1. Хуыцауы хъуыддӕгтӕ суанг райдианӕй фӕстӕмӕ куыд арӕзт цыдысты?

ЙЕГЪОВӔ Йесойы куы сфӕлдыста, уӕдӕй нырмӕ се ’хсӕн ис иудзинад. Хуыцау ӕппӕты фыццаг уый сфӕлдыста, ӕмӕ уый фӕстӕ Йесо йемӕ ӕмгуыст кодта ӕмӕ йын уыд «дӕсны кусӕг» (Ӕмб. 8:30). Йегъовӕйы лӕггадгӕнджытӕ дӕр-иу ӕмгуыст кодтой, цӕмӕй-иу сын Хуыцау цы бахӕс кодта, уый сарӕзтаиккой. Зӕгъӕм, Ной ӕмӕ йӕ бинонтӕ иумӕ нау арӕзтой. Фӕстӕдӕр израилӕгтӕ ӕмгуыст кодтой, ӕдзӕрӕг быдыры-иу цатыр куы сӕвӕрдтой, стӕй-иу ӕй куы райхӕлдтой ӕмӕ-иу ӕй ӕндӕр ранмӕ куы ахастой, уӕд. Кувӕндоны дӕр Йегъовӕйы сӕ рӕсугъд цагъд ӕмӕ зардӕй иумӕ кадджын кодтой. Йегъовӕйы адӕмӕн ӕппӕт уыдӕттӕ сӕ къухы ӕфтыдысты, ӕмгуыст кӕй кодтой, уый фӕрцы (Райд. 6:14–16, 22; Ным. 4:4–32; 1 Аз. 25:1–8).

2. а) Фыццаг ӕнусы ӕмбырды тыххӕй цы ис зӕгъӕн? б) Цавӕр фарстатӕм ӕркӕсдзыстӕм?

² Фыццаг ӕнусы дӕр чырыстӕттӕ Хуыцауӕн лӕггад кӕнгӕйӕ ӕмгуыст кодтой. Апостол Павел куыд бамбарын кодта, афтӕмӕй, кӕд алыхуызон курдиӕттӕй хайджын уыдысты  ӕмӕ сыл алыхуызон хӕстӕ уыд, уӕддӕр се ’хсӕн уыди иудзинад. Се ’ппӕт дӕр цыдысты сӕ Разамонӕг Йесо Чырыстийы фӕдыл. Павел сӕ абарста буаримӕ: кӕд буары бирӕ алыхуызон уӕнгтӕ ис, уӕддӕр иумӕ ӕмгуыст кӕнынц. (Бакӕс 1 Коринфӕгтӕм 12:4–6, 12.) Цымӕ абон та куыд у хабар? Нӕ бон куыд у уацамынды ӕмгуыст кӕнын, стӕй не ’мбырды ӕмӕ нӕ бинонты ’хсӕн иудзинад хъахъхъӕнын?

3. Апостол Иоанн цӕстылуайӕны цы федта?

³ Фыццаг ӕнусы апостол Иоанн цӕстылуайӕны федта, авд зӕды уадындзтӕй куыд уасынц, уый. Фӕндзӕм зӕд йӕ уадындзӕй куы ныууасыд, уӕд Иоанн федта, «арвӕй зӕхмӕ стъалы куыд ӕрхауд», уый. Уыцы стъалыйӕн лӕвӕрд ӕрцыд дӕлдзӕхы дӕгъӕл. Фыццаг уал дӕлдзӕхӕй скалд фӕздӕг, стӕй фӕздӕгӕй рацыд тынг бирӕ мӕтыхтӕ. Уыдон зиан хастой зайӕгойтӕн нӕ, фӕлӕ, «сӕ ныхтыл Хуыцауы мыхуыр ӕвӕрд кӕмӕн нӕ уыд, уыцы адӕмӕн» (Рарг. 9:1–4). Иоанн зыдта, мӕтыхтӕ тынг стыр зиан кӕй хӕссынц. Зӕгъӕм, афтӕ уыди Египеты Моисейы рӕстӕджы (Рац. 10:12–15). Иоанн кӕй федта, уыцы мӕтыхтӕ амонынц сӕрст чырыстӕттӕм – уыдон хъусын кӕнынц, мӕнг динты цы тӕрхон баййафдзӕн, уый тыххӕй. Уыцы хъуыддаджы семӕ ӕмгуыст кӕнынц, зӕххыл цӕрыны ныфс кӕмӕн ис, уыцы адӕм дӕр. Афтӕ иумӕ хъусын кӕнгӕйӕ бирӕтӕн баххуыс кӕнынц, цӕмӕй мӕнг дин ныууадзой ӕмӕ Хӕйрӕджы уацарӕй ссӕрибар уой.

4. Абон Хуыцауы адӕм цавӕр куыст хъуамӕ кӕной ӕмӕ уый сӕ къухы цӕй фӕрцы бафтдзӕн?

⁴ Махӕн Хуыцау бахӕс кодта, цӕмӕй ӕгас дунейы дӕр адӕмӕн «хорз хабар» хъусын кӕнӕм, цалынмӕ кӕрон не ’рцӕуа, уӕдмӕ. Уый стыр куыст у! (Матф. 24:14; 28:19, 20). «Дойны кӕмӕн у», уыдоны хъуамӕ хонӕм, цӕмӕй «царды дон лӕвар айсой», ома хъуамӕ Библийы фыст рӕстдзинад амонӕм, йӕ базонын кӕйдӕриддӕр фӕнды, уыдонӕн (Рарг. 22:17). Фӕлӕ уый нӕ къухы ӕфтдзӕн, «кӕрӕдзийыл [куы] хӕцӕм» ӕмӕ не ’мбырдимӕ ӕмгуыст куы кӕнӕм, ӕрмӕстдӕр уӕд (Еф. 4:16).

5, 6. Иумӕ цавӕр хъуыддӕгты фӕархайӕм?

⁵ Цӕмӕй хорз хабар, гӕнӕн ӕмӕ амалӕй, фылдӕр адӕмӕн фехъусын кӕнӕм, уый тыххӕй хъусын кӕныны хъуыддаг хъуамӕ хорз пълан кӕнӕм. Ӕмӕ нын уымӕн стыр ӕххуыс сты, ӕмбырдты, зӕгъӕм, уацамындон фембӕлдты, цы уынаффӕтӕ фехъусӕм, уыдон. Уый фӕрцы Хуыцауы Паддзахады тыххӕй хорз хабар хъусын кӕнӕм ӕгас зӕххыл дӕр ӕмӕ байуарӕм милуангай публикацитӕ. Иуӕй-иу хатт нын вӕййы зиутӕ дӕр. Ахӕм зиуты куы фӕархайӕм, уӕд ӕмгуыст фӕкӕнӕм, ӕгас зӕххыл нын цы милуангай хотӕ ӕмӕ ӕфсымӕртӕ ис, уыдонимӕ. Ӕмгуыст ма фӕкӕнӕм зӕдтимӕ дӕр – уыдон Хуыцауы адӕмӕн ӕххуыс кӕнынц хорз хабар хъусын кӕнынӕн (Рарг. 14:6).

⁶ Куыд ӕхсызгон нын вӕййы, «Ӕрвылазон чиныджы» куы бакӕсӕм, ӕгас дунейы дӕр нын цы бантыст, уый тыххӕй. Конгрессты размӕ адӕмӕн хуынды гӕххӕттытӕ куы фӕуарӕм, уӕд уыцы куыст фӕцӕуы ӕнӕхъӕн зӕххыл дӕр, ӕмӕ нӕ уый дӕр иу кӕны. Конгрессты цы раныхӕстӕ, цы драмӕтӕ ӕмӕ цы равдыстытӕ вӕййы, уыдон нӕ баразӕнгард кӕнынц, цӕмӕй Йегъовӕйӕн дӕттӕм, хуыздӕрӕй нӕм цы ис, уый. Ноджыдӕр ма нӕ иу хабар иу кӕны – ӕгас дунейы дӕр Чырыстийы мӕлӕт Ӕрымысӕн изӕр кӕй фӕбӕрӕг кӕнӕм, уый (1 Кор. 11:23–26). Алы аз дӕр 14 нисаны хурныгуылды фӕстӕ иумӕ ӕрӕмбырд вӕййӕм, цӕмӕй равдисӕм, Йегъовӕ мах тыххӕй цы сарӕзта, уымӕй дзы бузныг кӕй стӕм ӕмӕ Йесойы фӕдзӕхстмӕ кӕй хъусӕм. Ӕмӕ Ӕрымысӕн  изӕры размӕ дӕр цалдӕр къуырийы дӕргъы ӕмгуыст фӕкӕнӕм – адӕмы фӕхонӕм, цӕмӕй уыцы ахсджиаг хабар махимӕ сбӕрӕг кӕной.

7. Иумӕ кӕй архайӕм, уый фӕрцы нын цы ӕнтысы?

⁷ Иу мӕтыхӕн йӕ бон бирӕ куыд нӕу, афтӕ махӕн дӕр иугӕйттӕй нӕ бон нӕу хорз хабар ӕппӕт адӕмӕн дӕр фехъусын кӕнын. Фӕлӕ иумӕ кӕй архайӕм, уый фӕрцы нӕ бон у милуангай адӕмӕн, ӕппӕт кады аккаг чи у, уыцы Хуыцау Йегъовӕйы тыххӕй хъусын кӕнын.

8, 9. а) Павел чырыстӕттӕн цавӕр цӕвиттоны фӕрцы бамбарын кодта, се ’хсӕн иудзинад кӕй хъуамӕ уа, уый? б) Нӕ бон куыд у ӕмбырды иудзинад хъахъхъӕнын?

⁸ Павел Ефесӕгтӕм фыстӕджы бамбарын кодта, ӕмбырд куыд арӕзт у, уый ӕмӕ загъта, ӕмбырды алчидӕр алы хъуыддаджы дӕр кӕй хъуамӕ «рӕза». (Бакӕс Ефесӕгтӕм 4:15, 16.) Уый тыххӕй Павел цӕвиттонӕн ӕрхаста адӕймаджы буар ӕмӕ бамбарын кодта, алы чырыстон дӕр кӕй хъуамӕ архайа, цӕмӕй хотӕ ӕмӕ ӕфсымӕрты ’хсӕн иудзинад уа ӕмӕ ӕмбырды Разамонӕг Йесойы фӕдыл цӕуой. Павел загъта, буары уӕнгтӕ иумӕ сӕ куыст кӕй кӕнынц алыхуызон нуӕртты фӕрцы. Уӕдӕ ӕрыгон стӕм ӕви ацӕргӕ, фидар ӕнӕниздзинад нын ис ӕви лӕмӕгъ, уӕддӕр цымӕ цы хъуамӕ аразӕм, цӕмӕй ӕмбырды иудзинад уа?

⁹ Йесо хистӕр нӕлгоймӕгты сӕвӕрдта, цӕмӕй ӕмбырдӕн разамынд дӕттой, ӕмӕ йӕ фӕнды, цӕмӕй сын аргъ кӕнӕм ӕмӕ сын сӕ разамындмӕ хъусӕм (Дзут. 13:7, 17). Уый алы хатт ӕнцон нӕ вӕййы. Фӕлӕ нӕ бон у Йегъовӕйӕ ӕххуыс курын, ӕмӕ нын уый йӕ сыгъдӕг тыхы фӕрцы баххуыс кӕндзӕн, цӕмӕй хистӕр нӕлгоймӕгты разамындмӕ зӕрдиагӕй хъусӕм. Ахъуыды-ма кӕнӕм, ӕмбырдӕн цӕй стыр ӕххуыс уыдзыстӕм, сӕрныллӕг куы уӕм ӕмӕ хистӕр нӕлгоймӕгтимӕ ӕмгуыст куы кӕнӕм, уӕд. Уый фӕрцы не ’мбырды уыдзӕн иудзинад ӕмӕ кӕрӕдзи ноджы тынгдӕр уарздзыстӕм.

10. Кӕстӕриуӕггӕнӕг ӕфсымӕртӕ ӕмбырды иудзинадӕн стыр ӕххуыс цӕмӕн сты? (Кӕс нывмӕ статьяйы райдианы.)

¹⁰ Кӕстӕриуӕггӕнӕг ӕфсымӕртӕ дӕр ӕмбырды иудзинадӕн стыр ӕххуыс сты. Уыдон зӕрдиагӕй ӕххуыс кӕнынц хистӕр нӕлгоймӕгтӕн, ӕмӕ сӕ мах бузныг стӕм, цыдӕриддӕр аразынц, уый тыххӕй. Зӕгъӕм, кӕстӕриуӕггӕнӕг ӕфсымӕртӕ сӕ хъус фӕдарынц, цӕмӕй ӕмбырды фаг литературӕ уа, стӕй ӕгасцуай фӕзӕгъынц, ӕмбырдмӕ цы уазджытӕ ӕрбацӕуы, уыдонӕн. Стӕй ма фӕархайынц, цӕмӕй Паддзахады зал цалцӕггонд цӕуа ӕмӕ сыгъдӕг уа. Уыцы ӕфсымӕртимӕ ӕмгуыст куы кӕнӕм, уӕд не ’хсӕн уыдзӕн иудзинад ӕмӕ ӕмбырды алцыдӕр уаг ӕмӕ ӕгъдауыл уыдзӕн. (Абар Хъуыддӕгтӕ 6:3–6.)

11. Ӕрыгӕттӕн сӕ бон куыд у ӕмбырды иудзинадӕн ахъаз кӕнын?

¹¹ Иуӕй-иу хистӕр нӕлгоймӕгтӕ ӕмбырды фыдӕбон кӕнынц бирӕ азты дӕргъы. Фӕлӕ, чи зоны, сӕ бон нал у раздӕрау лӕггад кӕнын, азтӕ сыл сӕ уӕз кӕй ӕруагътой, уый тыххӕй. Ӕрыгон ӕфсымӕртӕ сын стыр ӕххуыс уыдзысты. Кӕд ӕрыгӕттӕм уыйбӕрц фӕлтӕрддзинад нӕма ис, уӕддӕр сӕ куы ахуыр кӕной, уӕд фидӕны сӕ бон уыдзӕн ӕмбырды фылдӕр хӕстӕ ӕххӕст кӕнын. Кӕстӕриуӕггӕнӕг ӕфсымӕртӕ зӕрдиагӕй куы архайой, уӕд сӕ хистӕр нӕлгоймӕгтӕй снысан кӕндзысты (1 Тим. 3:1, 10). Иуӕй-иу ӕрыгон хистӕр нӕлгоймӕгтӕн та ноджы фылдӕр бантыст – ныр лӕггад кӕнынц районон цӕстдарджытӕй ӕмӕ бирӕ ӕмбырдты хотӕ ӕмӕ ӕфсымӕртӕн ӕххуыс кӕнынц. Мах стыр аргъ кӕнӕм,  ӕрыгӕттӕй хотӕ ӕмӕ ӕфсымӕртӕн лӕггад кӕнын кӕй фӕнды, уыдонӕн. (Бакӕс Псалом 110:3; Екклесиаст 12:1.)

12, 13. Бинонтӕн цы баххуыс кӕндзӕн, цӕмӕй се ’хсӕн иудзинад уа?

¹² Нӕ бон цы у аразын, цӕмӕй нӕ бинонты ’хсӕн иудзинад уа? Бирӕтӕн стыр ӕххуыс у, алы къуыри дӕр бинонты ахуыр кӕй фӕуадзынц, уый. Ныййарджытӕ ӕмӕ сывӕллӕттӕ иумӕ ӕрӕмбырд вӕййынц, цӕмӕй Йегъовӕйы тыххӕй фылдӕр базоной, ӕмӕ уый фӕрцы кӕрӕдзимӕ ӕнгомдӕр кӕнынц. Бинонты ахуыры рӕстӕг сӕ бон у афӕлварын, уацамынды сӕ ныхас цӕмӕй райдайдзысты, уый. Афтӕмӕй се ’ппӕт дӕр хъусын кӕнынмӕ хуыздӕр цӕттӕ уыдзысты. Бинонты ахуыры рӕстӕг алкӕмӕн дӕр йӕ бон вӕййы йӕ хъуыдытӕ зӕгъын ӕмӕ, се ’ппӕт дӕр Йегъовӕйы кӕй уарзынц ӕмӕ сӕ йӕ зӕрдӕ рухс кӕнын кӕй фӕнды, уый фенын. Ӕмӕ уый фӕрцы бинонтӕ кӕрӕдзимӕ ноджы ӕнгомдӕр фӕкӕнынц.

¹³ Лӕг ӕмӕ ус цы хъуамӕ аразой, цӕмӕй кӕрӕдзи ӕмбарой ӕмӕ ӕнгом уой? Дыууӕйӕ дӕр Йегъовӕйы куы уарзой ӕмӕ йын иумӕ куы лӕггад кӕной, уӕд уыдзысты амондджын ӕмӕ се ’хсӕн уыдзӕн иудзинад. Стӕй хъуамӕ Авраам ӕмӕ Саррӕ, Исахъ ӕмӕ Ревеккӕ, Елхъан ӕмӕ Аннӕйау кӕрӕдзийыл узӕлой (Райд. 26:8; 1 Сам. 1:5, 8; 1 Пет. 3:5, 6). Лӕг ӕмӕ ус афтӕ куы архайой, уӕд кӕрӕдзимӕ дӕр ӕмӕ Йегъовӕмӕ дӕр ӕнгомдӕр кӕндзысты. (Бакӕс Екклесиаст 4:12.)

14. Кӕд дӕ цардӕмбал Йегъовӕйӕн нӕ лӕггад кӕны, уӕддӕр дӕ бон цы у аразын, цӕмӕй уӕ бинонты ’хсӕн фарн уа?

¹⁴ Библи бӕлвырд зӕгъы, нӕ цард кӕй хъуамӕ баиу кӕнӕм, Йегъовӕйӕн чи лӕггад кӕны, ӕрмӕстдӕр ахӕм адӕймагимӕ (2 Кор. 6:14). Фӕлӕ уӕддӕр нӕ хотӕ ӕмӕ не ’фсымӕртӕй кӕмӕндӕрты сӕ цардӕмбӕлттӕ Ӕвдисӕнтӕ не сты. Иуӕй-иутӕ сӕ рӕстдзинад базыдтой, бинонтӕ куы скодтой, уый фӕстӕ ӕмӕ сӕ цардӕмбӕлттӕ Ӕвдисӕнтӕ нӕ систы. Иннӕтӕн та сӕ цардӕмбӕлттӕ Ӕвдисӕнтӕ уыдысты, фӕлӕ стӕй ӕмбырд ныууагътой. Уыцы уавӕрты дӕр чырыстӕттӕ хъуамӕ Библийы уагӕвӕрдтӕм гӕсгӕ архайой, цӕмӕй сӕ бинонты ’хсӕн фарн уа. Фӕлӕ уый алы хатт ӕнцон нӕ вӕййы. Зӕгъӕм, Мэри ӕмӕ йӕ цардӕмбал Дэвид Йегъовӕйӕн иумӕ лӕггад кодтой. Стӕй Дэвид ӕмбырдтӕм нал цыд. Фӕлӕ Мэри дарддӕр дӕр архайдта, цӕмӕй хорз бинойнаг уыдаид ӕмӕ Библийы уагӕвӕрдтӕм гӕсгӕ цардаид. Стӕй ма се ’хсӕз сывӕллоны дӕр ахуыр кодта Йегъовӕйы коммӕ кӕсын, ӕмӕ дарддӕр дӕр ӕмбырдтӕм ӕмӕ конгресстӕм цыдысты. Сӕ сывӕллӕттӕ куы сыстыр сты ӕмӕ хицӕнӕй цӕрын куы райдыдтой, уӕд Мэри дарддӕр дӕр Йегъовӕйӕн лӕггад кодта, кӕд ын иунӕгӕй бирӕ зындӕр уыди, уӕддӕр. Фӕлӕ стӕй Дэвид райдыдта, Мэри-иу ын кӕй ныууагъта, уыцы журналтӕ кӕсын. Рӕстӕг куы рацыд, уӕд та ногӕй ӕмбырдтӕм цӕуын райдыдта. Йе ’хсӕзаздзыд фыртыфырт-иу ын алы хатт дӕр йӕ фарсмӕ бынат бацахста ӕмӕ-иу Дэвид куы не ’рбацыд, уӕд-иу ын уый фӕстӕ загъта: «Деду, абон мын ӕмбырды ӕнӕ дӕуӕй ӕнкъард уыди». 25 азы куы рацыд, уӕд Дэвид Йегъовӕмӕ ӕрбаздӕхт, ӕмӕ ныр Мэри ӕмӕ Дэвид Хуыцауӕн иумӕ цингӕнгӕйӕ лӕггад кӕнынц.

15. Ацӕргӕ къайтӕн сӕ бон куыд у ӕрыгон бинонтӕн ӕххуыс кӕнын?

¹⁵ Абон Хӕйрӕг бинонты цард фехалыныл архайы, ӕмӕ тынг ахсджиаг у, цӕмӕй Хуыцауы лӕггадгӕнджытӕн сӕ бинонты ’хсӕн иудзинад уа. Дӕ цардӕмбалимӕ иумӕ рагӕй цӕрут ӕви нӕ, уӕддӕр ахъуыды кӕн, дӕуӕн дӕ бон цы у зӕгъын кӕнӕ саразын,  цӕмӕй уӕ бинонтӕ ӕнгомдӕр уой. Кӕд ацӕргӕ стут, уӕд ӕрыгон бинонтӕн фӕзминаг ут. Уӕ бон у, ӕмӕ-иу сӕ уӕ бинонты ахуырмӕ фӕхонат. Афтӕмӕй фендзысты, бинонтӕ иумӕ цасфӕнды ма цӕрой, уӕддӕр ахсджиаг кӕй у, цӕмӕй кӕрӕдзийыл узӕлой ӕмӕ се ’хсӕн иудзинад уа (Тит. 2:3–7).

16, 17. Иумӕ ӕмгуыст чи кӕны, уыдонмӕ цавӕр фидӕн ӕнхъӕлмӕ кӕсы?

¹⁶ Дӕ цӕстытыл-ма ауайын кӕн, раджы заманты-иу израилӕгтӕ бӕрӕгбоны рӕстӕг Иерусалимы Йегъовӕйы куыд кадджын кодтой. Цӕмӕй-иу уырдӕм ӕрцыдаиккой, уый тыххӕй сӕ хъуыди балцмӕ алцыдӕр бацӕттӕ кӕнын ӕмӕ фӕндагыл дӕр кӕрӕдзийӕн ӕххуыс кӕнын. Стӕй кувӕндоны дӕр Йегъовӕйы иумӕ кадджын кодтой. Ӕппӕт уыдӕтты тыххӕй сӕ хъуыди кӕрӕдзиимӕ ӕмгуыст кӕнын (Лук. 2:41–44). Абон мах дӕр стӕм фӕндагыл – ног дунемӕ цӕуӕм, ӕмӕ мах дӕр хъуамӕ кӕрӕдзийыл хӕцӕм ӕмӕ ӕмгуыст кӕнӕм. Дӕ бон нӕ уаид ууыл ноджы зӕрдиагдӕрӕй архайын?

¹⁷ Ацы дунейы адӕм кӕрӕдзиимӕ нӕ фидауынц ӕмӕ бирӕ цӕйдӕрты тыххӕй тох дӕр кӕнынц. Фӕлӕ мах Йегъовӕйӕ бузныг стӕм, рӕстдзинад кӕй ӕмбарӕм ӕмӕ не ’хсӕн иудзинад кӕй ис, уый тыххӕй! Ӕгас дунейы дӕр ын йӕ адӕм лӕггад кӕнынц йӕ фӕндонмӕ гӕсгӕ. Ӕмӕ уӕлдайдӕр ацы фӕстаг бонты Йегъовӕйы адӕмы ’хсӕн хъуамӕ уа иудзинад. Исай ӕмӕ Михей куыд ныффыстой, афтӕ не ’ппӕт дӕр иумӕ «цӕуӕм Йегъовӕйы хохмӕ» (Ис. 2:2–4; бакӕс Михейы 4:2–4.) Куыд амондджын уыдзыстӕм фидӕны, зӕххыл ӕппӕт адӕмы ’хсӕн дӕр иудзинад куы уа ӕмӕ афтӕмӕй Йегъовӕйӕн куы лӕггад кӕной!