Ti Piipel is anerste wii anere relichyeese piicher. Khee een anere puuch hot te klaape fon soo fiile layt iwer soo een lang tsayt petrof. Uf te aner sayt, kepts khee puuch woo soo fiil unersuucht un kritikiirt woer is, wii ti Piipel.

Tsum payxpiil, etliche xtutiirte layt saan tas ti Piipel soo wii mer se hayt hon, weyer fon te orixinaale Xrifte net richtich ap kexrip woer. Eene leerer fon relichyoon fon te uniwersiteet saat: “Tas is soo: meyer wise net, op ti orxinaale tekste richtich rekuperiirt woer sin. Meyer hon ploos ap kexripne tekste kefun, woo fol mit feeler sin, un ti meyeste sin hunerte yoere noo te orxinaale tekste kemacht woer. Un noch, khan sin, tas es tausente unerxiite kept, tswixich ti orxinaale tekste un tii woo ap kexrip woer sin.”

Fer anere layt is es weeche sayn relichyoon xweyer, aan se nëme tas ti Piipel een orixinaal pexeet fon Kot is. Kuk Faizal sayn payxpiil. Tee is net in een kristlich familye kewakst. Tee hot kelërnt, tas ti Piipel een haylich puuch is, awer tas tii keënert woer is. Eyer saat: “Imer wën yemant mit meer iwer ti Piipel xpreche wolt, hon ich net aan tas keklaapt, wayl niimant hot ti orixinaal xrift fon te Piipel, tii is keënert woer!”

Machts een unerxiit se wise ep ti Piipel keënert woer is? Tenk aan tas: Ti Piipel hot xeene ferxpreche fer te futuer. Teest tuu aan tiise ferxpreche klaape, oone ti sicherheet hon, tas tii im orixinaale tekst waare? (Romanos 15:4) Wën ti Piipel ferkheert ap kexrip sol sin, teets tuu tëne sayn aanreete penutse fer entxluse mache, in te aarwayt, in te familye orer in te aanpeetung?

Is woer tas ti orixinaale tekste fon te Piipel ferxwun sin, awer es kept fiile aarich alte aapxrifte un too tepay sin tausente hantsxrifte. a Wii hon ti ap kexripne Xrifte ti efekte fon te tsayt, fon te yachtung un fon te fersuuchung fer ti tekste se ënere, aus kehal? Tas se wise, khan tich helfe ti sicherheet hon, tas ti Piipel, soo wii mer se hayt hon, Kot sayn orixinaal pexeet is. In te neekste artikele, lees ti wunerlich kexicht fer se wise was fer khëmpf ti Piipel mit kemacht hot.