1. Wẽnnaam sẽn sɩng bũmbã fãa naanegã tɛka, yaa vẽeneg tɩ bõe n tar yõodo?

HAL Wẽnnaam sẽn wa n sɩng bũmbã fãa naanegã, yɩɩ vẽeneg tɩ naag taab n tʋm tara yõodo. A reng n naana a Zeezi n yaool n naan bũmb a taabã. Rẽ poore, a Zeezi zĩnda a “sɛɛgẽ wa tʋʋm-mita,” n sõng-a n tʋme. (Yel. 8:30, Wẽnnaam Sebre, 1983) Neb nins sẽn tũ a Zeova pĩnd wẽndẽ wã me naaga taab n tʋme. Wala makre, a Nowe ne a zakã rãmb sõnga taab n ka koom-koglgã. Kaoosg zugẽ, Israyɛll nebã sẽn wa n na n ti sɛk-roogã, b naaga taab n tʋme. B sã n da wa n na n yiki, b sõngda taab n siig-a, tɩ b sã n ta b sẽn na n sigẽ wã bɩ b le naag taab n ti-a. Wẽnd-doogẽ wã me, b ra naagda taab n yɩɩndẽ la b wẽed yʋʋm-teed n pẽgd a Zeova hal tɩ noomẽ. A Zeova nin-buiidã sã n da pa sõng taaba, b ra pa tõogd n maan bõn-kãensã baa a yembr ye.—Sɩng. 6:14-16, 22; Sõd. 4:4-32; 1 Kib. 25:1-8.

2. a) Bõe la d tõe n yeel pipi kiris-nebã zugu? b) Sogs-bʋs la d na n leoke?

² Pipi kiris-nebã me ra sõngda taaba, n sakd a Zeezi Kiris  sẽn yaa b taoor lʋɩtã. Tʋm-tʋmd a Poll wilgame tɩ tigingã pʋgẽ, nebã minimã la b tʋʋmã yaa toor-toore, la tɩ baa ne rẽ, b yaa ‘yĩng a yembre.’ (Karm-y 1 Korẽnt-rãmb 12:4-6, 12.) La rũndã-rũndã yẽ? Wãn to la d tõe n naag taab n tʋm koe-noogã mooneg pʋgẽ? La wãn to la d tõe n sõng tɩ zems-n-taar zĩnd tigingã pʋgẽ, la d zakã pʋgẽ?

3. Bõe la Wẽnnaam vẽneg tʋm-tʋmd a Zã t’a yã?

³ Pipi kiris-nebã wakatẽ, tʋm-tʋmd a Zã yãa bõn-makre. A yãa malɛgs a yopoe sẽn peebd bardo. Malɛk a nu soabã sẽn wa n peeb a baorgã, a Zã yãa “ãdg a yembr sẽn yi saasẽ n lʋɩ tẽngã zugu.” Ãdgã talla kʋɩlen-biiga, n pak bulg sẽn yaa zulung noore. A sẽn pakã, bug-zõos n yi bulgã pʋgẽ, tɩ sʋy yi bug-zõosã pʋgẽ. Sʋyã pa wãbd tɩɩsã la moodã ye. B yiime n na n “zab ne neb nins sẽn ka tar Wẽnnaam bãnd b rĩyẽ wã.” (Vẽn. 9:1-4) Yaa vẽeneg t’a Zã mii sʋy sẽn tõe n wa ne sãoong ningã. Sɩd me, a Moyiiz wakatẽ wã, Wẽnnaam kɩtame tɩ sʋy sãam bũmb wʋsg Ezɩpt soolmẽ wã. (Yik. 10:12-15) Sʋy nins a Zã sẽn yã wã makda kiris-neb nins sẽn paam vʋʋsem sõng zaeebã. B moonda a Zeova bʋ-kaoorã koeese, n pukd ziri tũudmã bãongo. Neb milyõ-rãmb sẽn saagd n na n wa vɩɩmd wakat sẽn kõn sa tẽngã zug n sõngd-b n moondẽ. B sẽn naag taab n moondẽ wã yĩnga, b tõog n sõnga neb wʋsg tɩ b yi n bas ziri tũudmã, t’a Sʋɩtãan pa le so-b ye.

4. Tʋʋm-bʋg la a Zeova nin-buiidã segd n tʋme, la bõe la b segd n maan n tõog n tʋm-a?

⁴ A Zeova nin-buiidã tara tʋʋm-kãseng n segd n tʋme. B segd n moona ‘koe-noogã’ dũni gill tɩ sɛɛbã yaool n ta. (Mat. 24:14; 28:19, 20) B segd n boola neb nins fãa “ko-yũud” sẽn tarã tɩ b wa “reeg vɩɩm koom zaalem,” rat n yeel tɩ b segd n modg n sõnga neb nins fãa sẽn datã tɩ b wʋm Biiblã goam võore. (Vẽn. 22:17) La d sã n pa naag taab n tʋm la d teel taaba, d pa na n tõog n maan dẽ ye.—Efɛ. 4:16.

5, 6. Bõe yĩng tɩ d tõe n yeel tɩ d naagda taab n moond koe-noogã?

⁵ Sẽn na yɩl tɩ koe-noogã ta neb wʋsgo, d segd n sigla tʋʋmdã sõma. Sagls nins d sẽn paamd tigingã pʋgẽ wã sõngd-d-la zĩ-kãng wɛɛngẽ. Wala makre, d rengd n tigma taab n kelg sagls n yaool n yi koɛɛgã moonego. D maanda woto dũniyã gill zugu, n tar sɛb sẽn tik Biiblã me n kõt nebã. D zoe n kõo sɛb milyõ-rãmba. B mi n yiisa sebre, n yãk wakat n yeel tɩ d pʋɩ-a dũniyã gill zugu. Y sã n wa pʋɩt seb-kãens buudã, y naaga y tẽed-n-taas milyõ-rãmb n moond koe-yɛng ne ‘malɛk ning sẽn yɩgd n pɩʋʋgd yĩngrã.’ B gomda malɛg-kãng yell Vẽnegr 14:6 pʋgẽ.

⁶ D sã n wa karemd aniyɛɛrã, n ne tõnd koe-moonegã sẽn womd biis to-to dũniyã gillã, pa noom-d sɩda? Tags-y tõnd sẽn mi n pʋɩt tigis-kãsemsã bool-sɛbã me yelle. Tigis-kãsemsã sasa, d kelgda sõss sẽn kengd raoodo, la d mi n get teyatr-dãmb la mak-n-wilg toor-toore. B wae n gomda Wẽnnaam nonglmã yelle, sẽn na yɩl tɩ d maneg n tũ-a ne d sũur fãa. A Zeezi kũumã tẽegr wakat me, d naagda d tẽed-n-taasã n maand bũmb kẽere. Yʋʋmd fãa, d maand-a-la Nizã kiuugã rasem 14 dũniyã gill zugu, wĩndgã kõom poore, n wilg tɩ d sũur nooma ne a Zeova sẽn maan bũmb ningã, la tɩ d sakda a Zeezi noorã. (1 Kor. 11:23-26) Sẽn paase, pa  sẽn deeg-b lisg n yaa a Zeova Kaset rãmbã bal n tõe n wa ye. A Zeezi kũumã tẽegr sã n wa kolgdẽ, d maanda d sẽn tõe fãa sẽn na yɩl n bool neb wʋsg tɩ b wa.

7. D sẽn naagd taab n moond koɛɛgã kɩtame tɩ d tõogd n maand bõe?

⁷ Sʋʋr sã n yaa a yembre, a pa tõe n sãam bũmb wʋsg ye. Woto me, d sã n get tõnd ned kam fãa sẽn maand bũmb ning koɛɛgã mooneg pʋgẽ wã, tõe n wõnda pa waoog ye. La d sẽn naagd taab n tʋmdẽ wã, d tõogd n moonda neb milyõ-rãmb koɛɛgã, n gomd a Zeova sẽn yaa a soab ning sẽn zems ne pẽgr la waoogrã yelle. La pa d sẽn naagd taab n moond koɛɛgã yĩng bal la d sẽn zemsd taabã ye.

8, 9. a) Mak-bʋg la a Poll rɩk n wilg tɩ kiris-nebã segd n zemsda taaba? b) Bõe la d tõe n maan n sõng tɩ zems-n-taar zĩnd tigingã pʋgẽ?

⁸ Lɛtr ning a Poll sẽn tool Efɛɛs kiris-nebã pʋgẽ, a wilga tigingã sẽn sigl to-to wã, la a paas t’a nebã segd n bɩta bũmb fãa pʋgẽ. (Karm-y Efɛɛs-rãmb 4:15, 16.) Bõe la d ned kam fãa tõe n maan tɩ yɩ woto? A Poll rɩka makr ne ninsaal yĩngã sẽn yaa to-to wã, n wilg tɩ d fãa tõe n sõngame tɩ zems-n-taar zĩnd d sʋka, tɩ d fãa me ket n tũud a Zeezi Kiris sẽn yaa tigingã naabã. A yeelame tɩ yĩngã wil fãa tonga taaba, n sõngd taaba. Woto wã, d yaa kãsem tɩ d yaa bi-bɩɩga, d tara keelem tɩ d pa tar me, bõe la d tõe n maan tɩ zems-n-taar zĩnd tigingã pʋgẽ?

⁹ A Zeezi yãka kãsem-dãmbã tɩ b lʋɩ tigingã taoore, n dat tɩ d waoog-ba, la d tũ b saglsã. (Ebre. 13:7, 17) La pa wakat fãa la rẽ maaneg yaa nana ye. Zĩ-kãng wɛɛngẽ, d tõe n kosa a Zeova t’a sõng-do. A vʋʋsem sõngã tõe n sõnga tõnd tɩ d teel kãsem-dãmbã ne d sũur fãa. Sẽn paase, d pa segd n yĩm tɩ d sã n sik d meng n sak kãsem-dãmbã, nafda tigingã neb fãa ye. D sã n maan woto, d tigingã neb na n zemsda taaba, tɩ d sẽn nong taab to-to wã me tar paasgo.

10. Bõe la kãsem-sõngdbã maand tɩ sõngdẽ tɩ tigingã neb zemsd taaba? (Ges-y sõsgã sɩngrẽ fotã.)

¹⁰ Kãsem-sõngdbã me tʋmda wʋsg sẽn na yɩl tɩ tigingã neb ket n zemsd taaba. B sẽn tʋmd tʋʋm ninsã nafda tõndo. Rẽ pa be ne b yʋʋmã sẽn zem to-to ye. Wala makre, b kẽer geta sɛbã yelle, n sõngdẽ tɩ d paamd sɛb nins d sẽn dat koɛɛgã mooneg yĩngã. Sãnda reegda sãamb nins sẽn wat d tigissẽ wã. B modgda wʋsg me n sõngd n get Rĩungã roog yelle. D sã n teend saam-bi-kãense, d sõngdame tɩ bũmb fãa maan tɩ zems tigingã pʋgẽ.—Ges-y Tʋʋm 6:3-6.

11. Bõe la kom-bɩɩsã tõe n maan n sõng tɩ zems-n-taar zĩnd tigingã pʋgẽ?

¹¹ Kãsem-dãmb kẽer sɩng n tʋmda tigingã tʋʋm hal sẽn kaoose. La tõe tɩ b yʋʋmã sẽn vẽsgdã yĩng kɩtame tɩ b pa le tõe n tʋm wa pĩndã ye. Rẽ n so tɩ b rat saam-biis nins sẽn yaa kom-bɩɩsã sõngre. La sẽn na yɩl tɩ saam-bi-kãens tõog n tʋm tigingã tʋʋm wʋsgo, rẽnda b paam tɩ b sõng-b tɩ b minimã paase. Kãsem-sõngdb nins sẽn tʋmd sõma wã tõe n wa lebga kãsem-dãmba. (1 Tɩm. 3:1, 10) Kãsem-dãmb kẽer sẽn yaa kom-bɩɩs modg n paama minim hal tɩ b yãk-b tɩ b lebg tigims sull yel-gɛtba. Woto, b tõogd n sõngda b tẽed-n-taasã tigims wʋsg pʋsẽ. D sã n get kom-bɩɩsã sẽn tʋmd tigingã tʋʋm ne yamleoog n sõngd b tẽed-n-taasã, pa noom-d sɩda?—Karm-y Yɩɩn-sõamyã 110:3; Koɛɛg soab 12:1.

12, 13. Bõe n tõe n sõng zak rãmb tɩ b zems-n-taarã paase?

¹² Bõe la d tõe n maan tɩ zems-n-taar zĩnd d zakã pʋgẽ? Neb wʋsg gũus n gesame tɩ b sã n maand zak pʋgẽ Biibl zãmsgã n pa vaandẽ, sõngdame tɩ kambã ne b roagdbã moor noomẽ. Wakat kãnga, b sẽn gomd Wẽnnaam la a raabã yellã sõngdame tɩ b zems-n-taarã paasdẽ. B sã n segend koe-moonegã me, n mi n maan mak-n-wilgi, tõe n sõnga zakã rãmb tɩ b moond koɛɛgã sõma. Sẽn paase, b sã n kelgd b ned kam fãa sẽn gomd Biiblã yell to-to wã, b na n neeme tɩ b fãa nonga a Zeova, n dat n maan a raabã ne b sũur fãa. Rẽ na n kɩtame tɩ b maneg n nong taaba.

¹³ Bõe la pag ne a sɩd tõe n maan n naag taab n tũ a Zeova? B sã n sakd a Zeova ne b sũur fãa, b na n zemsda taaba, tɩ b zĩid-n-taarã noomẽ. B ned kam fãa segd n wilga a to wã t’a nong-a lame, wa a Abrahaam ne a Saara, a Izaak ne a Rebeka, a Ɛlkana ne a Ana sẽn da maandã. (Sɩng. 26:8; 1 Sãm. 1:5, 8; 1 Pɩy. 3:5, 6) Pag ne a sɩd sã n maand woto, b na n zemsda taaba, tɩ bãmb ne a Zeova zoodã me pãng paasdẽ.—Karm-y Koɛɛg soab 4:12.

14. Y pagã wall y sɩdã sã n pa tũud a Zeova, bõe la y tõe n maan tɩ y kãadmã yɩ sõma?

¹⁴ Biiblã wilga vẽeneg tɩ kiris-ned pa segd n kẽ kãadem ne ned sẽn pa tũud a Zeova ye. (2 Kor. 6:14) La d tẽed-n-taas kẽer pagb wall b sɩdb pa a Zeova Kaset rãmb ye. Sãnda sẽn wa n na n sɩng Biiblã zãmsgã tɩ b zoe n kẽe kãadem, tɩ b to wã pa sak n na n naag n lebg a Zeova Kaset soab ye. Kẽer kẽe kãadem ne a Zeova Kaset soaba, tɩ b pagã wall b sɩdã wa bas a Zeova tũubu. Kiris-neb nins sẽn be yel-kãens pʋgẽ wã maanda b sẽn tõe fãa n tũud Biiblã saglsã sẽn na yɩl tɩ b kãadmã yɩ sõma. La yell a woto pʋgẽ, pa wakat fãa la Biiblã noyã tũub yaa nana ye. Wala makre, a Maari ne a sɩd a Davɩɩd ra naaga taab n tũud a Zeova, t’a Davɩɩd wa yik n bas tigissã kẽnde. Baasgo, a Maari ra ket n modgdame n tũud sagls nins Biiblã sẽn kõt pagbã, la a bɩɩsd zʋg-sõma. A ra modgdame n sõngd a kamb a yoobã sẽn na yɩl tɩ b bãng a Zeova. A ra ket n kẽnda tigissã la tigis-kãsemsã me. Kaoosg zugẽ, b kambã wa n bɩɩme, tɩ b ned kam fãa yi n bao a zaka. Baa a Maari sẽn lebg a ye tɩ ra pa nana wã, a kell n modga ne a Zeova tũudmã. A Maari ra mi n basa sɛb yiri, n saagdẽ t’a Davɩɩd na karem seb-kãense. A Davɩɩd sɩd wa n sɩnga seb-kãens karengo. Bilf-bilfu, a le wa n sɩnga tigissã kẽnde. Wakat fãa, a yageng a ye sẽn da tar yʋʋm a yoob baooda zĩig n bĩng-a. A sã n wa pa tõog n kẽnge, a yagengã babsd-a lame, n yeel t’a sẽn pa yã-a tigsgã sasa wã sãama a sũuri. A Davɩɩd sẽn bas tigissã kẽndã yʋʋm 25 poore, a le lebg n wa a Zeova nengẽ, tɩ yẽ ne a pagã le naag taab n tũud a Zeova ne sũ-noogo.

15. Bõe la sẽn kẽ-b kãadem tɩ kaoosã tõe n maan n sõng sẽn nan kẽ-b paalmã?

¹⁵ Rũndã-rũndã, a Sʋɩtãan maoodame n dat n sãam zagsã. Rẽ n so tɩ pag ne a sɩd sẽn tũud a Zeova segd n modg n teel taaba. Baa yãmb sẽn kẽ kãadmã sẽn kaoos to-to bɩ y tags n ges y sẽn tõe n maanega, wall y sẽn tõe n gom goam nins buud tɩ y kãadmã maneg n yɩ sõma. Y sã n kẽe kãadem sẽn kaoose, y tõe n kõo sẽn nan kẽ-b paalmã mak-sõngo. Y tõe n mi n boola sẽn kẽ-b kãadem tɩ b  yʋʋm pa ta yãmbã tɩ b wa naag-y n maan zak pʋgẽ Biibl zãmsgã. B sã n wa be ne yãmba, b na n yãame tɩ baa neb sẽn kẽ kãadem tɩ kaoos to-to, b segd n ket n zemsda taaba, la b wilgdẽ tɩ b nonga taaba.—Tit 2:3-7.

16, 17. Bõe la Wẽnnaam nin-buiidã gũuda?

¹⁶ Israyɛll nebã sã n da na n kẽng Zeruzalɛm n tɩ maan kibsa, b ra teenda taaba. B rengd n segla bũmb nins b sẽn dat so-toakã yĩnga. Rẽ poore, b tũuda taaba, n sõngd taab sorã zugu. B sã n ta wẽnd-doogẽ wã me, b naagda taab n maan bũmb toor-toor a Zeova tũudmã yĩnga. (Luk 2:41-44) Rũndã-rũndã, tõnd me maanda bũmb sẽn wõnd so-toaka. D segenda d mens n na n wa vɩɩmd dũni-paalgã pʋgẽ. Rẽ n so tɩ d segd n zemsd taaba, la d teend taaba. Woto fãa baooda modgre. Zĩ-kãens wɛɛngẽ, yãmb nee bũmb y sẽn segd n modg n maan n paas bɩ?

¹⁷ Tags-y bõn-sõma nins d sẽn gũudã yelle. D zoe n yi n basa dũni-kãngã nebã sẽn kɩɩsd taab bũmb wʋsg poorẽ, la b zabd taabã. D ne a Ezayi ne a Miise bãngr-goamã sẽn pidsdi. B ra togsame tɩ wakat n wat tɩ Wẽnnaam nin-buiidã na n naag taab n dʋ a “tãngã zugu.” (Eza. 2:2-4; karm-y Miise 4:2-4.) Sɩd me, rũndã-rũndã sẽn yaa yaoolem wakatã, a Zeova sõnga a nin-buiidã tɩ b bãng-a sõma, tɩ b sẽn tũud-a to-to wã me tat a yam n yɩɩd pĩndã. La d sũur na n wa maneg n yɩɩ noogo. Bala, wakat n wat tɩ ninsaalbã fãa na n zemsd taaba, n naag taab n tũud a Zeova.