IESU be guba dekenai ia do daekau lasi neganai, iena aposetolo taudia ia hamaoroa: “Tanobada ena daudau momokani gabudia dekenai, lau do umui gwauraia hedinarai.” (Kara 1:8) Keristani taudia ginigunadia be edena dala ai unai do idia karaia?

Oxford University ena profesa ta, Martin Goodman, ia gwau: “Keristani taudia idia abia dae idia be mai edia gaukara, unai dainai idia be tomadiho ma haida amo idia idau, Roma Basileia henunai idia noho Iuda taudia amo danu.” Iesu be gabu idauidau dekenai ia lao ia haroro totona. Keristani taudia momokanidia be ia idia tohotohoa, bona idia laloparara “Dirava ena Basileia ena sivarai namona” do idia harorolaia bona Baibel ena hereva momokani idia ura henia taudia do idia tahua. (Luka 4:43) Unai dainai aposetolo edia negai ia noho Keristani kongrigeisen ai “aposetolo taudia” idia noho. (Mar. 3:14) Iesu ese ia murinai idia raka taudia ia hagania: “Unai dainai umui lao, bese ibounai taudia be hahediba taudia ai umui halaoa.”​—Mat. 28:18-20.

Ena be Iesu ena aposetolo taudia 12 be hari ita ida idia noho lasi, to Iehova ena hesiai taudia momo be idia ura misinari gaukara idia karaia. Idia momo ese Iehova ena boiboi idia abia dae, idia gwau: “Lau be inai, do lau lao! Lau do oi siaia!” (Isa. 6:8) Idia haida, Gilead Sikuli idia haorea taudia danu, be tano daudau idia lao. Ma haida be edia tano korikori ena hanua ta idia lao. Momo be gado ma ta idia dibaia, unai amo unai gado idia herevalaia taudia idia durua diba. Pablisa be momo lasi gabudia dekenai idia lao eiava gado ma ta idia dibaia tadikaka taihu momo be hekwakwanai haida idia davaria danu. Unai dainai edia lalokau Iehova bona dekena taudia dekenai idia hahedinaraia totona, idia be sibona edia ura idia dadaraia. Davana idia laloa murinai, heduru idia henia totona idia lao. (Luka 14:28-30)  Unai dala amo idia ese haroro gaukara idia durua.

To, iseda noho daladia be idauidau. Unai dainai Witnes taudia haida sibona be pablisa momo lasi gabudia dekenai idia lao o gado idauna idia dibaia. To iseda kongrigeisen ai misinari gaukara ita karaia diba, a?

Aposetolo edia negai idia noho Keristani taudia be edia hanua dekenai misinari gaukara idia karaia. Idia bona Dirava ena hesiai taudia ibounai dekenai Timoteo ese ia abia hagoadaia herevana be mai anina bada, ia gwau: “Evanelia tauna ena gaukara oi karaia, bona emu hesiai gaukara oi hagugurua momokani.” (2 Tim. 4:5) Ena be Keristani taudia be gabu idauidau ai idia noho, to sivarai namona idia harorolaia bona taunimanima be hahediba taudia ai idia halaoa. Danu, inai bamona misinari gaukara idauidau be iseda kongrigeisen ai ita karaia diba.

Hegeregere, gabu idauna ai misinari gaukara do ia karaia tauna be do ia hekwarahi mauri dala matamatana ia manadalaia totona. Ena asainmen matamatana ai gau momo do ia idau. To, pablisa momo lasi gabuna dekenai ita lao diba lasi neganai be edena bamona? Ita gwau diba iseda kongrigeisen ena teritori ibounai ita diba, a? Eiava dala ma haida ita tahua taunimanima ita haroro henia totona? Hegeregere, lagani 1940 ai, tadikaka idia hagoadaia wiki ta ta ai dina ta do idia abia hidi dala haroro idia karaia totona. Unai gaukara oi durua diba, a? Eiava magasin bona buka hahedinaraia troli oi gaukaralaia, a? Sibona oi nanadaia: Sivarai namona harorolaia totona, unai bamona daladia lau tohoa vadaeni, a?

Bema lalohadai maorona ita abia, unai ese ita do ia durua haroro gaukara ita goadalaia totona. Nega momo, pablisa goadadia be pablisa momo lasi gabudia dekenai idia lao eiava gado ma ta kongrigeisen idia durua. Idia ese haroro gaukara idia gunalaia neganai, pablisa ma haida idia hagoadaia diba. Danu, misinari taudia ese kongrigeisen ena gaukara idauidau idia gunalaia ela bona kongrigeisen ai idia noho tadikaka idia hegeregere unai maduna idia huaia totona. Bema oi be bapatiso Witnes tadikakana, oi ura emu kongrigeisen ai “naria tauna ena maduna” oi abia, a?​—1 Tim. 3:1.

Haroro gaukara bona kongrigeisen ai maduna haida ita huaia sibona be hegeregere lasi, to dala ma haida ai iseda kongrigeisen ita durua diba. Oibe, ita ibounai​—matamata o buruka, mero o kekeni​—ese kongrigeisen ai idia noho taudia ita hagoadaia diba.​—Kol. 4:11.

Iseda tadikaka taihu ita durudia totona, namona be idia ita diba namonamo. Baibel ese ita ia hagoadaia, ita hebou neganai “ta ta ibounai do ita laloa.” (Heb. 10:24) Unai dainai iseda tadikaka taihu bona edia dabu gaudia ita diba be namo, to namo lasi edia mauri lalonai idia vara gaudia ibounai ita diba. Reana idia ura ta ese tauanina dalanai ia durua, o ta ese ena lalona ia hagoadaia. Iseda tadikaka taihu durua gaukarana be elda bona hesiai taudia edia maduna sibona lasi. Oibe, gau haida dekenai elda o hesiai tauna sibona ese heduru idia henia be namo. (Gal. 6:1) To, ita ibounai ese idia buruka vadaeni tadikaka taihu, eiava hekwakwanai idia davaria noho ruma besedia ita durua diba.

Hegeregere, Salvatore be moni dekenai hekwakwanai ia davaria neganai, ia ese iena bisinesi, ruma, bona ena ruma bese ena kohu momo ia hoihoilaia, to ia laloa edena dala ai ena ruma bese do ia durua. Kongrigeisen ai ruma bese ta be unai ia itaia. Unai dainai Salvatore bona ena adavana idia durua moni gaukara ta idia abia totona, bona hanuaboi momo Salvatore bona ena ruma bese ida idia noho bona edia lalohekwarahi idia kamonai bona idia hagoadadia danu. Unai dala amo idia be lagani momo lalonai tura namodia ai idia lao. Ena be Salvatore bona ena ruma bese be unai hekwakwanai idia davaria, to hari mai moale ida edia gaukara hebou karana idia laloa.

Keristani taudia momokanidia dekenai idia dibaia gaudia be sibona dekenai idia dogoatao lasi. Iesu ia karaia bamona, namona be taunimanima dekenai Baibel ena gwauhamata namodia ita herevalaia. Herevana ita be gabu ma ta dekenai ita lao eiava lasi, to namona be ita hekwarahi ibounai dekenai kara namodia ita hahedinaraia totona. Oibe, ita noho kongrigeisen ai unai ita karaia diba. (Gal. 6:10) Bema unai ita karaia, henia kara ena moale do ita mamia bona do ita ura “gaukara namodia ibounai lalonai huahua do [ita] havaraia noho.”​—Kol. 1:10; Kara 20:35.