Тʹӧ әʹдәбйәтәкә дьн йа религийайе, мина Кʹьтеба Пироз нинә. Нава зәманәки дьрежда, тʹәне Кʹьтеба Пироз ль сәр баԝәрийа гәләк мәрьва һʹӧкӧм буйә. Хенщи ве йәке, тʹӧ кʹьтебәкә дьн ӧса кʹур нәһатийә леколинкьрьне у пәйкʹәтьне, чаԝа Кʹьтеба Пироз.

Мәсәлә, һьнә зандар дӧдьли дьбьн у дьбежьн кӧ Кʹьтебед Пирозә модерн, нә мина ньвисаред орижинал ә. Зандарәк, йе кӧ леколина гәләк религийа дькә, ӧса дьбежә: «Әм нькарьн сәд-сәләфи бежьн, ԝәки мә текста орижинал рʹастә-рʹаст дәрбаз кьрийә. Щәм мә тәне әԝ копийед Кʹьтеба Пироз һәнә, йед кӧ бь шашийа тʹьжә нә. Паши ньвисандьна текста орижинал, ԛьрнә дәрбаз бун у гәләк копийед Кʹьтеба Пироз һатьнә ньвисандьне, ләма жи әв жь орижинале һʹәзар тьштада щӧдә нә».

Һьнә мәрьв жь бо религийа хԝә, рʹастийа Кʹьтеба Пироз дькьнә бьн шьке. Мәсәлә, Файзал дь малбәта нәмәсиһитида мәзьн буйә у әԝ һин кьрьнә, ԝәки Кʹьтеба Пироз жь Хԝәде йә, ле һатийә гӧһастьне. Әԝ дьбежә: «Чахе мәрьва дьхԝәстьн тʹәви мьн дәрһәԛа Кʹьтеба Пироз хәбәр дьн, әз тʹьме дькʹәтьмә шьке. Чьмки щәм ԝана Кʹьтеба Пирозә орижинал тʹӧнә бу».

Гәло мәрʹа йәк ә, кӧ Кʹьтеба Пироз һатийә гӧһастьне йан на? Һәла дәрһәԛа ван пьрса бьфькьрә: Тӧ дькари созед Кʹьтеба Пирозә дәрһәԛа ахьрийе баԝәр бьки, һәрге ньзани әв соз текста орижиналда һәбун йан на? (Рʹомайи 15:4) Тӧйе принсипед Кʹьтеба Пироз бьди хәбате, чахе тьштәки фәрз сафи дьки дәрһәԛа хәбате, малбәте, йан һʹәбандьне, һәрге дьфькьри кӧ Кʹьтеба Пирозә модерн нәрʹаст ә у ԝәки әԝ мәрьва ньвиси нә?

Рʹаст ә пʹьртукед Кʹьтеба Пирозә орижинал бәтавәбунә, ле әм дькарьн дина хԝә бьдьнә копийед кәвьн у ӧса жи бь һʹәзара манускриптед Кʹьтеба Пироз. Ле гәло чаԝа әв манускрипт һатьнә хԝәйкьрьне у гьһиштьнә мә, нә ахьр текста манускрипта дьхԝәстьн бьгӧһезьн, һьм жи манускрипт дькарьбу бьрʹьзийа у нава пәйкʹәтьнада кʹӧта буйа. Әԝ йәк кӧ әв манускрипт һатьнә хԝәйкьрьне, чаԝа итʹбарийа тә һьндава рʹастийа Кʹьтеба Пирозә модерн һе ԛәԝи дькә? Щаба ԝан пьрса тӧ дькари дь готаред дьнда бьвини.