ANTIS ya onlad tawen si Jesus, oniay imbaga tod saray disipulo to: “Mantasi kayo nipaakar ed siak . . . diad sankaarawian a pasen na dalin.” (Gawa 1:8) Panon a nagawaan na saray inmuunan Kristiano itan ya mairap a kimey?

Imbaga na sakey a propesor na Oxford University a si Martin Goodman ya “diad empiryo na Roma nensaman, saray Kristiano et midumaan ed arum a relihyon, kaiba la ray Judio, lapud misyon da.” Nambiahe si Jesus ed nanduruman lugar pian manpulong. Inalig na saray tuan Kristiano so alimbawa to lapud atalosan da ya kabiangan ed pangipulong na “maong a balita na panarian na Dios” so pananap ed totoon malabay a makaaral ed katuaan na Biblia. (Luc. 4:43) Sakey iyan rason no akin a diad Kristianon kongregasyon nen inmunan siglo et wala ray “apostoles,” sakey a terminon literal ya manutukoy ed saray ibabaki odino mensahero. (Mar. 3:14) Ingganggan nen Jesus iray patumbok to: “Onla kayo sirin tan ibangat yo iray totoo ed amin a nasyones.”—Mat. 28:18-20.

Anggapo lay anggan sakey ed saray 12 apostol nen Jesus diad dalin, balet dakel ya lingkor nen Jehova natan so mangipapatnag na espiritu na panagmisionero. Inawat day imbitasyon a palaknaben so panagpulong da, ya inkuan da: “Wadia ak, ibaki mo ak.” (Isa. 6:8) Inmalis ed ararawin lugar so arum ya agagi, a singa saray nilibon nanaral ed Gilead School. Wala ra met so inmalis ed arum a pasen diad mismon bansa ra. Dakel so nanaral na sananey ya lenguahe pian makatulong ed saray kongregasyon tan grupo a mangaasikaso ed pankaukolan na saramay mansasalita ed satan a lenguahe. Nayarin agmarakep so kipapasen tan aliwan mainomay parad sarayan agagi so onalis ed lugar a walay pankaukolan odino manaral na sananey a lenguahe. Kaukolan day espiritu na panagsakripisyo pian nipatnag day panangaro rad si Jehova tan ed kapara  dan too. Kayari ran namplanon maong, namboluntaryo ran ontulong. (Luc. 14:28-30) Talagan baleg so nitutulong na saratan ya agagi.

Balet, nandurumay kipapasen. Aliwan amin ya Tasi et sarag day onalis ed lugar ya walay baleg a pankaukolan odino manaral na sananey a lenguahe. Kanian panon tayon nipatnag so espiritu na panagmisionero anggan diad mismon kongregasyon tayo?

Impatnag na saray Kristiano nen inmunan siglo so espiritu na panagmisionero, balet karaklan ed sikara et posiblin ag-inmalis ed lugar da. Say bilin ed si Timoteo et onaplika met ed sikara tan ed amin a lingkor na Dios: “Gawam so kimey na sakey ya ebanghelisador, sigpot mon sumpalen so ministeryom.” (2 Tim. 4:5) Inerman so kawalaan da, onaplika ed amin a Kristiano so ganggan ya ipulong so mensahe na Panarian tan bangatan so totoo pian magmaliw iran disipulo. Ontan met, dakel ya aspekto na panagmisionero so nayarin iyaplika ed mismon kongregasyon tayo.

Singa bilang, say sakey a misionero ed arum a bansa et kaukolan toy onadapta ed balo iran kipapasen. Diad balon asainmin to et dakel so kaukolan ton aralen a gawaen. Balet, panon to no agtayo sarag so onalis ed lugar a walay baleg a pankaukolan? Nepeg tayo kasin isipen ya kabisado tayo la so teritorya na kongregasyon tayo? Odino sarag tayo kasin salien iray balon paraan pian napulongan iray totoo? Alimbawa, nen 1940, pinaseseg iray agagi a mangiyeskedyul na sakey agew ed kada simba pian mibiang ed pampulong diad karsada. Sarag mo kasi so mibiang ed satan? Odino sarag mo kasi so mangusar na literature display cart? Say punto et: Kasin inisip mo lay mibiang ed ontan iran paraan na panangipulong ed maong a balita, a nayarin balo ed sika?

Makatulong ed sikatayo so pagmaliw a positibo pian magmaliw tayon maseseg tan maligsa ed ministeryo. Kaslakan, saramay manboboluntaryo ya onalis ed lugar a walay mas baleg a pankaukolan odino manlingkor ed teritoryan sananey so lenguahe et talagan kualipikado. Kanian magmaliw iran bendisyon ed agagi, a singa diad pangidaulo ra ed ministeryo. Sakey ni, saray misionero so mabetbet a mangidadaulo ed saray uksoyan na kongregasyon legan ya anggapo ni ray kualipikadon agagin lalaki. No sakey kan laki a bautismado, kasin “dadampoten”  moy pribilehyo ed kongregasyon, a mabulos kan manlilingkor ed saray agagi?—1 Tim. 3:1.

Nilikud ed maseseg a pibibiang ed ministeryo tan pagmaliw ya akaparaan a mangawat na saray responsabilidad ed kongregasyon, wala ni ray paraan ya makatulong tayod kongregasyon. Amin tayo—ugaw man odino matatken, laki odino bii—et nayarin magmaliw a “makapabiskeg a tulong” ed saray agagi ya mankaukolan.—Col. 4:11.

Pian natulongan tayo ray agagi tayo, kaukolan ya kabaten tayo ran maong. Bibilinen itayo na Biblia ya “nonoten tayo so sakey tan sakey” sano mantitipon tayo. (Heb. 10:24) Ipapabitar na saratan a salita ya anggaman agtayo pibabalian so bilay na arum, kaukolan tayon kabaten iray agagi tayo tan amtaen iray pankaukolan da. Nayarin say pankaukolan da et praktikal, emosyonal, odino espiritual. Aliwa labat ya saray elder odino ministeryal a lingkor so akanresponsabilidad ya ontulong ed saray agagi. Tua, wala ray situasyon a say manepeg ya ontulong et sikaran mismo. (Gal. 6:1) Balet, amin tayo et sarag tayoy ontulong ed saray maedad lan agagi tayo odino saray pamilya ya walaay problema.

Singa bilang, sanen aproblema ed pinansyal si Salvatore tan kaukolan ton ilako so negosyo to, abung to, tan dakel a kayarian na pamilya da, inisip to no panon ya nasarag na pamilya to so kipapasen da. Naimano na sakey a pamilya ed kongregasyon so pankaukolan da. Inikdan da ray pinansyal a tulong, tinulongan day Salvatore tan say asawa to ya makalmoy trabaho, tan pigay labi ran dinengel tan pinaseseg so interon pamilya to. Nagmaliw iran maapit a sankakaaro ed dakel ya taon. Anggaman makapaaburido so agawa diad gapo, malikeliket iyan duaran pamilya no nanonotan da ray panaon a sankakaiba ira.

Parad saray tuan Kristiano, say relihyon et agnepeg ya iyamot. Singa ginawa nen Jesus, kaukolan tayon ipaamta ed amin a totoo iray alay abig a sipan na Biblia. Balanglan sarag tayoy onalis odino andi, nayarian tayon iter so sankaabigan tayo pian nagawaan tayoy maabig parad amin. Tan seguradon nagawaan tayo itan ed kongregasyon a panlilingkoran tayo natan. (Gal. 6:10) No gawaen tayo itan, nalikna tayo so liket ed panangiter tan natulongan itayo a ‘manbunga ed amin a maabig a kimey.’—Col. 1:10; Gawa 20:35.