1. Ta gafa-gafu paga laman, anni i masingan ta trabahu na Dios?

MASINGAN i pattaradday ta gafa-gafu na pamaratu. Kinagi na ollu nga pinaratu na Dios: “Egga ngà ta bikò [ni Jehova] bilang malalaki nga mattrabahu. Sakan i kakayàna ta kagaggaw.” (Prov. 8:30) Nakka-uffun i Yama anna i Ana ta pamaratu ta naddumu-ruma nga gannug kagitta na masingan ta kaggawattam. Kanayun nga masingan i pakka-uffu-uffun ta trabahu na Dios. Masingan yaw ta pinamadday ni Noe ta Arka ta tiempona; pamataddag, panatta onu passassa, anna pangiyali ta tabernakulo ta pabbiahe na totolay na Dios ta tana-tana; anna i pattaradday na boses tapenu medayaw si Jehova ta templona. Nakua ngamin yatun megafu ta egga i pattaradday.​—Gen. 6:14-16, 22; Num. 4:4-32; 1 Cron. 25:1-8.

2. (a) Anni i masingi-singan ta nappollu nga kongregasion Cristiano? (b) Anni ira nga pakkiavu i matabbag taw nga artikulo?

² Masingan yaw nga pamarigan na makkaravulu nga mattrabahu ta nappollu nga kongregasion Cristiano ta pangiyorollu ni Jesu-Cristo. Niyesplika ni apostol Pablo nga maski nu “madduma-ruma i awayya makua” anna “madduma-ruma gapa i passerbi”  anna “madduma-ruma i pakawayya” na kada nazelugan ira nga Cristiano, parte ira na “tattadday laman nga baggi.” (Bibbigan i 1 Corinto 12:4-6, 12.) Ngem kunnasi gapa ta kaggawattam? Kunnasi tam nga mapattalupaddian i pattaradday ta pangilayyagayya ta mapia nga dumug? Kunnasi tam makoffun ta kongregasion tuange ta familia?

3. Anni i nasirmata ni Juan?

³ Turi ta aranni ngana nga mangultimu i ollu siglo C.E., nasirmata ni apostol Juan i pitu nga anghel nga nappaguni tu trumpeta. Turi ta pinaguni na mekalima nira i trumpetana, nasingan ni Juan i “bitun” nga nataga onu nadanna ta davvun. Egga annusi ta limana, anna inusana yatun nga pavvuka ta puerta na avvu nga ari matuku-tukug i karalamna. Nallawan ta makannag nga atu i durun ira nga nattun ta davvun. Imbes nga mulu-mula i daraladda, “totolay nga awan tu marka na Dios ta frente da” i daralanna yatun nga simboliko ira nga durun. (Nep. 9:1-4) Ammu ni Juan i kagrabe na pangatake na durun ira. Ari kari nga inatake na durun i Ehipto gari ta tiempo ni Moises? (Ex. 10:12-15) Iyilustra na simboliko nga durun nga nasingan ni Juan i pangilammuyag na nazelugan ira nga Cristiano ta makapangngua nga mensahe ni Jehova. Kavuluda ta maddaggun i minillion nga neravvunan i iddanamada. Ari nga kakkadda-kaddag nga makkafi i influwensia ni Satanas gukaban na imperio na falso nga relihion ta interu davvun, nu mattaradday tam ta pallayyagayya!

4. Anni nga trabahu i kukukuan na totolay na Dios, anna kunnasi nga metuppal yatun?

⁴ Daka-dakal i trabahu na totolay ni Jehova nga pangilayyagayya ta “mapia nga dumug” ta interu nga mundo nige nga manuppal yaw nga sistema. (Mat. 24:14; 28:19, 20) Nesali tatun i pangimbita ta “sinni laman nga mapangal” tapenu minum ta “danum nga mangiyawa ta inango . . . nga awan tu pagana.” (Nep. 22:17) Kunnasi tam nga makua yatun? Metuppal laman yatun nu “ngamin i maddumu-ruma nga parte na baggi ay mapia i patturuvvug da,” anna “nu mattrabahu ngamin danaw nga parte nga kunna mepangngo.”​—Efe. 4:16.

5, 6. Kunnasi nga mattaradday ittam ta pangilayyagayya ta mapia nga dumug?

⁵ Tapenu melammuyag i mensahe na Pappatulan ta mas aru nga totolay adde ta posible, organisado nakuan i pallayyagayya tam. Yatutta egga alawatattam ira nga instruksion. Meyawa yatun gukaban na kada kongregasion ta interu mundo tapenu mattaradday tam ta pallayyagayya. Kabalittam mammiting para ta pallayyagayya, ipakannammu tam ta totolay i mensahe na Pappatulan. Melayyagayya tam i mensahe gukaban na direkta nga pakiyuvovug anna gukaban na minillion nga kopia na nebase-Biblia nga publikasion ira. Sussuportammu kari i espesial ira nga kampania ta pallayyagayya? Nu kunnatun, makipattaraddeka ta minillion paga nga tanakuan ta pangipakannammu ta mensahe na “anghel nga kumaga-kagag ta tangnga ta utun,” kagitta na nekagi ta Nepakannammu 14:16.

⁶ Makapagayaya nga bibbigan i napattaradday nga resulta na pallayyagayya tam ta Yearbook! Nonopammu gapa i pattaraddetam nga mangitaneg tu imbitasion ira para ta rehional, espesial, anna internasional ira nga kombension. Taw ira nga paggarammammung, makaginna ittam tu makapagaram nga nebase-Biblia nga palappa anna makagiraw tu drama anna demonstrasion ira. Maruddu nga pagaramman ittam na parte ira na programa nga kuan i adde na  mawayya tam para kani Jehova. Pattaraddayan ittam gapa na passelebra ta patay ni Jesus. Megafu ta appresiattam i ari maguku-gukug nga allo na Dios anna tuppalattam i bilin ni Jesus, maggarammammung ittam kada ragun para tatun nga selebrasion​—kabalin na pallammag na bilag ta Nisan 14. (1 Cor. 11:23-26) Ari laman nga bawtisado nga Saksi i awayyana magatende. Piga ligguan nige na Memorial, kuattam i ngamin tapenu membitattam i ngamin nga totolay ta interu nga teritoria na kongregasiottam tapenu makikavulu nittam tatun nga okasion.

7. Nu makka-uffu-uffuttam, anni awayya tam metuppal?

⁷ Nu kunnasi nga baddi laman i madaral na tattadday nga durun, ariattam gapa mallayyagayyan i ngamin nga totolay nu magitetadday ittam. Ngem megafu ta makka-uffu-uffuttam, malayyagayyattam i minillion nga totolay meyannung kani Jehova anna moffunattam ira nga dayawan anna ikakua yaya. Kunnasi tam paga mepasingan i pakipattaraddetam ta totolay na Dios?

8, 9. (a) Anni nga angngarigan i inusa ni Pablo tapenu matudduan i Cristiano ira nga mattaradday? (b) Kunnasi ittam nga manguffun ta kongregasion.

⁸ Ta tura ni Pablo ta taga-Efeso ira, niyarubanna nga kawagan nga ma-organisa i kongregasion anna “mas paga nga mapagamu” i ngamin nga miembro ira. (Bibbigan i Efeso 4:15, 16.) Anni i makoffun nittam tapenu mapprogreso tatun? Inusa ni Pablo nga angngarigan i baggi tam tapenu ipakanawag i pattaradday ta kongregasion gukaban na pangiyorollu ni Jesu-Cristo. Kinagina i meyannung ta mapia nga “patturuvvug da.” Kunnasi nga makoffun i kada tadday nittam​—mabbing onu lakay onu bako, masikan onu makafi​—ta pattaradday anna ta espiritualidad na kongregasion?

⁹ Mawag nga makimoray anna irespeto tam i pinili ni Jesus nga mangiyawa tu direksion ta kongregasion​—i elder ira. (Heb. 13:​7, 17) Mariga yatun nu karuan. Ngem egga komfiansa tam nga tuppalan yatun na Dios nu mappegiya tam sa. Makoffun i aktibo nga fuersana tapenu interu-futu nga masuportattam i unnug ira na kongregasion. Yatutta nu gittana marigatattam nga tuttulan i neyawa nga instruksion, mawag nga nonopattam nu kunnasi nga makoffun i mapakalinno nga panguffuttam tapenu mattaradday i kongregasion. Makasta paga yatun ira nga pakiyuffuttam tapenu mas paga nga dumakal ittam ngamin ta pangaya.

10. Kunnasi makoffun i ministerial ira nga aripan ta pattaradday na kongregasion? (Innan i letratu ta gafu na artikulo.)

¹⁰ Dakal gapa i meyuffun na ministerial ira nga aripan para ta pattaradday na kongregasion. Maski nu anni edadda, malappo lagapa ira nga masserbi ta pakabenefisiowan na ngamin. Angngariganna, uffunadda i elder ira gukaban na paniguradu nga egga suplay nga publikasion para ta pallayyagayya. Maruddu nga ira i mangiyorollu ta pappakarenu anna pammentena ta Kingdom Hall, anna pamadulo ta bisita ira ta study. Gukaban na panguffuttam nira, mattaradday anna organisado i passerbi tam kani Jehova.​—Ikumpara i Kingngua 6:3-6.

11. Anni i meyuffun na mabbing ira ta pattaradday ta kongregasion?

¹¹ Aru nga elder ta kongregasion i malappo nga nasserbi ta aru ngana nga dagun. Ngem limitadu ngana laman i makuada megafu ta pallakay, yari tu mawag i panguli. Dakal i meyuffun na mas mabbing paga  ira. Kawagadda paga i aru nga ekspiriensa, ngem makoffun nira i passanay tapenu mangattu tu mas dakal paga nga responsibilidad. Anni kastana nu mappursigi i ministerial ira nga makualipika nga elder! (1 Tim. 3:1, 10) Megafu ta napprogreso i karuan nga mabbing nga elder, nakualipika ira nga masserbi nga manangngal ta sirkito, nga manguffun ta wawwaragi ta aru nga kongregasion. Ariattam kari mabbala-balo ta sigga-paran nga panguffun na mabbing ira?​—Bibbigan i Salmo 110:3; Eclesiastes 12:1.

12, 13. Anni makoffun ta kataggi-tadday tapenu egga i pattaradday ta familia?

¹² Innattam nu kunnasi mepasingan i panguffun ta familia tam. Aru i nakasingan nga i produktibo nga Paddayarayaw na Familia kada ligguan i nakoffun tapenu mas maddukko ira. Taw ira nga session, nakafokus tam ta espiritual nga ganna-gannug nga mamattaradday ta familia. Awayyada gapa ensayuan i kagiadda ta ministerio tapenu mas preparadu anna efektibo ira. Mas maddukko i familia nu maginnada i komento na kataggi-tadday meyannung ta Biblia​—parehu nga Dios i ayatadda anna tuttuppaladda i urena.

¹³ Anni i awayya nga kuan na magatawa tapenu manguffun ta pangidayaw kani Jehova? Nu parehu nga matalo nga masserbi kani Jehova i magatawa, magayaya ira anna egga pattaraddeda. Da Abraham anni Sara, Isaac anni Rebeka, Elkana anni Hana​—nipasingadda ngamin i ayada ta gi-attawadda. Kuattam gapa nakuan yatun. (Gen. 26:8; 1 Sam. 1:5, 8; 1 Ped. 3:5, 6) Yatun i makoffun nittam nga mas madukko ta atawa tam anna ta Yama tam ta langi.​—Bibbigan i Eclesiastes 4:12.

14. Nu ari nga massesserbi i atawam kani Jehova, anni i kuammu tapenu mapaladda i pagatawanu?

¹⁴ Manawag nga kinagi na Biblia nga ari nakuan mangatawa onu makitawa i Cristiano ta ari masserbi kani Jehova. (2 Cor. 6:14) Kunnasi gapa i wawwaragi tam nga ari tu kapangngurug i kafamiliada? Egga ngana atawa na karuan nigeda nannammuan i kinakurug, yari tu ari nga Saksi i atawada. Maski nu kunnatun, makoffun ta pattaradday na familia i pangiyaplika ta prinsipio ira na Biblia. Kavulu taw i pakiyoffun adde ta mawayyana ngem ari nga makikompromiso. Ari nga mabi yaw, ngem nonopammu i makasta ira nga resultana. Mariga nga iyaplika i prinsipio ira na Biblia nu pinanawan na atawada i kongregasion. Nesimmu yatun kani Mary. Nasserbi yaya anna i atawana nga si David kani Jehova, ngem turi ta nappasa i 25 dagun, nagimmang si David nga naki-study. Matalo lagapa si Mary nga maki-study anna maki-kombension, niyaplikana i prinsipio ira na Biblia ta baleda, anna sinudduanna i annam nga ánada. Turi ta nagadulto ngana i ánada anna nappapanaw ira, natagenona nga magitetadday yaya. Namegafu nga bibbigan ni David i magazinas nga nibattan ni Mary para sa. Turi kua, nagatende ngana uli yaya ta Kingdom Hall, anna kanayun nga mangireserba tu pagitubangnganna i annam nga ragun nga afukuna. Nu ari nga makangay si David, kagian na abbing, “Lolo, namiss taka ta study.” Kabalin na 25 nga dagun, nasserbi ngana uli si David kani Jehova. Magayaya ngana ira dua ni Mary nga makkavulu mangana ira ta passerbi.

15. Kunnasi moffunan na nabinnay ngana nga magatawa i bagu paga laman?

¹⁵ Megafu ta pangatake ni Satanas ta familia ta maddaggun, importante ta Cristiano ira nga magatawa nga egga i kooperasiodda. Maski nu nabinnay kamu  ngana nga magatawa, nonopammu nu anni paga i awayyam kagian onu kuan tapenu mapaladda i pagatawanu. Makoffun i manakam ira ta mabbing nga miembro na kongregasion taw nga gannug. Awayyanu gapa nga imbitan i bagu ira nga magatawa ta balenu tapenu mevulu ta paddayarayaw na familianu. Durante nga kavulunu i bagu ira nga magatawa, masingadda nga importante i pangiddeddunu anna pakka-uffu-uffunnu maski nabayag kamu ngana magatawa.​—Tito 2:3-7.

16, 17. Anni i ininnaggan na nattaradday nga aripan na Dios?

¹⁶ Nonopammu i Israelita ira ta tiempo na Biblia nga maddayarayaw kani Jehova ta fiesta ta templo na Jerusalem. Napprepara ira ta biaheda, nakka-uffu-uffun ira ta kawagan na kataggitadday, anna nattaradday ira ta paddayarayaw ta templo. Yatun i makagi nga kooperasion. (Lucas 2:41-44) Durante nga mappange ittam ta napabagu nga mundo, mawag tam gapa i mattaradday anna makka-uffu-uffun. Mawag tam i appursigi tapenu makua tam yatun. Anni paga i awayyam kuan taw nga gannug?

¹⁷ Nonopammu i maginnennag nga bendision nittam! Nibattattam ngana i pabbalin tu makasarili anna i ari pakka-annugutan nga gagangay ta maddaggun nga sistema na ganna-gannug. Masingattam ngana i ketuppal na profesiya da Isaias anni Mikias​—mattaradday i totolay na Dios nga mune “ta vukig ni Jehova.” (Isa. 2:2-4; bibbigan i Mikias 4:2-4.) Kurug nga mas neyatannang i paddayarayaw tam ta “pangurianan ira na aggaw.” Anni mabba i pagayaya tam sonu mattolay tam ta tiempo nga mattaradday anna makka-uffu-uffun i totolay!