KO NA TAEKINNA bwa te Riaboro bon . . .

• Te aomata ae te taamnei?

• Kanikinaean ae e buakaka nanon te aomata?

• Mwin aia karioiango aomata?

AE TAEKINAKI N TE BAIBARA

E maroro te Riaboro ao e ‘kariria’ Iesu. (Mataio 4:1-4) Ngaia are te Riaboro bon tiaki te karioiango ao tiaki naba kanikinaean te buakaka. Bon te aomata ae te taamnei ae buakaka.

TERA RIKI REIREIARA MAN TE BAIBARA?

• Te Riaboro bon te anera ae raoiroi n te moantai, ma “e aki teimatoa n te koaua.” (Ioane 8:44) E bon riki bwa te tia kewe ao e karitei nakon te Atua.

• A ira Tatan anera ake tabeman n ana karitei.​—Te Kaotioti 12:9.

• E kamatakia aomata aika bati te Riaboro bwa a na aki kona n noria.—2 I-Korinto 4:4.

A TAKU TABEMAN bwa tauan arom iroun te Riaboro bon te kewe, ao tabemwaang a maaku ngkai a tauaki aroia irouia taamnei aika buakaka. Tera ngkoe am iango?

AE TAEKINAKI N TE BAIBARA

“A bane kaain te aonnaba ni mena i aani mwaakan teuare buakaka.” (1 Ioane 5:19) E korakora ana kariri te Riaboro nakoia aomata ma e aki taua aroia aomata ni kabane.

TERA RIKI REIREIARA MAN TE BAIBARA?

• E kabongana te kewe te Riaboro ni karikirakea iai ana kariri.​—2 I-Korinto 11:14.

• A kona taamnei n taui aroia aomata n tabetai.​—Mataio 12:22.

• Ko kona n tokanikai n “rarawa nakon te Riaboro” man ana ibuobuoki te Atua.​—Iakobo 4:7.