1, 2. (a) Na cava era marautaka na dauveiqaravi ni Kalou nikua? (b) Cava mera cakava na itubutubu vaKarisito kei ira na qase mera vukei ira na itabagone mera kila na bibi ni papitaiso?

E TUKUNA e dua na qase ni ivavakoso vua e dua na cauravou yabaki 12 o Christopher: “Au kilai iko ni o se qai sucu, au marautaka nomu via papitaiso. Ia au via tarogi iko, ‘Na cava o via papitaiso kina?’” E vinaka na inaki ni nona taro na qase ni ivavakoso. Eda marau tale ga nikua meda raica e veiyabaki na nodra papitaiso e veiyasa i vuravura na vica vata na udolu na itabagone. (Dauv. 12:1) Ena gauna vata qori, era saga na itubutubu vaKarisito kei ira na qase mera vukei ira na itabagone me vu mai lomadra nodra vakatulewa, me yavutaki vinaka tale ga.

 ² E tukuni ena Vosa ni Kalou ni yalayala kei na papitaiso e itekitekivu ni nona bula na lotu vaKarisito, ena vakalougatataki koya o Jiova, ena tusaqati koya o Setani. (Vkai. 10:22; 1 Pita 5:8) Koya gona, era na vakavulici luvedra na itubutubu ena ka e vauci mera tisaipeli i Karisito. Na itabagone e sega ni tiko ena dina nona itubutubu, era na vukei koya na qase ni ivavakoso me cakacakataka na ka e vauci ena papitaiso. (Wilika Luke 14:27-30.) Kena ivakaraitaki: Me rawa ni tara e dua na vale me yacova ni oti, ena vinakati na vakavakarau vinaka. E bibi tale ga meda vakavakarau vinaka meda yalodina vei Jiova me “yacova na icavacava.” (Maciu 24:13) Ia na cava moni cakava ra itabagone moni vakadeitaka kina ni oni qaravi Jiova ena vo ni nomuni bula? Meda raica mada.

3. (a) E uqeti keda vakacava na vosa i Jisu kei Pita me baleta na bibi ni papitaiso? (Maciu 28:19, 20; 1 Pita 3:21) (b) Na taro cava eda na veivosakitaka, na vuna?

³ Ke o dua na itabagone o vakasamataka tiko mo papitaiso, dodonu mo vakavinavinakataki. E ka dokai dina meda papitaiso meda iVakadinadina i Jiova. Eda kila tale ga ni bibi meda papitaiso me rawa nida vakabulai. (Maciu 28:19, 20; 1 Pita 3:21) Nomu papitaiso e vakaraitaka ni o yalataka vei Jiova mo qaravi koya me tawamudu. Mo dina gona ena nomu yalayala. Qo e vica na taro mo vakadeitaka kina ke sa ganita mo papitaiso: (1) Au sa yalomatua meu vakatulewa vakataki au? (2) Sa lomaqu sara ga meu papitaiso? (3) Au kila na ibalebale ni noqu yalayala vei Jiova? Meda dikeva yadua mada.

4, 5. (a) Na cava eda kaya kina ni papitaiso e sega ni baleti ira ga na uabula? (b) Cava na ibalebale ni yalomatua?

⁴ E sega ni tukuna na iVolatabu ni dodonu ga mera papitaiso o ira na uabula se o ira sa yacova e dua na yabaki ni bula. Eda wilika ena Vosa Vakaibalebale  20:11: “E kilai na gone ena ka e cakava, e savasava se dodonu na nona ivalavala.” Io, era kila na gone na ka e dodonu, era kila na ibalebale ni nodra yalayala vua na Dauveibuli. E ikalawa bibi gona na papitaiso vei ira na gone era yalomatua, era sa yalataki ira tale ga vei Jiova.—Vkai. 20:7.

⁵ Na cava na ibalebale ni yalomatua? E sega ni okati ga kina na noda tubu vakayago. E tukuna na iVolatabu ni o ira na yalomatua era “vakayagataka nodra vakasama, e vakavulici me vakaduiduitaka na ka e donu mai na ka e cala.” (Iper. 5:14) Kena ibalebale, o ira na yalomatua era kila na ka e donu ena mata i Jiova, ra qai nakita dei e lomadra mera muria qori. Era sega ni vakamuai rawarawa mera caka ca; se mera vakamasuti e veigauna mera cakava na ka e dodonu. Koya gona, o ira na gone era papitaiso era na cakava na ka e dodonu ke sega ni tiko mada ga nodra itubutubu se o ira na uabula.—Vakatauvatana Filipai 2:12.

6, 7. (a) Na ituvaki cava e sotava o Taniela e Papiloni? (b) Cava eda tukuna kina ni gone yalomatua o Taniela?

⁶ Vakacava e rawa nira yalomatua na gone? Vakasamataki Taniela mada. De dua ni se itabagone a kau vakaukaua mai vei rau nona itubutubu me kau vakavesu i Papiloni. Ni tiko e kea, e maliwai ira na lewenivanua e duidui nodra ivakavuvuli ni ka e donu kei na ka e cala. Dua tale na ituvaki dredre e sotava o Taniela: Era dokai koya na lewenivanua e Papiloni, ni dua vei ira na itabagone era digitaki mera tu ena mata ni tui! (Tani. 1:3-5, 13) Ke tiko e Isireli o Taniela, de dua ena sega ni lesi vua qori.

⁷ Na cava e cakava o Taniela? Vakacava e rawai koya na totoka kei na lasa e Papiloni? E veisautaka nona vakabauta se ka e kilai kina? Sega! E tukuna na iVolatabu ni “nakita e lomana o Taniela me kua ni vakadukadukalitaki koya” ena ka kece e salavata kei na sokalou lasu. (Tani. 1:8) Io, e vakasakiti na yalomatua i Taniela!

8. Na cava o vulica vei Taniela?

⁸ Na cava o vulica vei Taniela? O koya e yalomatua e sega ni dau yamekemeke. E sega ni vaka na kamilioni se vokai e dau veisautaka na rokana me tautauvata kei na vanua e tu kina. Kena ivakaraitaki, ni tiko ena Vale ni Soqoni ena vaka na itokani ni Kalou, ia ni tiko e koronivuli ena itokani kei vuravura. O koya e yalomatua ena sega ni kuitaki voli, ena dei tu ga ni vakatovolei na nona vakabauta.—Wilika Efeso 4:14, 15.

9, 10. (a) Ena yaga vakacava nona vakasamataka e dua na itabagone na ka e dau cakava ni vakatovolei nona vakabauta? (b) Cava na ibalebale ni papitaiso?

⁹ Eda kila ni sega ni dua e uasivi; eso na gauna era na cala na itabagone kei na uabula. (Dauv. 7:20) Ia ke o vakasamataka tiko mo papitaiso, ena ka vakayalomatua mo dikeva se vakacava na levu ni nomu via muria na ivakatagedegede i Jiova. O na cakava vakacava qori? Mo taroga, ‘Ena gauna sa oti, au dau muria na ivakatagedegede ni Kalou?’ Vakasamataka lesu na ka o cakava ni vakatovolei nomu vakabauta. Vakacava o vakaraitaka ena gauna qori na yalomatua mo vakaduiduitaka kina na ka e donu mai na ka e cala? Kaya mada ke o dokai ena vuravura i Setani me vakataki Taniela.  Vakacava o na “kila tiko ga se cava na loma i Jiova” ni veisaqasaqa na lomana kei na ka o vakatovolei kina?—Efeso 5:17.

¹⁰ Na cava e bibi kina meda taroga qori? Me tiko vei keda na rai donu me baleta na papitaiso. Me vaka ga sa vakamacalataki mai, na nomu papitaiso e vakaraitaka ni o sa yalayala vei Jiova. Qori nomu yalataka ni o na lomani koya qai qaravi koya mai vu ni lomamu me tawamudu. (Mari. 12:30) O ira kece era papitaiso e dodonu mera dina ena yalayala qori.—Wilika Dauvunau 5:4, 5.

11, 12. (a) Na cava me vakadeitaka rawa e dua e vakasamataka tiko me papitaiso? (b) Cava mo cakava me donu tiko ga kina nomu rai me baleta na ituvatuva i Jiova na papitaiso?

¹¹ E tukuna na iVolatabu nira “na yalorawarawa ni cabori ira” na dauveiqaravi ni Kalou, wili kina na itabagone mera qaravi Jiova. (Same 110:3) Ke o vakasamataka tiko mo papitaiso, mo vakadeitaka ni lomamu dina qori. De dua ena vinakati kina mo dikevi iko, vakabibi ke o susu ena dina.

¹² Sa rairai vica na yabaki nomu raica nodra papitaiso eso, wili kina nomu icaba se o ira mada ga na tacimu e vale. Ke dina qori, na cava mo qarauna? Mo kua ni raica na papitaiso me ka ni veimurimuri se baleta ni o sa yacova e dua na yabaki ni bula. Na cava mo cakava me donu tiko ga kina nomu rai me baleta na ituvatuva i Jiova na papitaiso? Me tiko na gauna mo dau vakasamataka kina na vuna e bibi kina na papitaiso. Ena vakamacalataki ena ulutaga qo kei na kena e tarava e vica na vuna vinaka.

13. O na kila vakacava ni lomamu dina mo papitaiso?

¹³ E vica na sala o rawa ni kila kina ke vu dina mai lomamu nomu via papitaiso. Kena ivakaraitaki, na nomu masu. Na wasoma ni nomu masu kei na ka o masulaka ena kilai kina na nomu veivolekati kei Jiova. (Same 25:4) Levu na gauna e sauma noda masu o Jiova ni vakayagataka na iVolatabu. Kena ibalebale, na ivakarau ni noda vulica na iVolatabu ena kilai kina ke da vinakata dina meda toro volekati Jiova, meda qaravi koya mai vu ni lomada. (Josua 1:8) Mo taroga gona: ‘Au dau wereubiubi niu masu? Au dau vulica wasoma na iVolatabu?’ Ke dau caka e vale na Sokalou Vakavuvale, mo taroga: ‘E dau vu mai lomaqu meu vakaitavi?’ O na kila mai na nomu isaunitaro ke lomamu dina mo papitaiso.

14. Na cava na kedrau duidui na yalayala kei na papitaiso?

¹⁴ E sega ni matata vei ira eso na gone na kedrau duidui na yalayala kei na papitaiso. Kena ivakaraitaki, eso era kaya nira sa yalataki ira vei Jiova, ia era nanuma ni se sega ni kena gauna mera papitaiso. Vakacava e donu qori? Ni dua e yalataki koya, sa tukuna vei Jiova ni na qaravi koya me tawamudu. Gauna e papitaiso kina, e vakaraitaka e matanalevu ni sa yalayala oti. Kena ibalebale na noda papitaiso e vakaraitaka e matanalevu nida sa yalayala oti vei Jiova ena masu. Ni bera gona ni o papitaiso, bibi mo kila na ibalebale ni yalayala.

15. Na cava na ibalebale ni yalayala?

 ¹⁵ Ni o yalataka nomu bula vei Jiova, o sa sega ni lewai iko. O yalataka vua ni na bibi duadua ena nomu bula mo cakava na lomana qai muri na ka kece. (Wilika Maciu 16:24.) Dodonu meda raica vakabibi na yalayala kece, ia e bibi sara na noda yalayala vei Jiova! (Maciu 5:33) O na vakaraitaka vakacava ni o sa sega ni muria na lomamu, o sa nei Jiova?—Roma 14:8.

16, 17. (a) Vakamacalataka na ibalebale ni noda sega ni muria na lomada. (b) Ni dua e yalayala, na cava sa tukuna tiko?

¹⁶ Kena ivakaraitaki, kaya mada ke lolomataka vei iko nomu itokani e dua na motoka. E solia vei iko na kena ivola me vakaraitaka ni sa nomu qai kaya: “Sa nomu na motoka.” Ia e qai tukuna: “Au na maroroya na ki meu draiva. O na sega ni draiva.” O na raica vakacava na “iloloma” ya? Cava nomu rai me baleti koya e soli loloma?

¹⁷ Ni dua e yalataka nona bula vei Jiova, sa tukuna tiko vua na Kalou: “Au sa solia vei kemuni noqu bula. Au sa nomuni.” Ia vakacava ke rua tu nona ivakarau ni bula o koya e yalayala, de dua e veibuku lo tiko kei na dua e tawa vakabauta? Vakacava ke ciqoma e dua na cakacaka ena sega ni qarava kina mai vu ni lomana na cakacaka vakaitalatala se vakaleqa nona tiko ena soqoni vaKarisito? Qori e tautauvata vinaka kei koya e maroroya toka ga na ki ni motoka. Ni dua e yalataka nona bula vei Jiova, sa tukuna tiko vua na Kalou: “Oni sa lewa noqu bula. Ke veisaqasaqa na ka oni vinakata kei na ka au vinakata, ena yaco ga na lomamuni e veigauna.” E salavata vinaka qori kei na ivakarau ni rai i Jisu ni bula e vuravura. E kaya: “Niu sega ni lako sobu mai lomalagi meu cakava ga na lomaqu, na loma i koya ga e talai au mai.”—Joni 6:38.

18, 19. (a) Eda kila vakacava mai na ka erau tukuna o Rose kei Christopher ni veivakalougatataki na papitaiso? (b) Cava o nanuma me baleta na kena dokai na noda papitaiso?

¹⁸ Macala gona ni papitaiso e ikalawa bibi me kua ni raici vakamamada. Ena gauna vata qori, e ka dokai meda yalayala da qai papitaiso. Ke ra lomani Jiova na gone, ra qai kila na ibalebale ni yalayala, era na sega ni tu suka ni papitaiso; se mera veivutunitaka nodra vakatulewa. E tukuna o Rose e dua na itabagone papitaiso: “Au lomani Jiova, e sega ni dua na ka e tautauvata kei na marau au vakila niu qaravi koya. Au sega vakadua ni veivutunitaka na noqu vakatulewa meu papitaiso.”

¹⁹ Ia vakacava o Christopher a vakamacalataki ena itekitekivu ni ulutaga qo? Vakacava e yavutaki vinaka nona vakatulewa me papitaiso ni se yabaki 12? Ni vakasamataka lesu o Christopher na nona yalayala kei nona papitaiso, dua na ka nona marautaka nona vakatulewa. E tekivu painia tudei ni se yabaki 17, e lesi me dauveiqaravi ni ivavakoso ni sa yabaki 18, nikua sa veiqaravi tiko e Peceli. E kaya: “E donu noqu vakatulewa meu papitaiso. E veivakacegui na ka au cakava tiko qo vei Jiova kei na nona isoqosoqo.” Ke o vakasamataka tiko mo papitaiso, o na vakarautaki iko vakacava? Ena vakamacalataki qori ena ulutaga tarava.