ROGO gu garã nangia 2004 rogo Banduru ti rameru 26, bakere bazigizo amangi (bakio omehe adu nga 9.1-magnitude) rogo gu kisanga nga Simeulue du bangbanda nodiyo na dioyo nga ga gu bakere kisanga nga Sumatra du Indonesia yo. Aboro dunduko aru pangba ime kaa ngera kina ku rogo gu baime re. Ime aguari pangbaha yo kaa ga kina ku beberehe yo. Wakina ikpirogumba, aboro ki tona ka zubo kuri agangara yo kini tangbayo nga “Smong! Smong!” du nga rimo bakere sungburosungburo baime rogo fugoyo yo. Vuru aminiti yo 30, bakere sungburosungburo ime aye ki fu ku rii ngbiiyo, ki gbarasi badungu akporo na agbaria.

Gu bambata ba gu kere sungburosungburo ime re amangi rogoho nga gu kisanga nga Simeulue. Kina aboro 7 nakpi dagba agu aboro 78,000 naaraka rogo gu kisanga re. Tipagine kina bete aboro akpi ti ni? * Gu sanza dungu aboro gu kisanga re naagumbaha dedede nga: ‘Ka kere bazigizo mangi na baime ki tona ka ga ni giihe, mo oro ku rii gangara yo, bambiko si aimanga te gu ime re ki karaga tihe ki fu kurii ngbiiyo.’ Mbiko gupai naamangi aboro Simeulue re, i ima wirika wai ka ino singia sungburosungburo ime ima mbeda ho i abi ariapai ni ti baime. I abatasi raka yo mbiko i adegetuyo kuti gu zahe naaye mbata fu regbo.

Ziazia Kekeapai nafura tipa gu gberãngo nambeda nga gu “bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.” (Matayo 24:21) Ono anga si nga pa gbarasa kpotosende mbiko gu gbegberẽ mangaapai nga ga aboro te, watadu anga si nga gu kere gbegberẽpai nika manga mbiko ome zegino a te, mbiko ga Mbori ringbisapai nga kpotosende nyeanye kindi. (Batungusipai 1:4) Kuba gure, gu bakere gberãngbi naye re nga ga Mbori mangapai tipa ka “gbarasa agu yo nagbarasa kpotosende.” Si nika ngia digido gbegberẽ apai na arungo dunduko. (Yugoti 11:18; Asanza 2:22) Nairiwo gu maku nika ngiaha re!

Kurigure, gu bakere gberãngbi naye re adunga wa sungburosungburo ime, abazigizo gbiati zaragazaraga fofoi-ime-mbia nga gu naimo aboro-wenesa te. Ziazia Kekeapai naya, “Mbori nga nyemuse” na Mbori du rimoko nga Yekova kidohe nga “ruru aboro adía kumbo ringara, ki nye anye kindi.” (1 Yoane 4:8; Atambuahe 37:29) Ono tie, wai du rengbe mo ka bata be gu bakere gberãngbi re na ki gbia ngbarago ti agu amaku i nakido paha re? Banguapai sa nga: Mo degeturo kuti gu zahe naye mbata fu regbo!

Ani arengbanga ka ino gu uru nzunzu gbegberẽ apai na arungo nika digo ti ni te, mbiko Yesu aya: “Ono boro aina nga gu uru na gu saa wa sa te re, amaraika ngbangbaturũ a te, Wiri a te, ono kina Ba.” Wa vura duhe wo, Yesu afu angarasahe nga “oni ngere” angera. (Matayo 24:36; 25:13) Ono tipa gine? Ziazia Kekeapai  naringbisapa wai furani apai nika du rogo zegino mbata fu Mbori ye na digido. Kina wai pa ga hihii ime ni gihe ayugu gupai fu aboro Simeulue nga bakere sungburosungburo ime nambeda, si adu a nga wai apai nikaa ariatihe rogo zegino nika yugoho furani nga digido zegino ima mbeda. Gi sanduki re nayugo gu iiriwo aˈariapai Ziazia Kekeapai nafura tipaha.

Nirengo, bete kura agu apai du rogo gu sanduki re ni basasa aima manga kusayo. Ono Yesu aya ho ani nika bi “agi apai re” ni, ani ini gupai nga digido zegino ima mbeda. (Matayo 24:33) Mo sananga tiro nga, ‘Gini regbo rogo gu pangbanga nga ga aboro raka yo agi apai i nafura tipaha re (1) amangi rogo zegino dunduko, (2) amangi ti ngisa regbo sa, na(3) na si agberã rogoho kina ku mbatayo?’ Si tie ziazia nga, ani naraka ti gu regbo re.

Kuru bazogo sa nga ga Amerika ko aya, “gu zahe du mbata fu regbo . . . nabatasa raka aboro.” Tingbafuo gu bakere sungburosungburo baime namangi rogo 2004, i aye na agu ahe nafu zahe ku rogo agu adagbarago nagbia kpakarapai tipa gupai nga ka aboro kpikingo berewe kumbatayo wa gu namangi re ya. Wakina gure a, Mbori ima manga mbakadapai tipa ka fu zahe mbata fu digido zegino da. Ziazia Kekeapai afura kumbatayo nga: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.”—Matayo 24:14.

Rogo gu garã nasusi nisaha, aDezire Yekova adi asa naima susa birioni sa na beberehe (1.9 billion) kutingba sunge tungusa wene pangbanga rogo aringara nga 240 na rogo afugo naima susa 700. Gi sonakumbatayo namanga awere re nafu nyanyaki gopai nga digido zegino ima mbeda. Mbiko gu nyemuse du aDezire Yekova na ni tipa gayo amurakporo, i namanga bakere ome ka fu zahe tipa ga Mbori uru sapangbanga nga gu naye ni kina boro ipo. (Matayo 22:39) Gu rengo nga mo rengbe arengba ka gbia undo ti gi  pangbanga re nga gopai nga Yekova nakpinyemuro akpi. Mo tingidi gupai nga, “[Mbori] akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Petero 3:9) Ya mo mo amangapai kuti ga Mbori nyemuse ki degeturo kuti gu zahe re?

Mo tingidi gupai nga aboro gu gbaria naadu rogo gu kisanga nga Simeulue aoro ku rogo tumbatumba arago tipa ka bata ho i abi gupai ni nga hihii ime naga ni gihe; i aapidongo ho daho si akaragatihe ni te. I abati mbiko i adiberã ni ipo. Tipa gupai a nga mo bati be gu gberãngbi naye re, si naida mo mangi gupai nika batasa raka ro mbata fu regbo susi. Wai? Ga Mbori toro adu kugii gu nebi nga Yesaya ko kepai tipa gu wene yambahe du fu aboro ti “yangara arame,” nga gu regbo ani araka ti ni awere. Si aya: “Oni yé, ani dákpa ku ri ga Yekova bagangara yo . . . ya ko raba rani na gako asino ani ki nipeke kina gako agene.”—Yesaya 2:2, 3.

Nduge kurii bagangara yo nasa ro mo bi apai kuari na mo gbia ba bata. Wakina gure a, ino ga Mbori agene vurube Ziazia Kekeapai naundo amirioni aboro rogo zegino dunduko areme i mangi wene ariapai rogo gayo raka yo. (2 Timoteo 3:16, 17) Ni mangayo ho wo, gure nga i ‘napeka kina ga Mbori agene’ na kidu na ngbarago mbiko ko ima ida na yo na ko nabanda yo.

Ya mo mo amangapai kuti gu yambahe re na ki fu tiro tipa Mbori banda ro ti gi kere yangara arame re? Ani nangarasa ro mo wisigi agu ago apai sirisiri nga ga Ziazia Kekeapai du tipa “yangara areme” rogo gu sanduki du rogo gi kekeapai re. Agu aDezire Yekova du rogo gamo dagbarago aduadu na ngbarago ka undoro mo girogo agu averesi i nafuku he re na mo ini wai ka mangasunge na ni. Watadu mo rengbe ka gbia akaragapai kuti gamo asanahe ni ndu mo ku rogo gaani bangiriba nga ga Internet nga www.pr418.com. Mo ngere tii gu paparaha nga BIBLE TEACHINGS > BIBLE QUESTIONS ANSWERED. ▪