YESU mkanajawule kwinani, ŵasalile ŵakumkuya ŵakwe kuti, “Cimciŵa mboni syangu . . . mpaka kumbesi kwa cilambo capasi.” (Mase. 1:8) Ana Aklistu ŵandandaŵa akakombwele catuli kulalicila pacilambo cosope capasi?

Jwakwiganya jwine ku Yunifesite ja Oxford, lina lyakwe Martin Goodman ŵasasile kuti, “Mu ulamusi waciloma, Aklistu ŵalekanganaga ni ŵandu ŵadini sine, kupwatikapo Ayuda ligongo lyakuti ŵakamulaga masengo gakulalicila.” Ndaŵi jamunyuma, Yesu ŵajesile m’malo gakulekanganalekangana acilalicilaga ngani syambone. Aklistu ŵasyesyene ŵasosekwaga kuya cisyasyo cakweci mwakulalicila “ngani syambone syakwamba ya Ucimwene” kulikose kuti ŵapate ŵandu ŵakusaka kumanyilila usyesyene. (Luk. 4:43) Paligongo lyeleli mumpingo wa Aklistu ŵandanda mwapali “ŵandumetume” ŵaŵalalicilaga ngani syambone. (Maliko 3:14) Yesu ŵalamwile ŵakumkuya ŵakwe kuti ‘ajawule, akajiganye ŵandu ŵangosyo syosope.’—Mat. 28:18-20.

Moŵa agano pangalisoni ŵandumetume 12 ŵa Yesu pacilambo capasi pano, nambo pana ŵakutumicila ŵa Yehofa ŵajinji ŵakujigalila cisyasyo cawo pangani jakulalicila. Jemanjaji paŵilanjikwe kuti akatumicile kwakukusosekwa ŵakulalicila ŵajinji, akusajanga kuti, “Une apano! Andumisye!” (Yes. 6:8) Aklistu ŵajinji ŵapite kukutumicila m’yilambo yine panyuma pakumalisya majiganyo gawo ku sukulu ja Gileadi. Ŵane ŵapite kukutumicila m’mikuli jine m’cilambo cakumangwawo peco. Aklistu ŵanesoni alijiganyisye ciŵeceto cine kuti akamucisyeje mipingo soni makuga ga ciŵecetoco. Komboleka kuti yaliji yakusawusya kuti abale ni alongoŵa akombole kusamila kumalo kwakukusosecela ŵakulalicila ŵajinji kapena alijiganye ciŵeceto cine. Nambope, jemanjaji ŵaliji ŵakusacilila kulijima yindu yine pakusaka kulosya kuti  akusamnonyela Yehofa soni ŵandu. Panyuma pakosecela cenene, jemanjaji ŵalipelece kuti akakamucisye ŵandu ŵane. (Luk. 14:28-30) Yakutenda abale ni alongo ŵeleŵa yikukamucisya mnope m’mikuli jejinji.

Ngaŵa abale ni alongo wosope ŵampaka akombole kusamila kumalo kwakukusosecela ŵakulalicila ŵajinji kapena kulijiganya ciŵeceto cine ligongo lyakuti yakutendekwa paumi wetu yikusaŵa yakulekanganalekangana. Nambope, wosope mpaka tukombole kuŵa mpela amishonale mumpingo mwetu pemo.

Aklistu ŵa mu yaka 100 yandanda ŵaliji ŵamtawu pamasengo gakulalicila atamose kuti ŵajinji mwa jemanjajo ŵatamaga m’misinda jakumangwawo soni nganaŵa amishonale. Nambope yaŵasasile Paulo kwa Timoteyo, yakamulaga masengo kwa Aklistuwo soni yikusakamula masengo kwa ŵakutumicila ŵa Mlungu wosope lelojino. Jwalakwe ŵatite, “Mkamule masengo ga jwakulalicila, soni mkwanilisye mbali syosope sya undumetume wenu.” (2 Tim. 4:5) Aklistu wosope akusosekwa kutenda masengo gaŵatulamwile Yesu kuti tulalicile ngani syambone soni kwajiganya ŵandu. Konjecesya pelepa, atamose mumpingo mwetu, mwana masengo gejinji gakulandana ni ga amishonale gampaka tutende.

Mwambone, mmishonale pasamile m’cilambo cine akusasosekwa kutenda yiliyose yakomboleka kuti asyoŵelele yindu ya m’cilamboco. Nambi wuli naga nganituŵa tukombwele kusamila kumalo kwakusosecela ŵakulalicila ŵajinji? Ana mpaka tupate matala gane gakwalalicilila ŵandu? Mwambone, mu 1940, likuga lya Mlungu lyalimbikasyaga abale kuti asagule lisiku limo pa cijuma kuti alalicileje m’misewu. Ana nombenawo mpaka alinje kutenda yeleyi? Nambi wuli kulinga kulalicila pakamulicisya masengo kashelefu ka mabuku? Ngani jekulungwa jili jakuti, ana ali ŵakusacilila kulinga kamulicisya masengo matala gasambano gakulalicilila ngani syambone?

Kola nganisyo syambone mpaka kutukamucisye kuti tulalicileje mwamtawu. Ndaŵi syejinji, abale ni alongo ŵakuŵajilwa ni ŵakusasamila ku malo kwakukusosecela ŵakulalicila ŵajinji kapena kutumicila mumkuli wa ciŵeceto cine. Jemanjaji akusakamucisya mnope pampingo. Mwambone, akusakamucisya mnope pakulongolela masengo gakulalicila. Amishonale akusalongolelasoni mumpingo mpaka pandaŵi jele abale ŵakukokowo aŵajilwe kulongolela. Naga  wawojo ali m’bale jwam’batiswe, ana ‘akulingalinga’ kutenda yakomboleka kuti aŵajilwe kwatumicila abale ni alongo mumpingo mwawo mwakuŵa jwakutumicila jwakamucisya kapena jwamkulungwa jwamumpingo?—1 Tim. 3:1.

Konjecesya pa kujigala nawo mbali pakulalicila soni kulingalinga kuti akole maukumu mumpingo, panasoni mbali sine syampaka atende. Jwalijose mumpingo cinga jwacikulile kapena jwacinandipile, m’bale kapena mlongo, mpaka ŵalimbikasye ŵakulambila acimjakwe.—Akolo. 4:11.

Kuti tukomboleceje kwakamucisya Aklistu acimjetu, tukusasosekwa kwamanyilila cenene. Baibulo jikusatulimbikasya kuti ‘tuganicisyaneje’ patusongene pampepe. (Ahe. 10:24) Yeleyi ngayikugopolela kuti tukoleje lung’wanu wakumanyilila cilicose cakwayana ni ŵandu ŵane. Nambo yikugopolela kuti twapikanicisyeje acimjetuwo soni tumanyilileje yindu yakusosecela. Jemanjaji mpaka asosekwe kwakamucisya kutenda yindu yine, kwakamucisya nganisyo, soni kwalimbikasya ni Malemba. Yili yisyene kuti pana yakutendekwa yine yele acakulungwa ŵamumpingo kapena ŵakutumicila ŵakamucisyape ni ŵampaka asosekwe kumkamucisya Mklistu mjetu. (Aga. 6:1) Nambope, wosope tukwete ukumu wakwakamucisyasoni abale ni alongo ŵacikulile, kapena maŵasa gane gagakusimana ni yakusawusya.

Mwambone, pandaŵi jine Salvatore ŵatandite kulajilila kupata mbiya, mwati ŵasosekwaga kusumisya bisinesi jakwe, nyumba jakwe, soni yindu yine yejinji yaŵakwete. Liŵasa line mumpingo mwawo lyamanyilile yeleyi. M’yoyo, lyampele Salvatore mbiya, lyamkamucisye jwalakwe ni ŵamkwakwe kupata masengo, soni lyakungulukaga ni liŵasa lyakwe ndaŵi ni katema ni kwalimbikasyaga. Maŵasa gaŵiliga gaŵele gali pa unasi wambone kwa yaka yejinji. Apano maŵasaga gakusasangalala kuganicisya mwaŵatendele pakamusyangana pandaŵi jakusawusyajo.

Aklistu ŵasyesyene ngakusatenda sooni kwasalila ŵane yakusakulupilila. Tukusosekwa kuya cisyasyo ca Yesu mwakwamanyisya ŵandu wosope ya yindu yambone yaŵatulajisye Mlungu. Cinga mpaka tukombole kusamila kumalo kwakukusosecela ŵakulalicila ŵajinji kapena iyayi, nambo wosope mpaka tukombole kwakamucisya ŵane mumpingo mwetu. (Aga. 6:10) Patukwapa ŵane yindu yetu, tuciŵa ŵakusangalala soni tucijendelecela ‘kuŵeleka yisogosi m’masengo galigose gambone.’—Akolo. 1:10; Mase. 20:35.