Ese pwal wor eú puken lamalam epwe léllé ngeni ewe Paipel. Ese pwal wor eú puk me lúkún Paipel a fen anapanapa lúkúen chómmóng aramas ren fite fite ier. Nge pwal ina ewe puk a nóm fán watteen esiit me án aramas etittin.

Áwewe chék, ekkóch sou káé ra tipemwaramwar ika aramas repwe tongeni lúkúlúk ika masouen ekkewe kapiin Paipel iei me ewe popun makken Paipel mi lélléfengen. Iei alon emén professor lón pekin káé usun lamalam: “Sise fókkun tongeni lúkúlúk ika minne a mak lón Paipel iei mi fókkun léllé ngeni ekkewe popun makken Paipel.” A pwal apasa: “Mi nóm rech ekkewe chék kapiin Paipel mi chómmóng mwáállin lón me lap ngeniir ra ffér fitepúkú ier mwirin an a mak ewe popun makken Paipel. Ekkena kapi me ewe popun makken Paipel rese léllé wóón sókkopaten mettóch.”

Pokiten met ekkóch aramas ra pwisin lúkú lón ar lamalam, iir ra tipemwaramwar ika ewe Paipel a pop seni Kot. Áwewe chék, emén itan Faizal, an we famili esap iir Chón Kraist ra áiti ngeni pwe ewe Paipel eú puk mi pin nge aramas ra fen siwili. Iwe Faizal a erá: “Pokiten ena, ua ekis ekiekingaw fiti tipemwaramwar lupwen aramas ra mochen fós ngeniei usun ewe Paipel.” A pwal erá: “Pún met lamotan, nge ese nóm rer ewe popun makken Paipel. A fen siwil!”

Nge met, mi lamot ach sipwe silei ika Paipel a fen siwil are ese? Iwe, ekieki mwo ekkeei kapas eis: Ka tongeni lúkúlúk wóón án Paipel kewe pwon mi oururukich usun mwachkkan, ika kese silei ika iir mi wesewesen nóm lón ekkewe popun Paipel? (Rom 15:4) Ika pwe ekkewe mineféén Paipel, iir chék kapiin Paipel mi wor mwáállin lón, iwe kopwe lúkúlúk wóón ar kewe kapasen emmwen fansoun kopwe féri eú kefil mi lamot usun óm angang, famili are fel ngeni Kot?

Inaamwo ika ekkewe popun makken Paipel ra fen móróló, nge sia tongeni etittina ekkewe kapiin minen lóóm lóóm, kapachelong fitengeréú kapiin kinikinin lón Paipel ra makkeei ren péúr. Ifa usun ekkena kapiin Paipel rese móróló inaamwo ika a tatakkisiló ekkewe taropwe ra mak lón, a wor angangen ú ngeni, me ekkóch aramas ra sótun siwili masouan? Ifa usun pwóróusen án ewe Paipel nómofócheló a apéchékkúla óm lúkúlúk wóón ewe Paipel ka néúnéú lón ei fansoun? Sipwe ppii pélúwen ekkena kapas eis lón ekkewe lesen mwirin ei.