SANEYITSO LƐ MLITSƆƆMƆ | BIBLIA LƐ—ENYƐ EHI SHI KƐBASHI ŊMƐNƐ
Sane Ko ni He Hiaa Waa
Esoro Biblia lɛ yɛ jamɔ woji fɛɛ he. Wolo ko bɛ ni ená nibii ni mɛi babaoo heɔ amɛyeɔ lɛ nɔ hewalɛ yɛ be kpalaŋŋ mli tamɔ Biblia lɛ. Kɛfata he lɛ, wolo ko bɛ ni atao ehe saji babaoo ní awie ashi hu tamɔ Biblia lɛ.
Akɛ nɔkwɛmɔnɔ lɛ, woloŋlelɔi komɛi susuɔ akɛ esoro Bibliai ni yɔɔ ŋmɛnɛ lɛ yɛ blema nɔ lɛ he. Woloŋlelɔ kpanaa ko ni kaseɔ jamɔ he nii lɛ kɛɛ akɛ, ‘Wɔnyɛŋ wɔná nɔmimaa akɛ bɔ ni wɔtsɔɔ blema Bibliai lɛ shishi wɔhã lɛ ja. Bibliai ni wɔyɔɔ ŋmɛnɛ lɛ amli eyi tɔ kɛ tɔmɔi sɔŋŋ, ni tɔmɔi nɛɛ ba akɛni atsake blema Biblia lɛ hiɛ afii ohai komɛi ni eho nɛ lɛ hewɔ, ni enɛ ehã esoro Bibliai ni yɔɔ ŋmɛnɛ lɛ yɛ gbɛi srɔtoi babaoo nɔ.’
Mɛi krokomɛi hu heee yeee akɛ Biblia lɛ ja, yɛ jamɔ mli ni amɛyɔɔ lɛ hewɔ. Akɛ nɔkwɛmɔnɔ lɛ, nuu ko ni atsɛɔ lɛ Faizal ni fɔlɔi jeee Kristofoi lɛ tsɔɔ lɛ akɛ, Biblia lɛ ji wolo ko ni yɔɔ krɔŋkrɔŋ, shi atsake emli wiemɔi lɛ ekomɛi. Faizal wie akɛ: ‘Enɛ hewɔ lɛ, bei pii kɛ́ mɛi ka akɛ amɛ kɛ mi baagba Biblia lɛ he sane lɛ, miyiŋ etɛ̃ɛɛ mi. Nɔ hewɔ ji akɛ, jeee blema Biblia lɛ amɛhiɛ lɛ. Esoro nɔ ni amɛhiɛ lɛ yɛ blema nɔ lɛ he!’
Kɛ́ atsake Biblia lɛ jio, atsakeko lɛ jio lɛ, ani esa akɛ egba wɔnaa? Bo lɛ susumɔ sanebimɔi nɛɛ ahe okwɛ: Ani obaanyɛ okɛ ohiɛ afɔ̃ shiwoi ni shɛjeɔ mɔ mii ni yɔɔ Biblia lɛ mli lɛ anɔ kɛ́ obɛ nɔmimaa akɛ shiwoi nɛɛ yɛ blema Biblia lɛ mli? (Romabii 15:4) Eji Bibliai ni wɔyɔɔ ŋmɛnɛ lɛ ji Bibliai ni adesai ŋmala ni mli eyi tɔ kɛ tɔmɔi kulɛ, ani okɛ Biblia mli shishitoo mlai baatsu nii kɛ́ ookpɛ yiŋ ko ni he hiaa waa yɛ nitsumɔ, weku, loo jamɔ he?
Eyɛ mli akɛ ŋmɛnɛ lɛ, wɔbɛ blema Biblia mli woji lɛ diɛŋtsɛ moŋ, shi wɔbaanyɛ wɔtao nii amli kɛjɛ blema niŋmai ni etsɛ waa lɛ amli—ni Bibliai ni akɛ niji ŋmala lɛ babaoo hu po fata he. Te fee tɛŋŋ ni woji ni akɛ niji ŋmala nɛɛ enyɛ ehi shi kɛbashi ŋmɛnɛ yɛ fitemɔ, shiteekɛwoo, kɛ mɔdɛŋ ni abɔ akɛ abaatsake emli wiemɔi lɛ fɛɛ sɛɛ lɛ? Mɛɛ gbɛ nɔ bɔ ni Biblia lɛ enyɛ ehi shi kɛbashi bianɛ lɛ baanyɛ awaje hekɛnɔfɔɔ ni oyɔɔ yɛ bɔ ni Biblia lɛ ja hã lɛ mli? Kwɛmɔ bɔ ni ahã sanebimɔi nɛɛ hetoo yɛ saji ni nyiɛ sɛɛ ni tsɔɔ bɔ ni fee ni Biblia lɛ enyɛ ehi shi kɛbashi ŋmɛnɛ lɛ amli.
