Киелі кітапта не делінген?
Ібіліс деген кім?
СІЗДІҢ ОЙЫҢЫЗША, Ібіліс...
рухани тұлға ма?
адам бойындағы зұлымдықтың бейнесі ме?
адамның ойлап тапқаны ма?
КИЕЛІ КІТАПТА БЫЛАЙ ДЕЛІНГЕН:
Ібіліс Иса пайғамбарға тіл қатқан және оның адалдығын сынаған (Матай 4:1—4). Демек, Ібілісті адам ойлап таппаған, әрі ол — жай ғана зұлымдықтың бейнесі де емес. Ібіліс — зұлым рухани тұлға.
КИЕЛІ КІТАПТА ТАҒЫ НЕ ЖАЗЫЛҒАН?
Ібіліс алғашында періште болған, бірақ ол “шындықтан тайып кетті” (Жохан 8:44). Сөйтіп, Ібіліс өтірікшіге айналды, Құдайға қарсы бүлік шығарды.
Басқа періштелер де Шайтанның жағына шықты (Аян 12:9).
Ібіліс көп адамның санасын соқыр қылып, өз болмысын жасырып отыр (Қорынттықтарға 2-хат 4:4).
Ібіліс адамдарға ықпал ете ала ма?
КЕЙБІР АДАМДАРДЫҢ ОЙЫНША, Ібіліс адамдарға мүлдем ықпал ете алмайды. Ал өзге біреулер жын-перілерден зәре-құты қалмай қорқады. Ал сіз не ойлайсыз?
КИЕЛІ КІТАПТА БЫЛАЙ ДЕЛІНГЕН:
“Бүкіл дүние Шайтанның билігінде” (Жоханның 1-хаты 5:19). Шайтанның адамзатқа тигізіп отырған ықпалы күшті, бірақ ол әрбір адамды билеп-төстемейді.
КИЕЛІ КІТАПТА ТАҒЫ НЕ ЖАЗЫЛҒАН?
Ібіліс барынша көп адамды адастыру үшін алдап-арбау амалын қолданады (Қорынттықтарға 2-хат 11:14).
Кей жағдайларда жындар адамдарды билеп алады (Матай 12:22).
Сіз Алла Тағаланың көмегімен Ібіліске қарсы тұра аласыз (Жақып 4:7).