1. Matamana negana amo, Dirava ena kara amo dahaka ita dibaia?

DIRAVA ese gau ibounai ia havaraia negana amo, idia ibounai idia gaukara hebou namonamo. Dirava ese ia havaraia tauna ginigunana bona aonega bada tauna be ia gwau: “Lau be Dirava ena badibadinai lau noho, gaukara karaia tauna bamona. Dina ibounai Dirava be lau dekenai ia moale.” (Aon. 8:30) Tamana bona Natuna idia gaukara hebou, bona hari ita itaia mauri gaudia ibounai idia havaraia. Oibe, gaukara hebou karana be Dirava ese ia karaia gaudia ibounai lalonai ia hedinarai. Unai gaukara hebou karana be Noa ese lagatoi ia karaia negana ai ia hedinarai; Dirava ena taunimanima be tano gagaena ai idia loaloa neganai, palai dubu idia haginia, kokia, bona idia abia lao karana ai ia hedinarai; bona dubu helaga ai Iehova hanamoa totona miusiki idia gadaralaia bona ane idia abia karana ai ia hedinarai danu. Unai gaukara ibounai idia karaia totona, idia gaukara hebou be namo.—Gen. 6:14-16, 22; Num. 4:4-32; 1 Siv. 25:1-8.

2. (a) Idaunega Keristani kongrigeisen ese dahaka kara badana idia hahedinaraia? (b) Edena henanadai do ita herevalaia?

² Unai gaukara hebou karana be, Iesu Keriso ese ia gunalaia Keristani Kongrigeisen edia kara badana. Aposetolo Paulo  ese unai ia hahedinaraia, ena be horoa Keristani taudia ta ta edia “harihari gaudia be idauidau” bona edia “hesiai gaukara be idauidau,” to idia ibounai be “tauanina tamona.” (1 Korinto 12:4-6, 12 duahia.) To hari be edena bamona? Edena dala ai sivarai namona harorolaia gaukarana ita karaia hebou namonamo diba? Bona edena dala ai kongrigeisen bona ruma bese ai ita gaukara hebou diba?

3. Aposetolo Ioane be dahaka matahanai ia itaia?

³ Lagani 100 C.E. ena dokona ai, aposetolo Ioane ese matahanai ta amo aneru seven ia itaia, idia ta ta ese edia kibi idia hiriria. Aneru namba 5 ese iena kibi ia hiriria neganai, Ioane ese tanobada ai ia moru “hisiuna” ia itaia. Unai hisiu ese ki ta ia dogoatao, bona unai ki amo guri dobu masemase ena iduara ia kehoa. Vadaeni kwalahu bada herea be unai guri amo ia daekau, bona unai kwalahu amo kwadi momo herea idia raka-lasi. Unai kwadi ese tubutubu gaudia idia hadikaia lasi, to “edia baguna ai Dirava ena maka idia abia lasi taudia sibona” idia hadikaia. (Apok. 9:1-4) Ioane be kwadi momo herea ese do idia havaraia dika ia diba. Mose ena negai, kwadi momo herea ese Aigupito taudia dekenai dika bada idia havaraia, ani? (Eso. 10:12-15) Ioane ese ia itaia kwadi be horoa Keristani taudia idia laulaulaia, idia ese Iehova ena hahemaoro herevadia idia harorolaia. Hari inai negai idia be tanobada helarona idia abia taudia milioni momo danu idia gaukara hebou. Haroro gaukara ai ita gaukara hebou dainai, Satani ese ena tomadiho koikoi oreana ibounai amo ia gaukaralaia siahuna ia hamaragia!

4. Dirava ena taunimanima ese dahaka gaukara idia karaia be namo, bona edena dala ai unai idia karaia namonamo diba?

⁴ Inai nega oromana ena dokona ia do ginidae lasi neganai, Iehova ena taunimanima edia gaukara badana be tanobada hegegemadai,“sivarai namona” do idia harorolaia. (Mat. 24:14; 28:19, 20) Unai gaukara ena kahana ta be, “idia ranu mase taudia” idia boiria davana lasi “mauri ranu idia inua” totona. (Apok. 22:17) Ita be Keristani kongrigeisen lalonai ita noho dainai, edena dala ai unai ita karaia namonamo diba? Bema ‘ita hakapua namonamo bona ita gaukara hebou.’—Efe. 4:16.

5, 6. Sivarai namona ita harorolaia neganai, edena dala ai ita gaukara hebou?

⁵ Taunimanima momo dekenai Basileia ena sivarai namona ita harorolaia totona, namona be iseda haroro gaukara be dala maorona ai ita karaia namonamo. Unai dainai hakaua herevadia ita abia. Tanobada hegegemadai kongrigeisen ibounai amo idia halasia hadibaia herevadia dainai haroro gaukara totona ita hegaegae diba. Haroro gaukara totona ita hebou murinai, taunimanima dekenai Basileia ena sivarai namona ita harorolaia. Iseda uduna amo bona Baibel pablikeisen milioni momo amo sivarai namona ita halasia. Invateisen o pepapepa hariharilaia negadiai idia henia hakaua herevadia oi badinaia, a? Bema unai oi karaia, taunimanima milioni ma haida ida Apokalupo 14:6 ena hereva hegeregerena “guba ai ia roho lao” aneruna ese ia halasia sivaraina umui harorolaia.

⁶ Yearbook ai iseda haroro gaukara ena ripoti ita duahia neganai, ita moale! Danu, mai lalotamona ida rijinol, dina tamona, bona intanesinol hebouhebou totona boiboi pepapepadia ita hariharilaia karana mani oi laloa. Unai hebouhebou ai, Baibel amo hagoadaia tok namodia ita kamonai, bona drama bona haheitalai ita itaia. Unai kahana ta ta amo Dirava be mai lalokau ida ita ia noia mai eda kudouna ibounai ida ia ita hesiai henia totona. Iesu ena mase laloatao  hebouna ese ita ia hatamonaia danu. Dirava ena hebogahisi hereadaena bona Iesu ena hakaua dalana ita laloa bada dainai, lagani ta ta ai, Nisan 14, dina ia diho murinai ita hebou. (1 Kor. 11:23-26) Idia bapatiso Witnes taudia sibona be unai hebou dekenai idia lao lasi. Pura haida idia do noho bena Memorial hebouna do ita karaia neganai, iseda kongrigeisen ena teritori dekenai idia noho taudia ita boiria, unai mai anina bada hebouna dekenai idia mai totona.

7. Bema ita gaukara hebou, dahaka ia vara diba?

⁷ Kwadi tamona ese dika bada ia havaraia diba lasi. Unai hegeregerena, bema ita sibona ita haroro, namo bada do ita havaraia lasi. Bema ita gaukara hebou, taunimanima milioni momo be hairai bona hemataurai ia abia be maoro Diravana, Iehova, dekenai ita veria diba! To, Dirava ena taunimanima be unai dala sibona ai idia gaukara hebou lasi.

8, 9. (a) Keristani taudia idia gaukara hebou totona, Paulo ese edena haheitalai ia gaukaralaia? (b) Edena dala ai kongrigeisen lalonai ita gaukara hebou diba?

⁸ Paulo be Efeso taudia dekenai revareva ia torea neganai, kongrigeisen hakaua dalana bona “gau ibounai dekenai lo taudia ai ita lao” dalana ia herevalaia. (Efeso 4:15, 16 duahia.) Unai ita karaia totona, dahaka ese ita ta ta do ia durua? Paulo ese taunimanima ena tauanina ia herevalaia karana amo ia ese kongrigeisen ena kwarana, Iesu Keriso, henunai ita gaukara hebou dalana ia haheitalaia. Aposetolo Paulo ia gwau tauanina ibounai ia “hakapua namonamo” neganai, do ia gaukara hebou diba. Dahaka ita karaia diba kongrigeisen lalonai lalotamona ia noho totona?

⁹ Dala ta be, Iesu ese kongrigeisen ai hakaua herevadia idia halasia totona ia abia hidi elda taudia ita badinaia bona matauraia be namo. (Heb. 13:7, 17) Nega haida unai ita karaia be auka. To unai ita karaia diba, bema Dirava ena heduru ita noia. Iena lauma helaga ese ita do ia durua, mai iseda kudouna ibounai ida kongrigeisen ita durua totona. Unai dainai bema nega haida ita laloa hakaua dalana ta ita badinaia be auka, namona be ita laloatao, bema mai manau ida ita gaukara hebou, kongrigeisen lalonai maino do ia noho. Bona danu, bema unai ita karaia, ita huanai ia noho lalokauna be do ia bada.

10. Edena dala ai hesiai taudia ese kongrigeisen idia durua ia lalotamona totona? (Laulau ginigunana itaia.)

¹⁰ Kongrigeisen ai hesiai taudia edia heduru dainai lalotamona ia vara diba. Inai tadikaka edia mauri lagani be idauidau, to ita idia durua totona mai edia kudouna ibounai ida hesiai gaukara idia karaia. Hegeregere, elda taudia idia durua haroro gaukara ai do ita gaukaralaia buka bona magasin idia abia hegaegae. Danu, idia ese Kingdom Hall hagoevaia bona hanamoa gaukarana idia naria, bona hebou idia mai taudia idia welkam henia. Bema inai tadikaka ida ita gaukara hebou, kongrigeisen be do ia heau namonamo.—Kara 6:3-6 sekea.

11. Kongrigeisen lalonai lalotamona ia noho totona, matamata taudia be dahaka idia karaia diba?

¹¹ Lo tadikaka momo be lagani momo lalonai kongrigeisen ena maduna idia huaia. To edia mauri lagani ia bada dainai, idia hegeregere lasi maduna haida idia huaia totona, unai dainai senisi haida idia karaia. Tadikaka matamatadia be heduru bada idia henia diba. Ena be maduna huaia karana dekenai edia diba be bada lasi, to treinini idia abia neganai unai idia karaia diba. Hesiai taudia be elda taudia ai idia lao neganai, unai be moale gauna! (1 Tim. 3:1, 10) Idia matamata elda taudia haida be idia hegeregere  sekit gaukara idia karaia, bona kongrigeisen momo ai idia noho tadikaka taihu idia durua. Unai bamona matamata taudia be mai edia ura ida ita idia durua dainai ita moale, ani?—Salamo 110:3; Hadibaia Tauna 12:1 duahia.

12, 13. Dahaka ese ruma bese taudia ta ta ia durua diba idia gaukara hebou totona?

¹² Hari, ruma bese lalonai mai lalotamona ida ita gaukara hebou karana mani ita herevalaia. Momo idia davaria wiki ta ta ai Ruma Bese Ena Tomadiho idia karaia neganai, ruma bese ibounai edia hetura karana ia hagoadaia. Unai negadia ai, Dirava ena hereva idia laloa dainai, ruma bese ia hatamonaia. Danu, edia haroro daladia idia hegaegaelaia diba dainai, idia haroro namonamo diba. Danu, bema ruma bese taudia ta ta ese Baibel idia herevalaia hebou, unai ese idia ia hatamonaia, badina idia ibounai ese Dirava tamona idia lalokau henia bona idia ura iena ura idia karaia.

¹³ Headava taudia be dahaka idia karaia diba, Iehova idia hanamoa hebou totona? Bema idia ruaosi be mai abidadama ida Iehova idia hesiai henia, unai ese ia havaraia lalotamona karana idia moalelaia diba. Aberahamo bona Sara, Isako bona Rebeka, Elikana bona Hana—ese idia hahedinaraia edia adavana idia lalokau henia. Namona be ita gaukara goada unai bamona ita karaia totona. (Gen. 26:8; 1 Sam. 1:5, 8; 1 Pet. 3:5, 6) Unai ese ita bona eda adavana do ia hatamonaia bona iseda guba Tamana kahirakahira ita lao diba.—Hadibaia Tauna 4:12 duahia.

14. Bema emu adavana be Iehova ia hesiai henia lasi, dahaka oi karaia diba emui headava ia goada noho totona?

¹⁴ Keristani taudia be abidadama lasi taudia ida idia hakapua tamona lasi. (2 Kor. 6:14) To, iseda tadikaka bona taihu, tomadiho ai idia parara ruma bese ai idia noho taudia be edena bamona? Hari Dirava idia hesiai henia taudia haida be idia headava vadaeni murinai hereva momokani idia dibaia, bona edia adavana be Witnes lasi. To, Baibel ena hakaua herevadia badinaia karana ese ruma bese ia hatamonaia diba. Anina be edia adavana ida idia gaukara hebou be namo, to edia abidadama idia negea lasi. Reana unai be do ia auka, to do ia vara hahenamo ita laloa be namo. Danu, bema eda adavana be kongrigeisen ia rakatania, do ita hekwarahi Baibel ena hakaua herevadia ita badinaia totona. Unai be Keristani taihuna ladana Mary dekenai ia vara. Ia bona ena adavana David be Iehova idia hesiai henia hebou, to lagani 25 gunanai, iena adavana be kongrigeisen heboudia lao henia karana ia hadokoa. Mary be hanaihanai kongrigeisen heboudia bona hebouhebou badadia dekenai ia lao, bona ia hekwarahi ruma ai Baibel ena hakaua herevadia ia badinaia, anina be edia natudia 6 ia hadibaia danu. Edia natudia idia bada bona ruma idia rakatania neganai, Mary ia mamia ia be sibona ia noho. Bena David be Mary ese ia totona ia rakatania magasin ia duahidia matamaia. Daudau lasi, David be Kingdom Hall dekenai ia lao , bona iena tubuna mero, ena mauri lagani be 6 be hanaihanai ia totona helai gabuna ta ia makaia. Bema David be hebou ia mai lasi, unai mero maragina do ia gwau: “Tubugu e, hari dina hebou gabuna ai oi lau reaia.” Hari David be mai moale ida Iehova ia hesiai henia, bona Mary ia moale bada badina unai idia karaia hebou.

15. Lagani daudau idia headava taudia ese edena dala ai matamata taudia idia durua diba?

¹⁵ Hari Satani ia ura bada ruma bese maurina ia hadikaia, unai dainai Dirava ena hesiai taudia ibounai idia gaukara goada be namo, hanaihanai edia headava lalonai lalotamona ia noho totona. Ena be lagani momo oi headava vadaeni, to emu headava  hagoadaia totona, do oi gwauraia herevana o karaia gauna oi lalohadailaia be namo. Lagani daudau idia headava taudia ese kongrigeisen matamata taudia be inai kahana dekenai idia durua diba. Headava matamata taudia oi boiria diba emu adavana danu ruma bese ena tomadiho umui karaia negana ai idia helai vareai totona. Umui ida idia noho neganai, do idia itaia lalokau bona lalotamona karana be mai anina bada, herevana ta be lagani hida ia headava vadaeni.—Tito 2:3-7.

16, 17. Dirava ena hesiai taudia be dahaka idia naria noho?

¹⁶ Mani inai oi laloa, Ierusalema ena dubu helaga ai idia karaia ariana ta ai, Israela taudia be Iehova idia hanamoa. Idia be reana unai laolao totona idia hegaegae, dala dekenai ta ta idia durua, bena dubu helaga ai mai lalotamona ida Iehova idia tomadiho henia. Oibe, idia gaukara hebou dainai unai ia vara. (Luka 2:41-44) Nega matamata ita lao henia noho lalonai, namona be mai lalotamona ida ita gaukara hebou. Unai ita karaia totona ita gaukara goada be namo. Bona unai ita laloa dobu be namo, ani?

¹⁷ Vaira nega ai do ita abia hahenamo mani ita laloa! Inai tanobada ai lalotamona be lasi bona momo idia daradara. To ita be unai ibounai ita rakatania vadaeni. Isaia bona Mika ena peroveta hereva be hari ia guguru—Dirava ena taunimanima be mai lalotamona ida “Lohiabada ena ororo” dekenai idia daekau. (Isa. 2:2-4; Mika 4:2-4 duahia.) Inai nega gabena ai Dirava ena tomadiho momokani ita badinaia be namo. Bona mai moale ida taunimanima ibounai be mai lalotamona ida idia gaukara hebou negana ita naria!