1. Жь дәстпека әʹфьрандьнеда шьхӧлед Хԝәде ча дьһатьнә кьрьне?

ДӘСТПЕБУНА әʹфьрандьнеда Йаһоԝа у Иса йәктийеда бун. Йаһоԝа пешийа һәр тьшти Иса әʹфьранд. Ле һʹәму тьштед дьн Хԝәде тʹәви Иса әʹфьранд. Иса гот: «Әз рʹож бь рʹож, бь кʹефхԝәшийева тʹьжи бум, ль бәр ԝи» (Мәтʹлк. 8:30). Бав у Кӧрʹ тʹәви һәв һәвкʹари дькьрьн, ԝана щурʹә-щурʹә бинбәред дьн жи әʹфьрандьн чь кӧ иро әм дьвиньн. Әԝ йәкти ӧса жи дьһатә кʹьфше нава хьзмәткʹаред Хԝәдеда. Мәсәлә, чахе Нӧһ тʹәви нәфәред хԝә гәми ава дькьр. Ӧса жи, чахе щьмәʹта Хԝәде ль бәрʹийеда щигӧһасти дьбун, тʹәвайи Коне Пироз тʹоп дькьрьн, һәвдәрдьхьстьн, у щигӧһасти дькьрьн. Әԝ һәвкʹари һьн жи һәбу чахе пʹарьстгәһеда тʹәвайи пәсьне Йаһоԝа дьдан бь кʹьлама у һащәтед музикайе. Әԝ һәр тьшт щьмәʹта Хԝәде дькарьбу бькьра, чьмки йәкти нав ԝанда һәбу (Дәстп. 6:14-16, 22; Жьмар 4:4-32; 1 Дир. 25:1-8).

2. а) Бь чь әʹйан бу щьвата Мәсиһитийә пешьн? б) Дь ве тʹемайеда кʹижан пьрс ԝе бенә шьровәкьрьне?

² Ԛьрʹна йәкеда щьвата Мәсиһитийә пешьн жи йәктийеда бу. Әԝ щьват бьн рʹебәрийа Сәре щьвате, демәк Иса Мәсиһда бу.  Паԝлосе шанди шьровәкьр, кӧ рʹаст ә «щурʹә-щурʹә пʹешкʹешед» Мәсиһийед рʹункьри һәнә у ӧса жи «щурʹә-щурʹә ԛӧльх», «щурʹә-щурʹә карин», ле йәкә әԝ һʹәмушк пʹарәкә бәдәнәке нә, демәк әԝана йәктийеда ньн. (Бьхунә 1 Корьнтʹи 12:3-6, 12.) Ле чь әм дькарьн бежьн дәрһәԛа рʹожа иройин? Ча әм дькарьн йәктийеда бьн шьхӧле бәлакьрьна мьзгинеда? У әм ча дькарьн һәвкʹарийе бькьн щьватеда у ӧса жи малбәтеда?

3. Йуһʹәннайе шанди чь дитьнок дит?

³ Ԛьрʹна йәкеда Д.М., Йуһʹәннайе шанди дитьнок дит дәрһәԛа һʹәфт мьлйакʹәта, кӧ жь ԝан һәр кәси дәнге борʹийе дьһат. Чахе мьлйакʹәте пенща борʹийе хьст, Йуһʹәнна «стәйркәк» дит жь әʹзмен кʹәти сәр рʹуйе әʹрде. Бал ԝи стәйрки һәбу кʹьлита дәре гәлийе һәйԝайе. Әԝи дәре гәлийе һәй-ԝайе вәкьр, у ду-духан дәркʹәт у жь ԝе ду-духане кӧли дәркʹәтьн. Әԝ кӧлийед симболик, дәԝса кӧ зийане бьдьнә шинкайе, әԝана зийане дьдьнә «ԝан мәрьвед кӧ мора Хԝәде ль сәр әʹнийа ԝан тʹӧнәйә» (Әʹйан. 9:1-4). Бешьк, Йуһʹәнна заньбу ԝәки кӧли зийана мәзьн дькарьн биньн. Нә һена Мусада, ԝәʹде бәлаки, кӧлийа тʹәмамийа ԝәлате Мьсьре гьрт (Дәркʹ. 10:12-15). Әԝ кӧлийед симболик, кʹижан кӧ Йуһʹәнна дит, тенә һʹәсабе Мәсиһийед рʹункьри, йед кӧ рʹелигийед ԛәлпрʹа әʹлам дькьн дәрһәԛа диԝана Йаһоԝа. Милйона мәрьв баԝәрийа кʹижана һәйә кӧ бьжин ль сәр әʹрде, ԝи шьхӧлида тʹәви ԝан ьн. Тʹәви һәв әԝана хьзмәткьрьнеда һәвкʹарийе дькьн. У әԝ йәк али гәләк мәрьва дькә, кӧ рʹелигийа ԛәлп бьһельн у хԝә жь һʹӧкӧме Шәйтʹан хьлаз бьн!

4. Щьмәʹта Хԝәде чь шьхӧли гәрәке бинә сери, у кʹижан рʹекә тʹәк һәйә ԝәки әԝи шьхӧли биньн сери?

⁴ Щьмәʹта Йаһоԝарʹа тʹәми һатийә дайине, ԝәки «мьзгинийа Пʹадшатийе» бәла кьн нав тʹәмамийа дьнйайеда, һʹәта хьлази нәһатийә (Мәт. 24:14; 28:19, 20). Әԝ йәк те һʹәсабе тʹәглиф кьн ԝан йед кӧ «тʹи» нә, сәва кӧ «ава жийине» беһәԛ бьстиньн (Әʹйан. 22:17). Чаԝа әндәмед щьвата Мәсиһити, әм ча дькарьн һе пешда һәрʹьн ԝе йәкеда? Әме бькарьбьн пешда һәрʹьн, һәрге йәктийе хԝәй кьн у щьватеда һәвкʹарийе бькьн (Әфәс. 4:16).

5, 6. Әм ча йәктийеда ньн чахе мьзгине бәла дькьн?

⁵ Сәва кӧ чьԛас дькарьн гәләкарʹа мьзгине бәла кьн, әм гәрәке пешда хԝә һазьр кьн бона хьзмәткьрьне. Ве йәкеда али мә дькьн рʹебәрийед кӧ әм щьвата хԝәда дьстиньн. Паши щьвата даннасинкьрьне, әм дьчьнә хьзмәткьрьне у мәрьварʹа гьли дькьн дәрһәԛа мьзгина Пʹадшатийе. Әм ӧса жи ԝанрʹа бәла дькьн әʹдәбйәтед сәр һʹиме Кʹьтеба Пироз. Щара рʹебәрийе дьдьнә мә кӧ кампанйед хьзмәткьрьнеда кʹар бькьн. Чахе һун кʹар дькьн ԝан кампанйада, бь ве йәке һун йәктийеда ньн тʹәви милйона хушк у бьра, йед кӧ әве мьзгине бәла дькьн. Һьн жи, һун һәвкʹарийе дькьн тʹәви мьлйакʹәта, йед кӧ али щьмәʹта Хԝәде дькьн бәлакьрьна мьзгинеда (Әʹйан. 14:6).

⁶ Чахе әм кʹьтеба «Һәрсалида» дьхуньн кӧ шьхӧле мәйи бәлакьрьна мьзгине чь кʹаре тинә, әԝ йәк мәрʹа шабуне тинә! Ӧса жи бьфькьрьн, дәрһәԛа йәктийа мә чахе тʹәвайи нав тʹәмамийа дьнйайеда бәла дькьн тʹәглифкьрьнед сәр щьватед мәзьн. Сәр ԝан щьвина әм готаред һеланкьрьне дьбьһен, ӧса жи драма у тʹәмаша дьньһерʹьн. Әԝ һʹәму тьшт дьдьнә кʹьфше, кӧ ча Хԝәде бь һʹьзкьрьне мә тʹәглиф дькә, ԝәки бь тʹәмамийа дьле хԝә ԝирʹа хьзмәт кьн. Евара Биранина мьрьна Иса жи мә дькә йәктийе. Әм һәр  сал 14 Нисане паши кӧ рʹо дьчә ава, тʹоп дьбьн сәва бьдьнә кʹьфше рʹазибуна хԝә бона дьлрʹәʹмийа Хԝәде һьндава мә, у ӧса жи бьдьнә кʹьфше гӧһдарибуна хԝә һьндава тʹәмийа Иса (1 Корн. 11:23-26). Ле нә кӧ тʹәне йед ньхӧманди дькарьн бен сәр ве ԛәԝьмандьне. Чәнд һʹәфти пешийа Евара Биранине әм дәртен хьзмәткьрьне, сәва кӧ чьԛас дькарьн гәләк мәрьва тʹәглиф кьн сәр ԝе ԛәԝьмандьна мәхсус.

7. Чахе әм тʹәвайи һәвкʹарийе дькьн, әм чь дькарьн бькьн?

⁷ Кӧлик тʹәне нькарә тьштәки мәзьн бькә. Ӧса жи мәрьвәк тʹәне нькарә һʹәму мәрьварʹа мьзгине бәла кә. Ләма жи әм тʹәви һәв һәвкʹарийе дькьн, сәва кӧ али милйона мәрьва бькьн әԝана нас кьн ԝи, кʹе кӧ һежайи пәсьна у шькьрийе йә. Әԝ һәйә Йаһоԝа! Ле мәщалед дьн жи һәнә бь чь жи әм дькарьн тʹәви щьмәʹта Хԝәде йәктийеда бьн.

8, 9. а) Паԝлос чь мәсәлә ани сәва кӧ Мәсиһийа һин кә ԝәки әԝана йәктийеда бьн? б) Әм ча дькарьн һәвкʹарийе бькьн щьватеда?

⁸ Паԝлос нәʹма хԝәда Әфәсийарʹа шьровәкьр, ча щьват сазкьри йә у лазьм ә щьватеда гьшк «һәр алийада бьгьһижьн». (Бьхунә Әфәси 4:15, 16.) Паԝлос мәсәлә ани дәрһәԛа бәдәне, сәва бьдә кʹьфше кӧ һәр Мәсиһи дькарә щьватеда йәктийе хԝәй кә, кʹидәре Иса Мәсиһ рʹебәрийе дькә. Паԝлос ӧса жи гьли дькә дәрһәԛа һәвкʹарийа һәр «севька», кʹижан кӧ гәләк лазьм ьн. Ле ча һәр кәс жь мә, фьрԛи тʹӧнә щаһьл йан мәзьн, ԛәԝи йан сьст, дькарә йәктийе бькә щьвате?

⁹ Әме бькарьбьн, һәрге әм ԛәдьре ԝан дьгьрьн, йед кӧ Иса кʹьфш кьр, сәва әԝана щьватеда рʹебәрийе бькьн. Әԝ һәнә рʹуспи (Ибрн. 13:7, 17). Рʹаст ә щарна әԝ йәк чәтьн ә. Ле әм дькарьн жь Хԝәде рʹебәрийе һиви кьн. Рʹӧһʹе ԝийи пироз дькарә али мә бькә кӧ бь дьл у щан аликʹарийе бьдьн щьвате. Һәрге һʹәԝаса мә тʹӧнә кӧ пәй рʹебәрийе һәрʹьн кʹижан кӧ әм щьватеда дьстиньн, әм гәрәке бьфькьрьн һәрге әм бь мьлукти һәвкʹарийе бькьн, әме йәктийе бькьнә щьвате. Хенщи ԝе йәке, һәвкʹарийа ӧса али мә бькә кӧ һʹьзкьрьна хԝә һе мәзьн кьн.

10. Ча бәрдәстийе щьвате аликʹарийе дьдьн кӧ йәкти һәбә щьватеда? (Бьньһерʹә шькьле әʹԝльн.)

¹⁰ Бәрдәстийе щьвате жи аликʹарийе дьдьн кӧ йәкти щьватеда һәбә. Фьрԛи тʹӧнә әԝ бьра чәнд сали нә, әԝана бь дьл у щан хьзмәтийеда рʹӧһʹе хԝәԛӧрбанкьрьне дьдьнә кʹьфше, сәва кӧ һʹәмуйарʹа кʹаре биньн. Мәсәлә әԝана али рʹуспийа дькьн кӧ бьньһерʹьн һәла әʹдәбйәтед бона бәлакьрьне щьватеда тʹере дькьн йан на. Хенщи ԝе йәке, әԝана аликʹари дьдьн бона тʹәмьзайа Ода Щьвата у хԝәйкьрьна ве. Әԝана ӧса жи дьсәкьньн у слав дькьн һʹәмуйа кʹе те щьвате. Әм чахе тʹәви ԝан бьра һәвкʹарийе дькьн, әм йәктийе хԝәй дькьн у Йаһоԝарʹа бь организә хьзмәт дькьн. (Бәрамбәр кьн Кʹаред Шандийа 6:3-6.)

11. Бьред щаһьл ча дькарьн аликʹарийе бьдьн кӧ щьватеда йәкти һәбә?

¹¹ Гәләк бьред щабдар бь сала щьватеда хьзмәт дькьн. Әԝана дьԛәԝьмә ида нькарьн һаԛаси бькьн чьԛас кӧ бәре дькьрьн, чьмки әʹмьрда мәзьн ьн. Ле бьред щаһьл дькарьн бьбьнә аликʹарчи бона ԝан. Әԝана дьбәкә щерʹьбанди ниньн, ле дькарьн бенә һинкьрьне, сәва һе зедә щабдарийа һьлдьнә сәр хԝә. Чьԛас баш ә чахе бәрдәстийе щьвате дьхәбьтә кӧ пешда һәрʹә у бьбә рʹуспи! (1 Тимтʹ. 3:1, 10). Һьнәк рʹуспийед щаһьл пешда чунә у дькарьн хьзмәт кьн ча  бәрпьрсийаред мьһале, сәва кӧ гәләк щьватада али хушк-бьра бькьн. Әм гәләк рʹази нә кӧ әԝ бьред щаһьл һазьр ьн аликʹарийе бьдьн. (Бьхунә Зәбур 110:3; Ԝаиз 12:1.)

12, 13. Чь дькарә али нәфәред малбәте бькә сәва кӧ тʹәви һәв һәвкʹарийе бькьн?

¹² Ньһа ԝәрә әм шеԝьр кьн, ча әм дькарьн малбәтеда һәвкʹарийе бькьн, сәва йәкти һәбә малбәтеда. Гәләка тʹәхмин кьрьнә чахе Ԛӧльхкьрьна тʹәви Малбәте һәр һʹәфти дәрбаз дьбә, һәләԛәтийа ортʹа щаһьла у мәзьна ԛәԝи дьбә. Ԝәʹде ве щьвине, әм дәрһәԛа тьштед рʹӧһʹани хәбәрдьдьн, у әԝ йәк йәктийе дькә малбәте. Чахе малбәт пешда хԝә һазьр дькә бона хьзмәткьрьне, әԝ йәк али малбәте дькә кӧ мьзгине һе рʹьнд бәла кьн. У чахе әԝана тʹәвайи дәрһәԛа рʹастийе хәбәрдьдьн, у дьвиньн ԝәки гьшк малбәтеда Йаһоԝа һʹьз дькьн у дьхԝазьн дьле ԝи ша кьн, әԝана һе незики һәв дьбьн.

¹³ Щотед зәԝаще чь дькарьн бькьн, сәва кӧ тʹәви һәв һәвкʹарийе бькьн, у пәсьне Йаһоԝа бьдьн? Һәрге һәр йәк жь щотед зәԝаще бь амьнийе Йаһоԝарʹа хьзмәт кә, әԝана ԝе бәхтәԝар бьн у йәктийеда бьн. Бьраһим у Сәрайе, Исһаԛ у Рәбәкайе, Һаннайе у Әлкана, гьшк жи һьндава һәвдӧ һʹьзкьрьне дьданә кʹьфше. Әм жи гәрәке чʹәʹв бьдьнә ԝан, демәк һʹьзкьрьне бьдьнә кʹьфше щоте хԝәрʹа (Дәстп. 26:8; 1 Сам. 1:5, 8; 1 Пәт. 3:5, 6). Әԝ йәк щотед зәԝаще незики һәв дькә, у ӧса жи әԝана һе зедә незики Баве хԝәйи әʹзмана дьбьн. (Бьхунә Ԝаиз 4:12.)

14. Һәрге һәвалзәԝаще(а) тә Йаһоԝарʹа хьзмәт накә, тӧ чь дькари бьки сәва кӧ зәԝаща тә ԛәԝи бьминә?

¹⁴ Мәсиһи гәрәке хԝә хԝәй кьн, кӧ тʹәви нәбаԝәра нәкʹәвьнә бьн нирәки (2 Корн. 6:14). Ле һәнә хушк у бьра, малбәта кʹижанада нәбаԝәр һәнә. Һьнәк жь ԝан ида зәԝащеда бун чахе һатьнә нава рʹастийе, ле һәвалзәԝаще ԝана нәһатьнә нава рʹастийе. Ве дәрәщеда йәкә Мәсиһи дькарә малбәтеда әʹдьлайе хԝәй кә, һәрге пе принсипед Хԝәде бьжи. У ӧса жи әԝана дькарьн тʹәвайи һәвкʹарийе бькьн у рʹе бьдьнә һәв. Рʹаст ә әԝ йәк дькарә чәтьн бә, ле бьфькьрьн әв кʹарәкә чьԛас мәзьн тинә. Принсипед Кʹьтеба Пироз биньн сери щара дькарә чәтьн бә, илаһи һәрге һәвалзәԝащәк щьвате дьһелә. Әԝ йәк ԛәԝьмийә тʹәви хушкәке, наве кʹижане Мери йә. Әԝ у мере ԝе Девид тʹәвайи Хԝәдерʹа хьзмәт дькьрьн, ле паше әԝи щьват һишт. Мери бь хирәт дьчу сәр щьвата у щьватед мәзьн. Әԝ ӧса жи чьԛас дькарьбу принсипед Кʹьтеба Пироз дьани сери малда у һинкьрьна шәш зарʹед хԝәда. Чахе зарʹ мәзьн бун у жь мале чун, Мерийе хԝә тʹәне тʹәхмин дькьр. Һьнге Девид дәстпекьр бьхунә әԝ журналед кӧ Мерийе жерʹа дьһишт. Щар-щара әԝ диса вәдьгәрʹийа сәр щьвине, кʹидәре кӧ нәбийе ԝийи шәш сали бона ԝи щи дьгьрт. Ле чахе Девид нәдьчу щьвине, нәби жерʹа дьгот: «Калко иро тӧ нәһатьбуйи щьвине, мьн бира тә дькьр». Паши 25 сала Девид вәгәрʹийа щьвате, у ньһа әԝ бь шабуне Йаһоԝарʹа хьзмәт дькә, у Мери жи бәхтәԝар ә чьмки әԝана диса тʹәвайи Йаһоԝарʹа хьзмәт дькьн.

15. Ча щотед әʹмьрда мәзьн дькарьн али щотед щаһьл бькьн?

¹⁵ Рʹожа иройин Шәйтʹан пәй малбәта дькʹәвә, у ләма гәләк фәрз ә ԝәки хьзмәткʹаред Хԝәде һәләԛәтийа баш хԝәй кьн зәԝаща хԝәда. Фьрԛи тʹӧнә һун чьԛас ԝәхт зәԝащеда ньн, тʹьме бьфькьрьн һәла һун чь дькарьн бежьн йане бькьн, сәва зәԝаща хԝә һе ԛәԝи кьн.  Һәрге һун щотед әʹмьрда мәзьн ьн, һун дькарьн али щотед щаһьл бькьн. Һун дькарьн щотед щаһьл тʹәглифи мала хԝә кьн, сәва кӧ тʹәвайи ԛӧльхкьрьна тʹәви малбәте дәрбаз кьн. Әԝана дькарьн жь ԝә һин бьн, ԝәки фьрԛи тʹӧнә әԝана чьԛас ԝәхт зәԝащеда ньн, йәкә гәрәке һʹьзкьрьне һьндава һәвдӧ бьдьнә кʹьфше у йәктийеда бьн (Тито 2:3-7).

16, 17. Хьзмәткʹаред Хԝәде кӧ йәктийеда ньн һивийа чь нә?

¹⁶ Бьдә бәр чʹәʹве хԝә Исраела ԝәʹде бәре, чахе щәжьна Оршәлимеда пәсьне Йаһоԝа дьдан пʹарьстгәһеда. Ԝана һʹәму тьшт чь кӧ лазьм бу бона рʹеԝитийе һазьр кьрьн, паше әԝана тʹәвайи рʹекʹәтьн у али һәв дькьрьн. Пʹарьстгәһеда ԝана тʹәвайи пәсьне Йаһоԝа дьдан у жерʹа хьзмәт дькьрьн (Луԛа 2:41-44). Рʹожа иройин чаԝа кӧ әм һазьр дьбьн бона жийина дьнйа тʹәзә, мәрʹа лазьм ә йәктийеда бьн у һʹәму тьшти бькьн чь кӧ дькарьн, сәва тʹәви һәв һәвкʹарийе бькьн. Сәва ԝе йәке лазьм ә тʹьме ԛәԝате бьдьнә хәбате. Һәла бьфькьрьн һун ча дькарьн һе зедә бькьн сәва ве йәке?

¹⁷ Бьфькьрьн дәрһәԛа кʹәрәмед кӧ һивийа мә нә! Әм ида жь ве дьнйа бетʹьфаԛ дур ьн. Әм ньһа пе чʹәʹве хԝә дьвиньн кӧ ча пʹехәмбәртийа Ишайа у Миха тенә сери. Бь рʹастийе жи, щьмәʹта Хԝәде бь йәкти һьлдькʹьшьнә сәр «чʹийайе Хӧдан». (Иша. 2:2-4; бьхунә Миха 4:2-4.) Рʹасти жи, хьзмәткьрьна мә Хԝәдерʹа ԝан «рʹожед хьлазийеда» гәләк дьле ԝи ша дькә, у әԝ жь мә рʹази йә. Ле ԝәʹдәки, ԝе чьԛас хԝәш бә чахе әм бәхтәԝар у ша бьн, чьмки әме бьжин ԝи ԝәʹдәйи кӧ һʹәму инсанәт әʹдьлайеда, йәктийеда у һәвкʹарийеда Йаһоԝарʹа хьзмәт бькьн!