1. Kirap long pastaim yet, wanem pasin i stiaim ol samting em God i wokim?

KIRAP long taim God i wokim ol samting, em i holim wanpela tingting tasol. God i wokim Jisas paslain long em i wokim ol narapela samting. Jisas i tok: “Long taim [“Jehova,” NW ] i mekim ol dispela wok, mi stap wantaim em na em i makim mi olsem saveman i bosim wok. Olgeta de mi bin mekim em i amamas.” (Snd. 8:30, 31) Papa na Pikinini i wok bung wantaim, na ol i wokim kain kain diwai, plaua, na ol animal em yumi lukim long nau. God i save wok bung wantaim ol manmeri. Jehova i wok bung wantaim Noa taim em i stiaim Noa long wokim sip; God i stiaim lain bilong em long sanapim, rausim, na muvim haus sel taim ol i wokabaut long ples drai nating; na tu, God i stiaim lain bilong em taim ol i pilaim musik na singim ol song bilong litimapim nem bilong em long tempel. Olgeta dispela samting i kamap bikos God i bin wok bung wantaim ol manmeri.—Stt. 6:14-16, 22; Nam. 4:4-32; 1 Sto. 25:1-8.

2. (a) Long taim bilong ol aposel, ol Kristen i bihainim wanem kain pasin? (b) Yumi bai skelim wanem ol askim?

² Long taim bilong ol aposel, Jisas Krais i stap olsem het bilong kongrigesen, na ol Kristen i save wok bung wantaim. Aposel Pol i tok olgeta wan wan  Kristen “i gat kain kain presen” na ol “i gat kain kain wok bilong helpim ol arapela,” tasol olgeta i hap bilong “wanpela bodi.” (Ritim 1 Korin 12:4-6, 12.) Tasol olsem wanem long ol Kristen long nau? Taim yumi autim gutnius, olsem wanem yumi inap pas gut na wok bung wantaim? Olsem wanem yumi inap wok bung wantaim insait long kongrigesen na long famili?

3. Aposel Jon i bin lukim wanem visen?

³ Klostu long yia 100 C.E., aposel Jon i lukim wanpela visen. Em i lukim 7-pela ensel, na olgeta wan wan ensel i winim trampet. Taim namba 5 ensel i winim trampet, Jon i lukim “wanpela sta” i lusim skai na i pundaun long graun. Dispela sta i holim wanpela ki na em i yusim dispela ki long opim dua bilong hul i no gat as. Traipela smok i kamaut long hul, na ol grasopa i kamaut long dispela smok. Ol dispela grasopa i no bagarapim ol diwai na plaua, nogat, ol i “bagarapim tasol ol man husat i no gat mak bilong God long poret bilong ol.” (Rev. 9:1-4) Jon i save long bikpela bagarap em ol grasopa inap kamapim, long wanem, ol grasopa i bin bagarapim tru lain Isip long taim bilong Moses. (Kis. 10:12-15) Ol dispela grasopa i olsem tok piksa bilong makim ol Kristen em God i makim, na ol i autim ol strongpela tok long kot bilong Jehova. Long nau, planti milion manmeri i wok bung wantaim ol—dispela planti milion manmeri em ol manmeri husat i bilip na wet long kisim laip oltaim long graun. Yumi stap wanbel tru long mekim wok autim tok, olsem na yumi inap sakim Satan maski em i laik daunim yumi long rot bilong ol lotu giaman long olgeta hap bilong graun!

4. Ol manmeri bilong God i mas mekim wanem wok? (b) Olsem wanem bai ol inap mekim gut dispela wok?

⁴ Ol manmeri bilong Jehova i gat bikpela wok bilong autim “gutnius” long olgeta hap bilong graun paslain long dispela haptaim bilong nau i pinis. (Mat. 24:14; 28:19, 20) Dispela i makim olsem yumi mas invaitim olgeta “man nek bilong [ol] i drai” bambai ol i ken “kisim wara bilong laip, [na] ol i ken kisim fri.” (Rev. 22:17) Yumi stap olsem ol memba bilong kongrigesen, olsem na hau bai yumi inap mekim gut dispela wok? Yumi olgeta i mas “pas wantaim na i mas wok gut wantaim.”—Efe. 4:16.

5, 6. Olsem wanem yumi stap wanbel taim yumi autim gutnius?

⁵ Sapos yumi laik autim gutnius bilong Kingdom long planti manmeri moa, orait yumi mas oganaisim gut wok autim tok. Long rot bilong ol kongrigesen long olgeta hap bilong graun, yumi save kisim ol tok bilong stiaim yumi, na dispela i redim yumi long wok bung wantaim. Taim yumi bung long grup bilong autim tok, yumi save go autim tok bilong Kingdom long olgeta lain man. Yumi autim tok bilong God long rot bilong ol tok yumi autim na ol buk na nius yumi tilim. Olsem wanem? Yu givim bel tru long bihainim tok yumi kisim long mekim bikpela wok bilong autim tok? Taim yu bihainim tok, yu wok bung wantaim planti milion manmeri em ol i wok wantaim long autim tok bilong “ensel i flai namel long skai,” em Revelesen 14:6 i stori long en.

⁶ Tru tumas! Yumi amamas long ritim ripot long Yiabuk i stori long ol gutpela samting i kamap long wok bilong yumi! Tingim tu olsem, taim yumi tilim pepa bilong invaitim ol manmeri long i kam long rijinel kibung, spesel kibung, na intenesenel kibung, dispela i soim olsem yumi wok bung wantaim. Taim yumi stap long ol dispela kibung, yumi save putim yau long ol gutpela tok i kam long Baibel na ol drama na ol soim. Ol dispela tok na drama i kamapim klia olsem God i kirapim yumi long givim bel olgeta long mekim wok bilong em. Na tu, taim yumi mekim bung bilong tingim dai bilong Jisas, dispela i opim rot bilong yumi long i stap wanbel. Yumi pilim tru bikpela pasin helpim bilong God na yumi bihainim tok bilong Jisas, olsem na yumi save bung  wantaim long tingim dai bilong Jisas long olgeta yia long Nisan 14, bihain long san i go daun. (1 Kor. 11:23-26) Olgeta manmeri inap kam long dispela bung—em i no bung bilong ol Witnes tasol husat i baptais pinis, nogat. Insait long ol wik paslain long Memorial, yumi save inapim bikpela hap bilong teritori bilong yumi, na invaitim ol narapela long bung wantaim yumi long tingim dispela spesel de.

7. Taim yumi wok wantaim, yumi inap mekim wanem?

⁷ Wanpela grasopa tasol i no inap kamapim bikpela bagarap. Olsem tasol, wok bilong yumi wan wan i no inap stap ples klia. Taim yumi olgeta i wok bung wantaim, dispela i kirapim planti milion manmeri long tingim Man husat i gat rait long kisim biknem na ona, em Jehova! Tasol i gat ol narapela samting tu we i save helpim ol manmeri bilong God long i stap wanbel.

8, 9. (a) Pol i mekim wanem tok piksa bilong skulim ol Kristen olsem ol i mas i stap wanbel? (b) Olsem wanem yumi olgeta inap wok bung wantaim insait long kongrigesen?

⁸ Taim Pol i salim pas i go long ol Kristen long Efesus, em i stori long olsem wanem kongrigesen inap oganaisim wok, na tu, em i tok ol i “mas kamap olsem man i bikpela pinis long olgeta samting.” (Ritim Efesus 4:15, 16.) Wanem samting bai helpim yumi olgeta wan wan long winim dispela mak? Pol i tok Jisas Krais i stap olsem het bilong kongrigesen, na yumi olgeta i stap olsem bodi, olsem na yumi mas i stap wanbel aninit long wok bos bilong Jisas. Pol i tok olgeta wan wan hap bilong bodi i save “wok gut wantaim long rot bilong ol join i save mekim gut wok bilong ol.” Yumi olgeta wan wan—lapun o yangpela, yumi gat strong o nogat—olsem wanem yumi inap strongim pasin wanbel na strongim bilip bilong ol arapela insait long kongrigesen?

⁹ Wanpela bikpela samting em olsem, yumi mas soim rispek na stap daun long ol elda, long wanem, Jisas i givim wok long ol long skulim ol manmeri insait long kongrigesen. (Hib. 13:7, 17) Ating sampela taim yumi inap pilim hatwok long mekim olsem. Tasol yumi inap askim God long stiaim yumi. Holi spirit inap helpim yumi long givim bel olgeta long sapotim ol wok i kamap insait long kongrigesen. Olsem na sapos sampela taim bel i no kirapim yumi long bihainim tok bilong ol elda, yumi mas tingim gen olsem sapos yumi bihainim pasin daun na wok bung wantaim ol elda, dispela bai helpim kongrigesen long i stap wanbel. Taim yumi olgeta i wok bung wantaim, dispela bai helpim yumi long mekim pasin laikim bilong yumi i kamap bikpela moa.

10. Ol kongrigesen sevan i mekim wanem ol wok bilong helpim kongrigesen long i stap wanbel? (Lukim piksa long kirap bilong stadi.)

¹⁰ Ol kongrigesen sevan tu i save mekim bikpela wok long strongim pasin wanbel insait long kongrigesen. Ol dispela brata i gat kain kain krismas, na ol i daunim laik bilong ol yet na mekim ol wok bilong helpim olgeta insait long kongrigesen. Ol i helpim ol elda long stretim rot bambai yumi gat ol buk na nius bilong yusim long mekim wok autim tok. Na tu, ol i save klinim na stretim ol samting i bagarap long Haus Kingdom, na ol i tok amamas long ol manmeri i kam long ol miting. Taim yumi wok bung wantaim ol kongrigesen sevan, yumi helpim wok bilong kongrigesen long kamap gut.—Skelim Aposel 6:3-6.

11. Ol yangpela inap mekim wanem bilong helpim kongrigesen bilong ol long i stap wanbel?

¹¹ Planti brata i mekim ol wok bilong kongrigesen inap planti yia. Tasol nau ol i kamap lapun na ol i no inap mekim planti wok moa olsem long pastaim, olsem na sampela senis i mas kamap. Ol yangpela brata inap mekim sampela wok. Ol i no gat bikpela save tumas long mekim wok, tasol sapos ol narapela i trenim ol, ol bai mekim planti wok moa. Em gutpela samting tru taim ol kongrigesen sevan i wok strong long winim ol mak  bilong kamap elda! (1 Tim. 3:1, 10) Sampela yangpela elda i winim ol mak na ol i mekim wok olsem wasman sekit, na ol i helpim ol bratasista long planti kongrigesen. Yumi amamas long gutpela pasin bilong ol yangpela long helpim wok insait long kongrigesen!—Ritim Song 110:3; Saveman 12:1.

12, 13. Wanem samting bai helpim olgeta insait long famili long wok bung wantaim?

¹² Yumi ken stori nau long olsem wanem famili inap wok bung wantaim. Planti famili i luksave olsem taim ol i mekim Famili Lotu long olgeta wik, dispela i strongim ol yangpela na ol lapun long wok bung wantaim. Yumi stadi long tok bilong Baibel, na dispela i helpim famili long i stap wanbel. Yusim haptaim bilong Famili Lotu long prektisim ol tok bilong yusim long autim tok, na dispela bai redim famili long mekim gut wok autim tok. Taim olgeta wan wan insait long famili i kamapim tok bilong Baibel long bekim bilong ol, dispela i helpim ol long pas gut wantaim—olgeta i laikim wankain God na ol i laik tru long bihainim laik bilong em.

¹³ Olsem wanem ol poroman marit inap wok bung wantaim long givim biknem long Jehova? Sapos 2-pela poroman marit wantaim i stap gut long Jehova, tupela bai i stap wanbel. Tingim Abraham na Sara, Aisak na Rebeka, na Elkana na Hana—olgeta i kamapim klia olsem ol i laikim tru poroman marit bilong ol. Yumi tu i mas tokim poroman marit olsem yumi laikim em. (Stt. 26:8; 1 Sml. 1:5, 8; 1 Pita 3:5, 6) Dispela bai helpim yumi long i stap wanbel wantaim poroman marit bilong yumi na yumi bai pas gut moa wantaim Papa bilong yumi long heven.—Ritim Saveman 4:12.

14. Sapos poroman marit bilong yu i no mekim wok bilong Jehova, orait yu ken mekim wanem bilong strongim marit bilong yu?

¹⁴ Ol Kristen i no ken pas wantaim ol manmeri i no save long tok i tru. (2 Kor. 6:14) Olsem wanem long ol bratasista em ol wanfamili bilong ol i bilong narapela narapela lotu? Sampela manmeri i bin marit pinis na bihain ol i kisim save long tok i tru, na poroman marit bilong ol i no wanpela Witnes. Maski i olsem, sapos poroman marit i bihainim ol stiatok bilong Baibel, dispela inap helpim famili long pas gut wantaim. Kristen i ken wok bung wantaim poroman marit bilong em, tasol em i no ken mekim ol samting em Baibel i tambuim. Ating Kristen bai pilim hatwok long mekim olsem, tasol em i ken tingim ol gutpela blesing em bai kisim. Sapos poroman marit i lusim kongrigesen, long dispela taim tu i hatwok long bihainim ol stiatok bilong Baibel. Dispela samting i bin kamap long wanbilip bilong yumi Mary, na man bilong em David. Tupela wantaim i bin mekim wok bilong Jehova. Tasol bihain, David i lusim pasin bilong i go long ol miting bilong kongrigesen—dispela hevi i kamap inap olsem 25 yia i go pinis. Mary i strongim bel na em i go long ol miting na ol kibung, na em i wok strong long bihainim ol stiatok bilong Baibel long haus, na tu, em i skulim 6-pela pikinini bilong em na David. Taim ol pikinini i kamap bikpela na lusim Mary, em i pilim olsem em i stap wanpis. Bihain, David i ritim ol magasin em Mary i putim ples klia long Devit i ken ritim. David i kirap gen long i go long Haus Kingdom, na liklik bubu bilong em husat i gat 6-pela krismas, em i save redim spes bilong David long sindaun. Sapos David i no go long miting, liklik bubu i save tok, “Bubu, mi misim yu long miting.” Long nau, David i amamas long mekim gen wok bilong Jehova, na Mary i amamas tru olsem tupela i wok bung wantaim.

15. Olsem wanem ol poroman marit i lapun inap helpim ol yangpela marit?

¹⁵ Satan i birua tru long ol famili long nau, olsem na em i bikpela samting long ol wokman bilong God i mas wok bung wantaim insait long marit. Maski yu bin marit inap hamas yia, tingim gut ol tok na ol pasin yu inap mekim bilong  strongim marit bilong yu. Yupela ol poroman marit husat i kamap lapun, yupela i ken strongim ol yangpela marit insait long kongrigesen. Sampela taim yupela i ken singautim tupela yangpela marit long kam long haus bilong yupela na stap wantaim yupela long taim bilong Famili Lotu. Ol bai luksave olsem em i bikpela samting long tupela poroman marit i mekim ol tok na pasin i soim klia olsem ol i laikim tru narapela narapela, maski ol i marit inap hamas yia.—Tai. 2:3-7.

16, 17. Ol wokman bilong God i stap wanbel long nau na ol i bilip na wet long kisim wanem blesing?

¹⁶ Tingim lain Israel bilong bipo—ol i go long tempel long Jerusalem na ol i mekim bikpela bung na givim biknem long Jehova. Ating ol i redi gut, na lukautim narapela narapela taim ol i wokabaut yet long rot, na ol i bung wantaim long lotuim God long tempel. Olgeta manmeri i wok bung wantaim. (Luk 2:41-44) Yumi tu i wokabaut yet long rot i go long nupela taim, olsem na yumi mas i stap wanbel na wok bung wantaim. Oltaim toktok na pasin bilong yumi i mas strongim pasin bilong i stap wanbel na wok bung wantaim. Yu ting yu yet i mas wok strong moa long strongim dispela pasin?

¹⁷ Tingim ol gutpela blesing yumi bai kisim long bihain! Yumi no pas moa wantaim ol manmeri nogut bilong dispela haptaim—ol i no stap wanbel na tingting bilong ol i paul nabaut. Long nau, yumi lukim stret truim bilong tok profet bilong Aisaia na Maika—ol manmeri bilong God i stap wanbel na wokabaut i go antap long “maunten bilong Bikpela.” (Ais. 2:2-4; ritim Maika 4:2-4.) Tru tumas, pasin bilong yumi long mekim lotu i winim olgeta narapela lotu long nau. Amamas bilong yumi bai i kamap bikpela tru taim yumi kisim laip long nupela taim, em taim we olgeta lain manmeri bai i stap wanbel na wok bung wantaim!