Vai ĩvuku yĩngĩ ya ndĩni yĩilyĩ ta Mbivilia. O na kwa ĩvinda ĩasa no Mbivilia yoka ĩtetheesye andũ aingĩ makethĩwa na mũĩkĩĩo mũlũmu. Vai ĩvuku yĩngĩ andũ maaendeew’a nĩ kũyĩsoma ta Mbivilia na yaaneenewa naĩ ta Mbivilia.

Kwa ngelekany’o, asomi amwe monaa Mbivilia ila twĩ nasyo ite sya kwĩkwatw’a nũndũ maandĩko ala me vo ti mo ala maandĩkiwe nĩ aandĩki ma Mbivilia. Mũsomi ũmwe wa maũndũ ma ndĩni aĩtye atĩĩ: “Tũitonya kwĩthĩwa na mũĩkĩĩo kana maũndũ ala maandĩkĩtwe Mbivilianĩ maumĩĩiw’e nesa kuma mavukunĩ ala maĩ ma mbee vyũ.” Aendeee kwasya, “Maandĩko ala twĩ namo me mavĩtyo maingĩ, na maingĩ ma mo maandĩkiwe myaka mingĩ mũno aandĩki ma Mbivilia maminie kũandĩka, na kwoou me kĩvathũkany’o kĩnene mũno na mavuku asu maandĩkĩtwe mbee.”

Andũ angĩ nĩmethĩawa na nzika ĩũlũ wa maũndũ ala me Mbivilianĩ nũndũ wa maũndũ ma ndĩni ala mamanyĩĩtw’e. Kwa ngelekany’o, mũndũũme wĩtawa Faizal amanyĩiw’e nĩ asyai make ala mataĩ Aklĩsto kana Mbivilia nĩ ĩvuku ĩtheu ĩndĩ nĩyavĩndũiwe na ti ũndũ yailyĩ mwambĩĩonĩ. Faizal aĩtye atĩĩ: “Ũndũ ũsu nĩwatumaa nĩthĩwa na nzika ĩla mũndũ wambĩĩa kũneena nakwa ĩũlũ wa Mbivilia.” Eekaa ũu nũndũ asũanĩaa kana Mbivilia nĩyavĩndũiwe, na ti ũndũ yailyĩ mwambĩĩonĩ!

W’o nĩ ũndũ wa vata kũmanya kana Mbivilia ĩilyĩ ũndũ yailyĩ mwambĩĩonĩ kana nĩyavĩndũiwe? Nĩ kana tũmanye kana nĩ ũndũ wa vata, kwasũanĩa makũlyo aa: We no ũĩkĩĩe maũndũ maseo ala mathanĩtwe Mbivilianĩ ethĩwa ndwĩsĩ kana mawathani asu maĩ amwe katĩ wa ndeto ila Yeova waneenie? (Alomi 15:4) No ũtũmĩe mĩao ĩla yĩ Mbivilianĩ ĩla ũkwĩka motwi maito ĩũlũ wa wĩa, maũndũ ma mũsyĩ, kana ũthaithi, ethĩwa Mbivilia ila twĩ nasyo syĩ mavĩtyo maingĩ na ti Ndeto ya Ngai?

O na kau mavuku ma mbee ala maandĩkiwe nĩ aandĩki ma Mbivilia nĩmathelile, no tũkwate mavuku ma tene ala maumĩĩiw’e kumana na mavuku asu, o vamwe na mavuku ngili mbingĩ ma tene ala matũmĩawa kũalyũla Mbivilia. Kweethĩiwe ata mavuku asu ma tene maema kwoa, kwanangwa, na andũ maema kũvĩndũa kĩla kyaandĩkĩtwe nthĩnĩ? Kwĩthĩwa Mbivilia ĩtaanangwa nĩ syĩndũ isu syonthe kwĩtũĩkĩĩthya ata kana Mbivilia ila twĩ nasyo nĩ sya w’o? Soma ĩkaseti yĩĩ nĩ kana ũkwate mosũngĩo ma makũlyo asu.