1. I tshamela muni gi wonekako mitirweni ya Nungungulu kusukela kusanguleni?

KUSUKELA loku Nungungulu a sangulile ku vanga zilo, a mitiro yakwe yi famba hi wumunwe. A xivangwa xo sangula xa Nungungulu xi te ngalo: “Nzi wa hi zinwe naye, kukotisa xigogo xa mitiro. Nzi mu tsakisa siku ni siku.” (Mav. 8:30) A Dadani ni N’wana va lo tirisana kasi ku vanga zilo zo tala zi hanyako lezi hi zi wonako nyamutlha. A wumunwe gi lo simama gi woneka mitirweni ya Nungungulu. Hi wona tshamela lego ka matimu ya kuakiwa ka taru masikwini ya Noa; kuakiwa, kuhahlulwa ni kururiswa ka tabernakeli a xikhati lexi a vanhu va Nungungulu va nga enza xiwuleni; ni laha va nga chaya ni ku yimbelela zinwe tisimu ta ku dumisa Jehova tempeleni yakwe. Zontlhe lezo zi wa lava kutirisana. — Gen. 6:14-16, 22; Mitse. 4:4-32; 1 Kro. 25:1-8.

2. a) Xini xi nga woneka nguvu ka bandla go sangula ga wuKristu? b) Ziwutiso muni hi to wulawula hi zona?

² A kutirisana ku wa woneka kambe ka bandla go sangula ga wuKristu hasi ka hloko ya gona, Jesu Kristu. Mupostoli Paule i tlhamusele lezaku hambu lezi a maKristu ma totilweko ma nga hi ni ‘zinyikiwo zo hambana,’ ni “matirela ma hambeneko,” ni “mitiro yi hambeneko,” wontlhe ma wa hi ziro za “miri munwe.” (Gonza 1 Va Le Korinte 12:4-6, 12.) Ahati nyamutlha ke?  Hi nga simamisa kuyini ku xumayela mahungu yo saseka hi wumunwe? Hi nga tirisanisa kuyini lomu bandleni ni le ngangweni ke?

3. Muwoniso muni a vileko nawo mupostoli Johani?

³ Kumbheleni ka zana ga malembe go sangula Nguveni ya Hina, mupostoli Johani i lo wona ntlhanu wa tingelosi ni timbiri ka muwoniso. A yinwe ni yinwani ya tona yi loba mpunzu. A xikhati lexi a ngelosi ya wuntlhanu yi ngaba mpunzu wa yona, Johani i lo wona “nyeleti” na yiwa hi le tilweni. Yi wa hi ni pfhungulo mandleni ya yona niku yi lo vulula hi yona a nkele wa lieswila. Ku lo tuvika musi hi lomu nkeleni zonake kuta ntungu wa humbi. Wutshanwini ga ku onha byanyi ga misava, a humbi leyo yo fananisa yi lo pomela “vanhu lava va nga hiko na xifungo xa Nungungulu zimombyeni zabye.” (Kuv. 9:1-4) Handle ko kanakana Johani i wa yi tiva a mhango yi vangiwako hi humbi. Hikuyini? I wa zi tiva lezi a humbi yi zi mahileko le Gipite masikwini ya Mosi. (Ekso. 10:12-15) A humbi yo fananisa leyi Johani a yi wonileko yi yimela khwatsi a maKristu ma totilweko na ma huwelela a mahungu ya ntamu ya kulamula ka Jehova. Zalezi ma tira zinwe ni timiliyoni ta vanhu va nga ni kutsumba ko hanya misaveni. A zi hlamalisi lezi a kuxumayela ka hina hi wumunwe ku hungulako a ntamu lowu Satani a wu kombisako hi ku tirisa mufumo wakwe wa misava yontlhe wa wukhongeli ga mawunwa!

4. I ntiro muni lowu a vanhu va Nungungulu va faneleko ku wu maha, niku zini zi lavekako kasi va humelela?

⁴ A vanhu va Jehova va na ni ntiro wa hombe wa ku xumayela “ivangeli” misaveni yontlhe na ku nga se chikela magumo. (Mat. 24:14; 28:19, 20) Lezo zi patsa ku ramba ni wihi “loyi a zwako tora” lezaku a tanwa “mati ya wutomi mahala.” (Kuv. 22:17) Kota ziro za bandla ga wuKristu, zini zi lavekako kasi hi humelela ntirweni lowo? Hi nga zi kota ntsena loku hi ‘tlhanganyiswa khwatsi’ hi tlhela hi tirisana. — Efe. 4:16.

5, 6. Hi tirisanisa kuyini kuxumayeleni ka mahungu yo saseka?

⁵ Kasi hi xumayela mahungu yo saseka ya Mufumo ka vanhu vo tala hi laha zi kotekako hi kona, hi fanele ku xumayela hi ndlela yi xaxametilweko khwatsi. Hi zalezo zi mahako hi nyikwa zileletelo. A zileletelo lezi hi zi kumako mabandleni zi hi longisela kasi ku tira hi wumunwe. Anzhako ka mutlhangano wa ntiro wa simu, hi famba hi huwelela a mahungu yo saseka ya Mufumo ka vanhu. Hi maha lezo hi magezu ya hina ni timiliyoni ta mabhuku ma seketelwako ka Biblia. Wa ti karatela ku lanzela a xileletelo xa kuva u hlengela ka matsima yo hlawuleka ya kuxumayela ke? Hi ku maha lezo, u ti patsa ni vanhu vanwani va timiliyoni mu xumayela zinwe hi wumunwe a mahungu ya “ngelosi yi purumako xikari ka tilo,” leyi yi kumbukiwako ka Kuvululelwa 14:6.

⁶ A ho ku tsaka a xikhati hi gonzako matimu ya mihanzu ya ntiro wa hina lomu ka Anuário! Ehleketa kambe hi lezi hi tirisanisako zona a xikhati hi nyikelako zirambo za gotsovanyano wa muganga, wo hlawuleko, ni wa matiko manyingi. Ka mitlhangano leyo, hizwa tikanelo ti kucako ti seketelweko ka Biblia hi tlhela hi wona tidrama ni mikombiso. A zipanze lezo zi tala ku khanyisa a xirambo xa liranzo xa Nungungulu xa kuva hi mu tirela hi ntamu wontlhe. A xialakanyiso xa kufa ka Jesu xonawu xa hi vuna lezaku hiva ni wumunwe. Hi ku bonga a tipswalo ta Nungungulu ni ku ingisa a xileletelo xa Jesu, hi tlhangana lembe ni lembe ka ximaho lexo hi 14 ka Nisani, anzhako  ka kupela ka gambo. (1 Kor. 11:23-26) A zi lavi kuva Mboni yo bapatizwa kasi kuva kona ka ximaho lexo. Ka maviki yo kari mahlweni ka Xialakanyiso, hi ti karatela ku tira xipanze xa hombe xa bandla ga hina hi laha zi kotekako hi kona na hi ramba vanwani lezaku vata ka ximaho lexo xa lisima.

7. Zini hi zi kotako ku maha a xikhati hi tirako zinwe?

⁷ A humbi yinwe a yi na ntamu. Hi ndlela yo kari a xiyimo xa hinawu hi xalexo, a mihanzu ya kutikarata ka munhu munwe yi nga tshuka yi nga woneki. Kanilezi hi ku tira zinwe, ha zi kota ku vuna vanhu va timiliyoni lezaku va veka kupima ka loyi a fanelwako hi wudumo ni wudzunzo gontlhe, ku nga Jehova! Hambulezo, leyo a hi yona yoce ndlela leyi a kutirisana ka hina ku tiyisako hi yona a wumunwe ga vanhu va Nungungulu.

8, 9. a) Mufananiso muni lowu Paule a wu tirisileko kasi ku gonzisa maKristu lezaku mava ni wumunwe? b) Hi nga tirisanisa kuyini lomu bandleni?

⁸ Ka papilo gakwe ka va le Efesusi, Paule i wulawulile hi kuxaxametwa ka bandla ni xilaveko xa ku “kula zilweni zontlhe.” (Gonza Va Le Efesusi 4:15, 16.) Xini xi to vuna munwe ni munwani wa hina lezaku a tatisa a kungo lego? Hi ku tirisa xikombiso xa miri wa munhu, Paule i lo wulawula hi wumunwe ga bandla hasi ka hloko ya gona, Jesu Kristu. I lo wulawula hi “xivuno lexi xi nyikwako hi xiro xinwe ni xinwani.” Xana a munwe ni munwani wa hina — kani muswa kani munhu wa hombe, kani i tiyile kani wa sileka — a nga maha yini kasi ku tiyisa a wumunwe ni wumoya ga bandla ke?

⁹ A xinwe xa zilo za lisima nguvu ku ti koramisa ni ku kombisa xichawo ka lava Jesu a va yimisileko kasi ku rangela a bandla, ma nga madota. (Maheb. 13:7, 17) A hi xikhati xontlhe zi olovako ku maha lezo. Hambulezo, hi nga kombela wurangeli ka Nungungulu na hi tsumba lezaku i ta hi nyika. A moya wakwe wa ntamu wu nga hi vuna ku seketela malulamiselo ya bandla hi mbilu yontlhe. Hikwalaho, loku zi tshuka zi hi karatela ku lanzela a xileletelo xo kari hi nyikwako, hi fanele ku ehleketa hi lezi a kutikoramisa ka hina ku to vunisa zona bandla lezaku giva ni wumunwe. A ku hunza lezo, a ku tirisana ka zilo zo kota lezo zi ta vuna hontlheni lezaku hi engetela liranzo la hina.

10. A malanza ya wutireli ma vunisa kuyini bandla lezaku giva ni wumunwe? (Wona mufota kusanguleni ka nzima.)

¹⁰ A malanza ya wutireli wonawu ma tiyisa a wumunwe lomu bandleni. Kova ni yihi a tanga yabye, a vamakabye lava va maha mitiro yi vunako hontlheni. Hi xikombiso, va vuna madota hi ku chela kota lezaku hiva ni mabhuku ya ku ma tirisa ntirweni wa simu. Tlhatakumbiri, va khatalela a kubasiswa ni kuvuxiwa ka Salawu ya Mufumo hi kukhanzakanya, va tlhela va amukela vapfhumba lava va tako mitlhanganweni ya hina. A xikhati lexi hi tirisanako ni vamakabye lava, hi tiyisa a wumunwe lomu bandleni. — Ringanisa ni Mitiro 6:3-6.

11. A vaswa va nga maha yini kasi ku tiyisa a wumunwe laha bandleni?

¹¹ A vamakabye vo tala vo buva va na ni malembe na va rwele wutihlamuleli ga bandla. Kanilezi, hi kota ya tanga a va ha zi koti ku maha zontlhe lezi va nga maha kale, hikwalaho ka laveka kuva ku ciciwa zokari. A vaswa va nga vuna nguvu. Hambu lezi a wutlhari gabye ga ha hiko gi tsongwani, loku va gonzisiwa va nga zi kota ku rwala wutihlamuleli go engeteleka. Niku loku a nanza ga wutireli gi tira hi kutikarata gi nga ha faneleka hi kuva dota. (1 Tim. 3:1, 10) A madota yo kari ya vaswa ma kula laha ka kuza ma ringanelwa hi kuva vawoneleli va  xipanze, ma tirela vamakabye ka mabandla yo tala. Xana a hi bongi a xivuno lexo hi nyikwako hi vaswa va hina lava va tirako hi kuziranza ke? — Gonza Tisimu 110:3; Mutshawuteli 12:1.

12, 13. Xini xi nga vunako vontlhe laha ngangweni lezaku vava ni wumunwe?

¹² Zalezi a hi woneni lezi hi nga engetelisako zona wumunwe laha ngangweni. A votala va wula lezaku a ku maha Wukhozeli ga Ngango gi bhinzulako viki ni viki zi engetela kubohana xikari ka vanana ni vanhu va hombe. Ka zikhati lezo zo tsakisa, hi yisa kupima ka timhaka ta moya; lezo zi tiyisa a wumunwe laha ngangweni. Ka mabhulo lawo, a ku vuxeta zingheniso za ntiro wa simu zi nga longisela ngango kasi ku xumayela hi ndlela yi bhinzulako. Niku a xikhati lexi a ziro za ngango zi bhulisanako hi Mhaka ya Nungungulu, za tiyisa wumunwe— hakuva vontlhe va ta ranza Nungungulu va tlhela va lava ku maha kuranza kakwe.

¹³ Ahati vanhu va chadileko ke, va nga tirisanisa kuyini hi wumunwe kasi ku dumisa Jehova? Loku a nuna ni sati va hi malanza yo tsumbeka ya Jehova, va ti buza hi wumunwe kota wuyelo ga kona. Abrahama na Sara, Isaka na Rebeka, Elkana na Hana— vontlhe va wa hi mipatswa yi nga ranzana. Hinawu hi fanele ku ti karatela ku maha zalezo. (Gen. 26:8; 1 Sam. 1:5, 8; 1 Ped. 3:5, 6) Lezo zi ta hi vuna kuva ni wumunwe ni nuna wa hina kutani sati wa hina zi tlhela zi hi tshineta ka Dadani wa hina wa le tilweni — Gonza Mutshawuteli 4:12.

14. Loku a nuna wa wena kutani sati wa wena a nga tireli Jehova, u nga maha yini kasi a wukati ga nwina gi simama gi tiyile?

¹⁴ A maKristu ma fanele ku potsa ku bohelwa ntsungwa munwe ni va nga kholwiko. (2 Kor. 6:14) Ahati a vamakabye va hina lava va hanyako ka mingango yi hambeneko hi wukhongeli ke? A vokari va tirelako Jehova nyamutlha va tivile lisine na va chadile, niku a nuna kutani sati a hi Mboni. Hambulezo, a ku tirisa matshinya ya milayo ya Biblia zi nga tisa kuzwanana laha ngangweni. Lezo zi patsa ku tirisana nguvu ni nuna kutani sati hi laha zi kotekako hi kona na hi nga tshovi milayo ya Nungungulu. Lezo zi nga tshuka zi karata, hambulezo alakanyela mihanzu ya kona. A ku tirisa a matshinya ya milayo ya Biblia zi nga tshuka zi karata kambe loku a nuna kutani sati a fularela bandla. Lezo zi humelele makabye a vitwako Mary. Yena ni nuna wakwe David va wa mu tirela zinwe Jehova, kanilezi kwalomo ka 25 wa malembe nzhako, David i lo nyima kuya mitlhanganweni ya bandla. Mary i lo simama kuya mitlhanganweni ni migotsovanyanweni a tlhela a ti karatela ku tirisa matshinya ya milayo ya Biblia laha mutini, a ku patsa ni ku gonzisa vana vabye va ntlhanu ni munwe. Laha a vana lavo va nga kula va huma miti, Mary i lozwa xiwunza xa hombe. David i lo sangula ku lera a marevista lawa Mary a nga mu vekela. Hi kufamba ka xikhati, i lo sangula kuya mitlhanganweni. Ka mitlhangano leyo, a zukulu wakwe wa 6 wa malembe i wa tolovela ku mu vekela wutshamu. Loku a tshuka a ngayi, a jaha lego gi wa mu byela lezi: “Vovo, nzi ku vilele mitlhanganweni nyamutlha.” Zalezi David i tirela Jehova hi kutsaka, niku Mary i xalala nguvu hi lezi makunu va tirelako Jehova na va hi zinwe.

15. Xana a mipatswa yi chadileko kale yi nga vunisa kuyini leyi ya yiswa?

¹⁵ Kota lezi Satani a lwako ni mingango nyamutlha, za lisima ku wontlhe malanza ya Jehova ma simama ma tirisana khwatsi wukatini ga wona. Hambu loku u chadile kale, ti nyike xikhati xa ku ehleketa hi lezi u  nga wulako kutani ku maha kasi ku tiyisa a wukati ga nwina. Lava va chadileko kale va nga tlhela va vuna mipatswa yiswa laha bandleni lezaku yi maha lezo. U nga ha ramba patswa wuswa lezaku mu ta maha nawo wukhozeli ga nwina ga ngango. A xikhati lexi mu nga zinwe, a patswa lowo wa vaswa wu nga ha wona lezaku a liranzo ni kutirisana za lisima ka vontlhe, lava va chadileko kale ni lava va ha hi ku chadako.— Tit. 2:3-7.

16, 17. Zini lezi a malanza ya Nungungulu ma zi rinzelako?

¹⁶ Alakanyela vaIsraeli xikhatini xa kutsaliwa ka Biblia na va dumisa Jehova lomu ka mibuzo tempeleni yakwe le Jerusalema. Va wa longisela lipfhumba, va khatalelana lipfhumbeni lelo, va tlhela va ya khozela zinwe tempeleni. Zontlhe lezo zi wa lava kutirisana. (Luka 2:41-44) A xikhati lexi hi simamako ni lipfhumba la hina la kuya misaveni yiswa, hinawu hi fanele ku tlhanganyiswa khwatsi, ni ku tiyiswa hi xivuno lexi xi nyikwako hi xiro xinwe ni xinwani loku hi tirisana. Zi lava ku hlakulelwa siku ni siku gi cako. Xana wa ti wona na u hi ni xilaveko xa ku chukwatisa zo kari mhakeni leyi?   

¹⁷ Ehleketa hi makatekwa lawa hi ma rinzelako! Hi sina hi tsikile a kungazwanani ni pfilupfilu leyi yi tatileko tiko ga Satani. Zalezi hi wona kutatiseka ka magezu ma profetilweko hi Isaya na Mika — ya lezaku a vanhu va Nungungulu va wa ta kanziha zinwe “xitsungeni xa Jehova.” (Isa. 2:2-4; gonza Mika 4:2-4.) Kunene, hi kari hi khozela Jehova hi kuzwanana ka hombe ‘masikwini lawa yo gumesa.’ Kanilezi a litsako la hina li tava la hombe nguvu a xikhati lexi a vanhu vontlhe va to tlhanganyiswa khwatsi va tlhela va tirisana!