Jehová puévlo oĩ vaʼekue Babilonia Guasu poguýpe síglo segundo guive, áño 1919 peve. ¿Mbaʼérepa tekotevẽ ñakambia ñantende vaʼekue ymave ko témare?

Oĩ heta mbaʼe ohechaukáva umi kristiáno unhído osẽ hague Babilonia Guasu poguýgui áño 1919-pe, ha upe guive oñembyaty chupekuéra peteĩ kongregasión ipotĩvape. Jehová puévlo ohasa kuri peteĩ tiémpo de pruéva ha limpiésa áño 1914 guive. Ha jaikuaaháicha, upe áñope oñepyrũ ogoverna yvágape Ñandejára Rréino (Mal. 3:1-4). * Upéi, 1919-pe Jesús onombra “pe tembiguái jeroviaha ha iñarandúva”, omeʼẽ hag̃ua Jehová puévlope “hiʼupy hiʼoraitépe” (Mat. 24:45-47). Upe áño guive, Ñandejára siervokuéra oĩ porã jeýma Jehová renondépe, pórke ojei hikuái Babilonia Guasu poguýgui (Apoc. 18:4). Péro, ¿arakaʼe guivépa umi kristiáno oĩ raʼe Babilonia poguýpe?

Heta tiémpore ñapensa vaʼekue áño 1918-pe Ñandejára puévlo oĩ hague sapyʼami Babilonia Guasu poguýpe. Por ehémplo, La Atalaya 15 de marzo de 1992 heʼi kuri: “Ñandejára puévlo yma guare ojegueraha vaʼekue peteĩ tiémpore Babilóniape. Péicha avei Jehová siervokuéra ñane tiempopegua oĩ kuri Babilonia Guasu poguýpe áño 1918-pe”. Péro koʼág̃a, oñeanalisa porãve rire ko téma, ojehecha upe tiempo noñepyrũi hague 1918-pe, síno ymavéma.

Pe profesía oĩva Ezequiel 37:1-14-pe ohechauka Ñandejára puévlo opytataha ótro tetã poguýpe, péro upéi isãso jeytaha. Proféta Ezequiel ohecha vaʼekue visiónpe peteĩ lugár henyhẽtéva hénte omano vaʼekue kanguekuégui. Jehová heʼi chupe umi omanóva kanguekue orrepresentaha ‘umi Israelgua kompletoitépe’ (Ezeq. 37:11, NM). Ko profesía oñekumpli tetã Israel rehe, ha tiémpo rire oñekumpli pe “Israel Ñandejára mbaʼéva” rehe, haʼéva hína umi kristiáno unhído (Gál. 6:16; Hech. 3:21). Ezequiel ohecha kuri umi omanóva kanguekue oñepyrũha ojoajupa ha oñeforma jey heta kuérpo oikovéva, ha oiko chuguikuéra peteĩ ehérsito tuichaitereíva. Upéva ohechauka Ñandejára puévlo osẽ hague Babilonia Guasu poguýgui 1919-pe. Péro, ¿mbaʼéichapa ko profesía  ohechauka Ñandejára puévlo oĩ hague Babilonia Guasu poguýpe heta tiémpore?

Primero, pe visiónpe ojehecha umi omano vaʼekue kanguekue ‘isekopaitemaha voi’ (Ezeq. 37:2, 11, NM). Upéva ohechauka aretereíma omano hague hikuái. Segundo, umi persóna ndahaʼéi de rrepéntente oikove jeýva, síno mbeguekatúpe. Ñepyrũrã oñehendu peteĩ “tyapu”, ha umi omanóva kanguekue “oñepyrũ ojoaju ojuehe, káda uno ilugárpe”. Upéi káda kuérpo oñepyrũma hajygue ha hoʼo, ha saʼi saʼípe ipiréma avei hikuái. Amo ipahápe, haʼekuéra oñepyrũ oikove jey, ha Jehová omeʼẽ chupekuéra lugár oiko hag̃ua. Koʼã mbaʼe ndoikói kuri sapyʼaitépe, síno oraha vaʼekue tiémpo (Ezeq. 37:7-10, 14, NM).

Pe profesía heʼi haguéicha, Israel oĩ vaʼekue heta tiémpore ótro tetã poguýpe. Áño 740-pe a.C., hoʼa pe rréino de 10 trívu opytáva nórte gotyo, ha heta hénte oikóva iterritóriope ojeguerahapa hetãgui. Upéi áño 607-pe a.C., umi vavilónio ohundi Jerusalén, ha umi hénte oikóva Judápe, pe rréino del sur territóriope, ojegueraha avei ótro paíspe. Umi hudío ndaikatuvéi oho hetãme áño 537-pe a.C. peve. Péro upe áñope, peteĩ grúpo michĩva oho jey Jerusalénpe omopuʼã jey hag̃ua pe témplo ha oñepyrũ oadora jey hikuái Jehovápe.

Koʼã mbaʼe ohechauka Ñandejára siervokuéra oĩ hague heta tiémpore Babilonia Guasu poguýpe, ndahaʼéi 1918 guive 1919 pevénte. Jesús avei ohechauka vaʼekue ko tiémpo ipukutaha, oñeʼẽrõ guare pe ñana vai okakuaátavare pe trígondi, haʼéva hína “pe Rréino ñemoñare” (Mat. 13:36-43). Pe tiémpo okakuaahápe koʼã plánta, haʼe hína pe tiémpo hetavehápe umi apóstata, ha saʼive umi kristiáno verdadéro. Upévare ikatu jaʼe pe kongregasión kristiána oĩ hague Babilonia poguýpe. Ha upe tiémpo oñepyrũ áño 100 rire ha hiʼare koʼã ára paha peve, pe témplo espirituál oñemopotĩ meve (Hech. 20:29, 30; 2 Tes. 2:3, 6; 1 Juan 2:18, 19).

Ko tiémpo aja, umi líder rrelihióso ha polítiko oñehaʼãmbaite omoĩ ipoguýpe opa ikatúvape. Por ehémplo, haʼekuéra ndohejái umi héntepe oreko la Biblia, ni nopermitíri chupekuéra olee la Biblia pe idióma haʼekuéra ontendévape. Hetápe katu ojehapy vívo olee haguére la Biblia. Ha oimeraẽ oñeʼẽ vaíva umi enseñánsa omboʼévare umi iglésia, katuete ojekastiga. Péicha jahecha ijetuʼueterei hague umi héntepe oikuaa ha omboʼe umi mbaʼe oĩva la Bíbliape.

Pe visión Ezequiel ohecha vaʼekue, ohechauka Ñandejára puévlo oikove jeytaha, ha osẽtaha saʼi saʼípe pe rrelihión fálsagui. ¿Arakaʼe ha mbaʼéichapa  oiko koʼã mbaʼe? Pe visiónpe Ezequiel ohendu kuri peteĩ “tyapu”. Upéva oñepyrũ oñekumpli ojapóma unos kuánto síglo, jaike mboyve umi ára pahápe. Koʼã tiémpope oñemboʼe vaʼekue heta enseñánsa japu. Upéicharõ jepe, oĩ heta persóna oikuaaséva pe añetegua ha oadoraséva Ñandejárape. Koʼã persóna ostudia la Biblia ha omombeʼu umi héntepe umi mbaʼe oaprendéva. Umíva apytépe oĩ vaʼekue otradusíva la Biblia umi idióma oñeñeʼẽvévape.

Opakuévo síglo 19, haʼete ku umi omanóva kanguekue oñepyrũva hoʼopa ha ipirepa jey. ¿Mbaʼérepa jaʼe upéva? Pórke Charles Taze Russell ha iñirũnguéra oñehaʼã ipyʼaite guive odeskuvri pe añetegua oĩva la Bíbliape. Haʼekuéra oguenohẽ pe rrevísta La Torre del Vigía de Sión ha ambue puvlikasión oipytyvõ hag̃ua heta persóna ipyʼaporãvape oikuaa hag̃ua pe añetegua. Áño 1914-pe osẽ pe “Foto-Drama de la Creación”, ha 1917-pe pe lívro El misterio terminado. Koʼã mbaʼe tuicha omombarete vaʼekue Ñandejára puévlope. Upéi, áño 1919-pe Jehová siervokuéra oikove jey espirituálmente ha oñemeʼẽ chupekuéra peteĩ lugár oiko hag̃ua. Tiémpo rire, umi kristiáno orekóva esperánsa oikove hag̃ua ko yvy ape ári opa ára g̃uarã, omoirũ umi unhídope. Péicha oñondive oñepyrũ oadora Jehovápe ha oiko chuguikuéra “peteĩ ehérsito tuichaitereíva” (Ezeq. 37:10, NM; Zac. 8:20-23). * (Elee pe nóta.)

Koʼã mbaʼe ñaanalisa vaʼekue, ohechauka Babilonia Guasu oreko hague Ñandejára puévlope ipoguýpe síglo segundo guive. Upe tiémpope oĩ kuri heta apóstata, pórke omboyke hikuái pe añetegua ha oasepta umi enseñánsa japu omboʼéva umi rrelihión fálsa. Heta tiémpore ijetuʼu vaʼekue ojeservi porã hag̃ua Jehovápe, oiko haguéicha umi isrraelíta yma guarére, ojeguerahárõ guare chupekuéra hetãgui. Péro koʼág̃a javyʼaiterei, pórke pe añetegua ojepredika opárupi. Avei Ñandejára puévlo ohecha mbaʼéichapa ‘umi iñarandúva omimbi’, ha ‘hetápe oñemopotĩ’ oñepyrũgui oadora Jehovápe (Dan. 12:3, 10, NM).

Añetehápe ningo ndajaikuaaporãi mbaʼéichapa Satanás ohechauka Jesúspe pe témplo.

Mateo ha Lucas oexplika mbaʼépa Satanás ojapo upérõ guare. Haʼekuéra heʼi kuri pe Aña “ogueraha” hague Jesúspe Jerusalénpe ha “ohupi chupe pe témplo murálla ári” (Mat. 4:5; Luc. 4:9).

Ymave ningo ñane puvlikasionkuéra heʼi vaʼekue Satanás ndaikatuichéne hague oraha Jesúspe pe temploitépe voi. Pe rrevísta La Atalaya 15 de julio de 1961, heʼi ko tentasión ojoguaha pe ótra tentasión Satanás omoĩ vaʼekuépe Jesúspe, oguerahárõ guare chupe peteĩ sérro ijyvatetereívape, ha ohechaukapaite chupe umi goviérno oĩva ko yvy ape ári. Pe rrevísta heʼi Satanás upérõ ohechaukánte hague Jesúspe peteĩ visión, pórke ndaipóri ko yvy ape ári ni peteĩ sérro ikatuha guive ojehecha entéro umi país oĩva ko múndope.  Upévare pe rrevísta heʼi posívlemente Satanás ndoguerahái hague Jesúspe pe témplope omoñuhãsérõ guare chupe. Péro oĩ artíkulo osẽ ramóva rrevísta Ñemañaháme, oexplikáva Jesús ikatu hague omano ojepoírire pe témplo murállagui.

Oĩ heʼíva Jesús ndaikatuiha oike pe temploite peve, pórke haʼe ndahaʼéi levíta. Upévare heʼi hikuái Satanás oipurúnte hague peteĩ visión ohechaukárõ guare chupe pe témplo. Heta tiémpo upe mboyve, proféta Ezequiélpe ojegueraha vaʼekue avei peteĩ témplope peteĩ visión rupive (Ezeq. 8:3, 7-10; 11:1, 24; 37:1, 2).

Oimérire Satanás ogueraha raʼe Jesúspe pe témplope peteĩ visión rupive, ikatu oĩ oñeporandúva:

• ¿Añetehápe piko Jesús ombohovái raʼe upe tentasión?

• Satanás odesafia vaʼekue Jesúspe okonverti hag̃ua ita pánpe, ha avei oadora hag̃ua chupe. Upéicharõ, ¿oime piko ko okasiónpe odesafia avei Jesúspe opo hag̃ua pe témplo murállagui?

Péro oimérire Satanás añetehápe ogueraha raʼe Jesúspe pe témplope, ikatu avei oĩ oñeporandúva:

• ¿Odesovedesépa Jesús pe Léi ha oike pe témplope, peteĩ lugár haʼe ndovaleihápe oĩ?

• ¿Mbaʼéichapa Jesús ou pe desiértogui pe témplo peve?

Jahechamína peteĩ mbaʼe ñanepytyvõtava ñakontesta hag̃ua koʼã mokõi pregúnta.

Peteĩ profesór hérava Donald Carson, heʼi Mateo ha Lucas oñeʼẽrõ guare pe témplore, amalisia noñeʼẽi hague pe santuário rehe añónte, haʼéva pe lugár ikatuhápe oike umi levíta añoite. Amalisia oñeʼẽ raʼe hikuái pe témplo kompletoitére, ikorapy entéro reheve. Ikatu Jesús oĩ raʼe peteĩ lugár ijyvatevehápe pe témplo korapýpe. Por ehémplo, ikatu kuri oĩ pe eskína oĩvape suréste gotyo, pe terrása ári. Upe eskína opyta Cedrón Ñu rovái ha oreko peteĩ altúra de 137 métro. Pe istoriadór Josefo heʼi ko eskína ijyvateterei hague, ha peteĩ persóna oñemboʼýramo upépe ha omaña iguy gotyo, katuete iñakãngaʼúta. Upéicharõ, Jesús ndahaʼéiramo jepe levíta, ikatu kuri ojupi upe lugárpe avave orreklamaʼỹre chupe odesovedeseha pe Léi.

Péro, ¿mbaʼéichapa Jesús ou pe desiértogui Jerusalén témplo peve? Upéva ndajaikuaaporãi. La Biblia heʼínte Satanás “ogueraha” hague chupe Jerusalénpe. Ndeʼíri Jesús oĩ hague ag̃ui térã mombyry upégui, ni mboy tiémporepa Satanás oñehaʼã omoñuhã chupe. Upéicharõ, Jesús ikatu kuri oho yvýrupi Jerusalénpe, otardáramo jepe og̃uahẽ hag̃ua.

Jaikuaaháicha, Satanás ohechauka kuri Jesúspe entéro “umi goviérno oĩva ko yvy ape ári”. Péro ndaipóri ni peteĩ sérro ikatuha guive ojehecha entéro umi país oĩva ko múndope. Upéicharõ, posívlemente haʼe ojapo upéva peteĩ visión rupive. Haʼete peteĩ persóna ohechaukáva ótrope heta fóto diferénte paisgua, peteĩ pantálla higántepe. Satanás ojevaléramo jepe peteĩ visiónre, haʼe añetehápe oipota vaʼekue Jesús oñesũ henondépe ha oadora chupe (Mat. 4:8, 9). Upéicharõ, Satanás orahárõ guare Jesúspe pe témplope, posívlemente oipota avei Jesús oapeligra hekove ha opo pe yvatégui. Péro Jesús nomeʼẽi chupe gústo. Upéva ohechauka Jesús añetehápe ombohovái hague pe tentasión, tahaʼe oĩrire pe témplope, térã ohechárire peteĩ visión rupivénte.

Jahechaháicha, Jesús ikatu kuri oho pe témplope Jerusalénpe ha ikatu avei ojupi pe párte ijyvatevévape. Upéicharõ jepe, ndajaikuaaporãi mbaʼéichapa Satanás ohechauka raʼe chupe pe témplo. Péro si jaikuaa Satanás heta vése oñehaʼã hague ojapouka Jesúspe mbaʼe vai, péro Jesús ni una ves ndoʼái iñuhãme.