Di tudu kes livru sagradu, ka ten ninhun ki ta konpara ku Bíblia. Ka ten ninhun otu livru ki influensia krénsas di txeu algen duránti monti ténpu. Má tanbê, ka ten ninhun otu livru ki más kritikadu i investigadu.

Pur izénplu, alguns studiozu ta fla ma Bíblia ki nu ta uza oji é ka un kópia ki nu pode kunfia na el, sima kes skritura orijinal. Un profesor di universidadi ki ta studa relijion fla: “Nu ka ta konsigi ten sertéza si nu konsigi rekupera kel testu orijinal di manera izatu. Nu ten sô kópias ku txeu éru, i kuazi tudu es fazedu txeu ténpu dipôs di kes testu orijinal. Tanbê, talvês ten milharis di diferénsa entri kes kópia i kes orijinal.”

Otus algen, pamodi ses relijion, ka ta konsigi kridita ma Bíblia é mensaji orijinal di Deus. Pur izénplu, odja kuzê ki kontise ku Faizal, ki kriadu na un família ki ka éra kriston. El prende ma Bíblia é un livru sagradu, má ki mudadu. El fla: “Sénpri ki un algen krê papiaba ku mi sobri Bíblia, N ta fikaba ku un pé atras, afinal ningen ka ten kel Bíblia orijinal. El mudadu!”

Ta faze diferénsa sabe ô nau si Bíblia mudadu? Pensa na kel-li: Bíblia ten promésas sábi pa futuru. Bu ta kunfiaba na kes promésa li si bu ka tinha sertéza ma es staba na testu orijinal? (Romanos 15:4 ) Imajina ma Bíblia sta ku txeu éru ki es faze timenti es staba ta kopia-l. Bu ta uzaba se konsedjus pa djuda-u toma disizon sobri trabadju, família i manera ki bu ta adora Deus?

É verdadi ki kes skritura orijinal di Bíblia dizaparse. Má inda ta izisti txeu kópia, ki ta inklui milharis di kes kópia más antigu di Bíblia. Modi ki kes kópia konsigi txiga ti nos sikrê dja pasa txeu ténpu, sikrê ku pirsigison i ku pesoas ta tenta muda kel testu? É inportanti sabe kel-li, pamodi el pode djuda-u ten kunfiansa ma kel Bíblia ki bu sta uza oji é mensaji orijinal di Deus. Na kes otu artigu, bu sta ben lé sobri modi ki Bíblia txiga ti nos ténpu.