1. ¿Kunjam chuymanïñas qalltatpach utjäna?

JEHOVÁ DIOSAJJ taqe kun lurañ qalltkäna ukhatpachaw maynit maynikama yanaptʼasiñajj utjäna. Amuytʼañataki, Jesusajj Jehová Diosan ‘yanapiripjamajj’ taqe kunanwa Awkipar yanaptʼäna, ukatwa Jehová Diosajj jupar wal munasïna (Pro. 8:30, NM). Nayra tiemponakansa Diosan servirinakapajj ukhamarakwa Diosan mayitanakap phoqañatakejj maynit maynikam yanaptʼasipjjerïna. Sañäni, Noé tiempon luraskäna uka arca lurañatakejja, Noen familiapajj taqeniw yanaptʼapjjäna. Moisesajj jakkäna uka tiempons ukhamarakïnwa. Tatitumpi jikisiñ carpajj utjkäna uk apthapisin yaqha cheqar apañatakisa, yaqha cheqar purisin mayamp saytʼayañatakisa israelitanakajj maynit maynikamaw yanaptʼasipjjerïna. Ukatsti, templonjja mayachtʼataw Diosar qʼochupjjerïna musicsa tocapjjerïna. Taqe ukanak lurañatakejj maynit maynikamaw yanaptʼasipjjañapäna (Gén. 6:14-16, 22; Núm. 4:4-32; 1 Cró. 25:1-8).

2. 1) Nayrïr patat maranakanjja, ¿cristianonakajj kunjam chuymanïpjjänsa? 2) ¿Kuna toqenakatsa aka yatichäwin yatjjataskañäni?

² Nayrïr patak maranakansa cristianonakajj ukhamarakiw Diosar mayachtʼata yupaychapjjerïna. Jupanakan pʼeqepajj Cristönwa.  Apóstol Pablojj uka cristianonakat akham sänwa: “Maynejj taqe kunatakiw yatiñ chʼamjja katoqaspa [...]. Kunayman toqet lurañanaka[w] utjaraki[spa]” sasa. Ukatsti sarakïnwa: “[Taqenis] mä sapa cuerporu tukutakiwa” sasa (1 Corintios 12:4-6, 12 liytʼañataki). Jichhürunakanjja, ¿jiwasajj mayakirakïsnati? ¡Jïsa! Ukampis kunjamsa Diosan arunakap yatiyañansa, tamansa, familiansa mayakïsna ukwa aka yatichäwin yatjjataskañäni.

3. ¿Kunsa Juanajj mä visionan uñjäna?

³ Nayrïr patak maranakajj niya tukuyañampïskäna ukhajja, apóstol Juanajj paqallqo angelanakaruw trompetanak phustʼaskiri mä visionan uñjäna. Phesqëri angelajj trompet phustʼkäna ukhajja, mä warawara alajjpachat jalaqtasinkirwa uñjäna. Uka warawarajj chʼamak manqhwa jistʼaräna, uka chʼamak manqhatjj mä jewqʼew mistüna. Uka jewqʼetsti tʼijutʼijunakaw misturäna. Ukampis laqʼonakajj janirakiw kuna chʼojjñanakarusa, ni qoqanakarusa jan wali lurapkänti, jan ukasti khitinakatï “Tatitun sellopampi paranakapan jan chimptʼatäpki” uka jaqenakaruw tʼaqhesiyapjjäna (Apo. 9:1-4). Tʼijutʼijunakajj kunarus jan waltʼayakispawa, ukjja apóstol Juanajj sum yatïna, uka laqʼonakajj kunjamsa Egipto markankirinakar jan waltʼayäna uksa yatirakïnwa (Éxo. 10:12-15). Juanajj visionan uñjkäna uka tʼijutʼijunakajj alajjpachar sarañatak ajllit cristianonakampi sasiwa. Uka cristianonakajj akham sasaw yatiyasipki: “Jehová Diosajj niyaw aka ñanqha pachar tʼunjani” sasa. Ukampis uka ajllitanakajj janiw sapäpkiti, jan ukasti aka oraqen jakañatak suytʼasipki uka waranq waranqa cristianonakaw jupanakar yanaptʼasipki. Ukham mayachtʼata trabajisajj Supayan apnaqata religionanakat mistupjjañapatakiw walja jaqenakar yanaptʼawayapjje.

4. Diosan servirinakapajj ¿kuna wakiskiri luräwinïpjjesa, ukat kunjamsa uk phoqsna?

⁴ Jichhürunakanjja, Jehová Diosan servirinakapajj mä wali wakiskiri luräwinïpjjewa. Jupanakajj janïr aka pacha tukuskipanwa ‘suma yatiyäwinakjja’ Oraqpachan yatiyapjjañapa (Mat. 24:14; 28:19, 20). “Khititejj umat pharjayaski” ukajj jutasin ‘jakañ umat inak umtʼpan’ sasaw taqenir invitʼtanjja (Apo. 22:17). ¿Kunjamataksa uka luräw phoqsna? Maynit maynikam yanaptʼasisakiw uk phoqsna (Efe. 4:16).

5, 6. ¿Kun lurañatakis Jehová Diosan Testigonakapajj taqenis chʼamachasipjje?

⁵ Diosan Reinopat suma yatiyäwinak jukʼamp jaqenakar yatiyañatakejja, suma wakichtʼatäñasawa. Ukatakejj tamanwa ewjjtʼanak katoqtanjja. Ukarjam lurañäni ukhajja, jilat kullakanakasampejj jukʼamp mayachtʼataw yatiyañäni. Sañäni, yatiyir mistuñataki tantachäwinjj walja ewjjtʼanakwa katoqtanjja. Ukatsti, Bibliat apstʼat qellqatanakampiw Diosan Reinopat yatiyir sartanjja. Awisajja, yatiyañatak campañanakajj utjki ukan yanaptʼañatakiw mayirakistaspa. Ewjjtʼanakarjam yatiyañäni ukhajja, ‘alajjpachan jalnaqaski’ uka angelan wiñay qhespiyasiñ arunakapjj mayachtʼataw Oraqpachankir jilat kullakanakasampejj yatiyapjjañäni (Apo. 14:6).

⁶ Diosan arunakap yatiyasajj walja jaqenakaruw yanaptʼtanjja. Ukaw Anuario libronjj sapa mara uñjasi. Ukatjja, kimsa uru jachʼa tantachäwiru, walja markanakat jachʼa tantachäwiru jutapjjañapatakisa, mä wawakiw jilat kullakanakasampejj jaqenakar invitʼtanjja. Uka tantachäwinakanwa Jehová Diosar serviskakiñatak chʼamañchtʼir arstʼäwinaksa dramanaksa istʼtanjja uñtaraktanjja. Maysa toqetjja Jesusan jiwäwip amtañataki tantachäwiw mayachtʼarakistu. Uka tantachäwejj sapa maraw nisán phajjsit 14 uru saraqatarojj Inti jalantjjar apasi. Uka urojj Oraqpachanwa Jesusan jiwas layku jiwatapata yuspärañataki tantachtʼastanjja  (1 Cor. 11:23-26). Uka tantachäwiru jutirinakarusti wali kusisitaw katoqaraktanjja. Cheqansa walja semananak nayraw jupanakarojj uka tantachäwin jiwasamp chika sarapjjañapatak invitʼtanjja.

7. ¿Kunsa taqeni yatiyasajj jikjjattanjja?

⁷ Mä sapa tʼijutʼijojj janiw walja tʼijutʼijunakjamajj lurkaspati. Jiwasanakat ukhamarakiwa, sapakejj janiw jachʼañchatäñapäki, yupaychatäñapäki uka Jehová Diosan yatiyäwinakapjj Oraqpachan yatiyksnati. Ukampis taqeni yatiyir sarañatak chʼamachastan ukhajja, waranq waranqa jaqenakaruw uka yatiyäwimpejj pursna. Jichhajja, kunjamsa taman mayaki irnaqtʼañajj Diosan markapar mayachtʼañatak yanaptʼarakispa uk yatjjatañäni.

8, 9. 1) Taman mayachtʼatäñat qhanañchañatakejja, ¿kuna toqetsa Pablojj parläna? 2) ¿Kunjamsa tamasan mayakïñatakejj yanaptʼsna?

⁸ Éfeso markankir jilat kullakanakaru Pablojj cartap qellqkäna ukhajja, Diosan markapajj kunjam uttʼayatasa uka toqetwa qellqäna. Ukatsti, ‘kunayman toqetwa jiltañasajja’ sasaw sarakïna (Efesios 4:15, 16 liytʼañataki). ¿Kunjamsa taqenis ‘kunayman toqet jiltsna’? ‘Tamajj mä cuerpor uñtasitawa’ sasaw Pablojj qhanañchäna. Ukhamasti, tamajj Criston pʼeqtʼataw mayachtʼat irnaqañapa sasaw sarakïna. Ukatsti saskakïnwa: “Kunapachatejj taqpach cuerpojj sum saraski ukajja, taqpachaw munasiñanjj jiltaraki” sasa. Ukhamajj jilïrïstansa, wayn tawaqöstansa, chʼamanïstansa janisa, ¿kunjamsa tamasan mayachtʼatäñatak yanaptʼsna?

⁹ Jesusajj uttʼayki uka irpir chuymaninakar respetasa ukhamarak jupanakar istʼasaw yanaptʼsna (Heb. 13:7, 17). Awisajja ukham lurañajj chʼamakïspawa, ukampis jan ajjsarasaw Jehová Diosar yanaptʼa mayisiñasa. Diosan qollan ajayupaw kunanakatï taman amtaski ukarjam lurañatakejj yanaptʼistani. Taman katoqktan uka ewjjtʼanakar istʼañajj chʼamakïspawa, ukampis altʼat chuymanïñasawa ukaw taman mayachtʼatäñatakisa jilat kullakanakar jukʼamp munasiñatakis yanaptʼistani, uk janipun armañäniti.

10. Irpir chuymaninakan yanapirinakapajja, ¿kunjamsa taman mayachtʼatäñatakejj yanaptʼapjje? (13 janankir foto uñjjattʼam).

¹⁰ Kunanaktï irpir chuymaninakan yanapirinakapajj lurapki ukas taman mayakïñatakejj yanaptʼarakiwa. Jupanakajj qawqha maranïsipkpasa, uka jilatanakajj munasiñampiw irpir chuymaninakar yanaptʼapjje, ukham lurapjjatapat taqeniw yuspärtanjja. Amuytʼañataki, uka jilatanakajja yatiyir sarañataki Bibliat apstʼat qellqatanakajj taman jan faltañapatakiw yanaptʼapjje. Tantachasiñ Utajj suma uñjatäñapatakisa qʼomäñapatakisa, yanaptʼapjjarakiwa. Ukatsti, tantachäwinakaru jutapki ukanakarus katoqtʼapjjarakiwa. Jiwasatï uka jilatanakar yanaptʼañäni ukhajja, tamanjja taqe kunas sumakiw lurasini (Hechos 6:3-6 uñjjattʼarakïta).

11. Wayna jilatanakajja, ¿kunjamsa taman mayakïñatakejj yanaptʼapjjaspa?

¹¹ Yaqhep jilatanakajja walja maranakaw tamar yanaptʼawayapjje. Jichhasti, chuymanëjjapjjatap laykojj janiw nayrjam lurirjamäjjapjjeti. Ukampis jupanakat sipans wayna jilatanakaw utji, jupanakaw yanaptʼapjjaspa. Uka wayna jilatanakajj janis jupanakjam experiencianïpkchejja, taman jukʼamp luräwinak katoqapjjañapatakejj yanaptʼasispawa. Irpir chuymaninakan yanapirinakapat waljaniw irpir chuymanit irnaqtʼañatak chʼamachasisipki, ukajj kusiskañawa (1 Tim. 3:1, 10). Wayna irpir chuymaninakatsa, waljaniw tamanak tumptʼirit irnaqtʼasipki; jichhasti walja jilat kullakanakaruw tamanakan yanaptʼasipki. ¿Janit uka jilatanakan yanaptʼapat yuspärktanjja? (Salmo 110:3; ^[1] Eclesiastés 12:1 liytʼañataki).

12, 13. ¿Kunsa familianakajj mayakïñatak lurapjjañapa?

¹² Jichhajja, kunjamsa familiasan yanaptʼsna uka toqet parltʼarakiñäni. Familiana Diosar Yupaychañataki Arumajj sapa semanaw apasiñapa. Waljaniw uka tantachäwit akham sapjje: “Jehová Diosat familjam yateqañajj jukʼamp sum apasiñatakiw taqenirus yanaptʼawayapjjetu” sasa. Uka tantachäwinjja Diosan arunakap jukʼamp sum yatiyañatakiw wakichtʼasipjjaspa. Familiajj Diosan Arupat yateqañataki tantachtʼasi ukhajja, jupanakkamajj jukʼamp sumaw apasipjje, mayachtʼasipjjaraki. Cheqansa familianjja, taqeniw Jehová Diosar munasipjje, munañapsa lurañ munapjjaraki.

¹³ Casado chacha warminakasti, ¿kunsa Jehová Diosar mayachtʼata serviskakiñatakejj lurapjjarakispa? Kunapachatï Jehová Diosar taqe chuym servipjje ukhajja, purapatwa yanaptʼasipjjaspa, ukatsti jukʼamp kusisitaw jakasipjjarakispa. Kunjamtï Abrahamampi Sarampisa, Isaacampi Rebecampisa, Elcanampi Ana esposapampis munasiñampi uñjasipjjäna ukhamarakiw uñjasipjjañapa (Gén. 26:8; 1 Sam. 1:5, 8; 1 Ped. 3:5, 6). Casado chacha warminakatï munasiñampi uñjasiñatak chʼamachasipjjani ukhajja, jupanakajj jukʼampiw jakʼachasipjjani, Jehová Diosampis jukʼamp sumaw apasipjjarakini (Eclesiastés 4:12 liytʼañataki).

14. Esposomatï jan ukajj esposamatï Jehová Diosar jan yupaychkchi ukhajja, ¿kunsa jupamp sum apasiñatakejj lurasma?

¹⁴ Jehová Diosar jan servirimpejj janipuniw cristianonakajj casarasiñapäkiti sasaw Diosan Arupajj ewjjtʼi (2 Cor. 6:14). Ukampis maynitï casadojjasin Jehová Diosar uñtʼchi ukhajja, ¿kunsa luraspa? Esposopatï, jan ukajj esposapatï Jehová Diosar jan serviñ munkchi ukhajja, Biblian yatichäwinakaparjam sarnaqañaw familiamp sumankañatakejj cristianor yanaptʼaspa. Jehová Diosan munañap lurañas jupatak nayrankchejja, esposoparu jan ukajj esposapar yanaptʼañatakiw chʼamachasiñapa. Ukham lurañajj chʼamakïchi ukasa, Diosar serviñatakiw familiapar yanaptʼaspa. Esposonakat maynejj Diosan markapat jitheqti ukhaw Diosan mayitaparjam sarnaqañajj chʼamarakïspa. Mary kullakarojj ukaw pasäna. Jupajj esposopamp chikaw Jehová Diosar servïna, ukampis esposopajj niya 25 maranakaw tantachäwinakar jan sarjjänti. Ukhampachasa, Mary kullakajj tantachäwinakarusa jachʼa tantachäwinakarus saraskakïnwa. Ukatsti Bibliat yateqkäna ukarjam sarnaqañatakiw chʼamachasïna, wawanakaparus ukarjamaw yaticharakïna. Walja maranak pasatatjja, wawanakapajj jilïrëjjasin utat sarjjapjjänwa. Kullakajj sapakis jikjjataskchïnjja Diosar serviskakïnwa. David esposopan liytʼañapataki revistanak qhanar uchirïkäna ukwa esposopajj liyiñ qalltäna, qhepatjja tantachäwinakarus sarjjarakïnwa. Sojjta marani mä allchhipajj tantachäwin mä asiento Davitatak imapunirïnwa. Tantachäwinakaru jan sarirïki ukhajja akham sasaw allchhipajj sirïna: “Abuelito, tantachäwin walpun suysmajja” sasa. David jilatajj Diosan markapar kuttʼanjjewa. Mary kullakasti, wali kusisitaw jichhajj esposopamp chika Diosar serviski.

15. Walja mara casaratanakajja, ¿kunjamsa jichha casaratanakar yanaptʼapjjaspa?

¹⁵ Jichhürunakanjja Supayajj familianakaruw jan waltʼayañ muni. Ukatwa casadonakan mayachtʼatäñapajj wali wakiskiri. Walja marasa jan ukajj jukʼa maras casaratäpkchejja, jukʼamp sum apasiñatakiw chʼamachasipjjañapa. Experienciani chacha warminakaw jukʼa mara casaratanakarojj yanaptʼapjjaspa. Inas Familiana Diosar Yupaychañataki Arumajj apaski ukar jawstʼapjjchispa, ukhamatwa jupanakarojj purapat munasisa ukhamarak jan jaljtas jakasipjjañapataki yanaptʼapjjaspa (Tito 2:3-7).

16, 17. ¿Kuna bendicionanaksa jutïrin katoqañäni?

¹⁶ Israelitanakajj Jerusalén temploru fiesta amtañatak sarapjjerïna ukhajja, maynit maynikamaw yanaptʼasipjjerïna. Fiestar sarañataki wakichtʼaskasasa, thakin sarkasasa yanaptʼasipjjerïnwa. Templonsa, juntukiw Jehová Diosar yupaychapjjerïna (Luc. 2:41-44). Jiwasajj israelitanakjamarakiw viajisktanjja. Jutïrpachan mä Paraison jakasiñatakiw sarasktanjja, ukhamajj kunjamtï israelitanakajj yanaptʼasipkäna ukhamarakiw jiwasajj maynit maynikam yanaptʼasiñasa. Awisajja ukham lurañajj chʼamakïspawa, ukatwa chʼamachasiñasa. Akham jisktʼasiñäni: “¿Kunan jukʼampi chʼamachasiñajas wakisi?” sasa.

¹⁷ Walja bendicionanakwa jutïrin katoqapjjañäni. Jehová Diosan servirinakapajj janiw akapachankir jaqenakjam sarnaqjjtanti, jan ukasti jilat kullakanakasampejj mayachtʼata sumakiw jakasjjtanjja. Isaías ukhamarak Miqueas profetanakan arsutanakapajj kunjamsa phoqasiski ukwa nayranakasamp uñjasktanjja. Uka profetanakajj akham sasaw qellqapjjäna: “Jutapjjam, [Jehová] Tatitun qolluparu makhatapjjañäni” sasa (Isa. 2:2-4; Miqueas 4:2-4 liytʼañataki). Cheqansa, aka ‘qhepa urunakan’ utjki uka religionanakat sipansa cheqa religionajj jukʼamp jilankiwa. Akat mä jukʼa urunakatjja, Oraqen jakasir jaqenakajj taqenis sumakiw jakasjjapjjani. Taqenis mayachtʼata, juntuki ukham Jehová Diosar yupaychañajj ¡wali kusiskañapunïniwa!