SAKBAY a napan idiay langit ni Jesus, kinunana kadagiti adalanna: “Dakayto dagiti saksik . . . agingga iti kaadaywan a paset ti daga.” (Ara. 1:8) Kasano a naitungpal dayta dagiti nagkauna a Kristiano?

Kinuna ni Martin Goodman a propesor iti Oxford University a ti “pannakaammo dagiti Kristiano iti trabahoda ti nakaidumaanda iti dadduma a relihioso a grupo a pakairamanan dagiti Judio iti nagkauna nga imperio ti Roma.” Napan ni Jesus iti nagduduma a lugar tapno itungpalna ti ministeriona. Kas panangtulad iti ulidanna, ammo dagiti pudno a Kristiano a ti panangisaknap iti “naimbag a damag ti pagarian ti Dios” ramanenna ti panangdanon kadagiti tattao a mayat a mangammo iti kinapudno iti Biblia. (Luc. 4:43) Daytoy ti maysa kadagiti rason no apay nga addaan ti kongregasion Kristiano idi umuna a siglo kadagiti “apostol,” a ti literal a kaipapananna ket dagidiay naibaon wenno pannakabagi. (Mar. 3:14) Imbilin ni Jesus kadagiti pasurotna: “Inkayo ngarud ket mangaramidkayo iti ad-adalan kadagiti tattao iti amin a nasion.”—Mat. 28:18-20.

Awan itan ditoy daga ti 12 nga apostol ni Jesus, ngem adu nga adipen ni Jehova ti mangipakpakita iti regta ti maysa a misionero. Idi naawisda a mangisaknap iti panangasaba, kinunada: “Adtoyak! Ibaonnak.” (Isa. 6:8) Dadduma ti immakar iti adayo a lugar kas ti inaramid ti rinibu a nagraduar iti Gilead School. Immakar met ti dadduma iti sabali a lugar iti pagilianda. Adu ti nagsursuro iti sabali a lengguahe tapno tumulongda kadagiti kongregasion ken grupo a mangasikaso iti kasapulan dagiti agsasao iti dayta a lengguahe. Dagitoy a kakabsat nga immakar iti lugar nga addaan iti dakdakkel a panagkasapulan wenno nagsursuro iti sabali a lengguahe ket mabalin a saan a nanam-ay ti kasasaadda ken mabalin a saan a gapu ta nawayada. Kasapulan nga agsakripisioda tapno maipakitada ti  panagayatda ken Jehova ken iti kaarrubada. Kalpasan a natingitingda ti bambanag, nagboluntarioda a tumulong. (Luc. 14:28-30) Dagitoy a kakabsat tumultulongda kadagiti pakasapulan.

Nupay kasta, nagduduma ti kasasaadtayo. Saan a kabaelan ti tunggal adipen ni Jehova ti umakar iti lugar nga addaan iti dakdakkel a panagkasapulan wenno agsursuro iti sabali a lengguahe. Ngem mabalintayo kadi nga ipakita ti regta ti maysa a misionero uray iti mismo a kongregasiontayo?

Impakita dagiti Kristiano idi umuna a siglo ti regta ti maysa a misionero, ngem mabalin a kaaduan kadakuada ti nagserbi iti mismo nga ilida. Nupay kasta, ti pammaregta a naited ken Timoteo ket napateg kadakuada ken iti amin nga adipen ti Dios: “Aramidem ti trabaho ti managebanghelio, naan-anay nga itungpalmo ti ministeriom.” (2 Tim. 4:5) Ti bilin a panangikasaba iti mensahe ti Pagarian ken panangaramid iti adalan ket agaplikar iti amin a Kristiano sadinoman ti ayanda. Kanayonanna, agaplikar met iti kongregasiontayo dagiti trabaho ti maysa a misionero.

Kas pagarigan, masapul a makibagay ti maysa a misionero kadagiti baro a kasasaad iti sabali a pagilian. Adu a bambanag ti naiduma iti baro a teritoriana. Ngem kasanon no saantayo a kabaelan ti umakar iti lugar nga addaan iti dakdakkel a panagkasapulan? Maikunatayo kadi a nakasabaan aminen a tattao iti teritoria ti kongregasiontayo? Wenno pinadastayo kadin dagiti baro a pamay-an ti panangdanon kadagiti tattao? Kas pagarigan, naiparegta kadagiti kakabsat idi 1940 nga ikagumaanda ti mangasaba iti kalsada uray maysa laeng nga aldaw tunggal lawas. Mabalinmo kadi nga aramiden dayta? Wenno ti ngay panangusar kadagiti cart a pagidispleyan iti literatura? Ti napateg ket: Pinampanunotmo kadin ti panangidanon iti naimbag a damag iti pamay-an a mabalin a baro kenka?

Makatulong kadatayo ti panagbalin a positibo tapno naregta ken naragsaktayo iti ministerio. Iti adu a kasasaad, dagidiay immakar iti lugar nga addaan iti dakdakkel a panagkasapulan wenno nagserbi iti lugar a sabali ti us-usarenda a lengguahe ket nasanay nga agibumbunannag. Adu ti maitulongda iti sabsabali kas iti panangidaulo iti panangasaba. Kasta met, masansan a dagiti misionero ti mangidaulo kadagiti urnos iti kongregasion agingga nga adda dagiti kualipikado a bautisado a lokal a kakabsat a lallaki. No  maysaka a lalaki a bautisado a Saksi, ikagkagumaam kadi ti ‘rumagpat’, kayatna a sawen, situtulokka kadi a tumulong kadagiti kakongregasionmo?—1 Tim. 3:1.

Malaksid iti naregta a pannakiraman iti ministerio ken sisasagana a panangawat kadagiti annongen iti kongregasion, adda pay sabali a pamay-an tapno makatulongtayo iti kongregasiontayo. Asinoman—ubing man wenno nataengan, lalaki wenno babai—kabaelanna ti agbalin a “makapabileg a tulong” kadagiti kakabsat nga agkasapulan.—Col. 4:11.

Tapno matulongantayo dagiti kapammatiantayo, masapul nga am-ammuentayo ida a naimbag. Paregtaennatayo ti Biblia nga “agpipinnanunottayo” no agtataripnongtayo. (Heb. 10:24) Saan a kayat a sawen daytoy a pakibiangantayo ti biag ti sabsabali. Masapul nga ikagumaantayo nga am-ammuen dagiti kakabsattayo ken tarusan dagiti kasapulanda. Mabalin a dagitoy ket praktikal, emosional, wenno naespirituan a kasapulan. Saan laeng a rebbengen dagiti panglakayen ken ministerial nga adipen ti panangtulong kadagiti kakabsat. Pudno nga adda dagiti gundaway a nasaysayaat no ti maysa kadagita a kakabsat ti mangipaay iti tulong. (Gal. 6:1) Ngem kabaelantayo amin a tulongan dagiti lallakay ken babbaket a kakabsat, wenno ti maysa a pamilia nga addaan kadagiti problema.

Kas pagarigan, idi nagproblema iti pinansial ni Salvatore a masapul nga ilakona ti negosiona, pagtaenganna, ken ti adu a sanikua ti pamiliana, pinampanunotna no makalung-aw pay ti pamiliana. Naammuan dayta ti maysa a pamilia iti kongregasionda. Nangipaayda iti pinansial a tulong, tinulonganda ni Salvatore ken ni baketna a makabirok iti trabaho, ken adu a rabii a dimngeg ken pinaregtada ti pamiliana. Iti adu a tawen, nagbalin a nasinged nga aggagayyem dagitoy a pamilia. Uray no napasaranda ti rigat kadagiti naglabas a tawen, maragsakan a manglagip dagitoy a pamilia kadagiti panawen ti panagkakaduada.

Para kadagiti pudno a Kristiano, saan laeng a para kadakuada dagiti patpatienda. Kas inyulidan ni Jesus, masapul nga ipakaammotayo iti amin dagiti nagsasayaat a kari ti Biblia. Kabaelantayo man ti umakar wenno saan, ikagumaantayo nga aramiden ti naimbag iti isuamin. Maaramidantayo dayta uray iti mismo a kongregasion a pagserserbiantayo ita. (Gal. 6:10) No aramidentayo dayta, mariknatayo ti ragsak iti panangted ken makatulong kadatayo nga agtultuloy nga “agbunga iti tunggal naimbag nga aramid.”—Col. 1:10; Ara. 20:35.