1, 2. а) Хуыцауы адӕмӕн абон цины хос цы у? б) Ныййарджытӕн ӕмӕ хистӕр нӕлгоймӕгтӕн сӕ бон куыд у ӕрыгӕттӕн ӕххуыс кӕнын, цӕмӕй, донаргъуыд цы нысан кӕны, уый бамбарой?

«ДӔ РАЙГУЫРДӔЙ фӕстӕмӕ дӕ зонын,– загъта хистӕр нӕлгоймаг 12-аздзыд Кристоферӕн,– ӕмӕ мын тынг ӕхсызгон у, донаргъуыд райсын дӕ кӕй фӕнды, уый. Фӕлӕ дӕ хъуамӕ бафӕрсон: уыцы къахдзӕф саразын дӕ цӕмӕн фӕнды?» Уыцы хистӕр нӕлгоймаг ӕй уымӕй хуымӕтӕджы нӕ бафарста. Алы аз дӕр ӕрыгӕттӕй мингӕйттӕ донаргъуыд кӕй исынц, уый нын цины хос  куыннӕ у (Еккл. 12:1). Фӕлӕ сӕ ныййарджыты дӕр ӕмӕ ӕмбырды хистӕр нӕлгоймӕгты дӕр фӕнды, цӕмӕй уыцы къахдзӕф аразой, уый сӕхи кӕй фӕнды, уымӕ гӕсгӕ, стӕй цӕмӕй хорз ӕмбарой, донаргъуыд райсын цы нысан кӕны, уый.

² Библийӕ бӕрӕг у, адӕймаг йӕхи Хуыцауӕн куы снывонд кӕны ӕмӕ донаргъуыд куы райсы, уӕд ног цардӕй цӕрын кӕй райдайы. Уый та, иуӕй, ууыл дзурӕг у, ӕмӕ уыцы адӕймагӕн Йегъовӕ арфӕ кӕндзӕн, иннӕмӕй та – Хӕйрӕг йӕ ныхмӕ кӕй цӕудзӕн (Ӕмб. 10:22; 1 Пет. 5:8). Уымӕ гӕсгӕ ныййарджытӕ хъуамӕ сӕ сывӕллӕттӕн амоной, Чырыстийы ахуыргӕнинаг уай, уый цӕуыл дзурӕг у, уый. Кӕд сывӕллонӕн йӕ ныййарджытӕ чырыстӕттӕ не сты, уӕд та йын ӕмбырды хистӕр нӕлгоймӕгтӕ фӕлмӕнӕй ӕххуыс кӕндзысты уыцы хъуыддаг бамбарынӕн. (Бакӕс Лукайы 14:27–30.) Хӕдзар кӕронмӕ саразынӕн алцыдӕр бацӕттӕ кӕнын куыд фӕхъӕуы, афтӕ ӕрыгӕттӕ дӕр хъуамӕ донаргъуыд райсынмӕ сӕхи хорз бацӕттӕ кӕной, цӕмӕй Йегъовӕйӕн «кӕронмӕ» иузӕрдионӕй лӕггад кӕной (Матф. 24:13). Цымӕ сӕ бон цы у аразын, цӕмӕй сӕ зӕрдиагӕй бафӕнда Йегъовӕйӕн ӕнустӕм лӕггад кӕнын? Цӕй ӕмӕ йӕ базонӕм.

3. а) Донаргъуыд райсын куыд ахсджиаг у, уый тыххӕй Йесойы ӕмӕ Петры ныхӕстӕй цы ис базонӕн? (Матф. 28:19, 20; 1 Пет. 3:21). б) Цавӕр фарстатыл аныхас кӕндзыстӕм ӕмӕ цӕмӕн?

³ Кӕд ды дӕр ӕрыгон дӕ ӕмӕ донаргъуыд райсыныл хъуыды кӕныс, уӕд раппӕлинаг дӕ! Донаргъуыд райсай ӕмӕ Йегъовӕйы Ӕвдисӕн суай, уый стыр кад у. Уымӕй уӕлдай, донаргъуыд хъуамӕ алы чырыстон дӕр райса. Стӕй уыцы хъуыддаг тынг ахсджиаг у, цӕмӕй адӕймаг стыр бӕллӕхы рӕстӕг аирвӕза (Матф. 28:19, 20; 1 Пет. 3:21). Донаргъуыд куы райсай, уӕд равдисдзынӕ, Йегъовӕйӕн дзырд кӕй радтай, ӕнустӕм дын лӕггад кӕндзынӕн, зӕгъгӕ. Уыцы дзырд сӕххӕст кӕнын дӕ куыннӕ фӕнды. Уӕдӕ ахъуыды кӕн, донаргъуыд райсынмӕ ӕцӕгдӕр цӕттӕ дӕ ӕви нӕ. Уымӕн дын баххуыс кӕндзысты мӕнӕ ацы фарстатӕ: 1) ахӕм къахдзӕф саразынӕн цы фӕлтӕрддзинад хъӕуы, уый мӕм ис? 2) Донаргъуыд райсын мӕхи фӕнд у? 3) Адӕймаг йӕхи Йегъовӕйӕн снывонд кӕна,  уый цы нысан кӕны, уый ӕмбарын? Цӕй ӕмӕ ацы ӕртӕ фарстайыл аныхас кӕнӕм.

4, 5. а) Афтӕ зӕгъӕн цӕуылнӕ ис, ӕмӕ донаргъуыд райсын ӕрмӕстдӕр хистӕртӕн у сӕ бон? б) Фӕлтӕрдджын чырыстон уай, уый цӕуыл дзурӕг у?

⁴ Библи афтӕ нӕ зӕгъы, ӕмӕ донаргъуыд райсын сӕ бон ӕрмӕстдӕр стыртӕн у кӕнӕ, уал ӕмӕ уал азы кӕуыл сӕххӕст, уыдонӕн. Ӕмбисӕндты 20:11 стихы фыст ис: «Сывӕллонӕн йӕ митӕм гӕсгӕ дӕр бӕрӕг вӕййы, цы аразы, уый сыгъдӕг ӕмӕ раст у ӕви нӕ». Уӕдӕ сывӕллонӕн дӕр йӕ бон у ӕмбарын, раст цы у, уый, стӕй, йӕхи йе Сфӕлдисӕгӕн снывонд кӕна, уый цы нысан кӕны, уый дӕр. Уымӕ гӕсгӕ, йӕ фӕлтӕрддзинад хъуыддагӕй чи равдыста ӕмӕ йӕхи Йегъовӕйӕн чи снывонд кодта, ахӕм ӕрыгон адӕймагӕн йӕ бон у, ӕмӕ уыцы ахсджиаг къахдзӕф сараза, ома донаргъуыд райса (Ӕмб. 20:7).

⁵ Фӕлтӕрдджын уай, уый цӕуыл дзурӕг у? Фӕлтӕрддзинад, адӕймагыл цал азы цӕуы, алы хатт ууыл баст нӕ вӕййы. Библи зӕгъы, зӕгъгӕ, фӕлтӕрд адӕймаг «йӕ зонд, раст цы у ӕмӕ цы нӕу, уый ӕмбарын... сахуыр кодта» (Дзут. 5:14). Фӕлтӕрд адӕймаг зоны, Йегъовӕйы цӕсты раст цы у, уый, ӕмӕ йӕхицӕн загъта, уымӕ гӕсгӕ кӕй архайдзӕн. Ахӕм адӕймаджы ӕвзӕрдзинадыл бафтауын зын у, стӕй йӕ уый сӕр дӕр нӕ хъӕуы, цӕмӕй йӕ ӕдзух исчи разӕнгард кӕна, раст цы у, уый аразынмӕ. Уӕдӕ, донаргъуыд чи райста, ахӕм ӕрыгон адӕймаг дӕр хъуамӕ Хуыцауы уагӕвӕрдтӕм гӕсгӕ архайа, йӕ ныййарджытӕ кӕнӕ иннӕ хистӕртӕ йӕ фарсмӕ куы нӕ уой, уӕд дӕр. (Абар Филиппӕгтӕм 2:12.)

6, 7. а) Радзур, Данел Вавилоны цавӕр фӕлварӕнтыл сӕмбӕлд, уый тыххӕй. б) Данелмӕ фӕлтӕрддзинад кӕй уыд, уый цӕмӕй рабӕрӕг?

⁶ Цымӕ ӕцӕгдӕр уый гӕнӕн ис, ӕмӕ ӕрыгӕттӕм ахӕм фӕлтӕрддзинад уа? Ахъуыды-ма кӕнӕм Данелы цӕвиттоныл. Йӕ ныййарджытӕй йӕ куы байстой ӕмӕ йӕ Вавилонмӕ куы акодтой, уӕд ыл, ӕвӕццӕгӕн, дӕс азӕй гыццыл фылдӕр цыди. Ӕнӕнхъӕлӕджы Данел бахауд, раст ӕмӕ ӕвзӕр цы у, уымӕ бынтон ӕндӕр цӕстӕй чи каст, ахӕм адӕмы ’хсӕнмӕ. Фӕлӕ ма йын ӕндӕр хъуыддаг дӕр уыд фӕлварӕн. Вавилоны Данелмӕ хуымӕтӕг цӕстӕй нӕ ракастысты – Израилӕй кӕй ӕркодтой, уыцы ӕрыгон лӕппутӕй равзӕрстой, паддзахӕн чи хъуамӕ лӕггад кодтаид, ахӕмты, ӕмӕ Данел дӕр уыди сӕ иу! (Дан. 1:3–5, 13). Куыд зыны, афтӕмӕй Данелӕн Вавилоны фӕзынди, Израилы йын чи никуы уыдаид, ахӕм фадӕттӕ.

⁷ Цымӕ ӕрыгон Данел куыд бакодта? Мыййаг, вавилойнӕгтӕн уый бар радта, цӕмӕй дзы бынтон ӕндӕр адӕймаг скодтаиккой кӕнӕ йын йӕ уырнындзинад фӕцудын кодтаиккой? Нӕ. Библийы куыд фыст ис, афтӕмӕй Данел, Вавилоны куы уыд, уӕд «йӕхицӕн фидарӕй загъта», мӕнг динимӕ баст цы уыд, уыдӕттӕй «йӕхи кӕй нӕ фӕчъизи кӕндзӕн» (Дан. 1:8). Уый фӕлтӕрддзинад куыннӕ у!

8. Данелы цӕвиттонӕй цы ис базонӕн?

⁸ Данелы цӕвиттонӕй цы ис базонӕн? Фӕлтӕрдджын ӕрыгон адӕймаг, цӕуыл ӕууӕнды, ууыл зын уавӕрты дӕр фидар хӕцдзӕн. Уый хамелеоны хуызӕн нӕу, ома, йӕ алыварс цы ис, уымӕ гӕсгӕ йӕ хуыз чи фӕивы, ахӕм гӕккуырийы хуызӕн. Уый ахӕм нӕу, ӕмӕ Паддзахады залы Хуыцауы хӕлар у, скъолайы та – ацы дунейы лымӕн. Уый фӕлварӕнты дӕр Хуыцауыл иузӕрдионӕй баззайы. (Бакӕс Ефесӕгтӕм 4:14, 15.)

9, 10. а) Ӕрыгӕттӕн хорз цӕмӕн уаид, фӕстаг рӕстӕг фӕлварӕнты сӕхи куыд дардтой, ууыл ахъуыды кӕнын? б) Донаргъуыд райсын цы нысан кӕны?

⁹ Кӕй зӕгъын ӕй хъӕуы, ӕххӕст нӕ ничи у, ӕмӕ кӕстӕртӕ дӕр ӕмӕ хистӕртӕ дӕр иуӕй-иу хатт фӕрӕдийынц (Еккл. 7:20). Фӕлӕ уӕддӕр, кӕд донаргъуыд райсын фӕнд кӕныс, уӕд хорз уаид, куы ахъуыды кӕнис, Йегъовӕйы уагӕвӕрдтӕм гӕсгӕ цӕрын дӕ зӕрдиагӕй фӕнды ӕви нӕ, ууыл. Зӕгъӕм, ахъуыды кӕн:  «Йегъовӕмӕ кӕй хъусын, уый хъуыддагӕй ӕвдисын?» Ӕрхъуыды-ма кӕн, дӕ уырнындзинад фӕстаг рӕстӕг фӕлвӕрд куы цыди, уӕд-иу дӕхи куыд дардтай. Уыцы уавӕрты-иу растдӕр куыд бакӕнӕн уыд, афтӕ-иу бакодтай? Мыййаг, Данелау дӕу дӕр, Йегъовӕйӕн чи нӕ лӕггад кӕны, уыдонӕй чидӕртӕ фӕразӕнгард кӕнынц, цӕмӕй дын ацы дунейы цы фадӕттӕ ис, уыдонӕй спайда кӕнай? Дӕ уырнындзинад ахӕм цӕмӕйдӕрты фӕлвӕрд куы фӕцӕуы, уӕд, «Йегъовӕйы фӕндон цӕй мидӕг ис, уый» фембарыс? (Еф. 5:17).

¹⁰ Ацы фарстатыл ахъуыды кӕнын ӕнӕмӕнг цӕмӕн у? Уымӕн ӕмӕ афтӕмӕй хуыздӕр бамбардзынӕ, донаргъуыд райсын куыд ахсджиаг къахдзӕф у, уый. Куыд загътам, афтӕмӕй, донаргъуыд райсгӕйӕ равдисдзынӕ, Йегъовӕйӕн дзырд кӕй радтай, ӕнустӕм ӕй ӕппӕт зӕрдӕйӕ кӕй уарздзынӕ ӕмӕ йын кӕй лӕггад кӕндзынӕ (Мар. 12:30). Донаргъуыд чи райсы, уымӕн хъуамӕ йӕ фидар фӕнд уа уыцы дзырд сӕххӕст кӕнын. (Бакӕс Екклесиаст 5:4, 5.)

11, 12. а) Донаргъуыд райсын кӕй фӕнды, уый фидарӕй цы хъуамӕ зона? б) Цы дын баххуыс кӕндзӕн донаргъуыдмӕ Йегъовӕйы цӕстӕй кӕсынӕн?

¹¹ Библи зӕгъы, Йегъовӕйӕн йӕ адӕм, уыимӕ ӕрыгӕттӕ дӕр, зӕрдиагӕй ӕмӕ барвӕндонӕй кӕй лӕггад кӕндзысты (Пс. 110:3, фип.). Уӕдӕ донаргъуыд райсын кӕй фӕнды, уыцы адӕймаг хъуамӕ фидарӕй зона, уый йӕхи фӕнд кӕй у. Цӕмӕй дӕуӕн дӕр дӕ бон уа афтӕ зӕгъын, уый тыххӕй хъуамӕ дӕ зӕрдӕмӕ ныккӕсай, уӕлдайдӕр та кӕд рӕстдзинад гыццылӕй фӕстӕмӕ зоныс, уӕд.

¹² Куыд стыр кодтай, афтӕ, ӕвӕццӕгӕн, уыдтай, бирӕтӕ донаргъуыд куыд исынц, уый. Чи зоны, се ’хсӕн де ’мгӕрттӕ кӕнӕ дӕ хӕрз хотӕ ӕмӕ ӕфсымӕртӕ дӕр уыдысты. Фӕлӕ дӕхи хиз ахӕм хъуыдыйӕ, ӕмӕ донаргъуыд хъуамӕ райсай, уал ӕмӕ дыл уал азы кӕй сӕххӕст кӕнӕ иннӕтӕ се ’ппӕт дӕр донаргъуыд кӕй исынц, ӕрмӕстдӕр уый тыххӕй. Дӕ бон цы у саразын, цӕмӕй донаргъуыдмӕ Йегъовӕйы цӕстӕй кӕсай? Донаргъуыд райсын ахсджиаг цӕмӕн у, ууыл-иу ахъуыды кӕн. Ӕмӕ дын уымӕн та стыр ӕххуыс уыдзӕн, ацы ӕмӕ иннӕ статьяйы дзырд цӕуыл цӕуы, уый.

13. Донаргъуыд райсыны фӕнд дӕ зӕрдӕйӕ кӕй цӕуы, уый куыд базондзынӕ?

¹³ Донаргъуыд райсыны фӕнд дӕ зӕрдӕйӕ цӕуы ӕви нӕ, уый базонын дӕ бон у, зӕгъӕм, дӕ куывдтытыл куы ахъуыды кӕнай, уӕд. Йегъовӕмӕ арӕх фӕкувыс? Бӕлвырд цӕйдӕрты тыххӕй йӕм фӕкувыс? Ацы фарстатӕн цавӕр дзуапп ратдзынӕ, уымӕй бӕрӕг уыдзӕн, Йегъовӕимӕ ӕнгом дӕ ӕви нӕ (Пс. 25:4). Хуыцау нын нӕ куывдтытӕн арӕх дзуапп фӕдӕтты Библийы фӕрцы. Уӕдӕ, Библи куыд фӕахуыр кӕныс, уымӕ гӕсгӕ дӕр ис базонӕн, зӕрдиагӕй дӕ фӕнды, цӕмӕй Йегъовӕмӕ ӕввахсдӕр кӕнай ӕмӕ йын лӕггад кӕнай, ӕви нӕ (Йес. Н. 1:8). Ахъуыды кӕн: «Библи ӕдзухдӕр фӕахуыр кӕнын? Бинонты ахуыр нын куы вӕййы, уӕд дзы зӕрдиагӕй фӕархайын?» Ацы фарстатӕн цы дзуапп раттай, уый фӕрцы хуыздӕр бамбардзынӕ, донаргъуыд райсын дӕхи фӕнд у ӕви нӕ.

14. Бамбарын кӕн, дӕхи Хуыцауӕн снывонд кӕнай, уый донаргъуыд райсынимӕ куыд баст у.

¹⁴ Ӕрыгӕттӕй иуӕй-иутӕ кӕронмӕ нӕ фембарынц, дӕхи Хуыцауӕн снывонд кӕнай, уый донаргъуыд райсынимӕ куыд баст у, уый. Чидӕртӕ сӕ фӕзӕгъынц, сӕхи Йегъовӕйӕн кӕй снывонд кодтой, фӕлӕ донаргъуыд райсынмӕ цӕттӕ кӕй не сты. Фӕлӕ цымӕ уый гӕнӕн ис? Адӕймаг йӕхи Йегъовӕйӕн кӕй снывонд кӕны, уый ууыл дзурӕг у, ӕмӕ йӕм скуывта ӕмӕ йын дзырд радта, ӕнустӕм дын лӕггад кӕндзынӕн, зӕгъгӕ. Донаргъуыд кӕй райсы, уымӕй та иннӕтӕн равдисы, йӕхи Йегъовӕйӕн кӕй снывонд кодта. Уӕдӕ цалынмӕ донаргъуыд нӕ райсай, уӕдмӕ хъуамӕ  бамбарай, дӕхи Хуыцауӕн снывонд кӕнай, уый цы нысан кӕны, уый.

15. Дӕхи Хуыцауӕн снывонд кӕнай, уый цы нысан кӕны?

¹⁵ Дӕхи Йегъовӕйӕн куы снывонд кодтай, уӕд ын загътай, дӕ цард ӕнӕхъӕнӕй дӕр йӕ къухмӕ кӕй дӕттыс. Ды йын дзырд радтай, царды дын ӕппӕты сӕйрагдӕр йӕ фӕндон ӕххӕст кӕнын кӕй уыдзӕн. (Бакӕс Матфейы 16:24.) Адӕймаг цыфӕнды дзырд ма ратта, уӕддӕр ӕм хъуамӕ уӕлӕнгай цӕстӕй ма кӕса. Ӕмӕ уӕд, Йегъовӕ Хуыцауӕн цы дзырд ратта, уый тыххӕй та цы зӕгъӕн ис?! (Матф. 5:33). Уӕдӕ цӕмӕй бӕрӕг уыдзӕн, ныр дӕ цардӕн хицау ды кӕй нал дӕ, фӕлӕ Йегъовӕ? (Ром. 14:8).

16, 17. а) Дӕхи тыххӕй мауал цӕрай, уый цы нысан кӕны? Ӕрхӕсс цӕвиттон. б) Адӕймаг йӕхи Хуыцауӕн куы снывонд кӕны, уӕд ын цы фӕзӕгъы?

¹⁶ Ӕркӕсӕм-ма ахӕм цӕвиттонмӕ. Зӕгъӕм дын де ’мбал машинӕ балӕвар кодта. Машинӕйы гӕххӕттытӕ дын дӕ къухмӕ радта ӕмӕ дын загъта: «Ацы машинӕ у дӕу». Фӕлӕ дын стӕй афтӕ: «Машинӕйы дӕгъӕлтӕ мӕнмӕ уыдзысты. Ӕмӕ-иу ӕй скъӕргӕ дӕр ӕз кӕндзынӕн, ды нӕ, фӕлӕ». Ахӕм лӕвары тыххӕй ӕмӕ дын ӕй чи радта, уый тыххӕй цы ахъуыды кӕндзынӕ?

¹⁷ Адӕймаг йӕхи Йегъовӕйӕн куы снывонд кӕны, уӕд ын фӕзӕгъы: «Мӕ цард дӕуӕн дӕттын. Ныр ӕз дӕу дӕн». Ӕмӕ йӕм Йегъовӕ дӕр фенхъӕлмӕ кӕсы, цы дзырд радта, уый кӕй ӕххӕст кӕндзӕн. Фӕлӕ, зӕгъӕм, уыцы адӕймаг Йегъовӕйы фӕдзӕхсты сӕрты ахызт ӕмӕ сусӕгӕй райдыдта ӕнӕуырнӕгимӕ ӕмбӕлын. Йе та, зӕгъӕм, къаддӕр кӕй тыххӕй хъусын кӕндзӕн кӕнӕ ӕмбырдтӕ кӕй тыххӕй цух кӕндзӕн, ахӕм куыстмӕ бацыд. Цымӕ ма дзы уӕд афтӕ зӕгъӕн уыдзӕн, ӕмӕ, Йегъовӕйӕн цы дзырд радта, уымӕ гӕсгӕ цӕры? Уый абарӕн уыдзӕн, машинӕйы дӕгъӕлтӕ дӕхимӕ куыд дарай, уыимӕ. Нӕхи Йегъовӕйӕн куы снывонд кӕнӕм, уӕд ын фӕзӕгъӕм: «Мӕ цард у дӕу, мӕн нӕ, фӕлӕ». Ӕмӕ уӕдӕй фӕстӕмӕ алкӕддӕр фӕаразӕм, Йегъовӕйы цы фӕнды, уый, нӕхи бынтон ӕндӕр цыдӕр куы фӕфӕнды, уӕд дӕр. Йесо дӕр раст афтӕ кодта. Уый загъта: «Ӕз уӕларвӕй уый тыххӕй не ’рцыдтӕн, цӕмӕй, мӕхи цы фӕнды, уый кӕнон, фӕлӕ мӕ рарвитӕджы цы фӕнды, уый» (Иоан. 6:38).

18, 19. а) Розӕ ӕмӕ Кристоферы ныхӕстӕй куыд зыны, донаргъуыд чи райсы, уый стыр арфӕдзинӕдтӕй кӕй схайджын вӕййы? б) Донаргъуыдмӕ цы цӕстӕй кӕсыс?

¹⁸ Уӕдӕ бӕрӕг у, донаргъуыд райсын тынг ахсджиаг хъуыддаг кӕй у. Дӕхи Йегъовӕйӕн снывонд кӕнай ӕмӕ донаргъуыд райсай, уый стыр кад у. Ӕрыгӕттӕй бирӕтӕ Йегъовӕйы уарзынц ӕмӕ ӕмбарынц, дӕхи Хуыцауӕн снывонд кӕнай, уый цы нысан кӕны. Ахӕм ӕрыгӕттӕ донаргъуыд райсыныл фӕстӕ нӕ фӕкӕнынц. Стӕй, ахӕм уынаффӕ кӕй рахастой, ууыл фӕсмон дӕр никуы фӕкӕнынц. Донаргъуыд чи райста, иу ахӕм ӕрыгон хо, Розӕ, загъта: «Ӕз Йегъовӕйы уарзын, ӕмӕ йын кӕй лӕггад кӕнын, уымӕй стырдӕр циндзинад мын ницы хӕссы. Донаргъуыд кӕй райстон, уый у, мӕ царды цы уынаффӕтӕ рахастон, уыдонӕй ӕппӕты растдӕр уынаффӕ».

¹⁹ Статьяйы райдианы кӕй кой уыди, уыцы Кристоферӕн та йӕ хабар куыд рауад? 12-аздзыдӕй донаргъуыд кӕй райста, уый тыххӕй цы хъуыды кӕны? Кристофер зӕгъы, ахӕм уынаффӕ кӕй рахаста, уый тыххӕй тынг амондджын кӕй у. 17 азы йыл куы цыди, уӕд райдыдта пионерӕй лӕггад кӕнын, 18-аздзыдӕй сси кӕстӕриуӕггӕнӕг ӕфсымӕр. Ныр та лӕггад кӕны Вефилы. Кристофер загъта: «Донаргъуыд кӕй райстон, уый раст уынаффӕ уыди. Йегъовӕйӕн ӕмӕ йӕ организацийӕн кӕй лӕггад кӕнын, уый фӕрцы мӕ цардӕй тынг райгонд дӕн». Кӕд дӕу дӕр донаргъуыд райсын фӕнды, уӕд дӕ бон куыд у дӕхи бацӕттӕ кӕнын? Ацы фарстайыл дзырд цӕудзӕн иннӕ статьяйы.