik baʼax ku yaʼalik Dios utiaʼal ka u kanáantech teʼ kʼiinoʼob jach talamtakaʼ? Beet uts a xokik le tekstoʼob yaan teʼ cuadro tuʼux ku chíikpajal le baʼaxoʼob aʼalaʼan u yúuchul teʼ tu «tsʼook kʼiinoʼob[aʼ]» (2 Timoteo 3:1). U j-jaajkunajoʼob Jéeoba yanoʼob ta kaajaloʼ yéetel kiʼimak óolal ken u yáantechoʼob a maas naʼat le tekstoʼob tsʼíibtaʼanoʼoboʼ yéetel yaan u tsolikoʼobtech bix jeʼel a tsʼáaik ichil a kuxtaleʼ. Jeʼel u páajtal xan a wokol teʼ www.pr418.com/yua utiaʼal a wojéeltik u maasiloʼ.