Ombiibeli embo le likalekelwa mokati komambo makwao opalongelokalunga. Olo ashike embo la dula okulundulula eitavelo lovanhu omamiliyona momukokomoko womido dihapu. Shimwe vali, olo alike embo la konakonwa noukeka nonande ohali kembaulwa.

Pashihopaenenwa, ovahongwanhu vamwe ova li va limbililwa shi na sha nEembiibeli dokunena ngeenge odi na ngoo ouyelele tau tu kumwe nomashangelo opehovelo. Omuprofesa umwe oo ha konakona oinima yopalongelokalunga okwa ti: “Katu na oushili ngeenge otwa tolokulula eshangelo lopehovelo li li mondjila. Otu na ashike eekopi dOmbiibeli odo di yadi omapuko, nomambo mahapu a tya ngaho okwa tolokwa a kufwa momashangelo opehovelo pa pita omido dihapu, nokwa yooloka ko kuwo meenghedi dihapu.”

Ovanhu vamwe omolwomalongelokalunga omo va putukila ova limbililwa ngeenge Ombiibeli oi li ngoo paushili. Pashihopaenenwa, Faizal okwa hongwa koukwaneumbo wavo oo uhe fi Ovakriste kutya Ombiibeli embo liyapuki, ashike ola kala nokulundululwa. Okwa ti: “Osho osha li sha ningifa nge ndi kale nda limbililwa ngeenge ovanhu va li va hala okupopya naame kombinga yOmbiibeli molwaashi kava li ve na ei yopehovelo, ova li ashike ve na oyo ya lundululwa.”

Nonande Ombiibeli oya kala nokulundululwa mbela oshi na ngoo oupyakadi? Diladila komapulo aa: Owe lineekela ngoo momaxunganeko Ombiibeli oo taa hekeleke e na sha nonakwiiwa nonande ku shi shii ngeenge omaxunganeko oo okwa li meshangelo lopehovelo? (Ovaroma 15:4) Mbela oto ka longifa ngoo omafinamhango Ombiibeli u ninge omatokolo a fimana e na sha noilonga, noukwaneumbo ile nelongelokalunga ngeenge Eembiibeli dokunena odi na omapuko oo a shangwa kovanhu?

Nonande omambo makulu opehovelo Ombiibeli kae ko vali, ohatu dulu okutala momashangelo mahapu onale Ombiibeli. Osha enda ngahelipi opo omashangelo a tya ngaho a xupe monghedi omo a li haa tuvikilwa, momapataneko nomokushangululwa kwao? Okuxupa kwomashangelo oo ongahelipi kwa pameka elineekelo loye li na sha noushili wOmbiibeli oyo u na kunena? Tala omanyamukulo omapulo oo moitukulwa tai shikula ko i na sha nokuxupa kwOmbiibeli.