Pustaka si Badia tuhu-tuhu la seri ras Kitab Suci si deban. Pustaka si Badia nggo mpengaruhi kegeluhen enterem jelma mbarenda nari seh asa gundari. Janah, Pustaka si Badia ngenca buku si rusurna ipelajari ras ipermasalahken.

Contohna, piga-piga sarjana la tek adi Pustaka si Badia si ipake gundari seri ras Pustaka si asli. Sekalak profesor agama ngatakenca, ”La sieteh nggo nge siterjemahken teks si asli alu tepat dingen benar ntah lang. Si pasti, terjemahen si lit gundari dem alu kesalahen. Buen Pustaka si gundari iban ratusen tahun kenca Pustaka si asli isuratken. Janah, lit ka ribun perubahen i bas Pustaka si gundari.”

Erkiteken latar belakangna, enterem kalak la tek adi Pustaka e asli denga. Contohna, Faizal, ia iajari keluargana si labo kalak Kristen, adi Pustaka e Kitab Suci si nggo iubah. Nina, ”Adi lit kalak nuriken Pustaka si Badia man bangku, mis aku la tek erkiteken Pustakana lanai asli. Enggo iubah!”

Jadi masalah nge adi Pustaka si Badia e nggo iubah ntah lang? Ukuri: Banci nge kam tek man janji Pustaka si Badia kerna wari si pepagi adi la ietehndu lit ntah lang janji e i bas Pustaka si asli? (Roma 15:4) Nggit nge kam makeken pedah Pustaka si Badia sanga erban keputusen penting kerna pendahin, keluarga, ntah pe ibadatndu adi isina nggo iubah?

Aminna pe buku-buku si asli si lit i bas Pustaka nggo bene, banci sipereksa salinen si nai—termasuk ribun manuskrip (naskah) Pustaka. Uga maka naskah e lit denga aminna gia banci ceda, rusur itentang, ras melala usaha guna ngubah isina? Erkiteken Pustaka tetap lit, tek nge kam adi isina e seri denga ras si asli? Mari sipelajari sejarahna si dem alu tentangen.