1, 2. (a) Dahaka dainai Dirava ena taunimanima idia moale? (b) Edena dala ai Keristani tama sina bona elda taudia ese matamata taudia idia durua diba?

ELDA ta be mauri lagani 12 merona, Christopher, dekenai ia gwau: “Oi vara negana amo oi lau diba, bona lau moale oi be oi ura bapatiso. Lau ura henanadai, ‘Dahaka dainai oi ura bapatiso?’” Unai be henanadai namona, ani? Ita moale badina lagani ta ta ai, tanobada hegegemadai matamata taudia momo idia bapatiso. (Had. 12:1) Danu, Keristani tama sina bona kongrigeisen elda taudia ese matamata taudia idia durua be namo, unai amo idia sibona ese unai abia hidi do idia karaia bona badina maorona dainai unai idia karaia be namo.

² Baibel ia gwau, Keristani tauna be ena mauri ia gwauhamatalaia bona ia bapatiso murinai, Iehova amo hahenamo do  ia abia sibona lasi, to Satani amo hahetoho do ia davaria danu. (Aon. 10:22; 1 Pet. 5:8) Unai dainai, Keristani tama sina ese nega idia atoa be namo, unai amo edia natudia dekenai Keriso ena hahediba tauna ai lao karana ena anina idia hahedinaraia diba. To kongrigeisen ai, matamata taudia haida edia tama sina be Keristani taudia lasi. Unai dainai elda taudia ese idia dekenai hahediba tauna ai lao karana ena “davana” idia herevalaia be namo. (Luka 14:27-30 duahia.) Ta be ruma ta ia ura haginia neganai, do ia hegaegae guna, unai hegeregerena bema ta ia ura Iehova ia hesiai henia “ela bona dokona,” ia hegaegae guna be namo. (Mat. 24:13) Vadaeni, matamata taudia be dahaka idia karaia be namo, unai amo edia mauri ibounai lalonai Iehova idia hesiai henia diba? Mani ita itaia.

3. (a) Bapatiso karana dekenai, Iesu bona Petero edia hereva amo dahaka ita dibaia? (Mat. 28:19, 20; 1 Pet. 3:21) (b) Edena henanadai do ita herevalaia, bona dahaka dainai?

³ Matamata tauna e, oi be bapatiso oi lalohadailaia noho, a? Bema oibe, ai ura oi ai hanamoa! Oi bapatiso bona Iehova ena Witnes tauna ai oi lao be hahenamo badana. Danu, Keristani taudia ibounai idia bapatiso be namo, unai amo hahemauri idia abia diba. (Mat. 28:19, 20; 1 Pet. 3:21) Oi ura Iehova dekenai do oi karaia gwauhamatana oi badinaia dainai, oi hegaegae be gau badana. Unai dainai, sibona oi nanadaia: (1) Lau hegeregere inai abia hidi lau karaia totona, a? (2) Inai be sibona egu abia hidi, a? (3) Iehova dekenai gwauhamata karana ena anina lau lalopararalaia, a? Mani unai henanadai ta ta ita laloa.

4, 5. (a) Dahaka dainai bapatiso be mauri lagani bada taudia sibona totona lasi? (b) Keristani tauna be edena bamona do ia diba ia hegeregere?

⁴ Baibel ia gwau lasi mauri lagani bada taudia o gavamani ese maoro ia henia taudia sibona be bapatiso idia abia diba. Aonega Herevadia 20:11 ia gwau: “Mero maragina ese iena kara dekena amo, sibona ena mauri ia hedinaraia noho. Iena  kara dekena amo do oi diba, unai mero ia goeva bona ia maoro, o lasi.” Matamata tauna be ia diba dahaka be maoro bona ena Havaraia Tauna dekenai ena mauri ia gwauhamatalaia ena anina ia lalopararalaia danu. Unai dainai, bema iena kara amo ia hahedinaraia ia be ia hegeregere bona Iehova dekenai ena mauri ia gwauhamatalaia vadaeni, ia bapatiso diba.—Aon. 20:7.

⁵ Edena bamona do oi diba oi be oi hegeregere? Ta ena tauanina ena bada ese do ia hahedinaraia lasi ia be ia hegeregere. Baibel ia gwau, “taunimanima badadia” o idia hegeregere taudia be “edia darana idia gaukaralaia karana amo, sibodia idia hadibaia, unai amo maoro bona kerere edia idau idia dibaia diba.” (Heb. 5:14) Danu, bema ta ia laloa ia hegeregere, anina be ia diba dahaka be Iehova ena matanai ia maoro bona ena lalona ia hadaia unai do ia badinaia. Unai dainai, hahetoho ia davaria neganai, karaharaga ia dadaraia bona kara maorona ia karaia. Anina be ia bapatiso matamata tauna be Dirava ena taravatu do ia badinaia noho, ena be ena tama sina o taunimanima badadia idia noho lasi.—Filipi 2:12 sekea.

6, 7. (a) Babulonia ai, Daniela be dahaka hahetoho ia davaria? (b) Edena dala ai Daniela ia hahedinaraia Dirava ena taravatu ia laloa bada?

⁶ Matamata taudia be Dirava ena taravatu idia badinaia diba, a? Daniela mani ita laloa. Reana ia be do mero neganai, iena tama sina amo ia idia kokia bona Babulonia dekenai idia abia lao. Unuseniai idia noho taudia edia lalohadai namo bona dika dekenai be idau. Daniela ese hahetoho ma ta ia davaria danu: Babulonia ai, ia be dagi bada tauna bamona idia kara henia. Oibe, ia bona matamata taudia ma haida idia abia hidi King ena gaukara do idia karaia! (Dan. 1:3-5, 13) Babulonia ai, Daniela be hahenamo idauidau ia abia, to Israela ai unai ia vara lasi.

⁷ Unai ibounai dekenai Daniela be dahaka ia karaia? Babulonia ena aniani bona kohu namodia ese ena lalona idia veria, a? Iena noho dalana matamata dainai ena Keristani ladana namona eiava ena abidadama ia rakatania, a? Lasi momokani! Baibel ia gwau Daniela be Babulonia ai ia noho neganai, “ena lalona ia hadaia” tomadiho koikoi gaudia amo “sibona do ia hamiroa lasi.” (Dan. 1:8, NWT) Unai amo Daniela ia hahedinaraia ia be Dirava ena taravatu ia laloa bada!

8. Daniela ena kara amo dahaka oi dibaia?

⁸ Daniela ena kara amo dahaka oi dibaia? Ia matamata tauna be ia abia dae gaudia ia badinaia diba. Uda ai ia noho gesoa be ena noho gabuna hegeregerena ena kopina kala ia haidaua diba. Namo lasi matamata taudia be unai bamona. Anina be Kingdom Hall ai ia be Dirava ena turana bamona ia kara, to sikuli ai tanobada taudia bamona ia kara. Ia ese ena turadia edia kara do ia badinaia lasi, to iena abidadama idia tohoa neganai, do ia gini goada.—Efeso 4:14, 15 duahia.

9, 10. (a) Matamata tauna be hahetoho ia davaria neganai, dahaka ia laloa be namo? (b) Bapatiso ena anina be dahaka?

⁹ Ita ibounai be ita goevadae lasi dainai, nega ta ta ita kerere. (Had. 7:20) Unai dainai, bapatiso oi lalohadailaia noho lalonai, aonega karana be emu lalona oi hadaia Iehova ena taravatu oi badinaia totona. Edena dala ai unai oi karaia diba? Sibona oi nanadaia, ‘Dina ta ta ai Dirava ena taravatu lau badinaia, a?’ Emu abidadama ia tohoa hahetoho ta oi hanaia dalana mani oi laloa.  Emu kara amo oi hahedinaraia oi be maoro bona kerere edia idau oi diba, a? Daniela hegeregerena, Satani ena tanobada tauna ta ese oi ia kara namo henia be edena bamona? Oi ese ‘Iehova ena ura do oi lalopararalaia noho,’ ena be Dirava ena ura be emu ura amo ia idau, a?—Efe. 5:17.

¹⁰ Dahaka dainai unai henanadai ita laloa be namo? Unai amo do oi diba bema oi hegeregere bapatiso oi abia. Matamanai ita herevalaia bamona, ta ia bapatiso neganai, ia be Iehova dekenai ia gwauhamata, ia do ia lalokau henia bona mai kudouna ibounai ida ia do ia hesiai henia. (Mar. 12:30) Idia bapatiso taudia ibounai ese edia gwauhamata idia badinaia be namo.—Hadibaia Tauna 5:4, 5 duahia.

11, 12. (a) Bapatiso ia lalohadailaia tauna be dahaka ia laloa be namo? (b) Iehova ena lalohadai bapatiso dekenai oi abia totona, dahaka oi karaia be namo?

¹¹ Baibel ia gwau Iehova ena taunimanima, matamata taudia danu, be “mai edia ura kwalimu danu” ia do idia hesiai henia. (Sal. 110:3) Unai dainai namona be bapatiso ia lalohadailaia tauna ese sibona ena lalona ia tahua bema unai be sibona ena ura. Hereva momokani lalonai idia tubu taudia dekenai unai be mai anina bada.

¹² Idia hanaia laganidia lalonai, taunimanima momo idia bapatiso—emu turadia haida bona reana emu famili danu. Bema unai badina dainai oi ura bapatiso, dahaka oi laloa be namo? Namo lasi oi laloa bapatiso be vaia matamata taudia ibounai ese idia badinaia karana ta sibona. Iehova ena lalohadai bapatiso dekenai oi abia totona, dahaka oi karaia be namo? Namona be nega oi atoa, ita bapatiso ena badina oi lalohadailaia totona. Inai stadi bona vaira stadi ai badina namodia haida do ita herevalaia.

13. Edena bamona do oi diba oi be mai kudouna ibounai ida bapatiso oi lalohadailaia?

¹³ Gau haida ese do idia hahedinaraia, oi be mai kudouna ibounai ida bapatiso oi lalohadailaia. Hegeregere, emu guriguri ese do ia hahedinaraia oi be oi ura Iehova oi hesiai henia. Nega hida oi guriguri bona emu guriguri herevadia ese do idia hahedinaraia emu hetura karana Iehova ida be goada. (Sal. 25:4) Iehova ese iseda guriguri ia haerelaia dalana hereadaena be Baibel amo. Baibel stadilaia namonamo karana ese do ia hahedinaraia, ita ura Iehova kahirakahira ita lao bona mai kudouna ibounai ida ia ita hesiai henia. (Ios. 1:8) Unai dainai sibona oi nanadaia: ‘Egu guriguri ai dahaka lau herevalaia? Baibel lau stadilaia hanaihanai, a?’ Bona bema emu Keristani ruma besena be nega ta ia abia hidi Ruma Bese Ena Tomadiho totona, sibona oi nanadaia: ‘Mai ura ida unai dala lau badinaia, a?’ Oiemu haere ese do ia hahedinaraia, sibona emu ura dainai oi ura bapatiso.

14. Gwauhamata bona bapatiso edia idau hahedinaraia.

¹⁴ Haida be inai hereva rua, gwauhamata bona bapatiso edia idau idia daradaralaia. Hegeregere, matamata taudia haida idia gwau idia be Iehova dekenai idia gwauhamata vadaeni, to idia do hegeregere lasi idia bapatiso totona. Unai be lalohadai maorona, a? Gwauhamata ena anina be Iehova oi hamaoroa ia do oi hesiai henia ela bona hanaihanai. Bena oi bapatiso neganai, oi ese guriguri amo Iehova dekenai oi karaia gwauhamatana be taunimanima vairanai oi hamomokania.  Unai dainai oi do bapatiso lasi neganai, gwauhamata ena anina oi lalopararalaia be namo.

15. Dirava dekenai oi gwauhamata ena anina be dahaka?

¹⁵ Emu mauri be Iehova dekenai oi gwauhamatalaia neganai, oi be ia dekenai emu mauri oi henia. Iehova dekenai oi gwauhamata emu mauri lalonai iena ura do oi atoa guna. (Mataio 16:24 duahia.) Ita karaia gwauhamata ibounai ita lalodia bada be namo, to Iehova Dirava dekenai ita karaia gwauhamata be mai anina bada momokani. (Mat. 5:33) Edena dala ai oi hahedinaraia oi be sibona emu ura oi dadaraia bona hari oi be Iehova ena?—Roma 14:8.

16, 17. (a) Sibona emu ura dadaraia karana ena anina be dahaka? (b) Ia gwauhamata tauna be reana Iehova dekenai dahaka ia gwau?

¹⁶ Mani oi laloa, emu turana ta ese motuka ta be harihari gauna bamona oi dekenai ia henia. Oi dekenai motuka ena pepa ia henia bona ia gwau: “Inai be emu motuka.” To ma ia gwau: “Lau ese motuka ena ki do lau dogoatao. Bona lau sibona ese motuka do lau taria, oi lasi.” Unai “harihari gauna” be edena bamona do oi laloa? Bona harihari gauna ia henia tauna be edena bamona do oi laloa?

¹⁷ Bema ta be Iehova dekenai ia gwauhamata, oi laloa unai tauna amo ia be dahaka do ia ura? Ia be Iehova dekenai ia gwau: “Egu mauri be oi dekenai lau henia. Lau be oiemu.” To gabeai, unai tauna be mauri dala rua ia badinaia matamaia, reana hunia dalanai witnes lasi tauna ta ia tura henia be edena bamona? Eiava ia abia dae moni gaukarana dainai, ia be nega lasi Iehova ia hesiai henia o hebou ia lao henia totona? Unai be hegeregere motuka ena ki ia dogoatao tauna bamona, ani? Iehova dekenai ena mauri ia gwauhamatalaia tauna be hegeregere sibona dekenai ia gwau: “Oi be egu mauri ena biaguna, lau lasi. Bema emu ura be egu ura amo ia idau, nega ibounai emu ura do lau abia hidi bona karaia.” Unai be Iesu ena lalohadai hegeregerena, ia be tanobada ai ia noho neganai, ia gwau: “Guba amo lau diho mai . . . egu ura karaia totona lasi, to lau ia siaia tauna ena ura lau karaia totona.”—Ioa. 6:38.

18, 19. (a) Rose bona Christopher edia hereva amo dahaka oi dibaia? (b) Bapatiso be edena bamona oi laloa?

¹⁸ Momokani, bapatiso be mai anina bada abia hidina. Ma danu, ta ese ena mauri ia gwauhamatalaia bona ia bapatiso be hahenamo badana. Oibe, Iehova idia lalokau henia bona edia gwauhamata ena anina idia lalopararalaia matamata taudia idia ura bapatiso idia abia. Bona unai abia hidi idia karaia dainai, gabeai idia lalohisihisi lasi. Matamata kekeni ladana Rose ia gwau: “Iehova lau lalokau henia, bona lau ura bada ia lau hesiai henia. Unai dainai bapatiso totona lau karaia abia hidi lau daradaralaia lasi.”

¹⁹ To matamanai ita herevalaia tadikaka, Christopher, be edena bamona? Ena mauri lagani be 12 neganai bapatiso ia abia dainai, ia be abia hidi kererena ia karaia, a? Christopher be ia karaia gwauhamatana bona ia bapatiso dainai ia moale. Iena mauri lagani be 17 neganai, regula painia gaukara ia karaia, bona mauri lagani 18 neganai, hesiai tauna ai ia lao. Hari ia be Betele ai ia gaukara. Ia gwau: “Lau dekenai bapatiso be abia hidi maorona. Lau moale badina Iehova ena orea totona gaukara momo lau karaia diba.” Bema bapatiso oi lalohadailaia, edena dala ai oi hegaegae diba? Stadi gabena ese unai do ia herevalaia.