1, 2. (a) Kai salah sada si erbanca umat Dibata ermeriah ukur gundari? (b) Uga orang tua Kristen ras pertua banci nampati singuda-nguda anak perana ngangkai ertina iperidiken?

”ENGGO kutandai kam mulai kin kam tubuh,” nina pertua man Christopher si umurna 12 tahun, ”Janah meriah kuakap lit sura-surandu iperidiken. Kusungkun ateku kam, ’Engkai maka kam nggit iperidiken?’” Wajar pertua e nungkun bage. Meriah ukurta ngidah ribun anak muda iperidiken tiap tahun. (Peng. 12:1) Tapi, orang tua Saksi bage pe pertua ipastikenna atena gelah singuda-nguda anak perana erban keputusen i bas pusuhna nari janah ngangkai ertina iperidiken.

 ² I bas Pustaka, sipelajari maka pembaktin ras peridin eme bena-benana kegeluhen si mbaru man kalak Kristen. Kegeluhen e mereken melala pasu-pasu i bas Jahwe nari tapi ngerehken tantangen ka i bas Setan nari. (Kua. 10:22; 1 Pet. 5:8) Enda me alasenna ngkai orang tua Kristen arus mereken waktuna guna ngajari anak-anakna kai ertina jadi ajar-ajar Jesus. Adi lit singuda-nguda anak perana si orang tuana la bas kebenaren, alu perkeleng pertua nampati ia ngangkai erti mbaktiken diri ras iperidiken. (Oge Lukas 14:27-30.) Perlu persikapen guna majekken sada bangunen, bage ka pe singuda-nguda anak perana perlu erban persikapen sope iperidiken gelah banci ngelayani Jahwe alu setia ”seh ku kedungenna”. (Mat. 24:13) Kai si banci nampati kalak si nguda denga gelah ertekad ngelayani Jahwe seh rasa lalap? Mari sibahas.

3. (a) Menurut Matius 28:19, 20 ras 1 Petrus 3:21, ngkai maka penting iperidiken? (b) Penungkunen kai saja si man bahasenta, janah ngkai?

³ Kam singuda-nguda anak perana, lit nge sura-surandu iperidiken? Adi lit, enda sada tujun si mehuli! Sada kinihamaten si mbelin kal iperidiken jadi sekalak Saksi-Saksi Jahwe. Enda sada hal si arus ilakoken kalak Kristen, janah enda langkah si penting gelah banci selamat i bas kiniseran si mbelin nari. (Mat. 28:19, 20; 1 Pet. 3:21) Paksa kam iperidiken, icidahkenndu maka kam erjanji guna ngelayani Jahwe seh ras lalap. Tuhu-tuhu atendu nepati janji e, emaka penungkunen enda banci nampati kam guna ngenehen nggo siap ntah lang kam iperidiken: (1) Enggo nge aku cukup matang guna erbahan keputusen e? (2) I bas pusuhku nari nge aku erban keputusen e? (3) Kuangkai nge kai ertina mbaktiken diri man Jahwe? Mari sibahas.

4, 5. (a) Itentuken nge asakai umur kalak maka banci iperidiken? Jelasken. (b) Kai kin ertina kematangen man kalak Kristen?

⁴ Pustaka si Badia la nentuken asakai umur kalak maka banci iperidiken. Sioge i bas Kuan-kuanen 20:11, ”Sekalak anak icidahkenna ise ia, arah perbahanenna, arah kai si ibahanna ieteh kap mehuli ntah lang biakna.” Jadi anak-anak pe nggo banci ngelakoken kai si benar janah meteh kai pembaktin e. Emaka, iperidiken eme langkah si penting janah tepat man singuda-nguda anak perana si nggo terbukti matang ras nggo mbaktiken diri man Jahwe.​—Kua. 20:7.

⁵ Kai kin ertina kematangen? Kematangen la itentuken arah umur sekalak jelma ntah pe penampilen fisikna. Nina Pustaka si Badia, kalak si matang ”ngasup perukurenna” mbedaken kai si benar ras kai si salah. (Heb. 5:14) Kalak si matang meteh kai si benar janah ertekad guna terus ngelakokenca. Emaka la ia menukah terpengaruh guna ngelakoken kai si salah. Janah la perlu rusur ipebetehken man bana guna ngelakoken kai si benar. Emaka, singuda-nguda anak perana si nggo iperidiken arusna nggo banci ngelakoken kai si benar amin gia orang tuana ntah pe kalak dewasa si deban la lit i sekelewetna.​—Bandingken Pilipi 2:12.

6, 7. (a) Kai saja tantangen si niadapi Daniel i Babilon? (b) Uga Daniel ncidahken kematangenna?

⁶ Banci nge singuda-nguda anak perana ncidahken kematangen? Perdiateken contoh Daniel. Banci saja ia remaja denga paksa ibuat i bas orang tuana nari janah ibaba ku Babilon. Kenca e, Daniel tading i sekelewet kalak si la patuh man perentah Dibata. Tapi i Babilon, ia iperlakoken alu istimewa. Ia salah sada anak muda si ipilih guna ngelayani raja. (Dan. 1:3-5, 13) Kemungkinen, kesempaten si bage labo pernah banci idatna i Israel.

⁷ Tapi uga tanggapen Daniel? Tergoda nge ia? Berhasil nge kalak Babilon erban kinitekenna lemah? Sitik pe lang! Pustaka si Badia ngataken, paksa i Babilon ”itetapken Daniel i bas ukurna maka la ia nggit ngelanggar aturen agamana”, ipedauhna dirina i bas kai pe si lit hubungenna ras penembahen palsu. (Dan. 1:8) Daniel ncidahken maka ia tuhu-tuhu matang!

8. Kai si banci ipelajarindu i bas contoh Daniel?

⁸ Kai si banci ipelajarindu i bas contoh Daniel? Singuda-nguda anak perana si matang ncikep nteguh kinitekenna, amin gia i bas situasi si sulit. Labo ia bagi bindoren si salih-salih rupana bergantung lingkungenna. La ibahanna dirina tempa-tempa jadi teman Dibata i bas Bale Kinirajan tapi jadi teman doni enda ka i sekolah. Sebalikna, tetap ia setia amin gia ia iuji.​—Oge Epesus 4:14, 15.

9, 10. (a) Kai gunana adi iukurindu kerna uga tanggapenndu paksa kinitekenndu iuji? (b) Kai ertina iperidiken?

⁹ Tentu saja la lit si sempurna. Kalak si nguda denga bage pe kalak dewasa banci saja erban kesalahen. (Peng. 7:20) Tapi adi iperidiken atendu, mehuli adi ipereksandu uga belinna tekadndu guna matuhi perentah-perentah Jahwe. Sungkuni dirindu, ’Lalap nge kupatuhi Jahwe?’ Ukuri  uga tanggapenndu paksa kinitekenndu iuji pudi wari enda. Banci nge iputuskenndu kai si arus ilakokenndu? Bali bagi Daniel, lit nge sekalak jelma si nuruh kam nggunaken bakatndu bas doni Setan enda? Paksa reh godan si bagenda, ietehndu nge kai peraten Jahwe?​—Ep. 5:17.

¹⁰ Engkai maka penungkunen-penungkunen si bage penting? Erkiteken enda banci nampati kita meteh uga seriusna iperidiken e. Iperidiken ncidahken man kalak si deban maka kam nggo erban sada janji si penting man Jahwe. Kam erjanji ngkelengi janah ngelayani Ia alu bulat ukur seh rasa lalap. (Mrk. 12:30) Kerina kalak si nggo iperidiken arus ertekad nepati janjina man Jahwe.​—Oge Pengerana 5:4, 5.

11, 12. (a) Kai si perlu ipastiken kalak si atena iperidiken? (b) Kai si banci nampati kam gelah ngangkai erti iperidiken?

¹¹ Nina Pustaka si Badia, kerina umat Dibata, termasuk singuda-nguda anak perana, ngelayani Ia ”alu ukur meriah.” (Msm. 110:3) Emaka kalak si atena iperidiken perlu ipastikenna maka sura-surana e i bas pusuhna nari. Emaka perlu ipereksandu alu jujur alasenndu iperidiken, khususna adi kam ipebelin i bas keluarga saksi.

¹² Banci saja rusur idahndu kalak iperidiken, mungkin piga-piga temanndu ntah pe kaka ras agindu. Tapi ula sempat sura-surandu iperidiken erkiteken umur ntah pe erkiteken kalak si deban nggo iperidiken. Uga kam banci tek maka nggo tuhu-tuhu iangkaindu erti iperidiken? Ukurilah alu mbages ngkai maka iperidiken e seh kal pentingna. Artikel enda ras artikel selanjutna banci nampati kam ndatken jabapna.

13. Janari banci ietehndu keputusenndu guna iperidiken i bas pusuhndu nari?

¹³ Salah sada cara gelah banci ietehndu maka keputusenndu iperidiken bas pusuhndu nari ntah lang eme alu mereksa pertotonndu. Rusur nge kam ertoto man Jahwe? Bage-bage saja nge isi pertotonndu? Jabapen i bas penungkunen e ncidahken uga deherna hubungenndu ras Jahwe. (Msm. 25:4) Jabapen pertotonta megati ibereken Jahwe arah Pustaka si Badia. Emaka, pereksalah jadwalndu erlajar Pustaka guna meteh tuhu-tuhu nge atendu erteman ras Jahwe janah ngelayani Ia. (Jos. 1:8) Sungkuni dirindu, ’Ratur nge aku pelajaren pribadi? Meriah nge ukurku ikut kebaktin jabu?’ Jabapen i bas penungkunen e nampati kam ngenehen payo ntah lang keputusenndu guna iperidiken i bas pusuhndu nari.

14. Jelasken kai bedana pembaktin ras peridin.

¹⁴ Piga-piga anak muda banci saja la ietehna kai situhuna bedana pembaktin ras peridin. Lit si ngatakenca ia nggo mbaktiken diri man Jahwe tapi lenga siap iperidiken. Enda la mungkin. Pembaktin eme janjinta man Jahwe i bas pertoton guna ngelayani Ia rasa lalap. Paksa iperidiken, icidahkenndu man jelma si nterem maka kam nggo mbaktiken diri man Jahwe. Emaka, sope iperidiken perlu  iangkaindu kai ertina mbaktiken diri man Dibata.

15. Kai kin pembaktin e?

¹⁵ Paksa ibaktikenndu dirindu man Jahwe, ipebetehkenndu man baNa maka kam sikerajangenNa gundari. Kam erjanji maka ngelayani Ia sada hal si pentingna kal i bas geluhndu. (Oge Matius 16:24.) Seh kal seriusna janji enda! (Mat. 5:33) Emaka, uga kam banci ncidahken maka ietehndu kam nggeluh labo guna dirindu tapi nggeluh guna Jahwe?​—Rom. 14:8.

16, 17. (a) Ilustrasiken kai ertina geluhta lanai sikerajangenta. (b) Kai si ikataken kalak paksa mbaktiken dirina man Jahwe?

¹⁶ Mari siperdiatekan sada contoh. Bayangken sekalak temanndu mereken motor man bandu. Berekenna surat-surat motor e, janah nina, ”Motor enda sikerajangenndu.” Tapi kenca e nina, ”Aku si njemak kuncina, ya. Aku saja si mabasa, kam ula.” Uga perasanndu? Banci nge kataken motor e hadiah? Uga perasanndu nandangi temanndu e?

¹⁷ Paksa sekalak jelma mbaktiken kegeluhenna man Jahwe, ia erjanji man Dibata, ”Kubereken geluhku baNdu. Aku sikerajangenNdu.” Lit hak Jahwe ngarapken kalak e nepati janjina. Tapi uga adi ia mulai la patuh man Jahwe alu erbuni-buni ngerondong ras kalak si la nembah Dibata? Entah, uga adi ialokenna sada dahin si erbahan lanai lit waktuna guna erberita ras perpulungen? Kalak si bage la nepati janjina man Jahwe. Si enda bali bagi sekalak teman si nahan kunci motor ndai. Paksa sibaktiken kegeluhenta man Jahwe, sikataken man baNa, ”Geluhku sikerajangenNdu labo sikerajangenku.” Emaka, terus siusahaken ngelakoken peraten Jahwe amin gia la bagi peratenta. Usihlah Jesus, si ngataken, ”Aku enggo reh i Surga nari guna nehken peraten si nuruh aku, labo guna nehken peratenku.”​—Joh. 6:38.

18, 19. (a) Kai si banci sipelajari i bas pengalamen Rose ras Christopher? (b) Uga perasanndu kerna iperidiken?

¹⁸ Jelas me, iperidiken sada keputusen si serius. Sada kinihamatan si mbelin mbaktiken diri man Jahwe janah iperidiken. Singuda-nguda anak perana si ngkelengi Jahwe janah ngangkai ertina pembaktin la ragu mbaktiken dirina man Dibata janah iperidiken. Kalak enda la erkadiola nandangi keputusenna. Rose, sekalak anak singuda denga si nggo iperidiken ngataken, ”Keleng ateku Jahwe, janah la lit kai pe si erbanca meriah kal ukurku selain ngelayani Ia. Paksa erban keputusen guna iperidiken, sitik pe la aku sangsi.”

¹⁹ Uga kerna Christopher si ituriken bas pemena artikel enda? Uga perasanna nandangi keputusenna guna iperidiken bas umur 12 tahun? Ikatakenna maka seh kal riahna ukurna. Ia mulai jadi perintis biasa i bas umur 17 tahun, jadi sinampati perpulungen i bas umur 18 tahun, janah gundari ngelayani i Betel. Nina, ”Iperidiken sada keputusen si seh kal tepatna. Kegeluhenku dem alu kepuasen erkiteken erdahin guna Jahwe bage pe organisasiNa.” Adi iperidiken atendu, uga kam banci erban persikapen? Artikel seterusna njabap penungkunen e?