ANTES sumaka hi Jesus ha langit, nagsiring hiya ha iya mga disipulo: “Magigin mga saksi ko kamo . . . tubtob ha pinakahirayo nga lugar ha tuna.” (Buh. 1:8) Paonan-o daw la matutuman han siyahan-siglo nga mga Kristiano ini nga sugo?

Hi Martin Goodman nga propesor ha Oxford University, nakaobserbar nga an pag-abat han mga Kristiano nga may misyon hira amo an hinungdan nga naiiba hira tikang ha iba nga grupo han relihiyon, upod na an mga Judio, ha kadaan nga imperyo han Roma. Nagbiyahe hi Jesus ha iba-iba nga lugar basi tumanon an iya ministeryo. Ha pagsunod han iya ehemplo, nasantop han tinuod nga mga Kristiano nga basi maipasamwak “an maopay nga sumat han Ginhadian han Dios,” kinahanglan pamilngon an mga tawo nga naruruyag mahibaro han kamatuoran ha Biblia. (Luc. 4:43) Usa ini han mga hinungdan nga an Kristiano nga kongregasyon ha siyahan nga siglo may “mga apostol,” termino nga literal nga nagpapasabot hin mga iginpadara, o representante. (Mar. 3:14) Hi Jesus nagsugo ha iya mga sumurunod: “Kadto kamo ha mga tawo han ngatanan nga nasud ngan tutdui hira basi magin akon mga disipulo.”—Mat. 28:18-20.

Yana, waray na ha tuna an 12 nga apostol ni Jesus, pero damu nga surugoon ni Jehova an nagpapakita hin disposisyon han pagmisyonero. May kalabotan ha panawagan nga magboluntaryo ha lugar nga daku an panginahanglan, hira binaton: “Iini ako; pakadtoa ako.” (Isa. 6:8) An pipira nabalhin ha higrayo nga nasud sugad han ginhihimo han yinukot nga nagradwar ha Gilead. An iba nabalhin ha iba nga lugar ha ira kalugaringon nga nasud. Damu liwat an nag-aaram hin bag-o nga linggwahe basi makabulig ha mga kongregasyon o grupo nga nagsasangyaw ha mga tawo hito nga linggwahe. Bangin diri masayon para hini nga kabugtoan nga bumalhin ha mas daku an panginahanglan o mag-aram hin bag-o nga linggwahe. Kinahanglan andam hira magsakripisyo basi maipakita nira nga hinigugma nira hi  Jehova ngan an ira igkasi-tawo. Katapos kwentahon an magagasto siring pa, nagboluntaryo hira ha may mas daku nga panginahanglan. (Luc. 14:28-30) An ginbubuhat hini nga kabugtoan mapulsanon gud.

Pero iba-iba an kahimtang. Diri ngatanan nga Saksi makakag-alagad ha lugar nga mas daku an panginahanglan o makakag-aram hin bag-o nga linggwahe. Kon sugad, mahimo ba naton maipakita an disposisyon han pagmisyonero ha aton mismo kongregasyon?

Matin-aw nga an mga Kristiano ha siyahan nga siglo may disposisyon han pagmisyonero pero posible nga damu ha ira an waray bumalhin ha iba nga lugar. Bisan pa hini, an sagdon kan Timoteo aplikado ha ira pati na ha ngatanan nga surugoon han Dios: “Buhata an buruhaton han ebanghelisador, bug-os nga tumana an imo sagrado nga buruhaton.” (2 Tim. 4:5) An sugo nga isangyaw an mensahe han Ginhadian ngan manhimo hin mga disipulo aplikado ha ngatanan nga Kristiano diin man hira naukoy. Ngan bisan ha aton kongregasyon, masusubad naton an mga misyonero ha damu nga paagi.

Pananglitan, kon nabalhin an mga misyonero ha iba nga nasud, naiiba gud an mga butang kay ha ira nahiaraan, salit kinahanglan nira magpahiuyon ha bag-o nga mga kahimtang. Damu nga butang ha iya bag-o nga toka an naiiba gud. Ano man kon diri kita makakagboluntaryo ha lugar nga mas daku an panginahanglan? Sadang ba kita maghunahuna nga kabisado na naton an ngatanan ha aton teritoryo? O puydi ba nga sarihan naton an bag-o nga mga paagi ha pagsangyaw? Pananglitan, han 1940, an mga kabugtoan gin-aghat nga maggahin hin usa ka adlaw kada semana basi magsangyaw ha kalsada. Puydi mo ba liwat ito sarihan? Kumusta man an pagsangyaw gamit an mga cart nga may displey nga literatura? An punto amo ini: Nahunahuna mo na ba nga sarihan an sugad nga mga paagi ha pagsangyaw han maopay nga sumat, mga paagi nga bangin bag-o ha imo?

Makakabulig liwat an pagin positibo basi magin madasigon ngan malipayon kita ha ministeryo. Kasagaran nga kwalipikado nga mga magwarali an nagbuboluntaryo ha lugar nga mas daku an panginahanglan o ha teritoryo nga may iba nga linggwahe. Salit daku gud an ira naibubulig ha mga kabugtoan, pananglitan kon nangunguna hira ha pagministeryo. Dugang pa, an mga misyonero kasagaran nga nangunguna ha mga buruhaton ha lokal nga kongregasyon tubtob nga may-ada na kwalipikado nga mga  brother. Kon usa ka nga brother, nagtatalinguha ka ba pagkab-ot o andam ka ba magserbi ha kabugtoan ha imo kongregasyon?—1 Tim. 3:1.

Labot la ha pagin madasigon ha pagministeryo ngan pagin andam ha pagtuman han mga responsabilidad ha kongregasyon, may iba pa nga paagi nga makakabulig kita ha aton kongregasyon. An ngatanan—batan-on o lagas, lalaki o babaye—mahimo magin “makaparig-on nga bulig” ha mga igkasi-tumuroo nga nanginginahanglan.—Col. 4:11, ftn.

Basi mabuligan naton an aton mga igkasi-tumuroo, kinahanglan kilalahon naton hira hin maopay. Ginsasagdonan kita han Biblia nga “tagan naton hin atensyon an usa kag usa” kon nagkakatirok kita. (Heb. 10:24) Ini nga mga pulong nagpapasabot nga kinahanglan naton makilala an aton kabugtoan ngan masabtan an ira mga panginahanglan pero diri kita nanginginlabot ha ira personal nga kinabuhi. Mahimo naton hira buligan ha emosyonal, espirituwal, ngan praktikal nga paagi. Tinuod, may mga panahon nga an mga tigurang ngan ministeryal nga surugoon an angayan nga bumulig. (Gal. 6:1) Pero kita ngatanan mahimo makabulig ha edaran na nga kabugtoan, o ha bug-os nga pamilya, nga may-ada problema.

Pananglitan, nagkaproblema ha pinansyal hi Salvatore salit iginbaligya niya an iya negosyo, balay, ngan damu nga panag-iya han iya pamilya. Nabaraka hiya kon paonan-o malalamposan han iya pamilya ito nga problema. Nahibaroan ito han usa nga pamilya nga iya kakongregasyon. Ginbuligan nira ha pinansyal hira Salvatore ngan an iya asawa pati na ha pamiling hin trabaho, ngan damu ka gab-i nga namati hira ngan gindasig an bug-os nga pamilya. Nagin duok nga magsangkay an duha nga pamilya ha sulod hin damu nga katuigan. Bisan pa han mga problema nga naeksperyensyahan nira hadto, malipayon gud ini nga duha nga pamilya kon nahinunumdoman nira an mga panahon nga nagbuligay hira.

An tinuod nga mga Kristiano diri nag-aalang pagsumat ha iba han ira mga gintotoohan. Sugad han ginbuhat ni Jesus, kinahanglan naton sumatan an ngatanan mahitungod han makalilipay nga mga saad ha Biblia. Makakagboluntaryo man kita o diri, makakagbuhat kita han aton pinakamaopay para ha ngatanan. Ngan mahihimo gud naton ito ha aton mismo kongregasyon yana. (Gal. 6:10) Kon bubuhaton naton ini, maieksperyensyahan naton an kalipay tungod han paghatag ngan mabubuligan kita nga ‘mamunga ha tagsa nga maopay nga buhat.’—Col. 1:10; Buh. 20:35.