1. ¿Imaynatá Jehová, kamachisnin ima unaymantapacha llankʼarqanku?

JEHOVAWAN, Jesuswanqa tukuy imata ruwayta qallarisqankumantapacha khuska llankʼarqanku. Jehovaqa niraj ni imata ruwashaspa Jesusta ruwarqa. Chantá Jesusqa Tatanwan khuska uj “yanapaj maestro jina” llankʼarqa (Pro. 8:30, NM). Ajinallatataj kay Jallpʼapi Diospa ñaupa kamachisninpis, imatachus Jehová ruwanankuta kamachisqanta khuska ruwarqanku. Sutʼincharinapaj, Noeqa, familianwan khuska arcata ruwarqa. Aswan qhepamantaj israelitaspis Dioswan tinkukuna toldota khuska ruwarqanku, wajnejman rinankupajpis khuska oqharej kanku, chayaspataj khuskallataj sayachej kanku. Templopitaj israelitasqa Jehovata jatunchanankupaj platilloswan, arpaswan, waj imaswan ima khuska takej kanku. Diospa kamachisnenqa tukuy chay imasta ruwaj kanku purajmanta yanapanakusqankurayku (Gén. 6:14-16, 22; Núm. 4:4-32; 1 Cró. 25:1-8).

2. 1) ¿Imaynatá apostolespa tiemponpi cristianos yanapanakoj kanku? 2) ¿Imatataj kay yachaqanapi yachakusunchej?

² Apostolespa tiemponpipis cristianosqa purajmanta yanapanakorqanku. Apóstol Pabloqa chay cristianos imaymana  ruwanasniyoj kajtinkupis, imaymana imasta ruwayta atejtinkupis Jesuspa qhepanta risqankurayku ujchasqas kashasqankuta nerqa. Pabloqa chay cristianosta uj cuerpowan kikincharqa, cuerpojtaqa ashkha imasnin tiyan, chaykunataj khuska llankʼanku (1 Corintios 12:4-6, 12 leey). ¿Noqanchejrí? ¿Imaynatá willaypi, congregacionpi, familiapi ima purajmanta yanapanakusunman? Chayta qhawarina.

3. ¿Imatataj Juan mosqoypi jina rikorqa?

³ Uj kuti apóstol Juanqa mosqoypi jina qanchis angelesta cornetata waqachishajta rikorqa. Phishqa kaj ángel cornetata waqachejtintaj Juanqa “uj chʼaskata cielomanta kay pachaman urmamojta” rikorqa. Chay chʼaskamantaj uj llave qosqa karqa, chaywantaj chinkay chinkay pujyoj punkunta kicharerqa. Chay pujyoqa manchay ukhu, laqhataj karqa, qʼosñitaj llojsimuyta qallarerqa. Chay qʼosñimantataj langostas jallpʼaman llojsimorqanku. Chay langostasqa mana sachʼastachu, nitaj plantastachu mikhukaporqanku, manachayqa “frentesninkupi Diospa sellon mana kanchu, chaykunallata” (Apo. 9:1-4). Juanqa Egiptopi jina langostas tukuy imata mikhukapuyta atisqankuta yacharqa (Éxo. 10:12-15). Juan rikusqan langostasqa ajllasqa cristianoswan ninakun. Chay cristianostaj Dios sajra kausayta tumpamantawan chinkachinanta willashanku. Kay Jallpʼapi kausakuyta suyakojkunapis paykunawan khuska willashallankutaj. Tukuyninku Diosmanta khuska willasqankurayku, ashkha runas llulla religionesmanta llojsipunku, Satanaspa atiyninmantapis kacharichisqas kanku.

4. ¿Ima llankʼaytataj Jehová qowanchej, imatá chayta juntʼanapaj ruwananchej tiyan?

⁴ Jehovaqa uj jatun llankʼayta qowanchej. Niraj kay pachaj tukukuynin chayamushajtin tukuy runasman Reinonmanta sumaj willaykunata willamunanchej tiyan (Mat. 24:14; 28:19, 20). Diosta rejsiymanta tukuy chʼakichikojkunata “kawsay yakumanta” ujyanankupaj wajyarinanchej tiyan. Nisunman yachachinanchej tiyan Bibliamanta yachakuyta munajkunaman (Apo. 22:17). Chaytataj juntʼasunchej congregacionpi ujchasqa kaspa, purajmanta yanapanakuspa ima (Efe. 4:16).

5, 6. ¿Imastaj rikuchin willaypi purajmanta yanapanakusqanchejta?

⁵ Ashkha runasman willayninchejwan chayanapajqa, congregacionpi kamachikusqanman jina ruwananchej tiyan. Chay kamachiykunaman jina ruwaspaqa sumajta llankʼasunchej. Sutʼincharinapaj, willayman llojsinapaj tantakuytawan Reinomanta willaj rinchej, ashkha publicacionestataj saqenchej. Wakin kutisqa astawan willamunapaj campañasta wakichikun, chaypi yanapakunanchejtataj niwanchej. Chay llankʼaypi yanapakuspaqa, Jallpʼantinmanta hermanosninchejwan khuska llankʼashanchej, imaraykuchus kikin willaymanta tukuyninchej willanchej. Chantapis angeleswan khuska llankʼashallanchejtaj, imaraykuchus paykunaqa willamunapaj yanapashawanchej (Apo. 14:6).

⁶ Jallpʼantinpi imaynachus willayninchejpi riwasqanchejmanta Anuario libropi leespaqa mayta kusikunchej. Chantapis jatuchaj tantakuykuna hermanosninchejwan ujchasqa kanapaj yanapallawanchejtaj. Sutʼincharinapaj, Jallpʼantinpi jatuchaj tantakuykunaman runasta wajyarinchej. Chay tantakuykunapeqa umallirichiykunata uyarinchej, dramasta, rikuchiykunata ima qhawanchej, chaykunataj Jehovata astawan sirvinapaj yanapawanchej. Jesuspa Wañuyninta Yuyarinapaj tantakuypis ujchasqas kananchejpaj yanapallawanchejtaj (1 Cor.  11:23-26). Chay tantakuyman semanas faltashajtin Jallpʼantinpi runasta wajyarinchej. Chantá tukuyninchej inti yaykusqantawan 14 nisán pʼunchaypi tantakunchej. Ajinamanta Jesús kamachisqanta kasukunchej, Jehovamantaj noqanchejrayku ruwasqanmanta mayta agradecekunchej.

7. ¿Imastataj ruwayta atinchej hermanosninchejwan khuska llankʼasqanchejrayku?

⁷ Uj langostallaqa mana ashkha langostas jina ruwayta atinmanchu. Ajinallataj noqanchejpis sapallanchejqa Jallpʼantinpi mana willayta atisunmanchu. Chaywanpis langostas jina, tukuyninchej khuska llankʼanchej. Chayraykutaj ashkha runasman willayninchejwan chayayta atinchej Jehovamanta yachachinapaj, ajinamanta paykunapis Jehovata yupaychanankupaj, jatunchanankupaj ima.

8, 9. 1) ¿Imamantá Pablo parlarqa cristianos ujchasqa kanankupaj? 2) ¿Imatá ruwasunman congregación ujchasqa kananpaj?

⁸ Pabloqa Efesopi cristianosman congregación imayna wakichisqachus kashasqanta sutʼincharqa, “tukuy imapi” wiñananku kasqantataj yuyaycharqa (Efesios 4:15, 16 leey). Chantapis Pabloqa uj cuerpomanta parlarqa congregación ujchasqa kananpaj tukuyninchej yanapakuyta atisqanchejta sutʼinchananpaj, ajinamanta Jesuspa qhepanta rinanchejpaj, imaraykuchus pay congregacionpa uman. Pabloqa cuerpoj tukuy imasnin ankuswan sumaj tʼinkisqa kasqanrayku purajmanta yanapanakusqankuta nerqa. Noqanchejpis jóvenes chayri machitus manachayri onqosqas kaspapis, ¿imatataj ruwasunman congregación ujchasqallapuni kananpaj?

⁹ Ancianosta respetana, kamachiwasqanchejtataj kasukuna, imaraykuchus Jesusqa paykunata congregacionesta ñaupajman apanankupaj churan (Heb. 13:7, 17). Wakin kutis paykunata kasukuyta mana atillanchejchu. Chaywanpis Jehovamanta yanapata mañakuna. Paytaj espíritu santonnejta kasukunapaj yanapawasunchej. Llampʼu sonqo kasunchej, ancianostapis yanapakusunchej chayqa, congregacionpaj sumaj yanapa kasunchej. Tukuyninchejtaj ujchasqas kasunchej, sapa pʼunchaytaj munakuyta rikuchisunchej.

10. ¿Imaynatá siervos ministeriales congregación ujchasqa kananpaj yanapanku? (13 paginapi dibujota qhawariy.)

¹⁰ Siervos ministerialespis congregación ujchasqa kananpaj yanapakullankutaj. Ima edadniyoj kaspapis chay hermanosqa mayta llankʼanku, ancianostapis mayta yanapanku, chayraykutaj mayta agradecekunchej. Sutʼincharinapaj, paykunaqa congregacionpi publicaciones mana pisinanpaj yanapanku. Tantakuykunaman jamojkunatapis allin jamusqa kasqankuta ninku. Tantakuna Wasi allinchasqa, llimphuchasqa kananpajtaj yanapallankutaj. Siervos ministerialesta yanapakuspaqa, congregación ujchasqa kananpaj, Jehovata sumajta sirvinapaj ima yanapakunchej (Hechos 6:3-6 kikinchay).

11. ¿Imaynatataj jóvenes yanapakunkuman congregación ujchasqa kananpaj?

¹¹ Wakin ancianosqa congregacionpi watastaña mayta llankʼarqanku. Ichapis paykunaqa machuyapusqankurayku niña ñaupajpi jinachu ruwayta atinku. Jóvenes hermanostaj mayta yanapankuman. Paykunata ancianos wakichejtinkoqa congregacionpi astawan yanapakuyta atenqanku. Siervos ministeriales mayta kallpachakuspaqa, ancianos jina llankʼayta atenqanku (1 Tim. 3:1, 10). Wakin jóvenes ancianos ñauparinankupaj mayta kallpachakusqankurayku, congregacionesta waturispa llankʼashanku, ashkha congregacionesmanta  hermanostataj yanapashanku. Mayta agradecekunchej congregacionespi hermanosta yanapaj hermanos jóvenes kasqankumanta (Salmo 110:3; Eclesiastés 12:1 leey).

12, 13. ¿Imatataj familias ruwankuman ujchasqasllapuni kanankupaj?

¹² Familianchej ujchasqa kananpajqa, Familiapi Diosta Yupaychanapaj tantakuyta sapa semana ruwana. Tatas, wawasninkuwan Jehovamanta parlarinankupaj astawan khuska kajtinkoqa, astawan familiapi munakuy kanqa. Chay tantakuypitaj ichapis imaynatachus willanankuta ensayankuman, chaytaj sumaj willajkuna kanankupaj yanapanqa. Tukuyninku imaynatachus Jehovamanta willarinankuta uyarinakuspa, Jehovata munakuspa, Jehovata sirviyta munasqankuta rikuchispa imaqa, familiapi astawan ujchasqa kanqanku.

¹³ ¿Imatataj casarasqas ruwankuman ujchasqasllapuni kanankupaj? (Mat. 19:6.) Iskayninku Jehovata munakojtinku, khuska yupaychajtinku imaqa, qhariwarmi kausayninku aswan ujchasqa, aswan kusisqastaj kanqanku. Chayrayku may sumaj kanman iskayninku imaynatachus Abraham Sarawan, Isaac Rebecawan, Elcana Anawan munanakorqanku, ajinata munanakunanku (Gén. 26:8; 1 Sam. 1:5, 8; 1 Ped. 3:5, 6). Casarasqas munanakojtinkoqa ujchasqas kanqanku, Jehovawanpis sumajta masichakonqanku (Eclesiastés 4:12 leey).

14. Qosanchej chayri warminchej Jehovata mana yupaychajtinpis, ¿imataj yanapawasun ujchasqallapuni kanapaj?

¹⁴ Bibliaqa Jehovata mana yupaychajwan mana casarakunata nin (2 Cor. 6:14). Jinapis wakin hermanosqa Jehovata mana yupaychajwan casarasqas kashanku. Ichapis wakenqa casarakuspaña Jehovata yupaychayta qallarerqanku, chaywanpis warminku chayri qosanku mana Jehovaj testigonman tukunchu. Wakintaj ichapis Jehovaj testigonwan casarakunku, jinapis tiempo pasasqanman jina qosan chayri warmin Jehovata niña yupaychankuchu. Ajinapi rikukuspa Bibliaj yuyaychasqanta kasukuy yanapawasunman ujchasqa kanapaj, wakin kuti mana atikojtinpis. Ajinapi rikukorqa Mary, qosan Davidwan. Paykunaqa Jehovata yupaychaj kanku, chaywanpis Davidqa tantakuykunaman manaña rerqachu. Marytaj tantakuykunaman, jatuchaj tantakuykunaman ima rillarqapuni. Bibliamanta yachakusqanman jina kausakunanpajpis mayta kallpachakorqa, sojta wawasninmanpis Diosmanta yachacherqa. Chantá wawasnenqa wiñasqankutawan wasimanta riporqanku. Marytaj sapallanña rikukuspapis Jehovata yupaychallarqapuni. Revistastapis wasinpi saqej David rikunanpaj jina. Uj kutitaj Davidqa chay revistasta leeyta qallarerqa, pisi tiemponmantaj tantakuykunamanpis riyta qallarerqa. Sojta watayoj allchhisitonqa tantakuykunapi Davidpaj asientota japʼipoj. David tantakuykunaman mana rejtintaj nej: “Abuelitoy mayta faltacharqayki”, nispa. Davidqa 25 watas pasasqanmantaraj Jehovata watejmanta yupaycharqa. Kunantaj warminwan khuska Jehovata watejmanta yupaychashan, may kusisqastaj kashanku.

15. Unayña casarasqa kajkuna, ¿imaynatataj yanapankuman kunallanraj casarakojkunata?

¹⁵ Satanasqa familiasta tʼaqanachishan. Chayrayku Jehovata yupaychaj casarasqa cristianosqa ujchasqas kanankupaj mayta kallpachakunanku tiyan. Unayña chayri kunallanraj casarakuspapis, ujchasqallapuni kanankupaj imatachus ruwanankupi, imatachus ninankupi ima tʼukurinanku tiyan. Unayña casarasqa kajkunaqa,  kunallanraj casarakojkunata mayta yanapankuman, ichapis chaypajqa wakin kutis familiapi Diosta yupaychanapaj tantakuyninkuman wajyarinkuman. Ajinamanta kunallanraj casarakojkunaqa casarakusqankumanta watasña pasajtinpis ujchasqa kanankuta, purajmanta respetanakunankuta ima yachakonqanku (Tito 2:3-7).

16, 17. Kay tiempopi ujchasqallapuni kasunchej chay, ¿imaynatá mosoj pachapi kausakusunchej?

¹⁶ Israelitas Jehovata yupaychaj Jerusalén temploman rinankupaj purajmanta yanapanakoj kanku. Imastachus viajepaj necesitasqankutapis khuska wakichej kanku. Khuska viajaj kanku, purajmantataj yanapanakoj kanku. Temploman chayaspataj Jehovata khuska yupaychaj, jatunchaj ima kanku (Luc. 2:41-44). Noqanchejpis mosoj pachapi kausakunapaj wakichikushanchej. Chayrayku tukuyninchej ujchasqa kananchej tiyan, purajmantataj yanapanakunanchej tiyan. ¿Chayta ruwanapaj kallpachakushanchejchu?

¹⁷ Kay pachamanta runasqa mana ujchasqaschu kanku, tukuy imasraykutaj maqanakunku. Chaywanpis noqanchejqa Jehovaman mayta agradecekunchej sonqo tiyasqa kanapaj, Bibliaj yachachiyninta entiendenapaj ima yanapawasqanchejmanta. Jallpʼantinpitaj Jehová munasqanman jina yupaychashanchej. Mana jaykʼaj jinataj kay qhepa pʼunchaykunapi ujchasqa kashanchej. Imaynatachus Isaías, Miqueas nerqanku jina, tukuyninchej “Diospa orqonman wichari[shan]chej” (Isa. 2:2-4; Miqueas 4:2-4 leey). Kay tiempopi ujchasqallapuni kasunchej chayqa, tumpamantawan mosoj pachapi kausakusunchej. Chaypitaj tukuy runas “sumaj ujchasqa” kasunchej, Jehovata yupaychanapajtaj purajmanta yanapanakusunchej, ¡chaymá may sumaj kanqa!