1, 2. 1) Jichhürunakanjja, ¿kunas Diosan servirinakaparojj kusisiyistu? 2) Irpir chuymaninakas awk taykanakasa, ¿kun amuyapjjañapatakis wayn tawaqonakar yanaptʼapjjañapa?

“JUMAJJ wawäskayäta ukhatpachwa uñtʼsma” sasaw mä irpir chuymani jilatajj 12 marani Christopher waynitur säna. “Walik bautisasiñ muntajja, ukampis ¿kunatsa bautisasiñ munta?” sasaw jilatajj jisktʼarakïna. Ukajj wali wakiskir jisktʼawa. Oraqpachanjja sapa maraw walja wayn tawaqonakajj bautisasipjje, ukajj wali kusiskañawa (Ecl. 12:1). Wayn tawaqonakajj kunatsa bautisasiñ munapjje, kuntï lurasipki uk sumti amuyapjje janicha ukjja, irpir chuymaninakasa awk taykanakasa sumwa amuytʼapjjañapa.

² Maynejj Diosar jakäwip katuyasjje ukhamarak bautisasjje  ukhajja, mä machaq jakäwsa qalltkaspa ukhamawa sasaw Bibliajj qhanañchi. Bautisasisin Diosar servisinjja walja bendicionanakwa maynejj katoqani, ukampis Supayajj kunayman toqetwa Diosat jitheqtayañ munarakini (Pro. 10:22; 1 Ped. 5:8). Ukatwa awk taykanakajj uk amuyapjjañapatak wawanakapar yanaptʼapjjañapa. Irpir chuymaninakas ukhamarakiw jan cristiano awk taykani wayn tawaqonakarojj yanaptʼapjjañapa (Lucas 14:27-30 liytʼañataki). Amuytʼañataki, walja pisonakani mä uta utachañatakejja maynejj sum wakichtʼasiñapawa. Jehová Diosar ‘tukuykam’ jan jitheqtas serviñatakejja maynejj ukhamarakiw sum wakichtʼasiñapa (Mat. 24:13). Wayn tawaqo, jumatï Jehová Diosar serviñ amtasksta ukhajja, Jupar wiñayataki serviñwa amtañama. ¿Kunas uka amtar puriñatak yanaptʼiristam?

3. 1) ¿Jesusasa Pedrosa bautisasiñ toqet kamsapjjänsa? (Mat. 28:19, 20; 1 Ped. 3:21). 2) ¿Kuna jisktʼanakarus aka yatichäwin qhanañchasiskani, ukat kunatsa?

³ ¿Jumajj bautisasiñti amtaskta? Ukajj wali suma amtawa. Bautisasiñasa Jehová Diosan Testigopäñasa mä suma bendicionawa. Cristianonakajj taqeniw bautisasipjjañapa sasaw Jesusajj säna. Apóstol Pedrosti, ‘bautismo toqew jachʼa tʼaqhesïwin qhespitäñäni’ sasaw sarakïna (Mat. 28:19, 20; 1 Ped. 3:21). Aka yatichäwinjja, kimsa jisktʼanakaruw qhanañchasiskani, ukaw bautisasiñatak wakichtʼatäjjtati janicha uk amuytʼañatakejj yanaptʼätam. 1) ¿Ajay toqet jiltatäjjtati? 2) ¿Kunatsa bautisasiñ munta? 3) ¿Diosar jakäwi katuyasiñajj kunasa uk sumti amuyta? Uka jisktʼanaka jisktʼasiñajj wali wakiskiriwa. ¿Kunatsa? Bautisasisajja, Jehová Diosar wiñayataki serviñ arsutamwa uñachtʼayäta, ukatsti uka jisktʼanakajj arsutamaru phoqañwa yanaptʼarakïtam.

4, 5. 1) Bautisasiñatakejja, ¿kunatsa walja maranïñ jan suyañasäki? 2) ¿Kunas ajay toqet jiltatäñajja?

⁴ Maynejj qawqha maranis bautisasiñapa ukjja janiw Diosan Arupajj qhanañchkiti. Ukampis Proverbios 20:11 qellqatajj akham siwa: ‘Mä waynitun [jan ukajj “mä wawan”,  New World Translation of the Holy Scriptures, 2013] cheqa sarnaqatapajja, luratanakapatwa uñtʼasi” sasa. ¿Kunsa uka arunakajj sañ muni? Maynejj wawäkasinsa kunatï walïki jan walïkaraki ukjja amuyaspawa, ukatsti Diosarus jakäwip katuyasirakispawa, ukwa uka arunakajj sañ muni. Ukhamasti mä waynitutï ajay toqet jiltatäjjchi Diosarus jakañap katuyasjjarakchi ukhajja, bautisasispawa (Pro. 20:7).

⁵ ¿Kunas ajay toqet jiltatäñajja? Janiw jilïrïña, jan ukajj walja maranakanïña sañ munkiti, jan ukasti ajay toqet jiltatajja ‘kunatï walïki, jan walïkaraki uk uñtʼiwa’ sasaw Diosan Arupajj qhanañchi (Heb. 5:14). Ajay toqet jiltatajja, kunatï walïki uk sum amuyi, Jehová Diosarojj kunas kusisiyi uksa yatirakiwa, ukatsti ukarjam sarnaqañatakiw taqe chuyma chʼamachasi. Uka kasta jaqejja, janiw yantʼanakamp atipjayaskiti jan ukasti kunatï askïki walïkaraki ukarjamaw sarnaqe, ukatakisti janiw khitis jariyañapäkiti. Ukhamasti, bautisat wayn tawaqonakajj janiw awk taykapampi, jilïr jilat kullakanakamp uñjatakejj Diosan mayitanakaparjam sarnaqapjjañapäkiti (Filipenses 2:12 uñjjattʼarakïta).

6, 7. 1) Daniel waynitojja, ¿kuna yantʼanakansa Babilonia markan uñjasïna? 2) ¿Kunjamsa Danielajj ajay toqet jiltatätap uñachtʼayäna?

⁶ ¿Mä waynitojj ajay toqet jiltatarakïspati? Ukatakejj Diosar serviri Daniel waynitut amuytʼañäni. Juparojja 12 jan ukajj 13 maranikïskäna ukhaw babilonionakajj awkip taykapat apaqasin Babilonia markar apapjjäna. Uka markanjja, Diosar jan istʼir jaqenak taypinwa jakañapäna. Ukatsti, rey nayraqatan irnaqañapatakiw mä qawqha waynanakamp chik ajllitarakïna, ukatwa uka markan jakiri jaqenakajj wali wakiskiri jaqëkaspas ukham uñjapjjäna (Dan. 1:3-5, 13). Israel markan jakañat sipansa, Babilonia markan wali suma jakasiñas Daniel waynitutakejj utjkaspa ukham amuyañjamänwa.

⁷ Daniel waynitojja, ¿kunsa ukhaman uñjasisajj luräna? Kunanakatï Babilonia markan utjkäna ukanak uñjasajja, ¿janit Jehová Diosar yupaychjjäna? Janiwa. Jupajj janipuniw kunäkipansa Jehová Diosat jitheqtkänti. Babilonia markankkasajja, ‘Danielajj jan kunampi qʼañuchasiñatakiw chuymapanjj amtäna’ sasaw Bibliajj qhanañchi. Mä arunjja, uka waynitojj janipuniw kunäkipansa kʼari yupaychäwir mitisiñ munkänti (Dan. 1:8). Ukham lurasaw Daniel waynitojj ajay toqet jiltatätap uñachtʼayäna.

8. ¿Kunsa Daniel waynitun sarnaqäwipat yateqasma?

⁸ Jumajja, ¿kunsa Daniel waynitut yateqasma? Jupjam suma amuytʼasirïñamawa. Ukatsti jan waltʼäwinakan uñjaskasasa Jehová Diosar istʼaskakiñamawa. Janiw camaleón sat jiskʼa jararankhur uñtatäñamäkiti, uka jiskʼa jararankhojja kawkhantï jikjjataski ukarjamaw cuerpopajj colorat mayjtʼi. Janiw Tantachasiñ Utanakejj Jehová Diosan amigopäñamäkiti, jan ukasti yateqer masinakamampisa Jehová Diosan serviripjamaw sarnaqañama. Jan walinakan uñjaskasas janipuniw Jehová Diosat jitheqtañamäkiti (Efesios 4:14, 15 liytʼañataki).

9, 10. 1) Yantʼanakan uñjaskasajj kunsa lurawayta uka toqet lupʼiñajja, ¿kunatsa wali wakiskiri? 2) Bautisasisinjja, ¿kunsa maynejj taqenir yatiyi?

⁹ Cheqansa jilïrïstansa jan ukajj wayn tawaqöstansa, taqeniw pantjasirïtanjja (Ecl. 7:20). Ukampis bautisasiñ amtasksta ukhajja, akham jisktʼasiñamaw wakisispa: “Bautisasjjä uka qhepatjja, yantʼanakan uñjaskasas ¿Jehová Diosar istʼaskakïti?” sasa. ¿Kunjamatsa uk yatisma? Ukatakejj aka toqet amuytʼma: Aka qhepa phajjsinakanjja, ¿kuna yantʼanakansa uñjasiwayta? Ukhamanakan uñjaskasajja, ¿kunsa lurawaytajja? ¿Kunatï walïki  ukti lurawaytajja? Maysa toqetjja, Daniel waynitjam yantʼata uñjasisma ukhajja, ¿kunsa lurasma? Maynitï, “taqe kuns sum lurañ yattajja, jumatï chʼamachasiskakïta ukhajja akapachan nayraruw sarantasma” siristam ukhajja, ¿kunsa lurasma? ¿Uka arunakar istʼätati, jan ukajj kun lurañamtï Jehová Diosajj munki ukarjamach sarnaqäta? (Efe. 5:17).

¹⁰ Uka jisktʼanak jisktʼasiñamajj wali wakiskiriwa, ¿kunatsa? Ukaw bautisasiñaru wali wakiskirit uñjañatak yanaptʼätam. Janïr bautisaskasajja, ‘wiñayatakiw taqe chuymamp servïma ukhamarak munasïma’ sasaw Jehová Diosar sistanjja (Mar. 12:30). Bautisaskasinjja, uka arsutaswa taqenir yatiytanjja. Ukhamasti, bautisasïta ukajja uka arsutamar phoqañamapuniwa (Eclesiastés 5:4, 5 liytʼañataki).

11, 12. 1) Maynejj jupa pachpaw bautisasiñ amtañapa sasinjja, ¿kunatsa sistanjja? 2) Jehová Diosjam bautisasiñar uñjañatakejja, ¿kunas yanaptʼätam?

¹¹ Diosar servirinakapajja, ‘taqe chuymaw Jupar loqtañatakejj sartapjjani’, wayn tawaqonakas ukhamarak lurapjjani sasaw Bibliajj qhanañchi (Sal. 110:3, NM). Ukhamasti, bautisasiñ amtasksta ukhajja, janiw mayninakajj juma lanti amtapjjañapäkiti, jan ukasti juma pachpaw uka amtar puriñama. Awk taykamatï Jehová Diosan Testigopächi ukhajja, jukʼampiw uka toqet amuytʼasiñama.

¹² Jilanakamaru kullakanakamaru jan ukajj amigonakamaru bautisasir uñjasaw jumajj bautisasiñ munjjarakisma. Ukhamächi ukajj amuyasiñamawa. Janiw bautisasiñajj waktʼjjetuwa sasin amuyasasa ni mayninakar bautisasir uñjasakis bautisasiñamäkiti, jan ukasti kunjamsa Jehová Diosajj bautisasiñar uñji ukwa amuyañama. ¿Kunas ukatakejj yanaptʼiristam? Bautisasiñajj kunatsa wali wakiskirejja uk sum amuytʼañatakiw tiempo apstʼasiñama. Aka yatichäwinsa jutïr yatichäwinsa uka toqetwa yatjjataskañäni.

13. Bautisasiñ kunatsa munta uk yatiñatakejja, ¿kunas yanaptʼiristam?

¹³ Cheqapunit bautisasiñ munta janicha ukjja, ¿kunjamatsa yatisma? Jehová Diosar mayisitamat amuytʼañamawa. Jumajja, ¿Diosarojj qawqha kutis mä urun mayistajja? ¿Kunjamas mayisitamajja? Kunanakatï llakisiyktam ukanakatjja, ¿qhana arunakampit mayista? Uka jisktʼanakar qhanañchañaw Jehová Diosan amigopätati janicha uk yatiñatakejj yanaptʼätam (Sal. 25:4). Awisajja, Biblia toqew Jehová Diosajj mayisitanakasar jaysistu. Ukatwa Diosan amigonakapajj Bibliat yatjjatañatak chʼamachasipjje. Ukhamatwa Diosar cheqpachapuni uñtʼañ munapjjatapsa, taqe chuyma serviñ munapjjatapsa uñachtʼayapjje (Jos. 1:8). Ukhamajj akham jisktʼasim: “¿Qhana arunakampit mayistjja? ¿Sapa semanat Diosan Arupat yatjjatasktjja? ¿Taqe chuymati Familiana Diosar Yupaychañataki Aruman arstʼañatakejj chʼamachastjja?” sasa. Uka jisktʼanakaw kunatsa bautisasiñ munta uk yatiñatakejj yanaptʼätam.

14. Diosar jakäwis katuyasiñampi bautisasiñampejja, ¿kunansa jan kikpäki?

¹⁴ Yaqhep cristianonakajja, Diosar jakäwis katuyasiñampi bautisasiñampejj kunansa jan kikpäki ukjja janiw sumpach amuyapkiti. Yaqhep wayn tawaqonakajj akham sapjjewa: “Nayajj Diosar jakäwij katuyasjjtwa, ukampis janïraw bautisasiñatak wakichtʼatäkti” sasa. Ukajj janiw ukhamäkaspati. Diosar jakäwis katuyastan ukhajja, ‘wiñayatakiw servïma’ sasaw Jehová Diosar sistanjja. Bautisasisinsti,  kuntï arsktan ukwa taqenir yatiytanjja. Ukhamasti, janïr bautisaskasajja, kunas Diosar jakäwis katuyasiñajj uk sumwa amuyañama.

15. ¿Kunas Diosar jakäwis katuyasiñajja?

¹⁵ Diosar jakäwis katuyastan ukhajja, “jakäwijajja, jichhat uksarojj jumankjjaniwa” sasinsa Jehová Diosar sisksna ukhamawa. Mä arunjja, ‘taqe kunat sipansa, jumaruw servïma’ sasaw Diosar sasktanjja (Mateo 16:24 liytʼañataki). Kun arsusasa, arsutas phoqañatakejj chʼamachasipuntanwa. Ukhamajja, ‘Diosaruw servï’ sasin arsktan ukar phoqañajj ¿janit wakiskarakispa? (Mat. 5:33). Jumatï Jehová Diosar jakäwim katuyasjjsta ukajja, ¿kunjamatsa arsutamar phoqasma? (Rom. 14:8).

16, 17. 1) ¿Kunjamsa jakäwisajj jan jiwasankjjatap uñachtʼaysna? Uk mä uñachtʼäwimpi qhanañchtʼma. 2) Diosar jakäwis katuyasisajja, ¿kunsa Jehová Diosar sasktanjja?

¹⁶ Uka toqet sumpach amuytʼañatakejj mä amigomat parltʼañäni. Jupajj akham siristam: “Aka auto regaläma, papelanakapas akawa, jichhajj aka autojj jumankjjewa” sasa. Ukampis auton llavenakapjja jan churkiristamti, antisas akham siristam: “Nayaw llavenak katöjja, nayaw auto apnaqarakëjja” sasa. Ukham satajja, ¿kunjamakis jikjjatasisma? ¿Kunsa uka amigomat amuyasma?

¹⁷ Ukhamasti, Diosar jakäwis katuyasisinjja, “jakäwijajj jumankjjewa” sasaw Jehová Diosar sasktanjja. Ukampis Diosar jakäwip katuyasisinjja, maynejj Jehová Diosar jan serviri jaqempi casarasiñatak parljjaspa, jan ukajj yatiyir sarañata, tantachäwinakar sarañata tiempo apaqer trabajo thaqhasjjaspa ukhajja, ¿walikïskaspati? Janiwa. Auto regaliri amigojj auton llavenakap jan churkejja, ukamp sasispawa. Ukampis ak amtañäni, Diosar jakäwis katuyasisinjja, “jakäwijajj jumankjjewa” sasaw Jehová Diosar sistanjja. Ukhamasti munañanakas lurañat sipansa, Diosan munañaparjamaw sarnaqañasa. Ukham lurasajja, Jesusat yateqasitaswa uñachtʼayañäni. Jupajj akham sänwa: “Nayasti janiw alajjpachat munañajj lurasir jutkti, jan ukasti khitankitu ukan munañap luririw jutta” sasa (Juan 6:38).

18, 19. 1) Rose sat kullakasa Christopher jilatasa, ¿bautisasiñ toqet kamsapjjesa? 2) ¿Kunsa jumajj bautisasiñ toqet amuyarakta?

¹⁸ Kunjamtï uñjaniwayktanjja, Diosar jakäwis katuyasiñasa, bautisasiñasa janiw aleq ukham amtañakïkiti, jan ukasti wali amuytʼasisaw uk lurañama. Diosar jakäwis katuyasisasa, bautisasisasa wali kusisitaw jikjjatastanjja. Kawknïr wayn tawaqonakatï Jehová Diosar munasipjje, Diosar katuyasiñasa bautisasiñasa kun sañsa muni uks amuyapjjaraki ukanakajja, jan pächasisaw bautisasipjje. Ukham lurapjjatapatsa janirakiw amtasipkiti. Rose sat mä kullakajj akham siwa: “Jehová Diosarojj wal munasta, Jupar servisakiw wali kusisit jikjjatasta. Bautisasiñ amtkayäta ukhajja, janipuniw uk lurañat pächaskayätti, ukham yaqha lurañajj janipuniw utjkaspati” sasa.

¹⁹ Qalltan parlkayätan uka Christopher waynitut ¿amtasktati? Jupajja, 12 maranïkas bautisasisajj ¿pantjaspachänti? ¡Janiwa! Antisas Diosar jakäwip katuyaskäna ukhamarak bautisaskäna uka urjja wali kusisitaw amti. Jupasti 17 maraniw precursorat serviñ qalltäna. 18 maranëjjäna ukhasti, irpir chuymaninakan yanapiripatwa uttʼayapjjarakïna. Jichhasti, Betel utanwa irnaqtʼaski. Jupajj akham siwa: “Bautisasisajj janiw pantjasiwaykti. Jichhajja, Jehová Diosataki ukhamarak markapatakiw irnaqtʼaskta, ukham lurañajj walpun kusisiyitu” sasa. Wayn tawaqo jumatï bautisasiñ amtasksta ukhajja, ¿kunsa wakichtʼasiñatakejj lurasma? Jutïr yatichäwin yatjjatkañäni ukaw wakichtʼasiñatak yanaptʼätam.