1, 2. (a) Ang’o ma keloga mor ne jotich Nyasaye e kindegi? (b) Ere kaka jonyuol ma Jokristo kod jodong-kanyakla nyalo konyo rowere mondo ging’e gimomiyo ibatiso ng’ato?

JADUONG’-KANYAKLA moro ne wuoyo gi rawera miluongo ni Christopher ma jahigni 12. Nowachone niya: “Aseng’eyi chakre nyuoli kendo amor winjo ni idwaro mondo obatisi. Daher penji ni, ‘Ang’o momiyo idwaro kawo okang’ ma kamano?’” Penjo ma jaduong’-kanyaklano nopenjo rawerano ne en penjo mowinjore ndi. En adier ni waduto wamorga neno kaka higa ka higa ibatiso rowere gana gi gana e piny mangima. (Ekl. 12:1) E kindego bende, jonyuol ma Jokristo kaachiel gi jodong-kanyakla dwaroga ni gibed gadier ni rowerego  otimo yiero ma ok ochun-gi kendo rowerego ong’eyo maber gimomiyo gitimo yierono.

² Wach Nyasaye nyisowa ni okenge ma ng’ato kawo mondo ochiwre ne Nyasaye ma obatise, e chakruok mar ngima ma biro miyo oyud gueth ma wuok kuom Jehova, kaachiel gi akwede ma wuok kuom Satan. (Nge. 10:22; 1 Pet. 5:8) Omiyo, jonyuol ma Jokristo kawoga thuologi mondo gipuonj nyithindgi tiend bedo japuonjre Kristo. To kuom rowere ma jonyuolgi ok gin Joneno, jodong-kanyakla konyogiga e yo mamuol mondo ging’e gik ma dwarore mondo ng’ato obed japuonjre Kristo. (Som Luka 14:27-30.) Mana kaka chenro maber dwarore eka ger ot ma rum, e kaka timo ikruok maber dwarorega e ka ng’ato oti ne Jehova kochung’ motegno “nyaka giko.” (Mat. 24:13) To ang’o ma rowere nyalo timo mondo ging’ad mar tiyo ne Jehova e ngimagi duto? We wane ane.

3. (a) Weche ma Yesu kod Petro nowacho, konyowa nade ng’eyo ni batiso en gima onego okaw mapek? (Mat. 28:19, 20; 1 Pet. 3:21) (b) Gin penjo mage ma wabiro nono, to nikech ang’o?

³ Be dibed ni in rawera ma gombo mondo obatise? Ka en kamano to wapwoyi ahinya! En thuolo makende mondo obatisi kaka achiel kuom Joneno mag Jehova. E wi mano, batiso en gima dwarore ahinya ne Jokristo, kendo en okang’ maduong’ ahinya mabiro miyo ng’ato oyud resruok. (Mat. 28:19, 20; 1 Pet. 3:21) Nikech igombo ahinya rito singo mibiro timo ne Jehova, dwarore ni iikri maber ka pok ikawo okang’ maduong’no. Kuom mano, ber mondo wanon penjo moko adek ma biro konyi ng’eyo kabe iikori ne batiso. Penjogo gin: (1) Be pacha osetegno moromo ma nyalo miyo atim yiero ma kamano? (2) Be an awuon agombo timo kamano? (3) Be ang’eyo tiend chiwruok ne Jehova? We wanon ane penjogo.

4, 5. (a) Ang’o momiyo batiso ok en mana mar joma dongo kende? (b) Tiend bedo Jakristo ma pache otegno en ang’o?

⁴ Muma ok wach ni joma dongo kende kata rowere mosechako bedo gi ratiro moko ni e ma onego obatisi. Ngeche 20:11 wacho niya: ‘Nyathi ng’ere kuom timne; ka timne ler kata timne owinjore.’ Kata mana rawera nyalo ng’eyo tiend timo gima kare ma ochiwre ne Jachuechne. Omiyo, batiso en okang’ maduong’ kendo mowinjore ne rawera mosenyiso maler ni pache otegno kendo osechiwore ne Jehova.—Nge. 20:7.

⁵ Tiend bedo ng’at ma pache otegno en ang’o? Bedo ng’at ma pache otegno oriwo gik mathoth moloyo mana bedo gi del madongo. Muma wacho ni joma pachgi otegno gin “joma osetieg nyalogi mar ng’eyo tiend weche . . . mondo gipog gik ma kare kod gik ma ok kare.” (Hib. 5:14) Kuom mano, joma pachgi otegno ong’eyo gik ma kare e wang’ Jehova kendo giseng’ado e chunygi mar timo gigo. Nikech mano, ok yondhgi mapiyo mondo gitim gik ma ok kare kendo ok chun-gi timo gima kare. E yo ma kamano, rawera ma ibatiso onego obed ng’at ma biro luwo chike Nyasaye kata ka jonyuolne kod jomamoko madongo onge.—Pim gi Jo-Filipi 2:12.

6, 7. (a) Ler ane pek ma Daniel noromogo kane en Babilon. (b) Ere kaka Daniel nonyiso ni pache otegno?

⁶ Be rowere nyalo nyiso ni pachgi otegno kamano? We wanon ane ranyisi mar Daniel e Muma. Nyalo bedo ni ne en rawera kane okawe kuom jonyuolne githuon motere e tuech Babilon. Apoya nono, nochako dak e dier joma ne nigi paro mopogore ahinya e wi gik makare kod ma ok kare. E wi mano, ne nitiere obadho machielo ma noyudo kuno. Obadhono ne en ni nodhiale ahinya kendo nomiye luor makende e piny Babilon. Daniel ne en achiel kuom rowere ma noyier mondo ochung’ e nyim ruoth! (Dan. 1:3-5, 13) Nenore ni noyudo thuolo mang’eny mabeyo e Babilon ma samoro ne ok onyal yudo e piny Israel.

⁷ Ere kaka Daniel notimo e chalgo duto? Be gik mabeyo ma lombo wang’ ma ne ni Babilon noyondhe? Be noyie mondo gik ma timore e alworane olok pache kata oketh yie mare? Ooyo ng’ang! Muma wacho ni kane Daniel ni Babilon, ‘nosingore ei chunye ni ok’ notim gimoro amora motudore gi lamo ma miriambo ma ne nyalo miyo ‘oketh ne Nyasache.’ (Dan. 1:8) Daniel nonyiso ni pache otegno.

8. Ranyisi mar Daniel puonjowa ang’o?

⁸ Ranyisi mar Daniel puonjowa ang’o? Rawera ma pache otegno ni gadier e wi gik mosepuonje ma oyiego. Ok ochal gi ong’ongruok kata haniaf ma siko loko kite kaluwore gi kama entie. Ok otimre ni en osiep Nyasaye ka en e Od Romo to ka en e skul to en osiep piny. Kar bedo ng’at ma irundo pache koni gi koni, odong’ kogurore motegno kata mana e kinde ma itemo yie mare.—Som Jo-Efeso 4:14, 15.

9, 10. (a) En ber mane ma rawera nyalo yudo kuom paro matut kaka osebedo konyagore gi tembe moseromogo kuom kinde matin mosekalo? (b) Tiend batiso en ang’o?

⁹ En adier ni waduto warem, omiyo kinde ka kinde wabothga bed ni wan joma tindo kata joma dongo. (Ekl. 7:20) Kata kamano, sama iparo wach batiso, nyalo bedo maber nono matut ni ing’ado mar makori gi chike Jehova e okang’ ma romo nade. Inyalo ng’eyo nade okang’  ma ibiro makorigo gi chike Jehova? Penjri kama, ‘Asebedo ka aluwo chike Nyasaye e okang’ ma romo nade kuom kinde matin mosekalo?’ Par ane kaka isebedo kitimo sama iromo gi tembe. Be isenyiso ni in gi rieko ma dwarore e pogo ber gi rach? To nade ka ng’ato odhiali e yo makende e piny Satanni kaka ne otim ne Daniel? Be inyalo ‘dhi nyime yango dwach Jehova’ kata kapo ni dwache tuomore gi gima iyondhi mondo itim?—Efe. 5:17.

¹⁰ Ang’o momiyo wapenjo penjogi? Wapenjogi mondo gikonyi bedo gi paro mowinjore e wi batiso. Mana kaka osewach motelo, batiso en gima nyiso ni isesingori ne Jehova ni ibiro here kendo tiyone gi chunyi duto nyaka chieng’. (Mar. 12:30) Ji duto ma ibatiso onego ong’ad mar timo kaka ne gisesingore.—Som Eklesiastes 5:4, 5.

11, 12. (a) Ng’at ma dwaro ni obatise nyaka bed gadier kuom wach mane? (b) Ang’o ma biro konyi bedo gi paro mowinjore e wi chenro ma Jehova oketo e wi wach batiso?

¹¹ Muma wacho ni jotich Jehova moriwo nyaka rowere ne dhi tiyone ka ‘gichiwore gi hera.’ (Zab. 110:3) Omiyo ng’at ma dwaro mondo obatise, onego obed gadier ni batiso en gima en owuon ogombo kowuok e chunye. Mano nyalo dwaro ni ng’ato ononre adimba to ahinya ahinya kapo ni owuok e ot ma jonyuol gin Joneno.

¹² Kuom higni moko mosekalo, nyalo bedo ni iseneno ji mang’eny ka ibatiso moriwo nyaka mbeseni kata nyithindu moko. Ka en kamano, en ang’o monego itang’go? Bed motang’ mondo kik ine batiso kaka gima joma tindo jatimo ka gisechopo e higni moko. Ang’o ma biro konyi mondo ibed gi paro mowinjore e wi chenro ma Jehova oketo kuom batiso? Kawga thuolo mar paro gimomiyo batiso en gima onego ikaw mapek. Sulani kod ma luwe oting’o paro ma nyiso gimomiyo batiso en gima onego okaw mapek.

13. Ere kaka inyalo ng’eyo ni gombo ma in-go mondo obatisi owuok e chunyi?

¹³ Nitie yore minyalo ng’eyogo ka yiero mitimo mondo obatisi owuok e chunyi adier. Kuom ranyisi, gombo ma in-go mar tiyo ne Jehova biro nenore e yo miwuoyogo gi Nyasaye e lamo. Wuoyo gi Jehova e lamo nyading’eny kaachiel gi nyise weche manie chunyi e yo moriere, biro nyiso ni winjruok ma in-go kode otegno maromo nade. (Zab. 25:4) Yo maduong’ ma Jehova tiyogago e dwoko lamowa en kokalo kuom Wachne. Omiyo, kinda ma watimo mondo wapuonjrego Muma en gimachielo ma nyiso ni wadwaro sudo machiegni gi Jehova kendo ni wadwaro tiyone kowuok e chunywa. (Jos. 1:8) Kuom mano, penjri niya: ‘Be awuoyoga e yo moriere sama alemo? Be ajapuonjora Muma ma ok abara?’ To ka joodu timoga Lamo mar Joot, penjri kama: ‘Be ajabedoga e lamono?’ Dwoko michiwo ne penjogi biro konyi ng’eyo ka be adier igombo mondo obatisi.

14. Ler ane pogruok ma nitie e kind chiwruok ne Nyasaye kod batiso.

¹⁴ Nitie joma samoro ok ong’eyo pogruok mantie e kind chiwruok ne Nyasaye kod batiso. Kuom ranyisi, rowere moko wachoga ni gisechiwore ne Jehova to pod ok giikore mondo obatisgi. Be paro ma kamano owinjore adier?  Tiend chiwruok ne Jehova en wuoyo kode e lamo kinyise ni ibiro tiyone nyaka chieng’. Kae to sama ibatiso ng’ato, mano nyiso jomoko ni kare nosechiwore ne Jehova. Kuom mano, batiso en gima nyiso e lela ni ng’ato nosechiwore owuon kar kende ne Jehova e lamo. Ka pok obatisi, dwarore ni ing’e tiend chiwruok ne Nyasaye.

15. Chiwruok ne Nyasaye tiende en ang’o?

¹⁵ Kokete e yo mayot, sama ichiwori ne Jehova, inyiso ni isemiye ngimani. Isingo ne Jehova ni ibiro keto dwache obed mokwongo ne gimoro amora e ngimani. (Som Mathayo 16:24.) En adier ni singo moro amora onego okaw mapek, kata kamano, singo motim ne Jehova to onego okaw mapek moloyo. (Mat. 5:33) Ere kaka inyalo nyiso ni isekwerri iwuon kendo ni sani in mwandu Jehova?—Rumi 14:8.

16, 17. (a) Tiend kwerruok iwuon en ang’o? (b) Sama ng’ato chiwore ne Nyasaye, ochalo ng’at ma nyise nang’o?

¹⁶ Kuom ranyisi, tem ane paro ni osiepni moro dwaro miyi mtoka kaka mich. Kae to onyisi niya: “Mtokani mari.” To nade ka osiepnino omedo wachoni kama: “Ofungu to ok amiyi nikech an e ma abiroga riembo mtokani to ok in.” Inyalo neno nade mich ma kamano? Ibiro kawo osiepnino nade?

¹⁷ Koro par ane gima Jehova nyalo dwaro mondo ng’at mochiworene otim. Ng’atno osenyise niya: “Asemiyi ngimana. An mwanduni.” To nade kapo ni ng’atno wacho ni otiyo ne Nyasaye to kare owuondore, samoro komako osiep mar kisera gi ng’at ma ok Janeno? Nade koyie mondo ondike tich ma biro mone dhi e tij lendo kaka dwarore kod dhi e chokruoge mag Jokristo ma ok obare? Donge mano chalo gi kano ofungu mar mtoka? Ng’at mochiwore ne Jehova chalo ng’at ma nyise niya: “Abiro tiyo gi ngimana e timo dwachi moloyo timo dwacha. Ka dipo ni dwacha tuomore gi mari, abiro yiero mar timo dwachi kinde duto.” Mano biro chalo gi paro ma Yesu ne nigo ka ne en e pinyka. Nowacho niya: “Aselor ka awuok e polo mondo atim, ok dwacha awuon, to dwach ng’at ma ne oora.”—Joh. 6:38.

18, 19. (a) Ranyisi mar Rose gi Christopher nyiso nade ni batiso en thuolo makende ma kelo gueth mogundho? (b) Ineno nade chenro mar batiso?

¹⁸ Nenore maler ni batiso en okang’ maduong’ ma ng’ato ka ng’ato onego okaw mapek. Bende, en thuolo makende momiwa mondo ng’ato ochiwre kendo obatise. Rowere mohero Jehova kendo mong’eyo gimomiyo ng’ato chiworene, ok dikre ne batiso kata yuago ang’e ni ne giyiero timo kamano. Rawera moro mosebatisi miluongo ni Rose nowacho niya: “Ahero Jehova kendo onge gimoro amora ma ne nyalo mora mopogore gi tiyone. Onge gimoro amora masetimo e ngimana ma an-go gadier moloyo yiero ma natimo mondo obatisa.”

¹⁹ To nade Christopher ma nosewuo kuome e chak sulani? Be yiero ma notimo mondo obatise kojahigni 12 notimo kose ikore maber? Christopher paroga komor kaka nochiwore ne Nyasaye mi obatise. Nobedo painia mapile kojahigni 17, nokete obed jakony-tich kojahigni 18, to gie sani otiyo e Bethel. Owacho kama: “Yiero ma natimo mondo obatisa ne en yiero makare. Tich ma atimo ne Jehova kod riwruok mare kelona mor mogundho.” Kapo ni ichano mondo obatisi, ere kaka inyalo ikori? Sula maluwo mae biro wuoyo e wi penjono.