Ombeibela ondi ri embo rapeke momambo ayehe nge notjiṋa nozongamburiro. Kape nembo rarwe nde kurisa ongamburiro yovengi oure woruveze orure nao. Nu wina kape nembo rarwe nda konḓononwa nokukwekururwa tjinene.

Otjotjihorera, ovakonḓonone tjiva kave nongamburiro kutja Ozombeibela zanambano za tjangwa otja komatjangwa inga omatenga. Oprofessor imwe ndje rihonga ohunga nozongamburiro ya tja: “Eṱe katutjiwa nawa kutja twa yarura po omatjangwa inga omatenga otja tji ya ri. Omatjangwa nge ri po mu nozondataiziro ozengi, nowo tji ya tjangwa pa kapita ozombura ozengi okuza komatjangwa inga omatenga nu ya panguka momiano omingi.”

Varwe kave kambura mouatjiri wOmbeibela mena rozongamburiro ku vaza. Otjotjihorera, Faizal wa raerwa i yovandu veṱunḓu re mbe ha ri Ovakriste kutja Ombeibela embo eyapuke nungwari nda rundururwa. Eye wa tja: “Ami hee vanga okupuratena nawa indu ovandu tjaa ve vanga okuhungira kuna ami ohunga nOmbeibela. Kombanda yanao owo kava ri nOmbeibela indji onguru, indji ndji va ri na yo ya rundururwa.”

Hapo Ombeibela ya rundururwa poo indee? Tara komapuriro nga: Hapo mo yenene okukara nongamburiro momakwizikiro wOmbeibela woruyaveze ndoovazu ko nokutjiwa kutja omakwizikiro ngo ya ri momatjangwa inga omatenga? (Ovaroma 15:4) Hapo mape ya o ungurisa omirari vyOmbeibela okutwa po ozondando ozonanḓengu ohunga noviungura, eṱunḓu, poo omerikotameneno ndoovazu ozOmbeibela zanambano ze nozondataiziro nḓa tjitwa i ovandu?

Nandarire kutja omambo wOmbeibela ingo omatengatenga ya zenga poo kaye munikwa rukwao, matu yenene okutara komatjangwa omakuru nga tjangururwa. Nu wina matu yenene okumuna otupa otuingi twOmbeibela tu tu munikwa ndino. Hapo pe ya vi omatjangwa ngo aye ha kurupa, aye ha nyonwa nu aye ha rundururwa? Omuano mu ya tuurunga mau kurisa vi ongamburiro yoye mouatjiri wOmbeibela ndji u na yo ndino? Omaziriro komapuriro ngo maye zirwa motupa tu matu kongorere ko.