Nawku htung hte seng ai laili laika ni hta, Chyum Laika gaw laklai htum re. Labau hta, masha law law a makam masham hpe hkrang shachyaw ya lu ai laika buk hpe madun u ngu tsun jang, Chyum Laika hta lai nna kaga laika buk n nga ai. Chyum Laika buk gaw masha law law hti dik htum hte tsun hkrum dik htum laika buk mung re.

Ga shadawn, chyum hpaji du nkau mi gaw, ya na Chyum Laika ni gaw lata hte ka wa ai madung laika hte maren rai na kun? ngu nna ntsen ai myit nga ai. “Madung ka da ai hte maren tup hkrak ga gale da ai kun? ngu ai hpe atsawm n chye lu ai. Anhte lu da ai gaw shut ai lam law law lawm ai lata hte ka da ai laika ni re. Dai zawn lata hte ka ai laika law malawng gaw, madung Chyum Laika ni ka ngut nna shaning tsa lam hku na yang she ka wa ai majaw, madung laika hte ram ram shai nga na re” ngu nna nawku htung hte seng ai hpaji du langai tsun ai.

Nkau mi chyawm gaw shanhte a nawku htung shingdu labau a majaw, Chyum Laika a tup hkrak tengman ai lam hpe ntsen ai myit nga ai. Ga shadawn, Chyum Laika gaw chyoi pra ai laika buk raitim, dai hta lawm ai lam ni galai shai mat sai ngu nna, Hpai Ze ngu ai wa hpe Hkristan n re ai nta masha ni sharin ya ai. “Dai majaw ngai hpe masha ni Chyum Laika lam tsun ai shaloi n kam mat sai.” “Shanhte hta nga ai gaw madung Chyum Laika n re ai. Galai shai mat sai” ngu nna shi tsun ai.

Chyum Laika hta lawm ai lam ni galai shai ai, n galai shai ai hpe chye na matu ahkyak ai kun? Ndai ga san ni hpe dinglik yu u: Htawm hpang hte seng ai Chyum Laika ga sadi ni gaw, madung Chyum Laika hta lawm ai, n lawm ai hpe atsawm n chye jang, shalan shabran lam jaw ai dai ga sadi ni hpe nang kam na kun? (Roma 15:4) Ya aten na Chyum Laika ni hpe masha ni bai ka da nna, shut ai lam mung lawm ai laika buk rai jang, bungli, kun dinghku, nawku daw jau lam ni zawn grai ahkyak ai dawdan lam ni jahkrat ai shaloi, Chyum Laika lam matsun ni hpe hkan sa na kun?

Madung Chyum Laika ni mat mat sai raitim, hkying hku law ai lata hte ka da ai Chyum Laika hte hpawn, moi na lata hte ka da ai laika ni hpe shingdaw yu mai ai. Moi na lata hte ka da ai laika ni gaw tsam mat ai lam, ninghkap ai lam, ga si galai shai na matu shakut ai lam ni a lapran gara hku matut grin wa ai kun? Dai zawn grin wa ai majaw, ya aten lang nga ai Chyum Laika buk a tup hkrak tengman ai lam hpe kam na matu, gara hku karum ya ai kun? Mahtai hpe chye na matu, hpang na sumhpa ni kaw lawm ai myit lawm hpa labau hpe hkaja yu u.