BAGO magsakat sa langit, sinabi ni Jesus sa saiyang mga disipulo: ‘Kamo magigin mga saksi ko sagkod sa kapuro-puruhi nin daga.’ (Gui. 1:8) Paano ini nagibo kan inot na mga Kristiyano?

Sinabi ni Martin Goodman, propesor sa Oxford University, na an “debosyon kan mga Kristiyano sa saindang misyon an nagpalain sa sainda sa iba pang relihiyosong grupo, kaiba na an mga Judio, sa suanoy na imperyo nin Roma.” Nagbaklay si Jesus sa manlain-lain na lugar para utubon an saiyang ministeryo. Sa pag-arog ninda sa halimbawa ni Jesus, siguradong nasabutan kan tunay na mga Kristiyano na kaiba sa pagpalakop kan “maugmang bareta kan Kahadian nin Diyos” an paghanap sa mga tawong gustong maaraman an katotoohan sa Bibliya. (Luc. 4:43, NW) Ini an saro sa mga dahilan kun taano ta sa Kristiyanong kongregasyon kan inot na siglo igwa nin “mga apostol,” sarong termino na literal na iinaapod sa mga isinusugo. (Mar. 3:14, An Marahay na Bareta Biblia) Ipinagbuot ni Jesus sa saiyang mga parasunod: “Padumán kamo asin gumibo kamo nin mga disipulo sa mga tawo kan gabos na nasyon.”—Mat. 28:18-20, NW.

Dai na niyato kaibanan ngunyan sa daga an siisay man sa 12 apostol ni Jesus, pero dakul na lingkod ni Jehova an igwa kan espiritu nin pagmimisyonero. Sa imbitasyon na pahiwason an saindang paghuhulit, sinda suminimbag: ‘Uya ako, sugua ako.’ (Isa. 6:8) An iba, arog kan rinibong naggradwar sa Gilead, nagbalyo sa hararayong nasyon. An iba nagbalyo sa lain-lain na lugar sa sainda mismong nasyon. Dakul an nag-adal nin bagong lengguwahe tanganing umiba sa mga kongregasyon asin grupo na nag-aasikaso sa espirituwal na mga pangangaipo kan mga tawong nagtataram kan lengguwaheng iyan. An mga tugang na ini na nagbalyo kun sain dakula an pangangaipo o nag-adal nin bagong lengguwahe tibaad mayo man sa pinakamarahay na kamugtakan para tumabang asin tibaad dai man iyan nagin madali para sa sainda. Kinaipuhan nindang magin mapagsakripisyo sa sadiri para maipahiling na namumutan ninda si Jehova asin an saindang kapwa. Pagkatapos na makuwenta an gastos, iprinesentar ninda an saindang sadiri para tumabang. (Luc. 14:28-30)  Talagang napapaniguan kan siring na mga tugang an pangangaipo para sa mga parahayag kan Kahadian.

Pero, magkalain an satong mga kamugtakan. Bako gabos na Saksi nasa kamugtakan na magbalyo kun sain dakula an pangangaipo o mag-adal nin bagong lengguwahe. Kaya, puwede daw niyatong maipahiling an espiritu nin pagmimisyonero dawa yaon sana kita sa sadiri tang kongregasyon?

Mahihiling sa mga Kristiyano kan inot na siglo an espiritu nin pagmimisyonero, pero posibleng an kadaklan sa sainda dai man naghali sa sadiri nindang lugar. Dawa arog kaiyan, aplikado sa sainda asin sa gabos na lingkod nin Diyos an sadol ki Timoteo: “Gibuhon mo an gibuhon nin sarong ebanghelisador, lubos mong utubon an saimong ministeryo.” (2 Tim. 4:5, NW) An pagbuot na ihulit an mensahe kan Kahadian asin gumibo nin mga disipulo aplikado sa gabos na Kristiyano sain man na lugar sinda. Saro pa, dakul sa mga gibuhon nin sarong misyonero an puwede man niyatong gibuhon sa sadiri tang kongregasyon.

Halimbawa, tibaad kaipuhanon nin sarong misyonero sa ibang nasyon na makibagay sa bagong mga kamugtakan. Dakul na bagay sa bagong asignasyon niya an ibang marhay para sa saiya. Kumusta man kita kun dai kita puwedeng magbalyo kun sain may dakulang pangangaipo? Dapat daw niyatong isipon na kabisado na niyato an teritoryo kan satong kongregasyon? O puwede daw niyatong purbaran an ibang mga pamamaagi nin paghuhulit para mapatotoohan an mga tawo? Halimbawa, kan 1940, dinagka an mga tugang na mag-iskedyul nin sarong aldaw kada semana para magpatotoo sa tinampo. Puwede mo man daw na purbaran an pamamaaging ini? O kaya an paggamit nin cart nin literatura? Basta an punto: Kun positibo kita sa manlain-lain na pamamaagi nin paghuhulit kan maugmang bareta, kaiba na idtong mga tibaad bago para sa sato, magigin maigot kita asin magugustuhan tang marhay an satong ministeryo.

Idtong mga nagboluntaryo para magbalyo kun sain dakula an pangangaipo o para mag-adal nin bagong lengguwahe, sa parati, mga kuwalipikadong marhay na mga parahayag. Kaya nagigin sindang bendisyon para sa dakul na tugang, halimbawa kun sinda an nanginginot sa sainda sa paghuhulit sa langtad. Dugang pa, sa parati, mga misyonero an nanginginot sa mga gibuhon kan kongregasyon sagkod na magkaigwa na nin kuwalipikadong brother na taga diyan. Kun saro kang bawtisadong brother, ‘naghihinguwa’ ka daw na umabot sa pribilehiyo huling  gusto mong maglingkod sa mga kakongregasyon mo?—1 Tim. 3:1, NW.

Apuwera sa maigot na pakikikabtang sa ministeryo asin pagigin andam na mag-ako nin responsabilidad sa kongregasyon, may iba pa kitang magigibo para makatabang sa satong kongregasyon. Gabos kita—hoben o gurang, lalaki o babayi—puwedeng magin “tabang na nagpapakusog” sa mga kapagtubod niyatong nangangaipo.—Col. 4:11, NW.

Tanganing makatabang sa satong mga kapagtubod, kaipuhan niyato sindang mamidbid na marhay. Sinasadol kita kan Bibliya na “isipon ta an lambang saro” kun kita nasa mga pagtiripon. (Heb. 10:24, NW) Ipinapahiling kan mga tataramon na ini na dawa ngani dai kita nakikiaram sa personal na buhay kan iba, dapat niyatong hinguwahon na mamidbid an satong mga tugang asin sabuton an mga pangangaipo ninda. Tibaad praktikal, emosyonal, o espirituwal na tabang an kaipuhan ninda. Bako sanang mga elder o ministeryal na lingkod an may responsabilidad na magtabang sa mga tugang. Totoo, tibaad may mga sitwasyon na sinda an angay na magtabang. (Gal. 6:1) Pero, gabos kita puwedeng tumabang sa mga may edad nang mga tugang, o sa bilog na pamilya na napapaatubang sa mga problema.

Halimbawa, kan magkaproblema sa pinansiyal si Salvatore, kinaipuhan niyang ipabakal an saiyang negosyo, harong, asin dakul na iba pang pagsadiri kan pamilya ninda. Nahahadit siya kaidto kun paano niya bubuhayon an saiyang pamilya. Pero, nahiling nin sarong pamilya sa kongregasyon ninda an saindang sitwasyon. Nagtao nin pinansiyal na ayuda an pamilyang ini, tinabangan si Salvatore saka an saiyang agom na makakua nin trabaho, asin dakul na bangging kinaulay saka pinakusog an buot kan bilog na pamilya ni Salvatore. Nagin magkaamigo an duwang pamilya sa laog nin dakul na taon na ngunyan. Sa ibong kan gabos na inagihan ninda, parehong puwedeng girumdumon kan duwang pamilya an maugmang mga panahon na magkairibanan sinda.

Para sa tunay na mga Kristiyano, an relihiyon bakong sarong bagay na pribado. Arog kan ipinahiling ni Jesus, kaipuhan niyatong ipaaram sa gabos an magagayon na panuga kan Bibliya. Nasa kamugtakan man kita na magbalyo o dai, puwede niyatong itao an pinakamakakaya ta para gibuhon an ikakarahay kan gabos. Asin siyertong magigibo ta iyan sa kongregasyon kun sain kita ngunyan naglilingkod. (Gal. 6:10) Kun gigibuhon niyato ini, mamamatian ta an kaugmahan sa pagtao asin makakatabang ini sa sato na padagos na ‘magbunga nin gabos na marahay na gibo.’—Col. 1:10; Gui. 20:35.