KʼALAL skʼan toʼox xbat ta vinajel li Jesuse, xi laj yalbe li yajchankʼoptake: «Chavalik batel jkʼoplal [...] kʼalal to ta namal balumil» (Ech. 1:8). Pe ¿kʼuxi van xuʼ spas yuʼunik li mukʼta abtelal taje?

Jun jchanubtasvanej ta universidad ti lek ojtikinbile, laj yal ti yajtsʼaklomtak Kristo ti kuxiik ta yosilal Romae jelelik la tajek xchiʼuk li yan relijionetike, taje te tsakal skʼoplal li judaetike. ¿Kʼu van yuʼun ti jelelike? Yuʼun ta buyuk noʼox la xcholbeik mantal li krixchanoetik kʼuchaʼal la spas Jesuse. Jaʼ yuʼun li melel yajtsʼaklomtak Kristoe jech la spasik ek. Yuʼun ta buyuk noʼox laj yalik batel ‹li lekil aʼyejetik ta sventa Ajvalilal yuʼun Diose› xchiʼuk la saʼik li krixchanoetik ti oy ta yoʼontonik xchanel li kʼusi melele (Luk. 4:43). Jaʼ yuʼun chal Vivlia ti oy ‹jtakboletik› ta baʼyel sigloe, jaʼ xkaltik, krixchanoetik ti chichʼik takel batel ta spasel jtosuk abtelale (Mar. 3:14). Xi laj yalbe komel mantal yajchankʼoptak li Jesuse: «Batanik, bat pasik ta jchankʼop li krixchanoetik ta skotol jteklumetike» (Mat. 28:18-20).

Melel onoʼox ti chʼabal xa liʼ oyik li lajcheb yajtakboltak Jesuse, akʼo mi jech, ep yajtuneltak Jeova jech yakal chcholik-o mantal. ¿Kʼuxi pasem yuʼunik taje? Jaʼo kʼalal chbat tunikuk ti bu chtun mas jcholmantaletike. Yuʼun xi chalike: «Liʼ oyun vuʼune, tacun batel» (Is. 6:8). Yantike batemik ta namal lumetik sventa te xtunik, taje jaʼ jech spasojik ta smilal xa noʼox ermanoetik ti ayemik li ta Chanob vun ta Galaade. Yantik xtoke batemik ta naklej ta yan estado. Ep ermanoetik xtoke xchanojik yan kʼop sventa xkoltavanik ta junuk tsobobbail o  ta junuk grupo. Melel onoʼox ti mu kʼunuk ta pasel taje. Pe skotol li ermanoetike, ep kʼusitik yiktaojik ta skoj ti skʼanojik li Jeovae xchiʼuk li krixchanoetike. Li ermanoetik taje baʼyel la xchotan sbaik lek ta snopel sventa tskʼelik kʼuxi tstunes skʼakʼalik, stakʼinik xchiʼuk yipik sventa xbat xcholik mantal ti bu chtun ep jcholmantaletike (Luk. 14:28-30). ¡Toj lek li kʼusi spasojik li ermanoetik taje!

Melel onoʼox ti mu jkotoltikuk xuʼ kuʼuntik xchanel yan kʼope o ti xijbat ta yan estado sventa xbat koltavankutik ta xcholel mantale. Pe jkotoltik xuʼ xijtunutik kʼuchaʼal misionero li ta jtsobobbailtike. ¿Kʼuxi xuʼ spas kuʼuntik taje? Jkʼeltik batel.

Li yajtsʼaklomtak Kristo ta baʼyel sigloe mu skotolikuk tunik ta misioneroal, yuʼun te noʼox tun ta steklumalik. Pe xmuyubaj noʼox la xcholik mantal. Li Timoteoe laj yichʼ albel jun mantal ti chtun kuʼuntik li avi eke: «Abtejan batel li ta xcholel lekil aʼyeje, lek me tsʼakal xapas batel li avabtele» (2 Tim. 4:5). Toj tsots me skʼoplal ti jchʼuntik jkotoltik li mantal laj yichʼ alel ta sventa li xcholel mantale xchiʼuk ti jpastik ta yajtsʼaklom Kristo li krixchanoetike. Ta melel, ep me kʼusitik xuʼ jpastik sventa te noʼox xijtun ta misioneroal li ta jtsobobbailtike.

Kʼalal chbat tunuk ta yan lum jun misioneroe, chakʼ persa sventa xnop xaʼi ti kʼu yelan li kuxlejal tee. Li voʼotike xuʼ van mu xuʼ kuʼuntik ti xijbat tunkutik ta yan lume. Pe ¿mi xuʼ van jnopes jbatik xchiʼuk jchantik yan kʼuxi xuʼ jcholtik mantal? Li ta 1940 laj yichʼ tijbel yoʼonton ermanoetik ti xcholik mantal ta kaye junuk kʼakʼal ta xemanae. Li voʼotike, ¿mi ta jcholbetik mantal li krixchanoetik ta jnuptik ta bee? ¿Mi oy xa jcholojtik mantal ta mexa o ta yavil vun ti stakʼ jochele?

Mi xijmuyubaj noʼoxe, ta me jkʼupintik tajek li cholmantale. Li ermanoetik ti chchanik yan kʼop o chbat tunikuk ta yan lume, ep kʼusi tskolta-o sbaik li ta tsobobbaile. Yuʼun jaʼ jbabeik li ta cholmantale. Ep misioneroetike jaʼ oy ta sbaik sbeiltasel li tsobobbaile, jaʼ to chiktaik mi la xchanik xa ox li ermanoetik tee. Mi avichʼoj voʼ xchiʼuk mi keremote,  ¿mi oy ta avoʼonton chatun ta jtunel o ta mol ta tsobobbail? (1 Timoteo 3:1).

Pe oy to kʼusitik ti xuʼ jkolta-o jbatik li ta tsobobbaile. Mu ventauk mi ants o mi vinikutik, mi kerem o mi tsebutik o mi oy xa jabilaltik, jkotoltik xuʼ jkoltatik xchiʼuk jpatbetik yoʼonton li ermanoetike (Kol. 4:11).

Skʼan me xkojtikintik lek li ermanoetik mi ta jkʼan ta jkoltatike. Li Vivliae chalbutik ti skʼan teuk ta koʼontontik li kʼusi chtun yuʼun kermanotaktik kʼalal chijbat ta tsobajele (Evr. 10:24). Taje maʼuk me skʼan xal ti ta jtikʼ jbatik ta xkuxlejalike, yuʼun jaʼ skʼan xal ti xkaʼibetikuk smelolal ti kʼu yelan chaʼi sbaike xchiʼuk ti kʼusi chtun yuʼunike. Yuʼun xuʼ tskʼanik koltael ta sventa li kʼusi chtun yuʼunik jujun kʼakʼale, patbel yoʼontonik o tskʼanik koltael ta mantal. Melel onoʼox ti mu kʼusi xuʼ jpastik bakʼintike, yuʼun jaʼ oy ta sbaik li moletike o li jtuneletike (Gal. 6:1). Pe jkotoltik xuʼ jkoltatik li ermanoetik ti malubemik xae o li utsʼ alaliletik ti yakal chil svokolike.

Kalbetik skʼoplal jun ermano ti Salvatore sbie. Li ermano taje tsots tajek la snuptan svokol ta takʼin, jaʼ yuʼun la xchon ti bu chchonolaje, li snae xchiʼuk yan kʼusitik yuʼun. Solel chat tajek yoʼonton ta stojolal li yutsʼ yalale. Li ta stsobobbailike laj yaʼi jun nupultsʼakal li svokol la snuptanike. Jaʼ yuʼun koltaatik jutuk ta takʼin li Salvatoree xchiʼuk koltaat ta saʼel yabtelik. Ep ta velta koltaatik xchiʼuk patbat yoʼontonik yuʼun li utsʼ alalil taje, jaʼ yuʼun lek laj yamigoin sbaik. Chvul to ta sjolik ti koʼol tsal yuʼunik li vokolil taje.

Li melel yajtsʼaklomutik Kristoe chapalutik onoʼox me ta xcholbel mantal li krixchanoetike. Yuʼun skʼan jpastik jech kʼuchaʼal la spas li Jesuse xchiʼuk ti xkalbetik skotol krixchanoetik li kʼusitik labalik sba chakʼbutik li Diose. Mi xuʼ xijbat ti bu chtun mas jcholmantaletike o mi moʼoj, pe kakʼtik onoʼox me persa sventa jkoltatik li buchʼutik ta jtsobobbailtike (Gal. 6:10). Mi jech ta jpastike, mas me xijmuyubaj xchiʼuk ‹jech-o tsatin batel lek kuʼuntik li lekil abtelale› (Kol. 1:10; Ech. 20:35).