Diswan hem start long mek-tu century C.E. and hem finis long 1919. Why nao wei wea iumi minim diswan hem change?

Staka samting pruvim olketa anointed Christian kamap free from Bigfala Babylon long 1919 and olketa kamap klin long spiritual wei long datfala taem. Tingim: Stretawe bihaen Kingdom bilong God start rul long heven long 1914, pipol bilong God kasem test and God isisi helpem olketa for no followim olketa teaching bilong false religion. * (Mal. 3:1-4) Then, long 1919, Jesus markem “wakaman wea faithful and wise” for ‘givim kaikai long pipol bilong God long barava taem.’ (Matt. 24:45-47) Long datfala year, pipol bilong God kamap free from Bigfala Babylon. (Rev. 18:4) Bat wanem taem nao pipol bilong God kamap prisoner bilong Bigfala Babylon?

Long bifor, olketa pablikeson bilong iumi sei pipol bilong God kamap prisoner bilong Bigfala Babylon long 1918 and hem for shortfala taem nomoa. The Watchtower bilong March 15, 1992, sei pipol bilong God kamap prisoner bilong Bigfala Babylon long 1918, olsem olketa Israelite kamap prisoner long Babylon. Bat Bible showimaot pipol bilong God kamap prisoner bilong Bigfala Babylon staka year bifor 1918.

Profesi long Ezekiel 37:1-14 showimaot pipol bilong God bae kamap olketa prisoner and gogo bae olketa kamap free. Long wanfala vision, Ezekiel lukim wanfala valley wea fulap long olketa bon. Jehovah talem Ezekiel olketa bon hia hem “olketa Israelite.” Datfala profesi hem abaotem nation bilong Israel, and tu, hem abaotem datfala “Israel bilong God,” wea hem nao olketa anointed Christian. (Gal. 6:16; Acts 3:21) Ezekiel lukim olketa bon hia kamap olketa man and kamap bigfala army. Datwan piksarem wei wea pipol bilong God kamap free from Bigfala Babylon long 1919. Bat hao nao datfala profesi showimaot pipol bilong God olketa prisoner bilong Bigfala Babylon for longfala taem?

 First samting, olketa bon wea Ezekiel lukim olketa “barava drae fogud.” (Ezek. 37:2, 11) Datwan showimaot pipol hia dae for longfala taem finis. Mek-tu samting, pipol hia no kwiktaem laef bak bat olketa isisi laef bak. Ezekiel herem “wanfala noise bilong olketa bon wea mumuv, and then olketa bon hia start for join tugeta.” Nextfala samting, “olketa masol and meat grow long olketa bon,” and then, skin kavarem body bilong olketa. Gogo, “olketa start for brith, and olketa laef nao.” Bihaen datwan, Jehovah mekem olketa for stap long ples bilong olketa. Olketa samting hia no happen kwiktaem.—Ezek. 37:7-10, 14.

Olsem datfala profesi talem, olketa Israelite kamap prisoner for longfala taem. Hem start long 740 B.C.E. taem kingdom bilong Israel long north, wea hem tenfala tribe bilong Israel, kamap prisoner long nara kantri. Bihaen, long 607 B.C.E., olketa bilong Babylon distroem Jerusalem, and nara tufala tribe bilong Israel, wea hem kingdom bilong Israel long south, kamap prisoner long Babylon. Then, long 537 B.C.E., olketa Israelite kamap free and samfala Jew go bak long Jerusalem for buildim bak temple and worshipim moa Jehovah.

So evri samting hia showimaot masbi olketa anointed Christian olketa prisoner bilong Bigfala Babylon for longfala taem, no from 1918 go kasem 1919 nomoa. Jesus tu story abaotem datfala longfala taem, taem hem sei olketa rabis grass, wea hem nao olketa laea Christian, bae grow tugeta witim olketa wheat, wea hem nao “olketa son bilong Kingdom.” (Matt. 13:36-43) Long taem wea rabis grass and wheat grow tugeta, tu-thri trufala Christian nomoa stap. Staka wea sei olketa Christian followim olketa laea teaching and kamap olketa apostate. Dastawe iumi savve sei pipol bilong God olketa prisoner bilong Bigfala Babylon long datfala taem. Diswan hem start long mek-tu century C.E. and hem gohed go kasem taem wea God klinim spiritual temple bilong hem long taem bilong end.—Acts 20:29, 30; 2 Thess. 2:3, 6; 1 John 2:18, 19.

Insaed staka handred year hia, olketa bigman bilong religion and olketa bigman long gavman laek kontrolem pipol. Olsem example, olketa stopem pipol for no garem Bible and for no readim Bible long languis bilong olketa seleva. Olketa taengem samfala pipol long post and bonem olketa bikos olketa readim Bible. And olketa killim nogud eniwan wea tok againstim olketa bigman bilong religion. Long datfala taem, hem barava hard for pipol lanem truth and for teachim truth long olketa narawan.

 Vision wea Ezekiel lukim showimaot tu pipol bilong God isisi laef bak long spiritual wei, and olketa isisi kamap free from false religion. So wanem taem nao datwan start for happen, and hao nao datwan happen? Ezekiel herem “wanfala noise bilong olketa bon wea mumuv.” Datwan piksarem samting wea start for happen insaed tu-thri handred year bifor long taem bilong end. Long datfala taem, samfala pipol laek for savve long truth and for worshipim God long stretfala wei, nomata staka pipol followim olketa laea teaching. Olketa studyim gud Bible and olketa traem best for storyim wanem olketa lanem long nara pipol. Samfala waka hard for transleitim Bible long languis wea pipol savve minim.

Then, klosap long year 1900, hem olsem meat and skin start for kavarem olketa bon. Charles Russell and olketa fren bilong hem waka hard for lanem truth and for worshipim Jehovah. Olketa iusim tu Zion’s Watch Tower and olketa nara pablikeson for helpem pipol for savve long truth. Bihaen datwan, olketa iusim “Photo-Drama of Creation” long 1914 and disfala buk The Finished Mystery, wea olketa pablisim long 1917, for strongim faith bilong pipol bilong God. And then long 1919, hem olsem pipol bilong God laef bak and kasem ples for stap. Gogo, olketa wea garem hope for laef olowe long earth waka tugeta witim olketa anointed Christian. Olketa worshipim Jehovah tugeta and olketa kamap “bigfala army.”—Ezek. 37:10; Zech. 8:20-23. *

So pipol bilong God kamap prisoner bilong Bigfala Babylon long mek-tu century C.E. Long datfala taem, staka pipol kamap apostate and followim olketa laea teaching. For staka year, hem barava no isi for pipol worshipim Jehovah, olsem tu, hem no isi for olketa Israelite worshipim Jehovah taem olketa prisoner. Bat distaem plande pipol herem truth. Iumi hapi tumas bikos iumi stap long taem wea “olketa wea garem wei for luksavve bae shaen braet tumas”! Staka pipol distaem savve kamap klin long spiritual wei and followim tru worship!—Dan. 12:3, 10.

Iumi no barava sure sapos Satan tekem Jesus go long temple, or hem showim temple long Jesus long wanfala vision.

Long Bible, Matthew and Luke story abaotem datfala taem wea Satan traem Jesus. Matthew sei: “Devil tekem hem [Jesus] go insaed long Jerusalem and hem mekem hem standap antap long wall bilong temple,” wea hem wanfala part long building wea barava hae. (Matt. 4:5) Luke sei: “Devil tekem hem go insaed long Jerusalem and hem mekem hem standap antap long wall bilong temple.”—Luke 4:9.

Long bifor, olketa pablikeson bilong iumi sei luk olsem Satan no tekem Jesus go long temple for traem hem, bat hem showim temple long Jesus long wanfala vision. Olsem example, The Watchtower bilong March 1, 1961, sei maet datfala test hem olsem nara test wea Satan tekem Jesus go long wanfala barava hae maunten and showim hem evri kantri long world. Datfala Watchtower  sei luk olsem datwan hem wanfala vision, bikos no eni maunten hem barava hae wea man savve standap long hem and lukim evri kantri long world. So datfala Watchtower sei, luk olsem Satan showim temple long Jesus long wanfala vision. Nomata olsem, samfala nara article long Wastaoa sei, sapos Jesus jamp go daon from datfala temple, maet hem dae.

Samfala pipol sei from Jesus hem no wanfala Levite, hem bae no obeyim God sapos hem standap antap long wall bilong temple. So olketa sei masbi Satan showim temple long Jesus long wanfala vision for traem hem. Staka handred year bifor, Ezekiel tu lukim temple long wanfala vision.—Ezek. 8:3, 7-10; 11:1, 24; 37:1, 2.

Bat sapos Satan showim temple long Jesus long wanfala vision, samfala maet ting olsem:

• Waswe, Jesus really kasem test for jamp from temple?

• Long tufala nara taem wea Satan traem Jesus, hem laekem Jesus for mekem olketa ston kamap bred, and baodaon for worshipim hem. Waswe, datwan showimaot maet Satan laekem Jesus for really jamp go daon from temple tu?

Bat sapos Satan no showim temple long Jesus long wanfala vision, and hem tekem Jesus go long temple, samfala maet ting olsem:

• Waswe, Jesus no followim Law bilong Moses taem hem standap antap long wall bilong temple?

• Sapos Jesus stap long wilderness, hao nao hem kasem temple long Jerusalem?

Iumi bae storyim samfala nara samting wea bae helpem iumi for ansarem tufala kwestin hia.

Professor Carson sei Greek word for “temple” long Bible buk bilong Matthew and Luke savve minim full area bilong temple, and no just datfala main building long temple wea Barava Holy Rum insaed, wea olketa Levite nomoa savve go long hem. Long southeast bilong temple hem garem flat ruf. Datwan hem part long temple wea barava hae. Maet Jesus hem standap long there. From datfala flat ruf go daon kasem Kidron Valley hem samting olsem 140 meter. Josephus, man wea raetem history, sei sapos man standap long there and luk go daon, “eye bilong hem bae raon,” bikos hem hae tumas. Nomata Jesus hem no wanfala Levite, hem olraet nomoa for hem standap long there.

Bat sapos Jesus stap long wilderness, hao nao hem kasem temple long Jerusalem? Iumi no savve. Bible no talem hao nao Jesus kasem Jerusalem. Bible no talem tu wea long wilderness nao Jesus stap, or haomas day nao Satan traem hem. So maet Jesus wakabaot go long Jerusalem, nomata hem farawe for hem wakabaot.

Taem Satan showim Jesus “evri kantri long world,” luk olsem hem showim long Jesus long wanfala vision, bikos no eni maunten hem stap wea man savve standap long hem and lukim evri kantri long world. Maet samting Satan duim hem olsem taem samwan iusim screen for showim long narawan samfala piksa bilong olketa difren kantri long world. Satan showim olketa kantri long Jesus long wanfala vision, bat hem laekem Jesus for really baodaon and worshipim hem. (Matt. 4:8, 9) So taem Satan tekem Jesus go long temple, luk olsem hem laekem Jesus for jamp go daon, wea maet datwan killim Jesus dae. Bat Jesus strong for againstim Satan. Datwan hem bigfala test for Jesus.

So maet Jesus go long Jerusalem and standap long barava hae part bilong temple. Bat iumi no barava sure long datwan. Nomata olsem, iumi savve Satan hem traem Jesus, and Jesus evritaem strong for againstim hem.