1. Sangete nin tapio, irair dahieu me sansalda nan sapwellimen Koht doadoahk kan?

 SIOHWA oh Sises kin ketin miniminpene sangete tepin kepikipikdahn mehkoaros. Siohwa ketin kapikada Sises mwohn mehkoaros. Mwuhr, Sises iang ih ketin doadoahk oh “mi limwah, duwehte sounsawas emen.” (Lep. Pad. 8:30) Sapwellimen Siohwa ladu kan pil kin sawaspene nan doadoahk me re anahne wia. Karasepe, Noha oh eh peneineio doadoahkpene kauwada warihmwo. Mwuhr, mehn Israel kan doadoahkpene kauwada impwal sarawio. Re pil kin ehupene kihpeseng oh wahda kohla ehu wasa lel ehu wasa. Ni tehnpas sarawio, re kin ehupene koul oh kesengki mehn keseng kan pwehn kapingahki Siohwa koul kaselel kan. Sapwellimen Siohwa aramas akan kak wia soahng pwukat koaros pwehki re kin sawaspene.​—Sen. 6:14-16, 22; Nemp. 4:4-32; 1 Kron. 25:1-8.

2. (a) Dahme mwomwohdisohn tepin Kristian ko kasalehda me kapwuriamwei? (b) Peidek dah kan me kitail pahn koasoiapene?

² Tepin Kristian kan pil kin sawaspene. Wahnpoaron Pohl kawehwehda me re kin miniminpene, mehnda ma arail koahiek oh  pwukoa kan kin wekpeseng. Irail koaros kin idawehn arail Sounkaweid, Sises Krais. Pohl karasahkihong irail paliwar ehu me mie kakon tohto me wekpeseng ahpw koaros kin doadoahkpene. (Wadek 1 Korint 12:4-6, 12.) Ahpw ia duwen kitail rahnwet? Ia duwen atail kak sawaspene nan doadoahk en kalohk, nan mwomwohdiso, oh nan peneinei?

3. Kaudiahl dahieu me wahnpoaron Sohn alehdi?

³ Ni mwehin tepin Kristian ko, wahnpoaron Sohn kilang kaudiahl ehu duwen tohnleng isimen me wie pepeuk sowi kan. Ni tohnleng kelimmeno peuk nah sowio, Sohn kilangada “usu ehu me pwupwudiong pohn sampah.” Usu wet doadoahngki kih ehu en ritingada pwoahr loal ehu me soh kapi. Keieu, ediniei laud kohdahsang nan pwoahro oh mwuhr pelin loukust kan ahpw pwarada sang nan edinieio. Loukust ko sohte kauwehla tuhke kan, ahpw re kauwehla irail me “sohte kilelkihdi kilel en Koht ni temwarail kan.” (Kaud. 9:1-4) Sohn ese me pelin loukust ko kak kauwehla soahng tohto, duwehte dahme wiawi nan Isip ni mwehin Moseso. (Eks. 10:12-15) Loukust ko me Sohn kilangadao kin karasaraskihong Kristian keidi kan me kin kalokalohki rohng kehlail ehu me kin uhwong pelien lamalam likamw akan. Oh aramas rar rar kei me kin kasikasik mour soutuk nin sampah pil iangala irail. Irail koaros kin ehupene oh miniminpene nan doadoahk en kalohk wet. Doadoahk wet sewesehier aramas tohto en pedoisang pelien lamalam likamw oh saledeksang manaman en Sehdan.

4. Doadoahk dahieu me sapwellimen Koht aramas akan anahne wia, oh ia ihte ahl me re kak wia met?

⁴ Kitail ahneki pwukoa en kalohki ‘rongamwahwo’ ong aramas koaros nin sampah mwohn imwio leledo. Met wia doadoahk ehu me inenen laud! (Mad. 24:14; 28:19, 20) Kitail anahne luke koaros me “men nimpildahr” en nim “pilen komour,” me iei kitail anahne padahngki padahk mehlel en Paipel ong irail ko me men wehwehkihla. (Kaud. 22:17) Ahpw kitail kak wia met ihte ma kitail kin “sonamwahupene” oh sawaspene nan mwomwohdiso.​—Ep. 4:16.

5, 6. Ia duwen atail kin miniminpene ni atail kin kalohki rongamwahwo?

⁵ Pwe kitail en kalohk ong uwen tohtohn aramas me kitail kak, kitail anahne soandi mwahu nan atail doadoahk en kalohk. Kaweid me kitail ale nan atail mwomwohdiso kin sewese kitail en wia met. Mwurin atail kin tuhpene ong kalohk, kitail kin kohla padahkihong aramas akan duwen rongamwahu en Wehio. Kitail pil kin kasalehiong irail pwuhk kan me koasoia duwen Paipel. Ni mehlel, kitail kihlahr pwuhk rar rar kei nan sampah pwon. Ekei pak kitail kin ale kaweid en iang doadoahk tohrohr en kalohk. Ni omw wia doadoahk wet, kowe oh me rar rar kei nan sampah pwon kin ehupene kalohki rohngohte! Ke pil kin iang doadoahk rehn tohnleng kan me kin sewese sapwellimen Koht aramas akan kalohki rongamwahwo.​—Kaud. 14:6.

⁶ Ia uwen kaperen en wadek nan pwuhken pahr (Yearbook) duwen pweidahn doadoahk en kalohk nin sampah pwon! Pil medewehla duwen atail kin miniminiong riatail kan nin sampah pwon ni atail kin lukehdo aramas ni atail mihting tohrohr kan. Wasao, kitail kin rong kaweid kohte me riatail kan koaros kin rong. Padahk, sipai, oh kamwomwada kan kin kangoange kitail en patohwanohng Siohwa dahme keieu mwahu rehtail. Kitail pil kin  miniminiong riatail kan nin sampah pwon ni atail kin towehda Katamano pahr koaros. (1 Kor. 11:23-26) Kitail kin tuhpene mwurin kihrlahn ketipin ni Nisan 14 pwehn kasalehda atail kalahnganki dahme Siohwa ketin wiahiong kitail oh peikiong sapwellimen Sises kehkehlik. Oh wihk kei mwohn Katamano, kitail kin doadoahkpene pwehn luke uwen tohtohn aramas me kitail kak pwe ren iang kitail towehda ahnsou kesempwal wet.

7. Ia duwen atail miniminpene eh kin kapinga oh kawauwih Siohwa?

⁷ Emente loukust sohte kak kauwehla soahng tohto. Oh ma kitail kelehpw, kitail sohte kak kalohk ong aramas koaros. Ahpw pwehki kitail kin doadoahkpene, kitail kak padahkihong aramas rar rar kei duwen Siohwa oh sewese ekei en kapinga oh kawauwih ih.

8, 9. (a) Nan Episos 4:15, 16, ia duwen Pohl eh karasahda kesempwalpen miniminpene? (b) Ia duwen atail kak sawaspene nan mwomwohdiso?

⁸ Pohl kawehwehiong mehn Episos ko ia duwen mwomwohdiso eh kin soandi mwahu oh e nda me mwomwohdiso koaros anahne “keirda ni mehkoaros.” (Wadek Episos 4:15, 16.) Pohl doadoahngki karasaras en paliwar ehu pwehn kawehwehda me emenemen Kristian kak sewese mwomwohdiso en miniminpene oh idawehn Sises, me iei Sounkaweid en mwomwohdiso. Pohl nda me paliwar unsek kin “tengetengkipene kakon koaros” arail sawaspene. Ia duwen emenemen kitail, mehnda ma pwulopwul de mah, kehlail de luwet, kak sewese miniminpenehn mwomwohdiso oh atail nanpwungmwahu rehn Koht?

⁹ Sises ketin idihada elder kan en tiengla mwowe nan mwomwohdiso oh e kupwurki kitail en wauneki irail oh idawehn kaweid me re kin kihong kitail. (Ipru 13:7, 17) Met sohte kin ahnsou koaros mengei en wia. Ahpw kitail kak peki sapwellimen Siohwa sawas. Sapwellime manaman kak sewese kitail en peikiong kaweid koaros me elder kan kin kihong kitail. Pil medewehla ia uwen atail kak sewese atail mwomwohdiso ma kitail aktikitik oh miniminiong elder kan. Atail mwomwohdiso pahn miniminpene oh atail limpoak ong emenemen pahn kehlailla.

10. Ia duwen sounsawas kan ar kin sewese miniminpenehn mwomwohdiso? (Menlau kilang tepin kilel.)

¹⁰ Sounsawas kan pil kin sewese mwomwohdiso en miniminpene. Re kin doadoahk laud pwehn sewese elder kan, oh kitail kin kalahnganki soahng koaros me re kin wia. Karasepe, sounsawas kan kin tehk mwahu me neitail pwuhk kan kin itar ong atail doadoahk en kalohk, oh re kin kasamwo irail kan me kin kohdo iang towehda atail mihting kan. Re pil kin doadoahk laud pwehn kamwakele oh kamwahwihala wasa kan me ohla ni atail Wasahn Kaudok. Ni atail kin sewese brother pwukat, kitail kin miniminpene oh papah Siohwa ni ahl me soandi mwahu.​—Pil kilang Wiewia 6:3-6.

11. Ia duwen me pwulopwul kan ar kak sewese miniminpenehn mwomwohdiso?

¹¹ Ekei elder kin doadoahk laud nan mwomwohdiso sounpar tohtohie. Ahpw ele re sohla kak wia soahng kan ni uwen me re kin wia mahs pwehki re mahlahr. Brother pwulopwul kan kak sawas. Ma re kaiahnda, re kak wia pwukoa tohto nan mwomwohdiso. Oh ma sounsawas kan doadoahk laud, re ele kak papah nin duwen elder kei ni ahnsou kohkohdo. (1 Tim. 3:1, 10) Ekei elder pwulopwul kan pil kin kekeirda laud. Met re kin papah nin duwen sounapwalih kan me kin  seiloak oh kin sewese riatail Kristian kan nan mwomwohdiso tohto. Kitail uhdahn kin kalahnganki ni me pwulopwul kan ar kin men papah riatail kan.​—Wadek Melkahka 110:3; Eklesiasdes 12:1.

12, 13. Dahme kak sewese koaros nan peneinei en sawaspene?

¹² Ia duwen atail kak sewese tohn atail peneinei en sawaspene? Atail wia kaudok en peneinei wihk koaros kak sewese kitail. Ni ahnsou mwahu pwukat, pahpa nohno oh seri kan kin ehupene sukuhlki duwen Siohwa, met sewese arail miniminpenehn peneinei. Arail praktis dahme re pahn nda nan kalohk kin sewese irail koaros en kaunopada mwahu. Oh ni arail rong emenemen koasoia duwen padahk mehlel oh pil kilang me koaros nan arail peneineio kin poakohng Siohwa oh men kaperenda ih, met kin kalaudehla arail karanihala emenemen.

¹³ Siohwa ketin kupwurki pwopwoud ehu ira en sawaspene. Ma ira koaros poakohng Siohwa oh kin ehupene papah ih, ira pahn peren oh miniminpene nan ara mouren pwopwoud. Ira pil anahne kasalehda limpoak ong emenemen, duwehte me Eipraam oh Sara, Aisek oh Repeka, oh Elkana oh Ana wia. (Sen. 24:67; 1 Sam. 1:5, 8; 1 Pit. 3:5, 6) Ma pwopwoud ehu wia met, ira kin miniminpene oh karanihala Siohwa.​—Wadek Eklesiasdes 4:12.

14. Ma omw pwoudo sohte kin papah Siohwa, dahme ke kak wia pwe amwa mouren pwopwoud en kak kehkehlailte?

¹⁴ Paipel kasalehda ni sansal me kitail en dehr pwoudikihda emen me sohte kin papah Siohwa. (2 Kor. 6:14) Ahpw, mie riatail kan me arail pwoud kaidehn emen Sounkadehdehn Siohwa. Ekei sukuhlki duwen padahk mehlel mwurin arail pwopwoudida oh arail pwoudo sohte wiahla emen Sounkadehde. Meteikan ele pwoudikihda emen me kin papah Siohwa, ahpw mwuhr arail pwoudo sohla wia kisehn mwomwohdiso. Nan soangen irair pwukat, Kristian kan kin wia uwen arail kak en kolokol arail mouren pwopwoud en kehlail ni arail kin peikiong kaweid sang Paipel. Met ele sohte kin mengei ahnsou koaros. Karasepe, Mary oh eh pwoudo, David, kin ehupene papah Siohwa. Mwuhr, David uhdihsang towehda mihting kan. Ahpw Mary kin nantihongete en wia lih pwopwoud mwahu men oh kin kasalehda irair en Kristian. E pil kin padahkihong nah seri wenemeno duwen Siohwa oh pousehlahte towehda mihting kan oh mihting tohrohr kan. Ni ahnsou me seri ko laudla oh kohkohsang imwarailo, Mary pousehlahte papah Siohwa mendahki e uhdahn apwal ong ih. Ahpw mwuhr, David tepida wadewadek makasihn kan me Mary kin kihdiong ih. Kedekedeo, David pwurehng tepida towehda ekei mihting kan. Nein nah pwutako serio me sounpar weneu kin ahnsou koaros kihla nan dewe, oh ma David sohte kohdo, serio kin nda, “Pahpa kahlap, I sohte kilang uhk ni mihtingo rahnwet.” David pwurodo rehn Siohwa mwurin sounpar 25, oh met ih oh eh pwoudo kin peren pwe ira kak pwurehng ehupene papah Siohwa.

15. Ia duwen pwopwoud mah kan ar kak sewese pwopwoud pwulopwul kan?

¹⁵ Sehdan kin uhwong peneinei kan rahnwet. Met iei ehu kahrepe me pwopwoud kan me kin papah Siohwa anahne sawaspene. Mehnda ia uwen werei me kumwa pwopwoudki, medewehla duwen dahme kumwa kak nda de wia pwehn kakehlakahda amwa mouren pwopwoud. Ma kumwa mahlahr, kumwa kak wia mehn kahlemeng mwahu ong  pwopwoud pwulopwul kan. Kumwa ele kak luke pwopwoud pwulopwul ehu en iang amwa kaudok en peneinei. Ira pahn kilang me sohte lipilipil ia uwen werei me pwopwoud ehu pwopwoudki, pwopwoudo anahne kasalehda ara limpoak ong emenemen oh pil miniminpene.​—Taitus 2:3-7.

16, 17. Dahme sapwellimen Koht ladu miniminpene kan kin kasikasik?

¹⁶ Ni ahnsou me mehn Israel ko kin kohla Serusalem pwehn wia kasarawi kan, re kin sawaspene. Re kin kaunopada soahng koaros me re anahne ong arail seiloako. Mwuhr, re kin wiahkin ehu seiloak oh sawaspene. Ni tehnpas sarawio, irail koaros kin ehupene kapinga oh kaudokiong Siohwa. (Luk 2:41-44) Rahnwet, ni atail kaukaunop ong mour nin sampah kapwo, kitail anahne miniminpene oh wia uwen atail kak en sawaspene. Ke kak medewehla soangen ahl kan me kitail kak kalaudehla atail wia met?

¹⁷ Aramas nin sampah wet sohte kin pwungki duwen soahng tohto oh kin akamaiki mepwukat. Ahpw kitail uhdahn kalahnganki me Siohwa kin ketin sewese kitail en ahneki popohl oh wehwehki padahk mehlel! Sapwellime aramas akan nin sampah pwon kin kaudokiong ih ni ahl me e ketin kupwurki. Ahpw mehlel ni imwin rahn pwukat, sapwellimen Siohwa aramas akan kin miniminpene laudsang mahs. Duwehte me Aiseia oh Maika kohpada, kitail kin wiahkin ehu kohdalahng ni “nahnahn KAUN-O.” (Ais. 2:2-4; wadek Maika 4:2-4.) Ia uwen atail pahn peren ni ahnsou kohkohdo ni aramas koaros nin sampah ar pahn “sonamwahupene” oh sawaspene kaudokiong Siohwa!