နကစံးဆၢအီၤဒ်လဲၣ် မုၣ်ကီၤလံၢ်န့ၣ်မ့ၢ်ဝဲ . . .

• ပှၤနီၢ်သးဖိတဂၤဧါ.

• တၢ်အၢတၢ်သီတခါ လၢအအိၣ်လၢပပူၤဧါ.

• တၢ်တခါလၢ ပှၤဟီၣ်ခိၣ်ဖိတဖၣ် ဆိကမိၣ်ထီၣ်ဝဲဧါ.

လံာ်စီဆှံတဲဝဲဒ်လဲၣ်

မုၣ်ကီၤလံၢ် ကတိၤတၢ်ဒီးယ့ၣ်ၡူး ဒီး “လ့ပစီ” အီၤလီၤ. (မးသဲ ၄:၁-၄) လၢတၢ်န့ၣ်အဃိ မုၣ်ကီၤလံၢ်န့ၣ် တမ့ၢ်ပှၤတဂၤလၢ အိၣ်ထဲလၢ ပတၢ်ဆိကမိၣ်အပူၤဘၣ်. ဒီးအတမ့ၢ်စ့ၢ်ကီး တၢ်အၢတၢ်သီအတၢ်ပနီၣ်တခါဘၣ်. မုၣ်ကီၤလံၢ်န့ၣ် မ့ၢ်ဝဲပှၤနီၢ်သးဖိလၢ အအၢအသီတဂၤလီၤ.

ပမၤလိအါထီၣ်တၢ်ဂ့ၢ်အဂၤ လၢလံာ်စီဆှံအပူၤကသ့ဒံးဧါ

• လၢညါန့ၣ် မုၣ်ကီၤလံၢ်မ့ၢ် မူခိၣ်ကလူးလၢအဂ့ၤတဂၤလီၤ. ဘၣ်ဆၣ်အဝဲ “တဆၢထၢၣ်ဘၣ်လၢတၢ်မ့ၢ်တၢ်တီအပူၤဘၣ်.” (ယိၤဟၣ် ၈:၄၄) လၢခံအဝဲ ကဲထီၣ်ဝဲ ပှၤလၢအကတိၤကဘျံးကဘျၣ်တၢ်တဂၤ ဒီးပူထီၣ်ထီဒါကစၢ်ယွၤန့ၣ်လီၤ.

• မူခိၣ်ကလူးတနီၤစ့ၢ်ကီး ပိာ်ထီၣ်ဝဲမုၣ်ကီၤလံၢ်အခံ ဒ်သိးကထီဒါ ကစၢ်ယွၤန့ၣ်လီၤ.—လီၣ်ဖျါ ၁၂:၉.

• မုၣ်ကီၤလံၢ်ကျၢၢ်ဘၢဝဲ ပှၤအါဂၤအမဲာ် ဒ်သိးပှၤသုတသ့ၣ်ညါအဂ့ၢ်တဂ့ၤအဂီၢ်န့ၣ်လီၤ.—၂ ကရံၣ်သူး ၄:၄.

ပှၤတနီၤနီၤတဲဝဲလၢ မုၣ်ကီၤလံၢ်န့ၣ် သူဝဲအတၢ်လီတၢ်ဝ့ၤ ဒ်သိးကဒိၣ်စိလၢ ပဖီခိၣ်လီၤ. မ့မ့ၢ်အဂၤတနီၤနီၤန့ၣ် ပျံၤဝဲလၢတၢ်ဝံတၢ်နါ ကဒိးအဝဲသ့ၣ်လီၤ. မ့မ့ၢ်နၤမီၤ နဆိကမိၣ်ဒ်လဲၣ်.

လံာ်စီဆှံတဲဝဲဒ်လဲၣ်

“ဟီၣ်ခိၣ်ခဲလၢာ်မံလီၤဝဲလၢ တၢ်အၢတၢ်သီတဂၤန့ၣ်အပူၤလီၤ.” (၁ ယိၤဟၣ် ၅:၁၉) မုၣ်ကီၤလံၢ် ပၢဝဲဟီၣ်ခိၣ်ဒီတဘ့ၣ် ဘၣ်ဆၣ် တပၢဘၣ်ပှၤဟီၣ်ခိၣ်ဖိကိးဂၤဒဲးဘၣ်.

ပမၤလိအါထီၣ်တၢ်ဂ့ၢ်အဂၤ လၢလံာ်စီဆှံအပူၤကသ့ဒံးဧါ

• မုၣ်ကီၤလံၢ်သူဝဲအတၢ်လီတၢ်ဝ့ၤ ဒ်သိးကကွဲန့ၢ်လွဲန့ၢ် ပှၤဟီၣ်ခိၣ်ဖိအဂီၢ်လီၤ.—၂ ကရံၣ်သူး ၁၁:၁၄.

• တဘျီတခီၣ်န့ၣ် တၢ်ဝံတၢ်နါတဖၣ် ဒိးပှၤဟီၣ်ခိၣ်ဖိသ့ဝဲလီၤ.—မးသဲ ၁၂:၂၂.

• ခီဖျိ ကစၢ်ယွၤအတၢ်မၤစၢၤအဃိ ပဒုး “ထီဒါမုၣ်ကီၤလံၢ်” သ့ဝဲလီၤ.—ယၤကိာ် ၄:၇.