Mɛni Baiblo ɔ De?
Mɛni ji Abosiami, aloo mɛnɔ ji Abosiami?
ANƐ O MA DE KE Abosiami ji . . .
Mumi ko lo?
Su yayami ko nɛ ngɛ nɔmlɔ mi lo?
Nɔ́ ko nɛ be, se nimli susuɔ kaa e ngɛ lo?
NƆ́ NƐ BAIBLO Ɔ DE
Abosiami kɛ Yesu sɛɛ ní, nɛ e “ka” lɛ. (Mateo 4:1-4) Enɛ ɔ he ɔ, Abosiami ji nɔ ko nɛ ngɛ nitsɛnitsɛ, se pi su yayami ko nɛ ngɛ nimli a mi ji lɛ. Mumi ji lɛ, nɛ e yi kpɛti wa.
MƐNI HU WA MA NYƐ MAA KASE NGƐ BAIBLO Ɔ MI?
A bɔ Abosiami kaa bɔfo klɔuklɔu, se pee se ɔ ‘e yi anɔkuale.’ (Yohane 8:44) E ba pee lakpatsɛ, nɛ e te si kɛ wo Mawu.
Bɔfo kpahi ya piɛɛ e he nɛ a tsɔ atuã kɛ si Mawu.—Kpojemi 12:9.
Abosiami sisi nihi babauu konɛ a ko le kaa e ngɛ nitsɛnitsɛ.—2 Korinto Bi 4:4.
Anɛ Abosiami ma nyɛ maa ye nihi a nɔ lo?
NI KOMƐ DEƆ KE Abosiami be nyɛɛ maa ye nihi a nɔ, nɛ ni komɛ hu yeɔ gbeye kaa mumi yayamihi maa hao mɛ. Kɛ mo hu o susu kɛɛ?
NƆ́ NƐ BAIBLO Ɔ DE
“Je ɔ, Abosiami lɛ ngɛ nɔ yee.” (1 Yohane 5:19) Abosiami yeɔ adesahi a nɔ, se pi adesahi tsuo nɛ e ngɛ a nɔ he wami.
MƐNI HU WA MA NYƐ MAA KASE NGƐ BAIBLO Ɔ MI?
Abosiami guu sisimi blɔ nɔ kɛ náa nihi a nɔ he wami.—2 Korinto Bi 11:14.
Be komɛ ɔ, mumi yayamihi haoɔ nihi.—Mateo 12:22.
Mawu ma nyɛ maa ye bua mo konɛ o ‘te si kɛ wo Abosiami’ nɛ o ye e nɔ kunimi.—Yakobo 4:7.
