MUNGAZGORA KUTI Dyabulosi . . .

• Ni munthu wauzimu?

• Ntchimanyikwiro cha uheni uwo uli mwa munthu?

• Ntchinthu icho ŵanthu ŵakughanaghanira waka?

IVYO BAIBOLO LIKUYOWOYA

Dyabulosi wakayowoya na Yesu kweniso ‘wakamuyezga.’ (Mateyu 4:1-4) Ntheura Dyabulosi ntchinthu icho ŵanthu ŵakuchita kughanaghanira waka yayi, nesi ntchimanyikwiro waka cha uheni. Kweni ni munthu muheni wauzimu.

NI VICHI VINYAKE IVYO TIKUSAMBIRA MU BAIBOLO?

• Pakwamba, Dyabulosi wakaŵa mungelo mutuŵa, kweni ‘wakayimamo yayi mu unenesko.’ (Yohane 8:44) Wakazgoka mutesi na kugalukira Chiuta.

• Ŵangelo ŵanyake ŵakakolerana na uchigaluka wa Satana.​—Chivumbuzi 12:9.

• Dyabulosi wachali kubulumutizga ŵanthu ŵanandi kuti ŵaleke kumumanya.​—2 Ŵakorinte 4:4.

ŴANTHU ŴANYAKE ŴAKUTI mbutesi kuyowoya kuti Dyabulosi wangaŵa na mazaza pa ŵanthu, kweni ŵanyake ŵakopa kuti ŵangakoleka na mizimu yiheni. Kasi imwe mukuti wuli?

IVYO BAIBOLO LIKUYOWOYA

“Charu chose chikugona mu nkhongono za muheni.” (1 Yohane 5:19) Dyabulosi wali na mazaza pa ŵanthu, kweni ni wose yayi awo ŵakulongozgeka nayo.

NI VICHI VINYAKE IVYO TIKUSAMBIRA MU BAIBOLO?

• Dyabulosi ni muryarya pakuchita vinthu.​—2 Ŵakorinte 11:14.

• Nyengo zinyake mizimu yiheni yingaŵa na mazaza pa ŵanthu.​—Mateyu 12:22.

• Na wovwiri wa Chiuta, ‘mungamususka Dyabulosi.’​—Yakobe 4:7.