1, 2. (a) Ano an nakakapaugma sa banwaan nin Diyos ngunyan? (b) Paano matatabangan kan Kristiyanong mga magurang asin mga elder an mga hoben na masabutan an kahulugan kan bawtismo?

“MIDBID taka na puon kan umboy ka pa,” an sabi kan sarong Kristiyanong elder sa 12 anyos na si Christopher, “asin nauugma akong maaraman na gusto mo nang magpabawtismo. May gusto akong ihapot sa saimo, ‘Ta’no ta gusto mo nang magpabawtismo?’” May marahay na dahilan an elder sa paghapot kaiyan. Siyempre, nauugma kitang mahiling na rinibong hoben sa bilog na kinaban an nababawtismuhan kada taon. (Par. 12:1) Pero, gustong masiyerto kan mga magurang  asin mga elder sa kongregasyon na bako sanang sa sadiring buot ginibo kan mga hoben an desisyon na ini kundi kun nasasabutan man ninda an kahulugan kan pagpabawtismo.

² Itinutukdo sa sato kan Tataramon nin Diyos na an pagdusay asin pagpabawtismo kapinunan nin sarong bagong buhay para sa sarong Kristiyano. Puon sa panahon na iyan, maeeksperyensiyahan niya an mga bendisyon hali ki Jehova pero pati man mga pagkontra hali ki Satanas. (Tal. 10:22; 1 Ped. 5:8) Kaya dapat na magtao nin panahon an Kristiyanong mga magurang para itukdo sa saindang mga aki kun ano an kalabot sa pagigin sarong disipulo ni Cristo. Para sa mga hoben na bakong Kristiyano an mga magurang, mamumuton sindang tatabangan kan mga elder sa kongregasyon na makuwenta an gastos sa pagigin disipulo. (Basahon an Lucas 14:27-30.) Kun paanong kaipuhan an pagplano tanganing matapos nin mapanggana an pagtugdok nin sarong edipisyo, kaipuhan man an preparasyon tanganing maimbod na makapaglingkod ki Jehova “sagkod sa katapusan.” (Mat. 24:13) Pero ano an magigibo kan mismong mga hoben tanganing magin determinadong paglingkudan si Jehova sa bilog nindang buhay? Hilingon niyato.

3. (a) Ano an itinutukdo sa sato kan mga sinabi ni Jesus asin Pedro mapadapit sa kahalagahan kan bawtismo? (Mat. 28:19, 20; 1 Ped. 3:21) (b) Anong mga hapot an pag-uulayan niyato, asin taano?

³ Ika daw sarong hoben na nagpaplano nang magpabawtismo? Kun iyo, dapat kang komendaran! Dakulang pribilehiyo nanggad an mabawtismuhan bilang saro sa mga Saksi ni Jehova. Dugang pa, kahagadan para sa mga Kristiyano an pagpabawtismo, asin mahalagang marhay an lakdang na ini para maligtas. (Mat. 28:19, 20; 1 Ped. 3:21) Kun ika mapabawtismo, ipapahiling mong nanuga ka na ki Jehova na maglilingkod sa saiya sagkod lamang. Gusto mo nanggad na mautob an panugang iyan kaya pag-aandaman mo an mahalagang lakdang na ini. Makakatabang sa saimo an minasunod na mga hapot tanganing maaraman kun talagang andam ka nang magpabawtismo: (1) Igo na daw an pagkamaygurang ko para gibuhon an desisyon na ini? (2) Personal ko daw ining pagmawot? (3) Nasasabutan ko daw an kahulugan kan pagigin dusay ki Jehova? Pag-ulayan niyato an mga hapot na ini.

4, 5. (a) Taano ta an bawtismo bako sanang para sa mga may edad na? (b) Para sa sarong Kristiyano, ano an buot sabihon kan pagigin maygurang?

⁴ Dai sinasabi kan Bibliya na an bawtismo para sana sa mga may edad na o sa mga nasa legal nang edad. Mababasa ta sa Talinhaga 20:11: “Dawa an sarong aki namimidbid paagi sa saiyang mga gibo, kun baga dalisay asin tama an saiyang paggawi.” (NW) Kayang masabutan dawa nin sarong medyo hoben pa an kahulugan kan paggibo nin tama asin pagigin dusay sa saiyang Kaglalang. Kaya, an pagpabawtismo sarong mahalaga asin angay na lakdang para sa sarong hoben na nahihiling na sa saiya an pagigin maygurang asin nagdusay na ki Jehova.—Tal. 20:7.

⁵ Ano an buot sabihon kan pagigin maygurang? An pagkamaygurang dai pirming nanunungod sa edad nin sarong tawo o pisikal na pagdakula. Sinasabi kan Bibliya na an mga tawong maygurang “nasanay an saindang mga kakayahan sa pagsabot na mamidbid an tama asin an sala.” (Heb. 5:14, NW) Kaya aram ninda kun ano an tama sa paghiling ni Jehova asin napagdesisyunan ninda sa saindang puso na gibuhon iyan. Bilang resulta, dai sinda basta-basta naiimpluwensiyahan na gumibo nin sala; dai man sinda kaipuhan na pirming sadulon na gumibo nin tama. Iyo, rasonable sanang lauman sa sarong nagpabawtismong hoben na susunudon niya an mga pamantayan nin Diyos dawa mayo an saiyang mga magurang o ibang adulto.—Ikumparar an Filipos 2:12.

6, 7. (a) Ano an mga nagin pagbalo ki Daniel kan siya nasa Babilonya? (b) Paano nagpahiling nin pagkamaygurang si Daniel?

⁶ Kaya daw na maipahiling nin sarong hoben an arog kaiyan na pagkamaygurang? Buweno, pag-isipan an halimbawa ni Daniel. Posibleng nagtitin-edyer pa sana siya kan puwersahan siyang kuanon sa saiyang mga magurang asin darahon na bihag sa Babilonya. Bigla na sana, nakaistar na siya kaiba kan mga tawong ibang marhay an pagmansay sa kun ano an tama asin sala. Dugang pa, may saro pang pagbalo sa sitwasyon ni Daniel: Espesyal an pagtratar sa saiya sa Babilonya. Saro siya sa nagkapirang hoben na maingat na pinili tanganing maglingkod sa hadi! (Dan. 1:3-5, 13) Garo baga mas marahay an mga oportunidad ni Daniel sa Babilonya kisa sa tibaad makukua niya sa Israel.

⁷ Ano an nagin reaksiyon kan hoben na si Daniel sa gabos na ini? Naakit daw siya sa kagayunan kan Babilonya? Tinugutan daw niya na baguhon kan bago niyang kapalibutan an saiyang pagkatawo o paluyahon kaiyan an saiyang pagtubod? Dai nanggad! Sinasabi kan Bibliya na mantang nasa Babilonya, “nagdesisyon si Daniel sa saiyang puso na dai niya didigtaan an saiyang sadiri” kan ano man na konektado sa palsong pagsamba. (Dan. 1:8, NW) Talagang nagpahiling si Daniel nin pambihirang pagkamaygurang!

8. Ano an manunudan mo sa halimbawa ni Daniel?

⁸ Ano an manunudan mo sa halimbawa ni Daniel? An sarong maygurang na hoben marigon sa saiyang pagtubod dawa nasa masakit na sitwasyon. Bako siyang arog nin chameleon na nagbuburubago nin kulor depende sa saiyang kapalibutan. Dai siya minagawi na garo katuod nin Diyos pag nasa Kingdom Hall pero katuod kan kinaban pag nasa eskuwelahan. Imbes na ianod-anod, nagdadanay siyang marigon dawa may mga pagbalo sa saiyang pagtubod.—Basahon an Efeso 4:14, 15.

9, 10. (a) Paano makikinabang an sarong hoben kun iisipon niya an nagin reaksiyon niya sa nakaagi pa sanang pagbalo sa saiyang pagtubod? (b) Ano an kahulugan kan bawtismo?

⁹ Siyempre, gabos kita bakong perpekto; sa pana-panahon, nakakagibo nin sala an mga hoben pati man an mga adulto. (Par. 7:20) Pero, huling pinag-iisipan mo nang magpabawtismo, sarong kadunungan na aramon kun gurano ka na kadeterminadong mangapot sa mga pamantayan ni Jehova. Paano mo iyan maaaraman? Ihapot sa sadiri, ‘Pirmi ko daw sinusunod an mga  pamantayan nin Diyos?’ Isipon an nagin reaksiyon mo sa nakaagi pa sanang pagbalo sa saimong pagtubod. Naipahiling mo daw na igwa ka kan pakasabot na kaipuhan para mamidbid an kalainan kan tama sa sala? Paano kun, arog ni Daniel, may mga nagsasabi man sa saimo na may espesyal kang talento na magagamit sa kinaban ni Satanas? Magigibo mo daw na “padagos na sabuton kun ano an kabutan ni Jehova”?—Efe. 5:17, NW.

¹⁰ Taano ta mahalagang maaraman an simbag sa prangkang mga hapot na ini? Huling matatabangan ka kaini na mahiling kun gurano kaseryoso an pagpabawtismo. An bawtismo simbolo na may ginibo kang sagradong panuga ki Jehova. Nanuga kang mamumutan mo siya asin maglilingkod sa saiya sagkod lamang nin bilog mong puso. (Mar. 12:30) An gabos na nagpabawtismo dapat na magin determinadong utubon an saiyang panuga ki Jehova.—Basahon an Parahulit 5:4, 5.

11, 12. (a) Ano an kaipuhan siguraduhon kan saro na gusto nang magpabawtismo? (b) Ano an makakatabang sa saimo para masiyerto na tama an pagmansay mo sa areglo ni Jehova nin bawtismo?

¹¹ Sinasabi kan Bibliya na an banwaan ni Jehova, kaiba an mga hoben, “gikan sa buot na mapresentar kan saindang sadiri” para maglingkod sa Saiya. (Sal. 110:3, NW) Kaya kun an saro gusto nang magpabawtismo, kaipuhan niyang siguraduhon na personal niya ining pagmawot. Tibaad kaipuhan mong siyasaton nin maingat an saimong pagmawot, lalo na kun pinadakula ka sa katotoohan.

¹² Sa pag-agi nin panahon, posibleng dakul ka nang nahiling na nagpabawtismo—kaiba an nagkapira sa mga amigo mo o tibaad pati mga tugang mo. Kun iyan an sitwasyon mo, sa ano ka dapat mag-ingat? Mag-ingat na dai magkaigwa nin kaisipan na dapat ka na man na magpabawtismo huling naabot mo na an sarong partikular na edad o nahihiling mong nagpapabawtismo na an iba. Paano mo masisiyerto na tama an pagmansay mo sa areglo ni Jehova nin bawtismo? Magtao nin panahon para pag-isipan an mga dahilan kun taano ta mahalagang marhay an pagpabawtismo. Maaaraman mo sa artikulong ini asin sa masunod an nagkapira sa mga iyan.

13. Paano mo maaaraman kun baga gikan sa puso an desisyon mong magpabawtismo?

¹³ Igwang mga paagi tanganing maaraman kun baga gikan sa puso an desisyon mong magpabawtismo. Halimbawa, mahihiling sa saimong mga pamibi an udok sa puso mong pagmawot na paglingkudan si Jehova. Kun gurano ka kaparati asin kaespesipikong mamibi ki Jehova, diyan mahihiling kun gurano kadayupot an relasyon mo sa saiya. (Sal. 25:4) Sa dakul na pagkakataon, sinisimbag ni Jehova an satong mga pamibi paagi sa saiyang Tataramon. Kaya, kun gurano ka kaigot sa pag-adal nin Bibliya, diyan mahihiling kun gurano mo kagustong magin mas dayupot ki Jehova asin maglingkod sa saiya nin gikan sa puso. (Jos. 1:8) Kaya ihapot mo sa sadiri: ‘Gurano kaespesipiko an mga pamibi ko? Gurano karegular an personal na pag-adal ko sa Bibliya?’ Asin kun an saindong pamilya igwa nin Pampamilyang Pagsamba, ihapot mo sa sadiri: ‘Gikan sa buot daw akong nakikikabtang sa Pampamilyang Pagsamba mi?’ Matatabangan ka kan mga simbag sa mga hapot na iyan na mahiling kun baga personal mong pagmawot an desisyon mong magpabawtismo.

14. Ano an pagkakalain kan pagdusay asin bawtismo?

¹⁴ Tibaad bakong malinaw sa iba an pagkakalain kan pagdusay asin bawtismo. Halimbawa, may mga hoben na nagsasabi na idinusay na ninda an saindang buhay ki Jehova, pero dai pa sinda andam na magpabawtismo. Puwede daw iyan? An pagdusay sarong pribadong pamibi na diyan isinasabi mo ki Jehova an saimong panuga na paglilingkudan mo siya sagkod lamang. An bawtismo  iyo man an pagpahiling mo sa publiko na nagibo mo na an pribadong pagdusay na ini. Bago ka magpabawtismo, kaipuhan mong siyertuhon na nasasabutan mo an kahulugan kan pagdusay.

15. Ano an kahulugan kan pagdusay?

¹⁵ Sa simpleng pagtaram, pag idinusay mo an saimong buhay ki Jehova, sinasabi mong siya na an may sadiri sa saimo. Nanunuga ka ki Jehova na iinuton mo an paggibo kan saiyang kabutan kisa sa gabos na iba pang bagay sa buhay mo. (Basahon an Mateo 16:24.) Dapat seryosuhon an ano man na panuga, lalo na an panuga niyato sa Diyos na Jehova! (Mat. 5:33) Pero, paano mo maipapahiling na talagang itinao mo na ki Jehova an saimong sadiri asin ngunyan, siya na an may sadiri sa saimo?—Roma 14:8.

16, 17. (a) Iilustrar an kahulugan kan pagtao kan saimong sadiri ki Jehova. (b) Ano an talagang sinasabi nin saro na idinudusay an saiyang sadiri sa Diyos?

¹⁶ Halimbawa, imahinaron na rinegaluhan ka nin awto kan saimong amigo. Iinabot niya an rehistro asin nagsabi: “Sadiri mo na an awtong ini.” Pero paano kun sinabi pa niya: “Ako an makapot kan liyabe. Ako an mamaneho, bako ika.” Ano daw an mamamatian mo sa “regalong” iyan? Ano daw an mamamatian mo sa nagregalo?

¹⁷ Isipon mo ngunyan kun ano an tama sanang lauman ni Jehova sa sarong tawong nagdusay sa saiya, sa sarong tawong nagsabi sa saiya: “Itinatao ko na po sa saimo an buhay ko. Sadiri mo na po ako.” Pero, paano kun an tawong iyan magpuon nang magkaigwa nin dobleng pamumuhay, tibaad sekretong nakikipag-date sa sarong bakong kapagtubod? Paano kun inako niya an sarong trabaho na makakalimitar sa oras na magagamit niya sa ministeryo asin magigin dahilan kan parati niyang dai pag-atender sa mga pagtiripon kan kongregasyon? Bako daw na garo siya man sana an may kapot kan liyabe kan awto? Kun an sarong tawo magdusay kan saiyang sadiri ki Jehova, sa katunayan, an talagang sinasabi niya: “Ika na po an may sadiri kan buhay ko, bako na ako. Kun dai magkauyon an kagustuhan nindo sa kun ano an gusto kong gibuhon, an kagustuhan po nindo an masusunod—sa gabos na panahon.” Arog kaiyan an kaisipan ni Jesus. Siya nagsabi: “Nagbaba ako hali sa langit tanganing gibuhon, bako an sadiri kong kabutan, kundi an kabutan niya na nagsugo sa sako.”—Juan 6:38, NW.

18, 19. (a) Paano mahihiling sa mga sinabi ni Rose asin Christopher na an pagigin bawtisado sarong pribilehiyo na nagtatao nin mga bendisyon? (b) Ano an masasabi mo sa pribilehiyo na magpabawtismo?

¹⁸ Malinaw nanggad, an pagpabawtismo sarong seryosong lakdang na dai mo o nin siisay man dapat basang-basangon. Dakulang pribilehiyo an magin dusay asin bawtisadong lingkod ni Jehova. An mga hoben na namumutan si Jehova asin nasasabutan an kahulugan kan pagdusay, dai nagduduwa-duwang idusay an sadiri saka magpabawtismo; asin dai ninda pinagbabasulan an desisyon na iyan. Si Rose, sarong bawtisadong tin-edyer, nagsabi: “Namumutan ko si Jehova, asin mayo nang mas makakapaugma pa sa sako kisa sa paglilingkod sa saiya. An pagdusay an pinakasiguradong desisyon na ginibo ko sa buhay.”

¹⁹ Kumusta man si Christopher na nasambit sa kapinunan kan artikulo? Masasabi daw na talagang nasasabutan na niya an kahulugan kan saiyang pagpabawtismo sa edad na 12? Maugmang ginirumdom ni Christopher an saiyang pagdusay saka pagpabawtismo asin nagpasalamat siya na ginibo niya an desisyon na iyan. Nagregular payunir siya sa edad na 17, nagin ministeryal na lingkod sa edad na 18, asin ngunyan naglilingkod siya sa Bethel. Sinabi niya: “An pagpabawtismo iyo an tamang desisyon na nagibo ko. Kadakul akong ginigibong nakakaugmang trabaho para ki Jehova asin sa saiyang organisasyon.” Kun nagpaplano ka nang magpabawtismo, paano ka makakapag-andam para diyan? Sisimbagon kan sunod na artikulo an hapot na iyan.