Ang Biblia lain gid sa iban nga balasahon parte sa relihion. Wala na sing iban nga libro nga nakaimpluwensia sa pagpati sang madamo nga tawo sa sulod sang malawig nga tion. Sa pihak nga bahin, wala man sing iban pa nga libro nga ginatun-an sing maayo kag ginapangitaan sing sala sang mga eksperto.

Halimbawa, ginaduhaduhaan sang iban nga iskolar kon bala ang aton Biblia subong pareho gid sa orihinal nga mga sinulatan. “Indi naton masiguro kon bala eksakto gid sa orihinal ang aton nahimo,” siling sang isa ka propesor parte sa pagtuon sa mga relihion. “Ang mga kopya naton subong madamo sing sala, kag ang kalabanan sini ginkopya pila ka gatos ka tuig sa tapos nasulat ang orihinal kag madamo na gid ini sing kinalain.”

Ginaduhaduhaan man sang iban kon bala matuod gid ang Biblia bangod sa gintudlo sang ila relihion. Halimbawa, gintudluan si Faizal sang iya indi Cristiano nga pamilya nga ang Biblia balaan nga libro pero indi na ini pareho sa orihinal. “Gani, daw indi gid ako magpati kon may mag-istorya sa akon parte sa Biblia,” siling niya. “Isa pa, indi na orihinal ang ila Biblia. Ginbag-o na ini!”

Ngaa importante nga mabal-an naton kon bala may ginbag-o sa Biblia? Ti, binagbinaga ini nga mga pamangkot: Masaligan mo ayhan ang makapaumpaw nga mga promisa sang Biblia para sa palaabuton kon indi ka sigurado nga ini nga mga promisa ara gid man sa orihinal nga sinulatan? (Roma 15:4) Sundon mo bala ang mga prinsipio sa Biblia kon nagahimo ka sing importante nga desisyon parte sa imo trabaho, pamilya, kag pagsimba kon ang Biblia subong ginkopya man lang gali sang mga tawo kag madamo sing sala?

Bisan pa wala na ang orihinal nga mga libro sang Biblia, mausisa naton ang daan nga mga kopya, pati ang linibo ka manuskrito sini. * Paano nakalab-ot sa aton ini nga mga manuskrito bisan pa nagakadunot ini, ginpamatukan, kag gintinguhaan nga islan ang mensahe sini? Paano ini makapabakod sang imo pagpati nga masaligan mo gid ang imo Biblia subong? Hibalua ang sabat sa masunod nga istorya kon paano nakalab-ot sa aton ang Biblia.